E lider di e ehérsito di mersenario Wagner Group Yevgeny Prigozhin a yega Belarus. Asina presidente di e pais Aleksander Lukashenko a deklará na prensa Belaruso. Manera ta konosí Yevgeny Prigozhin por a konta ku protekshon di gobièrnu di Belarus a kambio di anulashon di e lantamentu kontra presidente di Rusia Vladimir Putin den wikènt tras di lomba.
Wagner Group tabata sostené ehérsito di Rusia na Ukrania, pero segun e grupo na vários okashon Rusia no tabata tene kuenta ku nan presensia durante sierto atake, loke a resultá den morto di mersenario. Esey tabata motibu den wikènt pa e grupo marcha den direkshon di Moskú pa atendé ku Vladimir Putin.
Pero despues di intermediashon di Belarus e grupo di mersenario i Rusia a akordá ku e mersenarionan lo no keda pèrsiguí. Na algun di nan a ofresé kontrakt pa djòin ehérsito di Rusia. Otronan lo no keda pèrsiguí i lo por bai bèk nan famianan.
Apesar ku e impase a kaba sin derame di sanger, hopi pregunta a keda habrí. Asina tabatin okashon kaminda e lider di Wagner Group lo a bisa ku e no ke pa su ehérsito disparsé, pero alabes tabatin plannan konkreto pa tur ehérsito privá keda inkorporá den esun di Rusia entrante promé di yüli.
Mas aleu e mersenarionan ku no a bandoná Wagner Group a haña un base temporal na Belarus. Belarus ta desmentí ku e base aki ta pa konsentrá e mersenarionan na un lokalidat pa vigilá nan.
Wardakosta Merikano ta bai saka e pidanan di e supmarino Titan for di profundidat pa mas investigashon. A base di esaki lo determiná si un hende mester para responsabel pa e insidente i ken lo mester paga un kompensashon. Ku e pidanan ku nan haña bèk nan lo por determiná kiko presis a bai robes i okashoná e probabel imploshon. No ta konosí kon largu e operashon ta bai dura. Ta teniendo kuenta ku kisas por haña restunan di e víktimanan.
Apesar di investigashonnan ekstenso servisionan di inteligensha na Merka no a logra haña prueba konkreto ku e vírus ku ta okashoná Covid-19 ta proveniente di un laboratorio na e siudat Chines Wuhan. Asina e korant The Guardian a publiká a base di un rapòrt di Office of the Director of National Intelligence (ODNI).
E konklushon aki ta kontradesí deklarashonnan anterior di hefe di FBI Christopher Wray kende a indiká anteriormente ku tin indikashonnan hopi fuerte ku ta den un laboratorio na Wuhan mes e vírus a lanta kabes. Por sierto ku ta FBI so ta sigui e teoria ey.
E rapòrt aktual di ODNI ta bisa ku teorétikamente e vírus por ta bin di un laboratorio, pero e prueba pa esaki simplemente no ta èksistí. A hasi vários investigashon na Wuhan Institute of Virology sin resultado. E servisio ta rekonosé ku tin poko koperashon di parti di China.
Otro servisionan di investigashon na Merka tampoko no ta kompartí e sospechonan di FBI i ta asumí meskos ku World Health Organisation ku ta trata di un vírus ku a pasa di animal pa hende.
Presidente di Rusia Vladimir Putin a gradisí e mersenarionan di Wagner Group pa anulashon di nan marcha pa Moskú. Di e forma ey a evitá derame di sanger di akuerdo ku Putin durante un diskurso na televishon.
E diskurso aki ta sigui despues ku den wikènt e tropanan mersenario di Wagner Group, ku tabata sostené Rusia su invashon di Ukrania, a lanta kontra e presidentte di Rusia i marcha den direkshon di Moskú pa un konfrontashon ku Putin. E grupo di mersenario ta tene Putin responsabel pa vários atake riba nan.
Despues di un intermediashon di parti di presidente di Belarus Alexander Lukashenko lider di Wagner Group Yevgeny Prigozhin a disidí para e marcha. A kambio Putin a fasilitá kontrakt nobo pa mersenarionan ku kier forma parti di ehérsito di Rusia, sobrá mester emigrá pa Belarus kaminda a primintí nan protekshon di gobièrnu.
