by Webmaster | 18/09/2023 | IT, Apps & Social Media
E supervisor di privacy na Irlanda a imponé un but di 345 mion euro riba e plataforma TikTok. E kompania lo no a hasi sufisiente pa protgé e privacy di muchanan Oropeo.
Segun e Data Protection Commission na Irlanda videonan ku mucha ta buta riba TikTok ta standart ahustá pa buta kontenido públiko hasiendo e muchanan asina vulnerabel pa hende ku nan no konosé. TikTok lo no a informá riba esaki i tampoko nan no tabata na altura ku tur hende por mira nan videonan.
E funshon Family Pairing, esta e funshon pa akoplá e account di e mucha na esun di su mayornan, tambe tabata funshoná malu. Asta terseronan por a hasi esaki ku e account di muchanan. E sede Oropeo di TikTok ta keda na Irlanda. Pa e motibu ei e medida a keda imponé na Irlanda mes.
Por sierto ku vários supervisor Oropeo lo ta siguiendo i vigilando e efektonan di inteligensha artifisial riba mucha, inkluso na Hulanda. Lo ta trata di e funshon di inteligensha artifisial di un app konosí, pero ainda no a revelá di kua app ta trata.
by Webmaster | 15/09/2023 | IT, Apps & Social Media
Usuarionan di WhatsApp por awor risibí aktualisashon di persona òf organisashon via kanalnan spesial diseñá pa e plataforma. E funshon aki no ta funshoná meskos ku grupo: e siguidónan por solamente lesa mensahe.
Propietario di WhatsApp Meta a tèst e funshon aki for di yüni na Colombia i Singapur i ta kla awor pa lans’é ofisialmente den 150 pais mas. Persona públiko i organisashonnan por usa e kanalnan pa mantené nan siguidónan na altura di nan aktividatnan. Asina bo por risibí e últimonan updates di un artista òf klup di deporte ku bo ke sigui.
E mensahenan lo drenta den un sekshon separá den WhatsApp. Usuarionan por buska e kanal riba nan telefòn i inskribí grátis. Kanalnan di WhatsApp lo filtra outomátikamente a base di e pais kaminda bo ta biba. Tambe bo por indiká si bo kier mira e kanalnan mas nobo, mas aktivo òf mas popular.
Usuarionan lo por reakshoná solamente ku emoji riba e mensahenan den e kanalnan ku despues lo keda registrá pa otro usuarionan mira e kantidat di reakshonnan. Updates ta keda disponibel 30 dia i despues ta keda eliminá outomátikamente.
Number di telefòn tampoko lo ta visibel. Tur number di manehadónan di kanal i siguidó ta keda privá. Pronto e funshon lo bira visibel den bo WhatsApp.
by Webmaster | 12/09/2023 | IT, Apps & Social Media
Consumentenbond na Hulanda a kuminsá un kaso kontra Google. E forma ku Google ta kolekshoná datonan di usuario ta bai kontra reglanan Oropeo di privasidat. Consumentenbond ta èksigi un kompensashon di 750 euro pa kada usuario.
E organisashon pa konsumidó Hulandes a anunsiá e kaso for di mei i awor ta bai sigui ku e plan. Alrededor di 82.000 konsumidó a uni ku Consumentenbond.
E kaso ta embolbé anunsionan pagá. Google ta bende espasio di propaganda riba website di komersiante ku usuarionan ta mira despues ora nan bishitá. E anunsionan ta sali outomátikamente pero dor di cookies, Google sa ku usuarionan ta buska, por ehèmpel, un wasmashin òf outo nobo.
Consumentenbond tin sosten tambe di Stichting Bescherming Privacybelangen. Na mart Consumentenbond a gana un kaso kaba kontra Facebook siguiendo reklamonan komparabel di usuario.
by Webmaster | 06/09/2023 | IT, Apps & Social Media
Union Oropeo a klasifiká 6 kompania teknológiko grandi komo entidatnan asina poderoso ku konsumidónan prakátikamente no por evitá nan. Pa e motibu ei e kompanianan aki mester kumpli ku reglanan mas estrikto i manehá nan responsabilidatnan korektamente.
Ta trata di e kompanianan Alphabet, Amazon, Apple, ByteDance, Meta i Microsoft. Komishon Oropeo ta yama e kompanianan aki di awor i dilanti ‘gatekeepers’ pasobra nan ta forma básikamente e entrada prinsipal di konsumidónan na servisionan importante manera TikTok, Facebook, Google Maps i WhatsApp.
