by Webmaster | 27/11/2023 | Internashonal
Outoridatnan na Rusia ta buskando Andy Stone bosero di e kompania propietario di Facebook Meta. No tin klaridat di kiko Stone ta eksaktamente akusá, eksepto ku e ministerio di Asuntunan di Interior na Rusia a but’é riba su lista di personanan buská pa outoridatnan.
Ya lo tin un kaso entamá kontra e bosero di e kompania, pero detayenan di e akusashonnan no ta publiká. Ta asina ku poko despues ku Rusia a invadí Ukrania e pais su gobièrnu a prohibí Instagram i Facebook, e plataformanan mas importante di Meta.
Di momentu ta prohibí na Rusia pa kritiká ehérsito òf e guera na Ukrania. Facebook i Instagram sinembargo a ninga pa kita mensahenan ku ta kritiká e guera.
Anteriormente outoridatnan na Rusia a menshoná Andy Stone kaba komo esun responsabel pa supesto aktividatnan ilegal di kolaboradónan di Meta. Stone lo a instigá pa kometé violensha kontra Rusia.
by Webmaster | 23/11/2023 | Internashonal
PVV di Geert Wilders ta e gran ganadó di elekshon na Hulanda. Despues di konta 94% di votonan ta parse ku e partido lo atkirí 37 asiento den e parlamentu di 150 miembro. Den transkurso di djaweps lo sigui un resultado di kontamentu definitivo. Segun kálkulonan e asistensha tabata 77.8%.
GroenLinks-PvdA a saka huntu 25 asiento i VVD 24, kua ta un pèrdida di 10 asiento. E partido di Pieter Omtzigt NSC ta parse di lo saka 20 asiento. Durante e kampaña e tabata na kabes den enkuestanan, pero den último siman PVV a alkansá e bentaha di Omtzigt.
D66 ta sigui NSC ku 9 asiento, pero mester bisa si aserka ku ta trata aki di un pèrdida fuerte di 15 asiento. BBB di Caroline van der Plas a bin kaba na 7 asiento.
Tradishonalmente ta e partido ganadó mester tuma e inisiativa pa forma un gobièrnu. Den e kaso aki pues PVV. Pero lo no bira fásil pa forma un gobièrnu stabil.
GL-PvdA, CDA, PvdD, DENK i Volt no ta dispuesto na negoshá ku PVV. NSC ta konsiderá PVV su posishon pa prohibí koran i moské inkonstitushonal. Un punto ku segun Wilders ta negoshabel i ku e ta dispuesto na buta un banda. Imigrashon ta un tema mas urgente pa PVV, pero esei no ta un garantia ku Omtzigt lo ta satisfecho ku esaki.
BBB ta asumí ku e ta den kontienda pa negoshá ku PVV, konsiderando e 7 asientonan ku e partido a gana i similaridatnan entre e partidonan.
Wilders lo mester bai negoshá pues ku VVD i NSC pa yega na e kantidat di asientonan ku e mester pa forma un gobièrnu stabil ku 81 asiento den parlamentu. Pa un mayoria Wilders mester di por lo ménos 76 asiento.
E sobrá 9 partidonan no tin resultadonan ku lo buta nan den kontienda pa negosiashon. Asina CDA i SP kada un a saka 5 asiento. FVD, PVDD, CU, SGP i DENK kada un a saka 3 asiento. VOLT a saka 2 asiento miéntras JA21 ainda a logra saka 1 asiento.
by Webmaster | 22/11/2023 | Internashonal
Segun e último enkuesta di Peilingwijzer promé ku e elekshon awe na Hulanda PVV di Geert Wilders ta kana pareu na kabes ku VVD ku un diferensha di 1% na fabor di VVD. E partidonan ta kada un bon pa 19% di akuerdo ku Peilingwijzer. Esaki ta bon pa 30 i 29 asiento respektivamente den e parlamentu di 150 miembro.
E kombinashon GL-PvdA por konta segun e enkuesta ku 17% ku ta bon pa 27 asiento. NSC ta sigui na di 4 lugá ku 14% ku ta en todo kaso garantia pa un oumento riba e asiento ku e partido su lider Omtzigt tin den Tweede Kamer.
