E kresementu di ekonomia di Hulanda ta stagná pero stabil na 0.8%. Konsumidornan ta gastando ménos dor di e altura di inflashon i tambe eksportashon a baha dor di konratempu riba merkadonan rònt mundu. Inflashon na Hulanda ta kalkulá aworakí na 4.2% i ta forma ketu bai un problema.
Partikularmente preis di alimento ta haltu aworakí di akuerdo ku un rapòrt di De Nederlandsche Bank (DNB), e banko sentral di Hulanda ku a kalkulá mas aleu ku e inflashon general lo subi te 6.8%. E inflashon ta okashoná pa un parti dor ku gobièrnu di Hulanda ta gastando muchu hopi kapital, loke ta hasi kombatimentu di inflashon difísil di akuerdo ku DNB.
E konsekuenshanan di e konflikto na Ukrania ta mas bisto e aña aki tambe. Esei ta resultando den preisnan mas haltu pa alimento i kombustibel. Esaki riba su turno ta frena e gastunan ku hogarnan ta hasi i ku ta stimulá kresementu ekonómiko.
E Banko Sentral di Merka, Federal Reserve (Fed), ta warda ku un otro oumento di interes pa kombatí inflashon. Esei despues di por lo ménos 10 okashon siguí ku a subi esaki. Ta posibel ku Fed lo warda te ku yüli pa bolbe subi interes.
E paso aki tabata di spera. Den mei a oumentá interes ku 0.25% di 5% pa 5.25%, ku ta e nivel di interes mas haltu den 16 aña. Kualke momentu lo sigui un splikashon di presidente di Fed Jerome Powell.
E Banko Sentral di Merka (Fed) a hasi fiamentu di plaka konsientemente mas difísil pa evitá ku preisnan ta sigui oumentá. Ta for di aña pasá mart Fed ta tene interes haltu. E intrankilidat den mundu bankario a mustra tambe ku bankonan tabata traha ku fiansanan muchu haltu ku nan no por a paga bèk efektivamente. E kaida di vários banko ya a resultá den un kambio di mentalidat bou di bankonan ku aworakí ta fiando ménos pa hasi negoshi.
Otro motibu dikon Fed ta warda ku otro oumento di interes ta e echo ku den mei inflashon na Merka a keda para na 4%, ounke mester bisa ku e inflashon di preis di kombustibel i alimento ta ketu bai na 5.3%.
E kiebro di dam na e riu Dnipro na Ukrania ta bai tin konsekuensha serio pa siguridat di alimento. Esaki di akuerdo ku Nashonnan Uní. Motibu pa e pronóstiko aki ta e echo ku e awa ku ta skapa awor a move den direkshon di regionnan kaminda agrikultura di trigo ta tuma lugá. E awa ta bai okashoná inundashon den e regionnan aki, loke ta bai tin konsekuenshanan direkto pa preis di alimento.
Aparte di esey e agreshonnan di último tempu ta limitá akseso di agrikultor na nan propio tereno dor di e tiramentu entre militarnan lokal i tropanan di Rusia. Aparte di esey nan ta konfrontá ku mina antipersonal riba e kamindanan ku nan ta trafiká. Aparte di e konsekuenshanan pa agrikultura e kiebro di dam a resultá den un falta di awa pa bebe tambe pa sigur 700 mil persona.
Te ainda e kousa eksakto pa e kiebro di dam no ta konosí. Tantu Rusia komo Ukrania ta kulpa otro di e desaster. Segun kálkulonan di e instituto di seismologia na Norwega i satélitenan e kiebro definitivamente ta okashoná pa un eksploshon. Te asina leu tin 13 morto sivil raportá.
E konosido multibionario, superinvershonista i filántropo di 92 aña George Soros ta bai pasa su imperio pa su yu Alex di 37 aña. Su yu ta meresé pa manehá e fortuna. Asina e invershonista di orígen Húngaro a bisa e korant The Wall Street Journal.
Di momentu tin un kapital di 25 mil mion dòler den Soros Fund Management. Soros a akumulá basta sèn den añanan 90 atraves di invershonnan inteligente pa su Open Society Foundation. E organisashon ey ta dediká na sosten pa demokrasianan den paisnan kaminda demokrasia ta kore peliger.
Soros a muda pa Merka despues di e di dos Guera Mundial kaminda el a gana un fortuna danki na su talento pa invertí den proyektonan ku potensial. Den 1992 el a bira mundialmente konosí despues di a gana mil mion dòler ku spekulashon riba Pound Sterling.
