by Webmaster | 29/09/2023 | Internashonal
Un atmósfera deprimí. Asina trahadónan di Erasmus MC na Rotterdam ta deskribí e dia despues di e serie di tiroteo fatal ku a tuma lugá djaweps. No tin polis mas presente na e hospital, solamente e kompanianan ku a bin drecha e daño okashoná pa e kandela sendé pa e sospechoso den e kaso aki.
Riba nivel públiko mester bisa ku tin hopi konsternashon a lanta despues ku a resultá ku Ministerio Públiko a manda atvertensha pa Erasmus relashoná ku e hòmber.
Riba djaweps alrededor di 14.30 (orario Hulandes) e promé tiroteo a tuma lugá na Heiman Dullaertplein na Rotterdam. Einan un hòmber di 32 aña a tira un dama di 39 aña mata. Su yu muhé di 14 aña a fayesé algun ora despues na hospital dor di su heridanan. Despues e hòmber a pega su kas na kandela.
Siguiendo e insendio na su kas e hòmber a bai Erasmus MC kaminda el a kuminsá tira, matando un dosente di 43 aña. Einan tambe e hòmber a sende un kandela. Alrededori di 15.30, ora e hòmber a bandoná e hospital polis a deten’é.
E sospechoso ta un studiante ku tabata na punto di risibí un diploma di basisarts. Ministerio Públiko a indiká ku e hòmber a yega di ta den kontakto ku hustisia i ku el asta keda kondená pa aktonan di maltrato di animal. Testigunan lo a yega di mir’é komportá di forma sikótiko. Mas aleu no ta konosí kiko e sospechoso tabatin di haber ku e víktimanan.
E sospechoso ta Fouad L di 32 aña ku tabata studia na Erasmus. Durante su detenshon a bin deskubrí un arma di kandela. Tambe e tabatin un chaleko kontra bala bistí. E ta biba pegá ku e promé víktima. Manera indiká e hòmber tabatin un kondena riba su nòmber pa maltrato di animal. Riba su telefòn a polis a haña imágennan basta violento. Te asina leu ta asumí ku Fouad L a aktua su so.
E kaso ta bou di investigashon.
by Webmaster | 22/09/2023 | Internashonal
Segun sifranan di International Organization for Migration 43.059 persona na Libia a keda sin dak riba nan kabes dor di e inundashonnan okashoná pa tormenta Daniel. Partikularmente na e siudat Derna hopi hende lo ta bandonando nan hogar dor ku no tin awa pa bebe disponibel. Nan ta buskando refugio den siudatnan mas grandi manera Benghazi kaminda nan tin famia.
Siman pasá e parti nort di e pais a keda severamente asotá pa tormenta Daniel. E siudat Derna a sufri mas tantu dor ku dos dam pegá ku e siudat a derumbá i destruí kasi un kuart di e siudat.
Anteriomente tabatin bastante konfushon rondó di e kantidat di víktima mortal, pero segun e último informashonnan konfirmá lo ta trata di 4000 persona. Bou di nan bastante migrante for di otro partinan di Áfrika ku kier a krusa pa Oropa na kosta di Libia.
by Webmaster | 20/09/2023 | Internashonal
Kuerpo Polisial di Hulanda ta sospechá ku e eksploshonnan ku a tuma lugá anteriormente e siman aki den e provinsia Groningen ta relashoná ku otro. Den último dianan tabatin vários eksploshon na vários lokalidat na Winschoten i Oude Pekela.
Ta posibel ku tin un relashon ku otro kasonan di violensha tambe. Te ainda polis no sa ken òf kiko tin tras di e eksploshonnan aki. Polis ta tene en todo kaso kuenta ku konfliktonan den mundu kriminal.
Por sierto ku e aña aki a registrá mas eksploshon ku den añanan anterior na Hulanda. NOS ta informá ku den e promé 9 lunanan di e aña aki ya a registrá 358 eksploshon na kas òf na edifisio.
Mas di 50% di e eksploshonnan ei a tuma lugá na Amsterdam i Rotterdam. Pero den último dianan e eksploshonnan aki ta tuma lugá den otro parti di Hulanda tambe.
by Webmaster | 19/09/2023 | Internashonal
Den mardugá di djaluna pa djamars vários eksploshon a tuma lugá den diferente parti di Hulanda. Asina a registrá eksploshon den edifísionan na Amsterdam, Weesp i Winschoten. Ku eksepshon di un persona ku a keda levemente heridá no tabatin herido kousá pa e eksploshonnan.