D66 ta sigui e partidonan aki ku 7% di votonan den e enkuesta ku ta bon pa 11 asiento. Esaki ta hopi ménos kompará ku e 24 asientonan ku e partido tin aktualmente den Tweede Kamer. Otro partidonan en todo kaso no ta pasa 4% den e enkuesta aki.
Fuente: Peilingwijzer.nl
by Webmaster | 21/11/2023 | Internashonal
Na Surnam un grupo di trahadó ilegal den minanan di oro a pèrdè nan bida despues ku un tunel a kai den otro. Presidente Chan Santokhi a konfirmá e insidente den parlamentu.
Ta trata segun Santokhi di sigur 10 persona i e kantidat di mortonan por sigui subi. Ehérsito, polis i timnan di reskate ta trahando duru pa yega na eventual sobrebibientenan.
E insidente a tuma lugá na Kleine Saramacca, konosí pa ‘Camp 21 pasi’, kaminda tin hopi mineria ilegal di oro ta tuma lugá.
Pa mineria di oro mester di un pèrmit di gobièrnu, pero den práktika ta tolerá hopi kompania ku ta operá sin e pèrmit aki. Konsekuentemente e kompaninan aki ta tuma riezgonan pa ku siguridat di trahadónan.
by Webmaster | 15/11/2023 | Internashonal
Rusia ta bai ahustá e reglanan pa periodista durante su próksimo elekshon presidensial. E reglanan nobo ta trese hopi restrikshon ku nan pa medionan paden i pafó di Rusisa. Tambe e pais a resien prohibí apps manera Facebook i Instagram.
Presidente Vladimir Putin a aprobá un lei ku ta stipulá ku solamente periodistanan rekonosé por graba òf saka potrèt na urnanan. Mas aleu e lei ta stipulá ku e periodistanan mester ta ofisialmente registrá pa por bishitá reunionnan di e komishon elektoral. Tambe mester di pèrmít di outoridatnan pa kobertura di asuntunan militar.
Den mart e siudadanonan di Rusia ta bai urna. Putin mes no a bisa públikamente si e lo postulá, pero generalmente ta asumí ku e lo ke sinta 6 aña mas. Den 2020 el a tene un referèndem kaminda a aprobá pa e postulá sigur 2 biaha mas despues di 2024 pa un periodo di 6 aña. Putin ta na poder 24 aña kaba.
E pais su oposishon ta neglishabel. Den ougùstùs a kondená e lider opositor Aleksej Navalny na 19 aña di prison. Su abogadonan tambe a keda detené despues.
by Webmaster | 14/11/2023 | Internashonal
Duana na Rotterdam a konfiská kasi 120 mion euro na kokaina e luna aki só. Djadumingu a konfiská kasi mil kilo na haf di Rotterdam. Eksaktamente 10 dia promé riba dia 2 ya a konfiská 550 kilo. Huntu e kantidatnan aki ta bon pa 117 mion euro.
E promé karga a yega den un konteiner for di Brasil ku mester a sigui den direkshon di Oustria. E droga tabata skondé den saku ku tabata tratá ku magnesium oksidá pa kamuflá esaki.
Djadumingu a haña e karga den un container ku outo segunda mano. E outonan tabata proveniente for di Merka i a yega Rotterdam via Panamá ku destino Lituania.
E kompanianan ku mester a risibí e containernan probablemente no tin nada di haber ku e droga.
Anteriormente e aña aki ya duana a konfiská 8.064 kilo di kokaina den haf di Rotterdam. Ta trata di e hayasgo mas grandi te asina leu. Na e okashon ei tabata trata di kasi 660 mion euro.
by Webmaster | 10/11/2023 | Internashonal
Portuguesnan ta bai urna den mart próksimo. Marcelo Rebelo de Sousa, presidente di Portugal, a anunsiá e elekshon pero lo warda pa disolvé parlamentu te ora ku esaki aprobá presupuesto e luna aki mes.
