E mama di e 4 muchanan ku tabata pèrdí den jungle na Colombia lo a biba 4 dia mas despues di e aksidente. Asina e tata di e muchanan Manuel Ranoque a deklará despues di a kòmbersá ku e yu mayó di 13 aña na hospital. Outoridatnan no a reakshoná ekstensivamente riba òf konfirmá e deklarashon di e tata.
E muchanan ta kedando na un hospital militar na Bogotá kaminda nan lo permanesé den próksimo 2 siman. Manera ta konosí ehérsito di Colombia a bin haña Lesly (13 aña), Soleiny (9 aña), Tien Noriel (4 aña) i Cristin (ku a kumpli entretantu 1 aña durante e 40 dianan ku nan tabata pèrdí. E muchanan tabata pèrdí despues ku e avion ku tabata transportá nan i nan mama a kai riba 1 mei. 2 siman despues a haña e avion i e kurpanan di tres adulto, inkluyendo e mama di e muchanan.
Despues di un búskeda organisá pa militarnan i habitantenan indígeno por fin a bin haña e muchanan 5 kilometer mas leu den un parti habrí ku ménos vegetashon mei mei di e jungle. Durante e 40 dianan ehérsito tabata bula riba e ária ku un spiker ku un mensahe di e wela di e muchanan ku un yamada pa keda un kaminda. Tambe ehérsito a dròp vários pakete di alimento sperando ku e muchanan lo a haña esakinan.
Segun informenan preliminar e echo ku e muchanan a krese den i pues konosé e área a yuda nan sobrebibí ku yuka, fruta i simia. Nan tabata hopi deshidratá, pero entretantu nan ta komiendo mihó i ta bayendo basta bon.
Èks promé minister di Italia Silvio Berlusconi a fayesé djaluna na 86 aña di edat. Berlusconi lo keda kòrdá tambe komo magnate mediátiko, komersiante i selebridat. Djabièrnè a hib’é hospital San Raffaele na Milan kaminda el a fayesé djaluna. Anteriormente e aña aki el a pasa 45 dia den hospital pa un infekshon na pulmon relashoná ku e leukemia ku e tabata sufri di dje pa algun aña kaba.
Te na su morto e tabata lider di e partido derechista Forza Italia ku ta forma parti aworakí di e koalishon liderá pa Giorgia Meloni di Fratelli d’Italia. Berlusconi no tabatin un ròl den e gabinete, pero su morto por nifiká un tèst pa e stabilidat di e koalishon den lunanan benidero di akuerdo ku agensia di prensa Reuters.
Den último añanan Berlusconi tabata den publisidat prinsipalmente pa e vários kasonan entamá kontra di dje relashoná ku korupshon i tambe su ponensianan kontroversial. Promé ku esey e tabata basta popular pa su estilo di bida. Silvio Berlusconi tabata promé minister di Italia den 4 gobièrnu.
E kiebro di dam na Ukrania riba djamars ta yega na momentu ku e pais tabata den preparashon pa un kontra ofensiva riba tropanan di Rusia. Ta asina ku djaluna presidente di Ukrania Volodymyr Zelenski a bisa den e konosido korant The Wall Street Journal ku e pais tabata preparando un ofensiva grandi. E kiebro di dam ta trese un retraso konsiderabel den e liña frontal di Ukrania.
E tropanan di Ukrania i Rusia ta separá di momentu dor di e riu Dnipro, ku a keda inundá ku awa dje dam, ku ta situá pues den teritorio okupá pa tropanan di Rusia. E inundashon ta forma un problema mas grandi pa Ukrania ku no por avansá, miéntras e parti okupá pa Rusia ta intakto ainda, dunando asina un bentaha.