Na Breda deskonosínan a manda algu ku tabata kima den direkshon di un bibienda ku despues a pega kandela dor di e eksploshon na impakto. Un otro eksploshon na Amsterdam a tuma lugá alrededor di 22.30 na un bibienda den stadsdeel Zuidoost kaminda tambe a benta un opheto na kandela paden.
Poko despues un otro eksploshon a tuma lugá na un bibienda den sentro di Weesp. Einan tambe ta trata di un opheto na kandela ku deskonosínan a manda paden ku despues a eksplotá. Un situashon komparabel a tuma lugá na Winschoten alrededor di 02.00.
E insidentenan aki ta sigui un serie di insidente un dia anterior den e provinsia Groningen na e lugánan Winschoten, Oude Pekela i e siudat Groningen. E eksploshonnan ta motibu pa preokupashon den Kuerpo Polisial ku ta investigando si tin un konekshon entre e vários insidentenan.
by Webmaster | 13/09/2023 | Internashonal
Presidente di Rusia Vladimir Putin i lider di Nort Korea Kim Jong-un a reuní ku otro na Rusia riba djarason. E lidernan ta topa otro na e instituto di investigashon espasial Vostochny, den parti sùit di Rusia, pegá ku e frontera ku China.
E motibu ofisial di e bishita no ta konosí. Den medionan Merikano tin spekulashon ku lo ta trata di asuntunan militar. Rusia lo ta interesá den sistemanan balístiko Nort Koreano miéntras Nort Korea ta buskando teknologia avansá i yudansa ku alimento.
Medionan na Rusia ta informá di otro banda ku e enkuentro ta prinsipalmente den kuadro di e kolaborashon entre e dos paisnan i pa e motibu ei no tin hopi detaye konosí.
by Webmaster | 12/09/2023 | Internashonal
Ya tin mas di 3 dia a pasa siguiendo e temblor djabièrnè último na Maroko. E kantidat ofisial di morto a bin para na 2.862 djaluna anochi. E chèns ku ainda lo haña víktima na bida a baha.
E momentu aki ta krusial. Ta asina ku den e promé dianan despues di un temblor e meta prinsipal di trahadónan di reskate ta pa haña sobrebibiente entre e ruinanan. Tempu ta nan enemigo mas grandi durante e prome 72 ora siguiendo un temblor.
Despues di 72 ora e chèns pa sobrebibí ta limitá den mayoria kaso. Mayoria hende por sobrebibí por lo ménos 72 ora sin awa. Despues di esei, hende por fayesé dor di set òf falta di nutrishon.
by Webmaster | 11/09/2023 | Internashonal
Un fabrikante Merikano ta retirá un tipo di cheps pikante for di merkado despues di morto di un hóben di 14 aña na Massachusetts. Su famia ta kombensé ku konsumo di e snèk ekstrémamente pikante a kousa su morto.
Ta trata di un chep di ‘tortilla’ bendí na 10 dòler pa kaha ku por sierto ta bin den forma di un kaha di morto i dekorá ku kolebra venenoso. Siguiendo e asina yamá “One Chip Challenge” konsumidónan ta retá pa filma nan reakshon ora nan kome e snèk i warda mas tantu posibel pa aliviá esaki.
E cheps aki ta trahá ku e asina yamá Carolina Reaper i Naga Viper, dos tipo di promèntè ku ta skor 1.7 i 1.4 mion riba skala di Scovilla. Riba e skala aki tabasko ta skor rònt di 5000 i jalapeño 10.000. E pakete ta indiká tambe ku e produkto ta destiná solamente pa adulto i ta asta deskonsehá konsumo durante embaraso. Tambe ta indiká pa buska yudansa médiko si bo desmayá, tin nousea duradero òf si ta difísil hala rosea.
E hoben di 14 aña, Harris Wolobah di Worcester, a risibí e chep segun su mama di un kompañero di skol. E yu lo a mária na skol, pero tabata mustra mihó ora el a bai kas. Poko despues a hañ’é desmayá den su kamber. Na hospital a konstatá su morto poko despues. Ounke ainda outopsia mester determiná ku eksaktitut e kousa di morto, e famia ta kombensé ku e cheps a kousa su morto. E mucha lo tabata den bon estado di salú.