Portugal ta tene elekshon nobo despues di retiru di promé minister António Costa relashoná ku un posibel kaso di korupshon i fabor polítiko. No tabatin klaridat si Rebelo de Sousa lo a yama elekshon nobo. E Partido Socialista di Costa tin un mayoria apsoluto den parlamentu ku lo por a trese otro kandidato dilanti.
Despues di retiru di Costa a detené sigur 5 persona, entre nan e hefe di staf di e promé minister. Tambe tin akusashonnan fuerte kontra e minister di infrastruktura i promé minister Costa mes.
by Webmaster | 08/11/2023 | Internashonal
Promé minister di Portugal António Costa a tuma retiru relashoná ku un posibel kaso di korupshon i fabornan polítiko. Costa a anunsiá su retiru despues di un reunion ku presidente di Portugal Marcelo Rebelo de Sousa.
Djamars ora Costa a hasi su anunsio polis ya a hasi algun entrada na su kas gubernamental Palacio São Bento. Tambe tabatin entrada na kantor di su hefe di staf i e ministerionan di Medioambiente i Infrastruktura.
Hinter e asuntu a kuminsá kana fin di 2019 relashoná ku un investigashon tras di akuerdonan ilegal pa produkshon di litium i produkshon di hidrógeno na Portugal.
Portugal tin e reserva mas grandi di litium na Oropa. Litium ta un di e supstansianan mas usá pa traha bateria pa outo eléktriko. Ta un industria kaminda hopi kapital ta lora i tin vários partido embolbí, kada un ku nan propio interes.
Polis a detené sigur 5 persona: e hefe di staf di e promé minister, dos propietario di kompania embolbé, un komersiante i un alkalde. Tambe tin akusashonnan serio kontra minister di infrastruktura João Galamba.
Promé minister Costa en todo kaso ta akusá di a yuda aselerá sierto deal personalmente. El a indiká den un deklarashon ku su konsenshi ta limpi pero ku e no por sigui ehersé e funshon di promé minister ku akusashonnan asina serio. El a primintí di koperá ku e investigashon.
Costa tabata promé minister di Portugal for di 2015. For di yanüari 2022 e tin un mayoria apsoluto den parlamentu ku Partido Socialista. E próksimo elekson tabata planiá pa 2026. Presidente Marcelo Rebelo de Sousa mester disidí awor si lo hala e fecha ei dilanti òf si e mayoria den parlamentu mester trese un promé minister nobo dilanti. Costa lo keda promé minister en todo kaso te ora ku e desishon final kai.
by Webmaster | 07/11/2023 | Internashonal
Ukrania i Moldavia por kuminsá ku negosiashonnan pa bira miembro di Union Oropeo. Asina NOS ta informá a base di un konseho di Komishon Oropeo ku lo keda tratá djarason. Segun e miembronan di e komishon e paisnan ta kumpli ku e rekerimentunan pa miembresia di Union Oropeo.
Ukrania i Moldavia mester a implementá vários reforma pa kombatí korupshon i labamentu di plaka. E leinan aki i e poder hudisial den e paisnan kandidato mester ta na òrdu promé ku por kuminsá palabrá miembresia di Union Oropeo.
Ópviamente no ta Komishon Oropeo ta disidí sino e 27 miembronan di Union Oropeo. E miembronan mester indiká si nan ta di akuerdo ku e konseho. E desishon final lo mester tuma lugá den desèmber.
Te asina leu Alemania so a indiká di ta na fabor di miembresia di e dos paisnan. Otro paisnan a keda mas reservá i tabata wardando e konseho aki promé. Espektativa ta ku lo duna lus bèrdè pa kuminsá negoshá, pero e palabrashonnan ei probablemente no ta tuma lugá e aña aki ainda.
E miembresia di Ukrania partikularmente ta di sigui konsiderando e implikashonnan polítiko relashoná ku e konflikto entre e pais i Rusia. Un eventual miembresia di Union Oropeo ta kambia e dinámika di e konflikto.