Den Konseho di Siguridat di Nashonnan Uní a kuminsá reuní for di ayera, pero ainda tin diskushonnan fuerte andando riba e kuestion. Miéntras Ukrania i Rusia ta keda kulpa otro di kiebro di e dam entretantu ta kalkulá ku e kiebro di dam lo afektá alrededor di 40 mil persona direktamente i un otro 100 mil indirektamente. Rekonstrukshon di e region ta bai bira algu difísil. Dor di e daño ya okashoná kaba pa e agreshonnan hopi hende lo no ke bai bèk nan kas di akuerdo ku ekspertonan.
E operashon na barika di Papa Francisco a kana sin problema. Asina Vatikano a publiká djarason. Papa Francisco lo tin ku keda algun dia mas den hospital Gemelli na Roma despues di e operashon di djamars. Den próksimo 11 dia no tin oudiensia planiá. For di 2021 e pontífise ta tratá na su tripanan pa diverticulitis, algu basta frekuente serka hende grandi. Esaki tin ora por kondusí na infekshonnan ku mester keda tratá.
Un eksploshon inesperá a buta un dam enorme na Ukrania basha abou djamars, okashonando un inundashon desastroso di e área. E siudat pegá ku e dam, Nova Kakhovka, ta okupá pa Rusia. Segun e agensia di prensa estatal di Rusia mitar di e dam a basha abou i chèns ta grandi ku esei lo pasa ku sobrá di e dam tambe.
E dam ta konektá via e riu Dnipro ku un sentral di distribushon di awa 60 kilometer mas leu na e siudat Kherson. E parti nort dje riu ta okupá pa Ukrania i e parti sùit ta den man di tropanan di Rusia. Te ainda no tin klaridat ken ta responsabel pa e eksploshon. Ukrania i Rusia ta kulpa otro, miéntras ainda no tin un investigashon a tuma lugá na e sitio. No tin indikashon ku un atake militar a tuma lugá i te asina leu ta konosí ku ta Rusia ta okupá e region.
Segun informenan den otro medio Rusia lo kier a probechá di e dam su suministro di awa i a laga esaki yena muchu. Sin ku esaki tabata e intenshon esei por a resultá den un sobrekarga i desfunshonamentu di e dam. E desaster aki ta forma un problema pa tur dos partido den e konflikto. Ta asina ku e awa tabata usá pa suministro di awa na Krimea ku ta aneksá pa Rusia for di 2014 tambe.
Na banda di Ukrania tambe por surgi un problema enorme. E sentral di awa ta usá pa fria un sentral nuklear na Ukrania. Por lo pronto tur kos ta parse bou di kòntròl eynan ainda. Esey dimes ta un alivio, pero te ainda tin e problema di vários mil persona ku mester a bandoná nan hogar.
Nashonnan Uní a yama un reunion di urgensha relashoná ku e insidente.
Haiti ta asotá di momentu pa hopi inundashon i movementu di tera. Por lo ménos 15 persona a pèrdè nan bida i mas di 13 mil persona mester a bandoná nan hogar. Alrededor di 1200 kas ta deklará inapropiá pa biba aden i tin sigur 7400 kas ku a raportá daño material.
Tin hopi daño tambe na kosechanan, loke ta lanta e miedu pa un situashon di mas hamber den partinan dje pais. Manera ta konosí Haiti tin hopi problema ku distribushon di alimento.
Ta bini aserka ku e pais ta asotá pa algun aña pa violensha i guera entre gangnan kriminal ku tin kòntròl riba vários parti di e kapital Port-au-Prince. Promé minister Ariel Henry a hasi un yamada urgente na instanshanan internashonal pa yuda kontené e situashon. Nashonnan Uní ta dispuesto na yuda, entre otro ku restourashon di òrdu polisial pa trese trankilidat bèk.
Leslie Van Houten, un di e siguidónan di e notorio lider di sekta Charles Manson, lo ta pronto den libertat atrobe despues di tabata será 52 aña. Asina un korte na California a disidí. Van Houten di 73 aña tabata será for di 1971 pa su embolbimentu den e asesinato di aktris Sharon Tate i 6 otro persona den 1969.