Aparte di e 6 kompanianan tambe a identifiká 22 servisio ku ta kai bou di nan ku ta konsiderá inevitabel den bida diário i trabou. Resien e kompanianan a haña mitar aña pa kumpli ku un lista di rekerimentu pa evitá abusu i dependensha di nan. Tambe usuarionan di servisionan importante mester haña mas opshon i libertat den e servisionan nan ku nan kier usa.
Microsoft i Apple no ta di akuerdo ku e klasifikashon aki. Nan ta argumentá ku nan servisionan iMessage (Apple) i Bing, Edge i Microsoft Advertising (Microsoft) no ta kai bao di selekshon di Komishon Oropeo. E kompanianan a apelá e desishon. E dokumento kompleto ta disponibel aki.
by Webmaster | 05/09/2023 | IT, Apps & Social Media
E aplikashon di video TikTok ta bai warda e datonan di usuarionan Oropeo den un datacenter nobo na Dublin, Irlanda. Segun e ret sosial asin’akí e ta den kumplimentu ku reglanan di privasidat.
E regulashon Oropeo ta stipulá ku kompanianan no por simplemente warda dato di hende pafó di Oropa. Esei ta pèrmití solamente si e lei di privasidat di e respektivo pais ta por lo menos mesun severo ku na Oropa.
Anteriormente TikTok tabata warda e datonan di usuarionan Oropeo na Singapur i Merka, pero den e paisnan ei e reglanan di privasidat ta ménos severo. Esei ta nifiká ku tin un posibilidat ku, por ehèmpel, e gobièrnunan ei por pasa dor di dato di hende.
Den e datacenter Oropeo “solamente empleado aprobá tin akseso limitá na sierto dato” di akuerdo ku TikTok. Aparte di e datacenter na Dublin, TikTok ta trahando datacenter tambe na Norwega i un otro sitio na Irlanda. E sede Oropeo di TikTok tambe ta lokalisá na Dublin.
by Webmaster | 29/08/2023 | IT, Apps & Social Media
China lo a usa kasi 7700 spam account riba Facebook i Instagram pa influenshá hende den otro partinan di mundu. Meta, e kompania propietario di e plataformanan, a kaba di tene e limpiesa mas grandi den su historia di akuerdo ku medionan internashonal.
Segun Meta e accountnan tabata sirbi pa glorifiká China den tur sintí i kritiká e forma ku hende ta biba den paisnan den parti wèst. Mas aleu e kompania di Mark Zuckerberg ta argumentá ku plataformanan manera TikTok, YouTube i X (ántes Twitter) tambe ta kontené un kantidat enorme di account ku ta sirbi e mesun propósito.
Servisionan di inteligensia na China lo ta tras di e operashon di espionage masivo aki. Riba retnan sosial i den medionan internashonal ta papia di ‘Spamouflage’, un operashon pa influenshá habitantenan di otro pais. Ku e limpiesa aki Meta kier a deshasí di e accountnan aki. No ta konosí si otro plataformanan online lo tuma e mesun paso.
by Webmaster | 25/08/2023 | IT, Apps & Social Media
E plataforma OnlyFans tabata konta 3.2 mion kreadó di kontenido na kabamentu di aña pasá. Esei ta dos biaha e kantidat di e aña anterior. E kantidat di fanátikonan tambe a krese eksplosivamente: entretantu tin kasi 240 mion usuario rònt mundu. Esei ta bon pa un resultado di mas di 5 mil mion dòler.
Riba OnlyFans tin un variedat di kreadónan di kontenido di trahadónan den industria seksual te na selebridat i artista. E plataforma tin e reputashon di ta un plataforma kaminda ta paga pa wak kontenido seksual. Pero en prinsipio e plataforma ta kreá pa mas ku esei so. Kreadónan di kontenido ta haña 80% di loke nan fanátikonan ta paga, e otro 20% ta bai pa OnlyFans.
by Webmaster | 18/08/2023 | IT, Apps & Social Media
Inteligensha artifisial por ‘rei’ bo password. Investigadónan a konkluí den un estudio resien ku Inteligensha artifisial por rei bo password ku un probabilidat di mas di 90%. E investigashon ta kondusí pa e universidat di Surrey na Inglatera.
A resultá ku inteligensha artifisial por saka afó kiko ta bo password a base di e sonido di e keyboard di bo computer. Esaki opviamente ta trese riezgonan di siguridat ku n’e. E investigadónan a tèst esaki dor di tek riba e keyboard di un MacBook Pro 25 biaha na diferente manera.