Aña pasá, siguiendo e invashon di Rusia, Ukrania a hasi un petishon urgente pa bira miembro di Union Oropeo. Poko despues Moldavia a sigui. Durante un reunion den yüni aña pasá ya e miembronan a aprobá e kandidatura di e paisnan.
by Webmaster | 03/11/2023 | Internashonal
Un hurado na Merka a deklará e komersiante di kriptomoneda Sam Bankman-Fried kulpabel di froude ku míles di mion dòler. Bankman-Fried a slùis sumanan enorme for di su bolsa pa kriptomoneda FTX, ora esaki a kai aña pasá. Ku kaida di e kompania tur e kapital a disparsé.
Bankman-Fried (31 aña) tabata konsiderá un Steve Jobs òf Elon Musk nobo ku a subi te na tòp di mundu di tech, partikularmente kriptomoneda. Su aparensha humilde tabata hala hopi atenshon i atmirashon rònt mundu.
Den un aña i mei di tempu el a logra produsí miónes ku komèrsio ku bitcoin i ethereum. Promé ku su 30 aña ya Bankman-Fried a gana 20 mil mion dòler.
Na kabamentu di aña pasá a resultá ku Bankman-Fried tabata usa sèn di invershonista pa finansiá su propio aktividatnan personal. A resultá ku el a diseñá un kódigo ku por a pèrmití transakshonnan te na 65 mil mion dòler sin prueba di garantia.
Ora invershonistanan a tuma nota di e problemanan rondó di e bolsa i a purba retirá nan kapital a resultá ku FTX tabata un hùls bashí. Bankman-Fried ta sospechá di a slùis sigur 8 mil mion dòler.
Den su deklarashon na korte Bankman-Fried a keda para ariba ku el a bira víktima di un konseho finansiero malu. Pa e motibu ei e no tabatin bista riba e situashon na FTX.
Di otro banda tin hopi prueba a bin dilanti dor di deklarashonnan di esnan ku tabata partisipe den e froude. A kambio di redukshon di kastigu nan a duna vários testimonio kontra Bankman-Fried. Bankman-Fried i algun konosí, inkluyendo su èks partner, a laga hopi prueba atras den nan grupo di app Wirefraud, esta froude digital.
E hurado no a tuma mas ku 4 ora pa yega na un veredikto. Riba 28 di mart lo bira konosí kiko lo ta su kastigu eksakto. Pa e tipo di krímen aki e mester tene kuenta ku algun dékada den prison.
by Webmaster | 01/11/2023 | Internashonal
Un dealer di arte na Fransia mester a paresé den korte pa estafa di un pareha na edat. El a kumpra un maskarada Afrikano, ku tin orígen den siglo 19, pa un suma di 150 euro. Alguna luna despues sinembargo el a bende esaki na findishi pa mas di 4 mion euro.
E pareha a bende e maskarada ku e dealer den 2021 ora nan tabata ruim op nan kas. Nan a invitá e antikuario pa bin wak algun opheto ku lo e por tabata interesá aden. Lo el a kumpra e maskarada for di nan sin bisa esaki su berdadero balor. E dealer a bisa sinembargo ku e mes no tabata sa ku e maskarada ta bal asina tantu sèn.
E pareha a rekonosé e maskarada aña pasá ora nan a lesa riba e findishi kaminda a bend’é. E maskarada a resultá un obra di arte di e pueblo Fang na Gabon. Inisialmente a ofresé e maskarada pa 300 mil euro, pero despues di un ofèrta anónimo e maskarada a bai pa 4.2 mion euro.
E pareha ta sinti ku e dealer a estafá nan i a hib’é korte pa anulá e benta. Poko despues gobièrnu di Gabon tambe a bin dilanti demandando pa debolbé e maskarada. Esaki lo ta hòrtá i pa e motibu ei mester bai bèk su pais di orígen. E gobièrnu di Gabon a pidi den e kuadro aki pa para e kaso.