Segun e komishon ku a evaluá i yega na e desishon, Leslie Van Houten no ta forma un peliger pa orden públiko i ta repentí di loke el a hasi, di akuerdo ku e korant Los Angeles Times. Anteriormente e gobernador di California a rechasá e petishon pa e sali den libertat, pero wes a revoká esei.
Leslie Van Houten tabata un di e aktornan prinsipal durante e asesinato di Sharon Tate, kua a lanta basta konsternashon konsiderando ku na e okashon ey Tate tabata na estado di yu di direktor di sine Roman Polanski.
Bou di influensha i siguiendo instrukshonnan di Charles Manson Van Houten, dos otro dama i un hòmber a infiltrá e kasi di Polanski i asesiná e aktris i su wespetnan ku kuchú i arma di kandela. Polanski no tabata na kas. Un dia despues e mesun grupo ku algun miembro mas di e sekta a ataká un otro bibienda kaminda a asesiná 2 persona mas.
E kulpabelnan a keda kondená inisialmente na morto den 1971, pero den 1972 a kambia esaki den bida largu. Charles Manson mes a muri na 83 aña den 2017 den prizon. Ku e asesinato e kier a desenkadená un guera rasial na Merka.
E konflikto entre Rusia i Ukrania ta pasando dor di un fase basta tenso den último dianan. Partikularmente despues ku Rusia a anunsiá preparashonnan pa medidanan nuklear. Pais bisiña Belarus a buta su teritorio disponibel pa Rusia posishoná arma nuklear. E kapitalnan di Ukrania i Rusia dia pa dia ta sinti mas efekto direkto di e konflikto entre e paisnan. Tantu Kiev komo Moskú a risibí atake ku drone den dianan tras di lomba.
Den mardugá di djaluna pa djamars ya tabata di tres anochi siguí ku Kiev tabata blanku di atakenan for di Rusia ku a resultá den 1 morto, 13 persona heridá i hopi destrukshon na edifisionan i vehíkulo. Bosero di e forsa aereo di Ukrania a informá ku Rusia lo a usa 31 drone tipo Shahed (for di Iran), di kua a logra basha 29 abou pegá ku Kiev. Ukrania lo ta usando sistemanan Patriot for di Merka pa defendé kontra e atakenan.
Remarkablemente Rusia tambe a informá djamars ku tabatin atake ku drone riba Moskú ku a laga 2 persona heridá. Lo ta trata di 8 drone proveniente for di Ukrania. Un atake ku presidente di Rusia Putin ta konsiderá un provokashon serio. Segun Ukrania sinembargo lo ta trata di atake di milisianan ku no ta bou di mando di su gobièrnu. Segun Rusia e atake ey lo ta posibel dor ku vários pais ta suministrá arma avansá na Ukrania.
Organisashonnan manera WHO a kuminsá bati alarma relashoná ku atakenan riba servisionan di resktae i kuido. Na Ukrania so entretantu ya a registrá mas di mil atake riba hospital i otro servisionan di kuido.
Meskos ku e fenómeno ku nos a mira na Kòrsou siman pasá kaminda awa den kanal a bira kòrá den e dianan aki tabatin un fenómeno komparabel den e kanalnan ku ta atravesá Venesia. Eynan e awa ku ta kore dor di e siudat a haña un koló bèrdè kla. Segun outoridatnan no ta trata di nada pa preokupá ku n’e. Despues di investigashon a resultá ku e koló bèrdè ta proveniente di un supstansha biológiko usá pa inspekshoná awa i kueba.
No ta konosí ta ken ta responsabel pa e derame di e supstansha. Tin sospecho ku por ta trata di aktivistanan di medioambiente ku a hasi e awa di un fontein Venesiano pretu komo forma di protesta kontra uso di kombustibel fosil. Remarkablemente e aktivistanan a usa karbon pa e akshon ey.
Un avion di Asiana Airlines a hera di aksidentá dor di un pasahero ku a habri un porta promé ku aterisahe. E avion, un Airbus A321 ku 194 persona na bordo, tabata na kaminda pa e siudat Daegu i a logra aterisá sin ku tabatin herido. Opviamente hopi pasahero a drenta den pániko òf pèrdè rosea dor di e preshon di altura.
