Sientífikonan Chines i Canades a deskubrí un fósil ku ta sugerí un mamífero mordiendo un dinosourio. Lo ta algu úniko ya ku semper e impreshon tabata ku mamífero no ta forma menasa pa dinosourio. E estudio ta publiká den e revista Nature.
E fósil tabata bou di investigashon for di 2012 ora a deskubrí esaki na e provinsia Chines Liaoning, un lugá kaminda tin hopi fósil volkanisá. E skèlètnan tabata práktikamente intakto. Despues di un serie di kálkulo a konkluí ku e fósil ta berdadero i lo tin mas o ménos 100 pa 125 mion aña.
E mamífero tin e tamaño di un pushi komun i koriente, loke tabata e tamaño máksimo pa mamífero den e époka ei. E presa ta un dinosourio bebi di e tipo psittacosaurus, un tipo ku tabata kome vegetal so. E diseño mas abou ta duna un impreshon di e look di e animalnan.