Pa fin di e aña aki wes lo tuma un desishon kiko mester pasa ku e maskarada.
by Webmaster | 31/10/2023 | Internashonal
E paisnan reuní den G7 a stipulá un kódigo di kondukta pa kompanianan ku ta desaroyá inteligensha artifisial. E kódigo aki mester garantisá seguridat i konfiabilidat di e teknologia nobo aki.
Ekspertonan a bin ta atvertí na kuminsamentu di e aña aki pa ku e riezgonan di uso di inteligensha artifisial. E programanan ta hasi un trabou impreshonante pero e informashon ku e sistemanan ta produsí no ta kuadra semper.
Ademas e sistemanan ta sirbi hopi biaha pa krea informashon ku no ta kuadra, inkluyendo fake news. E desaroyonan ta kana asina lihé ku hende por pèrdè kòntròl riba e konsekuenshanan. E kódigo di kondukta aki lo mester kambia esei.
E kódigo ta konsistí di 11 punto di atenshon pa e kompanianan. Di otro banda e kódigo no ta obligatorio. E kompanianan no ta mará pues na direktivanan ku ta prohibí nada.
Si ta asina ku e kódigo aki ta buta preshon riba paisnan pa traha lihé riba leinan ku ta regardá inteligensha artifisial. Te asina leu no ta èksistí regulashon integral relashoná ku inteligensha artifisial na Merka, pero Oropa ya a tuma algun paso anteriormente e aña aki.
by Webmaster | 27/10/2023 | Internashonal
Ehérsito di Merka a hiba vários atake riba dos fasilidat na Siria ku di akuerdo ku gobièrnu Merikano ta bou di kòntròl di e Guardia Revolushonario Islámiko i otro gruponan na Iran.
Segun e Ministerio di Defensa Merikano e atakenan a tuma lugá ku F-16 riba depósito pa arma i munishon. Mas aleu Pentagon a informá ku e operashon aki ta sigui un serie di atake resien riba tropanan Merikano na Irak i Siria.
E atakenan a tuma lugá riba òrdu di presidente Joe Biden kende a indiká anteriormente ku el a atvertí ayatollah Ali Khamenei, e lider spiritual di e pais, ku e atakenan riba tropa Merikano lo tabata bai tin konsekuensha. E presidente Merikano a enfatisá ku e atake no ta relashoná ku e situashon na Israèl.
by Webmaster | 26/10/2023 | Internashonal
Na Merka a demandá un pilot pa 83 intento di asesinato. Riba un buelo di Alaska Airlines di e lugá Everett pa San Francisco lo el a purba paga e motornan di e avion di akuerdo ku ABC News.
E sospechoso ta traha pa e aerolinea pero no tabata trahando na e momentu ei. Na momentu ku el a hasi su intento lo e tabatin 40 ora sin drumi. Dor di intervenshon di e kapitan i ko-pilot por a evitá un tragedia.
E tripulashon di e avion a logra dominá e hòmber i mar’é riba un stul te ora a aterisá e avion na Portland kaminda a pas’é pa outoridatnan.
by Webmaster | 23/10/2023 | Internashonal
E atake sibernétiko riba e Korte Internashonal di Hustisia (ICC) na Den Haag den sèptèmber ta relashoná ku spionage. E atake tabatin komo meta saboteá e trabou di ICC. Asina a resultá for di investigashon di ICC basá riba e pruebanan disponibel.
ICC ainda no por bisa ken tabata tras di e atake. Outoridatnan Hulandés ta investigando e kaso.
Entre tantu ICC a tuma medida inmediatamente despues di e atake. Ekspertonan eksterno di siguridat sibernetiko i Hulanda a yuda ku esaki i tambe e korte a tuma medidanan pa evitá un atake nobo. Pero e problemanan pa ICC no ta kaba einan.
Asina Rusia a kuminsá su propio kasonan kriminal kontra e fiskal i wesnan di e Korte Internashonal di Hustisia. Esaki komo reakshon riba òrdu di e korte pa arestá presidente di Rusia Vladimir Putin. E korte ta tene Putin responsabel pa deportashon di mucha for di e partinan na Ukrania okupá pa Rusia.
