by Webmaster | 01/11/2022 | Internashonal
Un kantidat deskonosí di bishitante ta será den Disneyland Shanghai. E parke mester a sera inmediatamente despues ku outoridatnan a anunsiá un lockdown nobo. Esaki despues ku a detektá 10 kaso nobo di kontagio ku Covid-19 den e siudat. E bishitantenan tin mag di bandoná e parke solamente si nan por presentá un tèst negativo. Despues di esei nan ta opbligá di hasi tèst tres dia siguí. Di momentu tin alrededor di 200 lockdown vigente na China.
by Webmaster | 31/10/2022 | Internashonal
Luiz Inácio “Lula” da Silva a gana e di 2 ronda di elekshon presidensial na Brasil. Segun e último konteo ayera nochi Lula a optené kasi 51% di votonan, un viktoria nèt nèt ku ta hasi’e presidente di e pais atrobe. Su kontrinkante Jair Bolsonaro a optené 49,2% di votonan.
Lula tabata presidente di e pais entre 2003 i 2010 i a primintí su votadónan ku lo e bai bèk na su maneho anterior, ku énfasis riba protekshon di esnan mas vulnerabel i anulashon di eksplotashon di Amazona.
Su atversario Bolsonaro a antisipá riba un posibel derota i a anunsiá promé ku elekshon ku lo e laga investigá e proseso di elekshon.
by Webmaster | 31/10/2022 | Internashonal
E evento djasabra último na Seul – kapital di Sur Korea – kaminda 153 persona a fayesé a keda okashoná pa un estampida den un kaya smal. Asina testigunan a deklará na agensia di prensa Yonhap. E tragedia a tuma lugá na e área di rekreo i salimentu Itaewon kaminda lo tabatin alrededor di 100 mil persona presente pa selebrá Halloween.
E víktimanan a muri dor di pushamentu ku a surgi den un kaya smal ku ta bai abou. E aña aki tabata promé biaha atrobe ku por a asistí sin medidanan pa evitá propagashon di Covid-19. Outoridatnan a duna di konosé durante un deklarashon ku promé ku e pandemia nunka nan no a haña nan konfrontá ku tantu hende na e evento.
Ekspertonan internashonal a bisa a base di grabashonnan ku ta sirkulá riba internèt ku polis no tabata prepará pa e kantidat di hende.
by Webmaster | 31/10/2022 | Internashonal
Eksportashon di grano for di Ukrania ta kompletamente paralisá atrobe. Esaki despues ku Rusia a hala atras for di un akuerdo pa fasilitá eksportashon for di e pais. Mas di 10 barku di transporte ta konsekuentemente mará. Rusia ta kulpa Ukrania di a ordená un atake ku drone riba barkunan di marina pegá ku e siudat Sebastopol na Krimea.
Nashonnan Uní ta pronostiká problema ku suministro di alimento den sierto parti di mundu ku por resultá den un krísis. Riba 22 di yüli último e dos paisnan a yega na un akuerdo pa fasilitá eksportashon di grano for di Ukrania. E dil mester a vense originalmente riba 19 di novèmber.