E balor di bolsa di e plataforma pa kriptomoneda Coinbase a baha ku 20% djamars despues ku e instansha Merikano di supervishon Securities and Exchange Commission (SEC) a start un kaso penal kontra e kompania. Coinbase, e plataforma di kriptomoneda mas grandi na Merka, lo ta ofresiendo servisio sin e pèrmitnan korespondiente.
E balor a baha den un ratu di ora di un poko mas ku $58 pa $48,45. E propiedatnan di Coinbase ta kaluklá na $130 mil mion danki na kapital di un par di desena di mion invershonista.
E supervisor SEC a anunsiá mas aleu ku ta vigilando tambe e otro plataforma mas grandi na mundu Binance, ku tambe ta sospechá di ofresé servisio sin e debido pèrmitnan. Kontrali na Coinbase, Binance no ta aktivo riba merkado di bolsa. Pero Binance a sinti e klap tòg ora e balor di su kriptomoneda BNB a pèrdè 10% di su balor.
Mundialmente preis di alimento ta mustrando un bahada leve. Preis di produktonan básiko manera grano, produktonan derivá di lechi i zeta di palma a sigui baha despues di e bahada di luna pasá. Preisnan ta na e nivel mas abou for di aprel 2021.
Motibu prinsipal ta e deal di suministro di grano ku Rusia i Ukrania a akordá ku otro aña pasá i tambe e kosecha favorabel di último tempu. Ta un desaroyo ku por kondusí na un bahada di preis di sierto produkto den supermarket. Esaki por trese pronto un alivio pa konsumidornan rònt mundu, inkluso na Kòrsou, kaminda preis di komestibel a subi drástikamente.
Segun kálkulonan di Food and Agriculture Organization di Nashonnan Uní, e organisashon ku ta monitoria i mantené un registro di preisnan mundial, preisnan a baha ku 2.6% debí na un bahada di 3.2% di e preis di produktonan derivá di lechi. Kompará ku e mesun periodo aña pasá por papia di un diferensha di 18%. Vèt vegetal di girasol i soya, trigo i maishi tambe tabata mas barata, pero aros i karni si a bira mas karo. E preis mas haltu ku nos ta mira ainda ta esun di suku. Preis di suku ta mustra un subida permanente.
Manera indiká e bahada aki ta indikashon ku preisnan den supermarket tambe ta bai baha, pero dor di konyuktura ekonómiko por dura vários luna promé ku nos ripará un bahada di preis den supermarket tambe.
China a kuminsá ku boramentu di un buraku ku un profundidat di 11 kilometer den un afan pa yega na mas kombustibel fosil. Ta trata di un rèkòrt pa Chinesnan. E proyekto ta bou di guia di China National Petroleum Corp ku ta papia di un suministro garantisá di energia pa China.
E proyekto a kuminsá e siman aki na Tarim den parti wèst di China kaminda tin hopi petroli presente den tera. Pa e proyekto aki mester tene kuenta ku vários lag di tipo di tera. Na e profundidat ey nos ta papia di tera formá 145 mion aña pasá.
Segun agensia di prensa Bloomberg ta informá e proyekto lo dura alrededor di 11 luna. Aparte di petroli i gas gobièrnu di China ta spera tambe di haña otro materia prima i mineral pa produsí por ehèmpel outo eléktriko. Tambe mester ta posibel pa hasi investigashon sientífiko na e profundidat ey pa studia temblor i erupshonnan volkániko.
E plan ambisioso aki por sierto no ta e promé den su sorto. E pais ku ta karga e rèkòrt ta Rusia ku a bora un buraku ku a alkansá un rpofundidat di 12.262 meter.
E kresementu di merkado laboral na Hulanda (esta, e kresementu di kuponan nobo di trabou) a práktikamente stagna. Aña pasá kos tabata mustra bon ainda ora tabatin 1.6 mion vakatura disponibel, e mayor kantidat registrá, pero awor a yega un fin na e situashon ey.
Segun kálkulonan e kantidat di vakatura lo subi ku 1,4%, pero pa 2024 no ta ferwagt un subida di mas ku 0,5%. E sektornan ku mester tene mas kuenta ku kontrakshon di trabou disponibel lo ta konstrukshon i servisionan finansiero. Asina por dedusí di e pronóstiko anual di UWV ku ta atribuí e kontrakshon aki na pronóstikonan ekonómiko ménos favorabel. E kantidat di vakatura nobo ta kalkulá e aña aki pa baha ku 119 mil.
Aparte di esei e merkado laboral Hulandes ta sufri tambe di falta di personal. E mayor problema ta ku no ta ekonomia ta dikta mas kua trabou tin disponibel: ta loke e studiantenan resien graduá aworakí tin di ofresé no ta kompatibel ku loke kompanianan ta buska. Dor di falta di studiantenan ku e konosementu ku merkado ta pidi, kompanianan no por desaroyá aktividatnan nobo ku riba nan turno tin un impakto grandi riba e performance di e respektivo kompanianan.