No ta promé biaha tampoko ku hende a kaba den hospital despues di a kome e snèk pikante aki. Tin vários adulto ku mester a bai hospital despues di kome e snèk i por lo ménos 10 otro kaso konosí di hóben ku a bira malu dor di e ‘challenge’ aki. Ta promé biaha ku unu a fayesé. Segun dòkternan e supstansia kapsaisina den e cheps ta kousa problema di kurason. Den un deklarashon fabrikante Paqui, filial di e konosido kompania Hershey, ta lamentá morto di e hóben.
E kompania a reiterá ku e produkto ta kumpli ku reglanan di siguridat i ta enfatisá ku ta un prdukto pa adulto. Pero awor ku a resultá ku mucha tòg ta logra buta nan man riba e snèk e kompania a disidí retirá esaki for di merkado.
by Webmaster | 07/09/2023 | Internashonal
E Korte mas haltu na Mexico a eliminá e prohibishon riba aborto. Esei ta nifiká ku hospitalnan públiko den hinter e pais mester ofresé e tratamentu aki. Di momentu mas o ménos 10 di e 32 estadonan na Mexico ta ofresé esaki.
E desishon ta nifiká konkretamente ku interupshon di embaraso no ta prohibí mas den e pais, pues servisionan federal di kuido ku ta ofresé aborto no por keda pèrsiguí mas.
Defensornan di derechonan di hende muhe i ser humano ta kontentu ku e sentensha, pero di otro banda tin hopi resistensha tambe. Un mayor parti di e 127 mion habitantenan di Mexico ta katóliko i no ta kontentu ku e desishon.
by Webmaster | 06/09/2023 | Internashonal
The Rolling Stones lo lansa un álbum nobo titulá “Hackney Diamonds” riba 20 di òktober próksimo. Esaki ta e promé álbum atrobe den 18 aña. Djarason ora e banda a hasi e anunsio a lansa mesora e single nobo “Angry”.
Den e último simannan tabatin hopi spekulashon tokante un álbum nobo di The Rolling Stones. E antisipashon grandi ta lógiko si konsiderá ku den último dianan por a nota e logo di e banda kasi tur kaminda. Djarason por poko a saka un breaking news ku e álbum a sali kaba.
Mick Jagger, Ron Wood i Keith Richards a presentá nan plan pa un evento huntu ku presentadó Jimmy Fallon. Segun Jagger e banda e graba 23 kansion di kua 12 lo paresé riba “Hackney Diamonds”. Delaster ábum di The Rolling Stones tabata “A Bigger Bang” ku a sali na 2005.
by Webmaster | 01/09/2023 | Internashonal
Èks promé minister di Finlandia Sanna Marin a bandoná polítika. Djabièrnè Marin a tuma retiro komo lider di partido sosial demókrata di e pais. Sanna Marin por lo pronto tin e rèkòrt di promé minister femenino mas yòn den historia. E tabatin apénas 34 aña ora el a bira promé minister di Finlandia den 2019.
E tabata hopi popular riba social media i tabata paresé riba e kaft di revistanan prominente manera Vogue i Time Magazine. Bou di su guia Finlandia a bira miembro di OTAN ora nan pais bisiña Rusia a invadí Ukrania. Marin ke biba un bida privá atrobe.
El a pèrdè hopi simpatia sinembargo durante su gobièrnu relashoná ku e fiestanan ku e tabata organisá den e kas reservá p’e komo promé minister. Asina un grabashon di dje bailando na un di e fiestanan ei a bai rònt mundu lantando bastante krítika. Dado momentu a èksigí te asta pa e hasi un tèst si e ta usa droga òf nò.
by Webmaster | 31/08/2023 | Internashonal
Na Gran Bretaña un hòmber di 54 aña a demandá BBC pa un video den kua el a paresé aksidentalmente. E video ta disponibel riba YouTube i tin miónes di view. E hòmber ta haña ku e tin derechi riba e parti di e sèn ku BBC a generá ku e video.
Guy Goma, manera e yama, a solisitá na BBC den 2006 pa un funshon den e departamentu di IT. El a mèldu na resepshon kaminda e mester a warda te ora nan bin busk ‘é pa su afsprak. Na mes momentu e asistentenan di un programa a konfundi’é ku un invitado i a lag’é tuma asiento den un programa live.
Na e momentu ei el a realisá ku tabata un eror pero ya e programa a bai den aire. Pa kolmo el a rospondé e preguntanan di e presentadó di e mihó forma ku e tabata por. Poko despues BBC a ripará e eror. E grabashon di e insidente naturalmente a bira viral.