Despues di aterisahe outoridatnan na e sitio a detené e hòmber ku ta sospechá di a habri e porta. No tin klaridat ainda kon bin e hòmber a logra habri e porta. Ora ku un avion ta bulando e portanan ta lòk dor di e preshon di airu kontrolá na bordo.
E kantante Canades Céline Dion a definitivamente anulá tur show ku tabata sea planiá òf posponé pa otro fecha. Esaki relashoná ku un malesa neurológiko. Den un mensahe riba su website Dion ta splika ku na e momentu aki e no ta kapas di prepará pa e konsiertonan, laga para presentá.
Den desèmber kaba Céline Dion a partisipá via su account di Instagram ku e ta sufri di stiff person syndrome, un malesa ku ta afektá e sistema nervioso sentral i ku ta afektá kanamentu i kanta.
E konosido kantante Tina Turner a fayesé na 83 aña di edat. The Queen of Rock ‘n’ Roll, manera nan ta yam’é, a fayesé djarason despues di tabata kebrante di salú pa algun tempu kaba na su kas na Küssnacht, na Suisa.
Den e partisipashon di morto famianan ta elogiá Turner su forma energétiko di presentá i kanta ku su konosidó stèm heis pero semper bou di kòntròl. Turner ta drenta historia komo un dama ku tabata sa di perseverá den atversidat. Den último añanan el a sufri di tantu kanser, komo fayo di nir i atake selebral. El a rekuperá kada bes, pero e gòlpinan aki a èksigí nan preis pa su salú.
Na komienso di su karera e tabata forma un duo ku su kasá di “aquel entonces” Ike Turner. Huntu nan a skor vários hit den añanan 60 i 70 manera Nutbush City Limits, Proud Mary i River Deep – Mountain High.
Despues di nan divorsio den 1978 Tina a kontinuá ku un karera solo impreshonante ku hitnan inolvidabel manera Private Dancer, What’s Love Got to Do With It i (Simply) The Best. Durante su karera Tina Turner a risibí 8 premio Grammy i den 2021 a inkluí e leyenda aki den The Rock ‘n’ Roll Hall of Fame, esaki despues di a keda inkluí kaba den 1991 pa su trabou ku Ike.
Tina Turner a nase komo Anna Mae Bullock den 1939 na Tennessee. El a kuminsá su karera komo miembro di koro den e agrupashon The Kings of Rhythm di su èks kasá Ike. Poko despues nan a forma nan legendario duo Ike & Tina.
Tina Turner a yega di un forma pekuliar na su nòmber di artista. Su kasá Ike a registrá e nòmber Tina Turner sin informá su kasá di esaki pa asina den futuro e tabata disponé di derechinan riba e nòmber. Di e forma ey lo e por a remplasá Tina na kualkier momento i mantené e nòmber. Aparte di e abusu físiko esey tabata un di e vários forma ku Ike tabatin kòntròl riba Tina. Pero durante e proseso di divorsio wes a otorgá e kantante e derechi riba e nòmber Tina Turner.
Aparte di su karera komo kantante tambe na vários okashon nos por a disfrutá di su talento komo aktris den Mad Max Beyond Thunderdome, We Don’t Need Another Hero i e rock opera Tommy di un di e pioneronan di hard rock The Who.
Un hurado di korte na Merka ta tene èks presidente Donald Trump responsabel pa abusu seksual i difamashon den un kaso entamá pa e eskritor E. Jean Carroll. Alabes e hurado no ta ten’é responsabel pa violashon, manera e dama a akus’é. Carroll tin ku risibí segun e hurado un kompensashon di 5 mion dòler.
E hurado a argumentá ku e echo ku Trump a hasi bofon di e akusashonnan públikamente den un video a hasi daño na e dama su reputashon. Segun e eskritor Trump lo a viol’é den añanan 90 den un espasio pa kambia paña. Siman pasá dos otro dama a duna testimonio ku Trump lo a mishi ku nan di forma inapropiá. Trump ta hibando un kampaña di momentu pa pastisipá den elekshon pa presidensia di Merka atrobe.