E sonidonan ta grabá ku tantu e programa Zoom komo un smartphone. Despues a pasa e grabashon di e sonidonan den un sistema di Inteligensha Artifisial ku despues di un par di okashon por a rekonosé e sonido di e keyboard di e MacBook menshoná anteriormente.
Nan no por determiná kon e sistema ta logra interpretá i prosesá e sonidonan, pero ta definitivamente sigur ku e sistema ta rekonosé kada sonido separá. Loke por hunga un ròl por ehèmpel ta otro sonidonan den serkania di e keyboard. Pa logra esaki esnan ku ke haña akseso na bo computer mester ta sufisiente serka di e aparato.
by Webmaster | 11/08/2023 | IT, Apps & Social Media
Twitter ta definitivamente algu di pasado. Propietario Elon Musk a buta tur opheto ku e logo di e para na benta, inkluyendo e bòrchi grandi parti dilanti di e sede di e kompania. Pa kita esaki Musk mester haña pèrmit ainda paso e trabounan lo tuma lugá den espasio públiko. Por sierto ku esun ku ke kumpra e bòrchi lo mester kubri e gastunan tambe pa kit’e.
Na total ta trata di 584 artefakto manera mesa, pinturanan di Tweet ku a bira viral i asta algun instrumento musikal. E artefaktonan lo ta na benta a partir di 25 dòler via un findishi online. E findishi ta planiá pa 12 di sèptèmber. Mas informashon lo sigui.
by Webmaster | 11/08/2023 | IT, Apps & Social Media
X, e kompania anteriormente konosí komo Twitter, a tuma su promé paso pa transformá den un app ku por tur kos. X ta bini awor ku e posibilidat di videocall i transferensha di sèn. Asina e direktor di X Linda Yaccarino a bisa den un entrevista na CNBC. Manera ta konosí Yaccarino a kuminsá resien komo direktor di Twitter pa asina transformá e kompania.
Segun rumornan Elon Musk, proietario di Twitter (awor X), lo ke transformá X den un all-in-one app komparabel ku WeChat na China. Esei ta un plataforma ku den su base ta un app pa chat, pero ku hopi funshon adishonal, manera online shopping, notisia, fiansa i bestèl kuminda òf un taksi. Konhuntamente e funshonnan ei ta forma e super app WeChat.
X ke bai pues den e mesun direkshon pa bira un plataforma ku interaktividat sin límite. I mas ku klaro ta bai tin un ròl tambe pa inteligensha artifisial.
by Webmaster | 10/08/2023 | IT, Apps & Social Media
X, e kompania anteriormente konosí komo Twitter, mester paga un multa di 350.000 dòler. E kompania a tarda ku suministro di informashon na korte relashoná ku un investigashon kontra èks presidente di Merka Donald Trump.
Ta trata aki di e investigashon si Trump a trata di influenshá e resultado di elekshon den 2020. Na yanüari fiskal a haña aprobashon pa solisitá informashon riba e account di Twitter di e èks presidente. Wes a konsiderá ku tabatin sufisiente motibu pa kontrolá e account, pero no ta konosí kiko eksaktamente fiskal ta buskando.
X (Twitter) a apelá i indiká 4 dia despues ku e plaso pa pasa e informashon a vense ku e no ta bai desvelá e informashon. E apelashon a keda rechasá, pero no ta konosí si e plataforma ta bai koperá òf nò. Aparte di esei mester bisa ku miéntras e account di Trump ta disponibel atrobe, Trump no a bolbe usa esaki mas.
by Webmaster | 08/08/2023 | IT, Apps & Social Media
Un grupo di hacker na Rusia a hiba un atake riba vários website Hulandes i logra baha esakinan. Ta trata entre otro di e website di Maastricht Aachen Airport i e asosiashon di kompanianan di transporte públiko ku no tabata aksesibel djaluna.
Ta trata di un asina yamá DDOS attack, kaminda e server di e website ta keda inundá ku traffic hasiendo esaki inaksesibel pa otro usuario. Pa djaluna anochi e website di e airport di Maastricht tabata funshoná atrobe i operashonnan por a kontinuá kompleto atrobe. E atake en todo kaso no tabatin efekto riba e tránsito aério. Meskos ta konta pa e kompanianan di transporte públiko.