Awor ku e video a generá miónes di view e hòmber ta argumentá ku BBC mester pag’é un paarti di e sèn ku e video a generá. Por sierto ku e ‘sollicitatiegesprek’ nunka a tuma lugá. E hòmber ta traha di momentu na un instansha pa mucha ku problema ku siñamentu.
by Webmaster | 31/08/2023 | Internashonal
Por lo ménos 73 persona a pèrdè nan bida den un kandela den un edifisio di 5 piso na e siudat Surafrikano Johannesburg. Sigur 52 persona ta heridá. E chèns ku lo haña mas sobrebibiente ta nihil di akuerdo ku outoridatnan.
E kousa di e kandela no ta konosí. E edifisio lo tabata sirbi komo un lugá di opvang pa hende sin dak riba nan kabes. Alrededor di 200 persona lo tabata bibando einan.
E edifisio tabata yen di provishon improvisá i kosnan ku e habitantenan tabata kolekshoná. Esaki lo a stroba hopi víktima hui for di e kandela. E opstákulonan aki tabata forma un problema tambe pa timnan di reskate por hasi nan trabou.
Den e respektivo bario tin mas edifisio den e estado aki kaminda hende sin dak riba nan kabes ta buska un lugá pa drumi.
by Webmaster | 31/08/2023 | Internashonal
Despues di Reino Uní, Italia i Merka awor Nova Zelandia tambe ta investigando un hòmber Canades ku a manda paketenan pa hende ku kier a buta un fin na nan bida. E sospechoso ta Kenneth Law di 57 aña ku ya ta detené na Canada.
Law tabata traha komo kòki na un hotel na Toronto kaminda polis a deten’é den mei. E hòmber lo a konfesá na un agente undercover ku el a yuda hopi hende buta un fin na nan bida ku un supstansha ku el a bende nan.
Tin sospecho ku e hòmber lo tabatin kliente den por lo ménos 40 pais kaminda el a manda 1200 pakete. Den Reino Uní tin sospecho ku 88 kaso di hende ku a buta un fin na nan bida ta relashoná ku e supstansha ku e hòmber aki tabata fasilitá. Den sèptèmber e hòmber su kaso ta bin dilanti.
by Webmaster | 30/08/2023 | Internashonal
Den último 7 luna paisnan Oropeo a kumpra 40% mas gas natural for di Rusia kompará ku promé ku e konflikto ku Ukrania a kuminsá. Asina Financial Times ta informá a base di un rapòrt di e organisashon no-gubernamental Global Witness.
Den último 30 aña regularmente Rusia a sera e kranchi di suministro na Oropa. Oropa lo ke terminá e dependensha di gas líkido for di e pais ya ku ta for di e entradanan ei mes e pais ta finansiá su invashon di Ukrania.
Pero e pensamentu ei aparentemente no ta konta ora ta trata di suministro di LNG for di Rusia di akuerdo ku Global Witness, ku por sierto a usa datonan di e agensia di investigashon Kpler. Partikularmente Spaña i Bèlgika ta usuarionan grandi di LNG for di e pais. Huntu ku China nan ta forma e 3 klientenan mas grandi.
Spaña lo a kumpra 7470 mion meter kúbiko di LNG for di Rusia, kompará ku e 4670 mion aña pasá. Na Bèlgika e importashon a subi di mas di 5000 mion pa mas di 7000 mion meter kúbiko di LNG. Hulanda si a baha su konsumo di gas di 2870 mion meter kúbiko na 830 mion e aña aki.
Loke ta remarkabel den e totalidat aki ta ku promé ku e konflikto ku Rusia paisnan Oropeo tabata importá hopi ménos LNG. E desaroyo aki ta afektá e plannan di Oropa pa stòp kompletamente ku importashon di gas for di e pais pa mas tardá den 2027.
by Webmaster | 28/08/2023 | Internashonal
Polis na Gresia a detené 79 persona relashoná ku sendementu di kandela. E grupo ta sospechá di a okashoná e kandelanan ku ta asotá e pais pa algun siman kaba. Na total a arestá 140 persona, di kua 79 ta sospechá di a hunga un ròl aktivo. Detayenan te asina leu no ta konosí.
Di un kandela parti nort-wèst di e kapital Atena ta sigur ku ta trata di un kandela deliberá. Asina tin sentenáres di lugá ku ta na kandela aworakí. Sigur 27 persona a pèrdè nan bida te asina leu.