No tin klaridat kon e suseso aki lo afektá e operashonnan di Rusia na Ukrania.
E reglanan pa keda nominá pa un Oscar pa mihó film a bira mas severo ainda. Entrante 2025 pa un pelíkula tin un chèns di keda nominá e film mester a drai mas tantu tempu den teaternan ku aworakí. Pa otro kategorianan tur kos ta keda meskos. Entrante 2025 e film mester a drai por lo ménos un siman den teaternan grandi na sea New York, Los Angeles, San Francisco, Chicago, Miami òf Atlanta.
Aparte di e eksigensia ey e film mester a estrená den por lo ménos 10 otro siudat Merikano. Ku e medida aki Academy of Motion Picture Arts and Sciences ke logra pa solamente pelíkulanan ku berdaderamente ta traha pa sali den teater keda nominá. Konsekuentemente pelíkulanan ku ta sali riba servisionan di streaming manera Netflix i Amazon Prime no tin chèns di keda nominá. E medida aki ta sigui despues ku e pelíkula CODA riba e servisio di streaming di Apple a gana un Oscar dos aña pasá. Esey a resultá den basta protesta bou di direktornan renombrá ku ta konsiderá streaming parti di televishon.
No ta promé kambio den e reglanan pa mihó film. Asina tin kondishonnan mará tambe na porsentahenan obligatorio di minorianan ku a kolaborá na e obra pa e por keda nominá. Asina por lo ménos 1 di e protagonistanan di e film MESTER ta sea un persona di koló, hende muhé, un miembro di e komunidat LGBTQ òf deshabilitá òf e pelíkula mester trata un tema relashoná ku un di e gruponan ey. Sino e pelíkula lo no yega na remarke pa un nominashon.
E medida ey a sigui despues di hopi krítika na un okashon ku tabatin un pelíkula so nominá ku tabata inkluí persona di koló. Pero e medida no tin un efekto positivo riba sintonia. E oudiensia pa e premionan Oscar ta kada aña mas abou. For di 2014 e publiko ku ta sintonisá pa wak e otorgashon di premio a baha di kasi 43.7 mion televidente te na 18.7 mion televidente e aña aki. 2 aña pasá e sintonia tabata na su punto mas abou, esta 10.4 mion televidente.
Un dama Merikano i su yu ku no a nase ainda a pèrdè nan bida siman pasá na Ohio despues ku su otro yu di 2 aña a tir’é aksidentalmente ku un pistol. Asina vários medio Merikano a publiká.
E yu lo a haña e arma den kamber di su mayornan ora ku su mama tabata laba paña. E mama a logra yama polis i a keda trasladá pa hospital, pero e intentonan pa salba mama i yu no tabatin resultado.
Polis a bin haña no solamente e arma ku e mucha a usa, pero tambe 2 otro arma kargá ku ta pèrtenesé na e tata ku no tabata na kas na e momentu ey. Segun kálkulonan alrededor di 40% di hogarnan na Merka ta disponé di arma di kandela ku manera den e kaso aki no ta semper ta wardá na un lugá sigur.
Posiblemente marina di Merka a kapta e sonido di e imploshon di e supmarino Titan for di djadumingu. Esey lo a pasa algun ora despues ku e supmarino a baha den awa. Asina e korant The Wall Street Journal a publiká a base di funshonarionan ku a yuda ku e búskeda.
Segun un kolaboradó di e ministerio di defensa Merikano marina a kuminsá sigui sonido sospechoso despues ku a pèrdè kontakto ku e supmarino, pero ya lo a nota un sonido sospechoso kaba n’e sitio kaminda el a pèrdè kontakto.
Tòg a disidí start un búskeda pa falta di mas informashon. Sinembargo djaweps wardakosta Merikano a konfirmá ku ta trata ku tur probabilidat di un imploshon despues ku a lokalisá algun parti di e nave.