Konsekuentemente e kompanianan ta kada bes mas inkliná pa outomatisá i reorganisá sierto proseso opreashonal. Segun UWV e mismatch entre kompania i kandidato pa traha ta dia pa dia mas grandi kousando asina un problema struktural riba e merkado laboral Hulandes. E organisashon ta rekomendá pa ofresé e kandidatonan nobo e posibilidat di kambia di estudio pa asina nan tin un mihó chèns riba merkado laboral.
ADECK, e asosiashon ku a fungi komo e portabos di empresanan chikí i mediano durante e último 30 añanan, ta anunsiá ku a finalisá e proseso di restrukturashon i ta kla pa reaktivá su servisionan pa su miembronan. E proseso di restrukturashon a tuma kasi un aña ku e resultado ku awor tin un direktiva nobo i dinámiko, ku un ‘branding’ nobo, un wèpsaite kompletamente funshonal i un plan operashonal pa guia e asistensia na benefisio di nos miembronan.
E direktiva nobo a keda skohé mediante un reunión general riba 20 di april 2023. E direktiva diario ta konsistí di sr. Gabriel “Boy” Magdalena (Presidente), sr. Juni Sluis (Sekretario) i sra. Noraima Engelhart (Tesorero). E direktiva en kuestion lo fungi komo unu di transishon i preparashon pa por elegí un direktiva nobo den 6 luna. Pa por kumpli ku e planifikashon menshoná, e direktiva di transishon aki ta konta ku apoyo di un tim di restrukturashon ku ta konsistí di sr. Ghatim Kabarra, sr. Javier Magdalena, sr. Menno George, sra. Neftali Girigoria i sra. Jeanette Bonet.
Durante e proseso di restrukturashon a identifiká e nesesidat pa kambia e identidat i tambe e posishonamentu di e organisashon.
“Nos ta masha orguyoso di e direkshon nobo ku nos a skohe pa ADECK ku e meta pa sigui sirbi nos miembronan mihó posibel”, asina sr. Gabriel “Boy” Magdalena a deklará komo e Presidente resien elegí di ADECK. “Nos miembronan lo benefisiá enormemente di un organisashon revitalisá ku lo bai brinda asesoramentu, kapatisashon, sosten, infrastruktura i un plataforma digital komo tambe servisionan di promoshon pa empresanan chikí i mediano”.
E mishon prinsipal di ADECK ta pa yuda krea un futuro pa empresanan chikí i mediano pa por garantisá pa nan krese i tin un impakto duradero riba nos ekonomia.
E balor di bitcoin a baha djabièrnè mainta atrobe pa promé biaha for di 17 di mart. Djabièrnè mainta e balor di e kriptomoneda a baha mas abou ku 26.200 dòler. E bahada ta okashoná pa retirada di algun komersiante grandi di kriptomoneda i e supervishon mas severo na Merka. Na su punto mas abou invershonistanan por a kumpra un bitcoin pa 26.148 dòler. Despues el a subi bèk te na 26.375 dòler. Otro kriptomoneda manera ether tambe a pèrdè balor djabièrnè.
E sektor di kriptomoneda a haña un gòlpi despues ku Merka a introdusí leinan di supervishon mas severo. Partikularmente plataformanan manera Binance i Coinbase ta vigilá ku wowo di falki. Siguiendo e medida dos komersiante grandi, esta Jane Street i Jump Crypto, a disidí hasi ménos negoshi ku kriptomoneda. Despues, anteriormente e siman aki, a bira konosí ku Binance, e plataforma di kriptomoneda mas grandi na mundu, tabatin problema ku prosesamentu di transakshon.
Apesar di e pèrdida djabièrnè mester bisa ku ketu bai kos ta bayendo mihó ku aña pasá pa kriptomonedanan. 2022 tabata un aña hopi malu pa invershonnan den kriptomoneda. Partikularmente den e último lunanan e balor di kriptomoneda a baha dor di kaida di e plataforma FTX di Sam Bankman-Fried.
E kiebro ku rapper Ye, anteriormente konosí komo Kanye West, a kosta e kompania Aleman Adidas entretantu 400 mion euro den e promé kuartal di e aña aki. E kompania a anulá e kontrakt ku Ye den òktober despues ku e rapper a publiká mensahenan antisemítiko riba social media, esta mensahenan ku ta buta hudiunan den un lus negativo.
