E aktris Merikano Kirstie Alley a fayesé den mardugá di djaluna pa djamars. Asina su yunan a konfirmá riba Twitter. Resien a konstatá kanser serka Alley.
E aktris a haña hopi akohida internashonal despues di su ròl den e serie North and South (1985), un serie riba e guera sivil na Merka. Pero su berdadero breakthrough tabata su ròl komo Rebecca Howe den e serie humorístiko Cheers. Na su pik di popularidat el a partisipá tambe den e pelíkula Look Who’s Talking, huntu ku John Travolta.
Alley a gana vários premio durante su karera, inkluso un Golden Globe pa su ròl den Cheers i un Emmy pa su protagonisashon den e perlíkula David’s Mother.
Direktor James Cameron tin un reto basta grandi su dilanti ku lansamentu di Avatar: The Way of Water, e siguiente kapítulo di e pelíkula 3D Avatar di 2009. E gastunan pa Avatar: The Way of Water a resultá asina haltu ku e pelíkula mester generá por lo ménos $2.200,- mion (2.200.000.000 dòler) pa “break even”, o sea hasi sufisiente ganashi pa gana e gastunan bèk.
Den e otro palabra Avatar: The Way of Water mester bira e di 3 òf den mihó kaso 4 pelíkula mas eksitoso den historia pa por papia di un éksito finansiero. Asina direktor James Cameron mes a konfirmá na e revista digital GQ. The Way of Water a resultá un obra basta karo pa produsí, Cameron ta rekonosé. Cameron mes no a menshoná kuantu sèn a kosta pa produsí Avatar: The Way of Water, pero for di su palabranan mester konkluí ku e pelíkula mester a kosta alrededor di $1.000 mion.
E promé pelíkula Avatar, ketu bai ta e pelíkula mas eksitoso den historia ku un benta mundial di $2.900,- mion (sin konta inflashon), siguí pa Avengers: Endgame ku un benta di $2.800,- mion mundialmente (sin konta inflashon). Na di tres lugá ta sigui Titanic ku $2.200,- mion i Star Wars: The Force Awakens ku $2.000 mion (ámbos sin konta inflashon). Dje tantu plaka ei The Way of Water mester bai generá. E promé Avatar lo a kosta segun estimashonnan alrededor kasi $400 mion.
16 di desèmber ta lansamentu mundial di Avatar: The Way of Water.
E konosido aktor retirá Michael J. Fox a risibí un premio Oscar honorario durante e asina yamá Governors Awards na Los Angeles. A otorgá Fox e premio pa su trabou pa kombatí e malesa Parkinson, rekohiendo mas di mil mion dòler na fondo pa desaroyá un trato p’e malesa. E aktor di entretant 61 aña a tende den 1991 ku e tambe tin Parkinson.
Fox a risibí e premio di su kolega Woody Harrelson ku a bisa di e aktor ku nunka el a pidi pa e ròl aki, pero ku e premio ta na su lugá si konsiderá kuantu el a logra ku su aktivismo.
Michael J Fox ta konosí di vários serie i pelíkula, en partikular Back to the Future. Durante su karera el a risibí entre otro 5 premio Emmy, 4 Golden Globe i un Grammy. Pero nunka pa un Oscar. Den 2020 el a retirá definitivamente for di mundu di sine ku lansamentu di su buki No Time Like the Future.
“Black Adam” di Warner Bros. / DC tabata ketu bai pará na number 1 na box office un wikènt mas promé ku lansamentu di “Black Panther: Wakanda Forever” djabièrnè último. Asina e website The Wrap a publiká. Ku e logro aki “Black Adam” a generá $18.5 mion riba nivel lokal butando e resultado total na $137 mion despues di tres siman.
Sinembargo tin problema ku lansamentu di e pelíkula na China, loke por resultá den e mesun problema ku e pelíkula di Marvel “The Eternals”. Den total último título ei a alkansá e mesun montante aña pasá riba nivel doméstiko. I “Black Adam” ta parse di alkansá $164 mion riba nivel doméstiko i $400 mion riba nivel mundial.
E serie popular riba Netflix The Witcher ta bai haña un di 4 temporada. E temporada nobo aki sinembargo lo kontinuá sin protagonista Henry Cavill ku ta hunga e papel di yagdó di mònster Geralt of Rivia. Liam Hemsworth (ruman di Chris Hemsworth alias Thor den e pelíkulanan di Marvel) a keda anunsiá komo remplasante di Henry Cavill.
Siman pasá Cavill a anunsiá den un video riba Instagram ku e ta bin bèk pronto den su ròl komo Superman. E aktor Ingles a hunga e paprel di Clark Kent (alias Superman) entre otro den Batman v Superman: Dawn of Justice (2016) i Man of Steel (2013).