E búskeda pa e supmarino Titan di Oceangate Expeditions entretantu a pasa su fase krusial. E timnan di búskeda ta asumí ku e oksígeno disponibel na bordo ta agotando, kisas ya el a kaba entretantu. Mas detaye no ta konosí pasobra no tabatin komunikashon ku e supmarino for di djadumingu, pues ta difísil determiná kon nan a hasi uso di e oksígeno disponibel. E komunikashon a kibra 2 ora despues ku e supmarino a sali pa eksplorá e ruinanan di Titanic. Konsiderando e echonan aki speransa a baha ku e pasaheronan ta bai sobrebibí.
Algun otro desaroyo riba djaweps a reforsá e idea ey.
E trabounan di búskeda a kontinuá te den oranan lat di mardugá entre djarason i djaweps. Merka, Reino Uní, Canada i Fransia a uni forsa den e esfuersonan. Djaweps a kontinuá ku e trabounan di búskeda te ora a bin haña algun parti di e supmarino. Ta trata di e frame di aterisahe i e klèp parti patras di e supmarino. Di otro partinan hañá tin indikashon ku kisas un imploshon a tuma lugá. Den kaso di un imploshon, kontrali pues na un eksploshon, e forsa di preshon ta dirgí di pafó paden. Den tal kaso ta bira mas difísil pa lokalisá e nave òf otro partinan di dje.
Mester tene kuenta ku akaso haña e supmarino mes, un senario kada bes mas improbabel, lo dura basta ora promé ku por sak’é for di e profundidat kaminda e ta lokalisá. Di momentu ta usando robòt ku por baha te 6 kilometer bou di awa pa lokalisá e posishon eksakto kaminda a pèrdè e supmarino. Anteriormente un di e avionnan ku ta sirkulando riba e region a kapta sonido den e área, pero e posishon eksakto di e orígen di e sonidonan aki no ta konosí.
Di e pasaheronan ta konosí ku ta trata di fundadó i direktor di e kompania OceanGate Stockton Rush, e multimionario i aventurero Britániko Hamish Harding, e komersiante Pakistani Shahzada Dawood i su yu Suleman.
E kapitan di e barku ta e Franses Paul-Henri Nargeolet ku a hasi ekspedishon i eksplorá Titanic na 35 okashon den pasado. Hopi di e imágennan aktual di Titanic ku nos ta disponé di dje ta danki na e kantidat ekstenso di eksplorashonnan ku figuranan manera Paul-Henri Nargeolet a hasi den pasado.
Durante un rueda di prensa djaweps alrededor di 3or di atardi Wardakosta di Merka a informá ku a base di e echonan konosí te asina leu tin poko speransa ku lo rekobrá e pasaheronan na bida.
Tabatin atvertensha ku algu por bai robes riba un dia ku e supmarino di OceanGate Expeditions. Asina vários professional ku eksperensha ku ekspedishon bou di awa i tambe èks gerente di e kompania a atvertí kaba for di 2018.
David Lochridge tabata e direktor di operashon. For di 2018 el a indiká ku tin problemanan di siguridat ku e supmarino. Asina e kòntròl i protokòl di siguridat tabata laga hopi di deseá. Lochridge lo a haña retiru pa su krítika riba e diseño di e supmarino. Den un kaso den korte el a te asta indiká ku sierto tèst obligatorio no a tuma lugá.
Den e mesun aña ey e korant The New York Times a publiká un artíkulo kaminda mas di 30 eksperto i spesialista den ekspedishon bou di awa a dirigí nan mes na Stockton Rush, ceo di OceanGate i un di e pasaheronan ku pues ta pèrdí. Na e okashon ey nan tur a indiká ku riba un dia algu lo bai hopi robes.
A registrá mas atake di orka riba barkunan di plaser. Na e okashon aki ta trata di un atake riba un barku di bela Hulandes ku tabata nabegá pegá ku Norwega. Asina Volkskrant a publiká djarason.
Manera nos a informá algun siman pasá tin un fenómeno straño den e laman entre Spaña i Maroko último tempu kaminda orka ta ataká barkunan di plaser. For di 2020 a registrá sentenáres di atake di orka riba barku, partikularmente entre Spaña i Maroko. E orkanan ta ataká generalmente e timon di barkunan di bela. E forsa físiko di e orkanan ta sufisiente pa okashoná basta daño na e timon i te asta buta e barkunan bòltu òf senk.