E emisora públiko Hulandes NOS a trese su koresponsal na Rusia Iris de Graaf bèk Hulanda. Esaki pa motibunan di siguridat, di akuerdo ku NOS den un komunikado djaluna. E trabounan i reportahenan mester sigui tuma lugá for di Hulanda.
Aparentemente tabatin vários kaso di intimidashon kontra e reportero ku tabata traha na Moskú. Na e aeropuerto di e kapital di Rusia outoridatnan a interog’é basta largu riba e Korte di Hustisia Internashonal na Den Haag. Segun NOS dia pa dia ta mas difísil pa kubri e konflikto harmá entre Rusia i Ukrania.
Asina Rusia a adaptá vários lei ku ta regardá kobertura di e konflikto i tambe reporteronan ta kore riesgo di bai será pa bida largu. Algu komparabel a pasa ku e reportero pa The Wall Street Journal Evan Gershkovich. E ta detené for di 29 di mart riba sospecho di spionage.
E otro korespondiente di NOS Geert Koerkamp ta na Rusia ainda pero te asina leu no a hañ’é konfrontá ku e mesun problemanan, pero dado kaso e tambe mester bandoná Rusia, tur kos ta prepará pa esei.
World Health Organisation no ta konsiderá e pandemia di Covid-19 mas komo un situashon di emergensha. Tres aña pasá a anunsiá e kódigo di alarma mas haltu, pero e fase ey a pasa. Danki na entre otro bakunashon por a tene e situashon bou di kòntròl. Pa e anunsio ofisial di WHO, klek aki.
Kada tres luna ekspertonan tabata evaluá e situashon pa despues raportá na presidente Tedros Adhanom Ghebreyesus, ku tin e outoridat pa baha e estado di emergensha na un nivel mas abou. Den yanüari ainda WHO tabata konsiderá e pandemia un situashon di preokupashon indikando ku si mester baha e nivel di emergensha, esaki mester tuma lugá paso a paso.
Durante un diskurso Ghebreyesus a indiká ku no ta solamente un selebrashon, pero tambe un momento di reflekshon pasobra ta algu ku por pasa atrobe i nos mester ta prepará. Dado ku e bahamentu di nivel di emergensha no ta nifiká mesora fin ofisial di e pandemia, ainda tin programanan di bakunashon andando.
Segun sifranan ofisial un poko ménos di 7 mion persona a muri dor di Covid-19, pero tin sospecho ku por ta trata di mas hende, esta 16.6 mion. Tambe tin esnan ku a fayesé dor di e efektonan negativo di e pandemia riba kuido den vários pais. Durante e pik di e pandemia den yanüari 2021 alrededor di 100 mil persona tabata muri semanalmente.
WHO a finalisá e anunsio ku 7 rekomendashon:
Paisnan mester saka lès for di e pandemia i prepará pa futuro insidensianan ku medidanan pa evitá pániko i negligensha.
Mester integrá bakunashon kontra Covid-19 den programanan koriente di bakunashon riba nivel lokal.
Mester kompilá tur informashon disponibel relashoná ku organismonan ku ta afektá nos sistema respiratorio pa krea mas konsientisashon.
Paisnan mester ta prepará den sentido legislativo pa tuma kontramedidanan na tempu ora esaki ta nesesario.
Mester sigui dialogá ku komunidatnan i nan lidernan pa garantisá koperashon i komunikashon pa hasi e respektivo komunidatnan mas fuerte, resiliente i inklusivo pa formulá programanan di maneho efisiente.
Alivio di medidanan relashoná ku biahe mester kontinuá, pero teniendo kuenta ku riesgonan ku por lanta kabes.
Mester sigui sostené investigashon ku ta mehorá bakuna ku ta limitá transmishon i ku por apliká integralmente sin riesgo.