E atake lo ta konsekuensha di e desishon di Hulanda pa sostené Ukrania ku barku i otro material militar. E grupo NoName0571 ta tras di e atake i ta responsabel pa vários atake sibernétiko riba aliadonan di Ukrania. Asina tabatin atakenan tambe riba website di De Rechtspraak, Eerste Kamer i e hafanan di Rotterdam, Amsterdam, Den Helder, Eemshaven/Delfzijl i Vlissingen/Terneuzen. Na e okashonnan ei e atakenan tampoko a afektá e operashonnan diário di e respektivo instanshanan.
by Webmaster | 03/08/2023 | IT, Apps & Social Media
Si ta na e departamentu di supervishon na China denter di poko tempu muchanan bou di 18 aña na China no ta haña mas ku dos ora akseso na internet. E supervisor Chines entretantu a traha un proposishon pa implementashon. Ta trata di un kontinuashon di un maneho ku China ta hiba pa un par di aña kaba.
E reglanan proponé ta bai asina leu ku muchanan bou di 8 aña no ta haña mas ku 40 minüt akseso na internet. Muchanan den e edat di 8 pa 16 aña ta haña pa mas tantu 1 ora akseso na internet. Hóbennan entre 16 i 18 aña ta haña 2 ora akseso. Entre 10or di anochi i 6or di mainta menornan di edat no tin akseso na internet.
Fabrikantenan di tablet i smartphones na China ta obligá na inkorporá e limitashonnan aki pa usuarionan di internet por kumpli ku e reglanan. Ta asina si ku mayornan ta haña e posibilidat pa desaktivá e limitashonnan di tempu. Ta antisipá ku hopi mayor lo hasi uso di e posibilidat ei. Aparte di esei e medidanan aki ta rekerí hopi esfuerso i kapital di plataformanan di internet na China.
Por lo pronto ta trata di un proposishon, pues no tin klaridat si gobièrnu di China berdaderamente lo implementá e reglanan aki. China ta hiba un maneho pa promové i stimulá un uso sano di internet i alabes kombatí adikshon na internet.
No ta promé restrikshon ku gobièrnu di China ta imponé. For di 2021 muchanan tin pa mas tantu 3 ora pa siman akseso na online games i for di aña pasá nan no tin akseso mas na internet despues di 10or pa wak livestreams.
by Webmaster | 03/08/2023 | IT, Apps & Social Media
Nunka e kompania Nintendo a hasi mes tantu ganashi manera den e di dos kuartal di e aña aki. Den último tres luna Nintendo a gana alrededor di 1300 mion dòler.
Motibu prinsipal pa esaki ta e ganashi generá for di benta di e game Zelda: Tears of the Kingdom. For di su lansamentu den mei Nintendo a bende 18.5 mion kopia di e game. E éksito di Zelda tabatin un efekto positivo tambe riba e benta di e console Nintendo Switch. Na total Nintendo a bende 3.9 mion unidat di Switch.
Loke a kontribuí pa un gran parti tambe ta e éksito di e pelíkula The Super Mario Bros Movie. Mundialmente 168 mion persona a bai wak e film.
Konsekuentemente e resultado komersial di Nintendo a subi di 2160 mion dòler aña pasá te 3230 mion dòler e aña aki. Tambe tin rumornan ta bai rònt ku Nintendo ta diseñando un console mas avansá ku Nintendo Switch, pero detayenan no ta konosí.
by Webmaster | 01/08/2023 | IT, Apps & Social Media
X, e kompania te ku resien konosí komo Twitter, a bai korte ku un organisashon ku ta hiba kampaña kontra plamamentu di odio via internèt. Segun e kompania e asina yamá Center for Countering Digital Hate (CCDH) lo ta mina libertat di ekspreshon. I esei miéntras X lo ta hasiendo su máksimo esfuerso pa hende por bisa loke nan ta pensa.
Den un blòg X a skirbi ku e ta hasi su máksimo esfuerso tambe pa kombatí mensahenan di odio riba e plataforma anteriormente konosí komo Twitter. Sinembargo Center for Countering Digital Hate (CCDH) lo ke influenshá diskushon públiko i pa e motibu ei X ta bai korte ku nan.
Den e demanda X ta akusá Center for Countering Digital Hate (CCDH) di ta ataká tur persona ku no ta di akuerdo ku nan prinsipionan i tambe e organisashon lo a optené datonan di X di un forma ilísito pa finalmente por hasi mal uso di esaki. Tambe e organisashon lo a hiba un kampaña pa kombensé invershonista pa no buta anunsio komersial mas riba Twitter.