No tin un splikashon eksakto kiko ta okashonando e komportashon straño aki bou di e animalnan, pero un kos ta sigur: e orkanan ta ataká di un forma dirigí. Den e kaso spesífiko aki ta difísil determiná kiko ta e kousa, pasó no ta probabel ku e ehemplar ku a ataká e barku Hulandes ta pèrtenesé na e populashon ku ta biba entre Spaña i Maroko.
Kasi 30 persona a keda heridá despues di un eksploshon na un parti di e infrastruktura di gas na Paris. 4 di e víktimanan ta den estado krítiko. E eksploshon a tuma lugá nèt promé ku 5or di atardi orario Franses den un edifisio.
Te asina leu tur kos ta mustra ku e eksploshon ta konsekuensha di un eskape di gas. Testigunan a bisa ku nan a tende un klap fuerte, miéntras otronan lo a mira un bola di kandela enorme na e sitio.
E eksploshon a okashoná un kandela basta grandi den e edifisio, pero ku entretantu ta bou di kòntròl. Tin 2 persona pèrdí ainda ku probablemente ta pegá bou di e ruinanan di e edifisio, ku despues a kai den otro.
Segun agensia di prensa AFP e eksploshon tabata asina fuerte ku bentananan na un distansha di 400 meter for di e sitio a rementá.
E mal tempu kompañá pa hagel ku a pasa riba Hulanda djamars a okashoná algun inundashon di kaya den vários provinsia. E servisio di meteorologia KNMI dado momentu a emití un kódigo oraño pa kasi hinter Hulanda, ku eksepshon di Waddeneilanden ku a haña kódigo hel. Entretantu e kódigo oraño ta anulá.
E promé kaida di awa a kuminsá na Zeeland rònt di 3or di atardi. Despues e mal tempu a sigui move pa otro partinan di Hulanda. Outoridatnan a haña vários yamada ku melding di daño material, kaida di palu i inundashon. Tambe mester a anulá vários buelo na Schiphol.
Segun pronóstikonan e mal tempu a bandoná Hulanda den oranan di mardugá. E mal tempu a surgi inesperadamente i ta bai kompañá pa bientu fuerte, welek i kaida di hagel.
Aktor Jonathan Majors mester paresé den korte na Manhattan riba 3 di ougùstùs. Asina vários medio Merikano a publiká djamars. Manera ta konosí un dama a hasi denunsia di maltrato kontra Majors den mart último.
Majors a mèldu na korte djamars pa tende ki dia lo trata e kaso. Tambe wes a reiterá e prohibishon di kontakto ku e dama te ku e dia di tratamentu di e kaso. Majors ta akusá di a choka, maltratá i intimidá e dama, ku a keda trasladá pa hospital ku herida leve na kabes i den su nèk.
E akusashonnan no tabata sin konsekuensha pa e aktor. Asina su manager a terminá su kontrakt i tambe tin duda ku e por kontinuá ku vários proyekto ku e tabata embolbé den dje. Segun e abogadonan di Majors e aktor ta inosente i bon mirá e víktima den e kaso aki. E abogadonan lo tin prueba ku ta e dama a agredí e aktor.
Wardakosta na Merka a amplia e búskeda pa e supmarino di rekreo di OceanGate Expeditions ku ta pèrdí for di djaluna. E supmarino ta usá pa eksplorashon di e ruinanan di Titanic. Segun kálkulonan e pasaheronan a sobra ménos di 40 ora na oksígeno. Esei ta nifiká ku entrante djaweps mainta e pasaheronan lo no por hala rosea mas.
Outoridatnan a mobilisá un supmarino mas pa kontinuá e búskeda. Fransia tambe a duna un man dor di mobilisá un otro supmarino. For di djadumingu no tin kontakto mas ku e supmarino ku na e momentu ey tabata hasiendo otro ekspedishon pa bishitá e ruinanan di Titanic. E búskeda ta pues un kareda kontra di oloshi. Tin un indikashon di na unda e supmarino por ta segun señalnan anterior di radar, pero e lugá eksakto no ta konosí.