Ye a yuda Adidas introdusí e modelo di sapatu Yeezy. Dor ku e kompania a kita e modelo aki for di merkado el a mira su resultado baha den e promé kuartal ku un par di sentenar di mion na Merka, China i Oropa. Adidas ta rekonosé ku e pèrdida a hasi daño na e kompania.
Segun e atministrashon di Adidas tin un kantidat di Yeezy na un balor total di 1200 mion euro den e kompania su magazeinnan. E problema ta ku Adidas no por bende esakinan sin paga Ye un kompensashon. Adidas no por i no ke adaptá e modelo tampoko i eliminashon di e kantidat enorme di sapatunan ta iresponsabel for di un punto di bista medioambiental.
E pèrdida klomo konsekuensha direkto di e kiebro ku Ye ta bai kosta Adidas segun kálkulonan 500 mion euro. Adidas ta raportá den euro ya ku e ta di orígen Aleman. Esei ta alabes e motibu dikon e komentario di Ye riba hudiu ta trese un karga èkstra pisá pa e kompania.
No opstante e pèrdida riba Yeezy, Adidas a logra tòg un resultado operashonal positivo di 60 mion euro den e promé kuartal di e aña aki. P’esei e impase ku rapper Ye no a afektá e akshonnan di e kompania riba merkado di akshon.
E miedu ta real. Despues di kaida di e banko Merikano First Republic Bank e tenshon den e mundu bankario ta enorme den último dianan. Mart ya tabata un luna ku notisia preokupante ora ku vários otro banko a haña nan den problema. Ta preludio di un krisis bankario nobo manera nos a mira den 2008? For di e tempu ey mundu finansiero ta kouteloso ku bankonan ku ta tumba.
Ora ku tantu Silicon Valley Bank komo Signature Bank a hera di bati bankarota ya tur tipo di alarma a kuminsá bati serka polítikonan, supervisornan i kompania. Pa kolmo a sigui e kaida di e banko Suiso Credit Suisse, loke a alimentá e preokupashon ku e kaida di un par di banko por resultá den un efekto dominó den ekonomia.
Pa bin bèk riba First Republic Bank, esaki ta forma parti awor di JP Morgan ku a bin dilanti pa salba e banko despues di e bank run siman pasá ku a evaporá mitar di e kapital di First Republic.
Na total JP Morgan a paga 10 mil mion dòler pa First Republic. Pero ta keda e pregunta si First Republic ta e delaster banko ku nos ta mira bati bankarota, pasó riba merkado di akshon en todo kaso kos no ta parse di ta move den un direkshon positivo.
Merka mester subi su plafònt di debe pronto. E minister di finansa Merikano Janet Yellen ta premirá ku kisas e pais no ta bai por kumpli ku su debenan finansiero entrante yüni. Kiko ta pasando?
What / Where
Kada tantu aña Kongreso Merikano ta determiná e plafònt di debe di e pais, esta kuantu sèn e pais ta pèrmití di fia. E lei aktual na Merka ta stipulá ku Merka no tin mag di tin un debe di estado di mas di 31.4 bion dòler. Pa bo tin un idea: 1 bion (ku b) ta un suma di sigur 12 sifra.
De echo Merka a yega na e límite aki kaba for di yanüari, pero kongreso a tuma medida pa gobièrnu por a sigui invertí kapital. E departamentu di Finansa no por pronostiká mas kuantu tempu Merka por sigui hasi esaki sin subi e plafònt di debe. Pero tur kos ta mustra ku pronto Merka lo no disponé di kapital. Pa e motibu ey mester bai tuma medida pronto di akuerdo ku e departamentu di finansa.
Si no subi e plafònt di debe e konsekuenshanan por ta hopi ferfelu. Ámtenar no por kobra i ònderstant tampoko por wòrdu pagá. Aparte di esei e merkado finansiero na Merka ta di importansia vital pa ekonomia mundial pasó Merka ta un di e paisnan ku ta invertí mas den otro pais. Si kos bira pèrtá na Merka esaki tin un konsekuensha direkto pues pa e paisnan ku ta dependé di e invershonnan aki i pa komèrsio en general.
Nunka den historia kos a yega asina leu ku e pais no por kumpli ku su debernan finansiero pasó for di añanan 60 e pais a subi e plafònt na por lo ménos 80 okashon.
Who / When
Presidente Joe Biden ta reuní riba 9 di mei ku diferente lider di kongreso pa trata e asuntu, pasó e subimentu di e plafònt di debe semper ta fuente di konflikto polítiko den e pais.
E frakshon demokrátiko ta pidiendo un oumento di e plafònt pa algun tempu kaba, pero di momentu ta e republikanonan tin un mayoria den parlamentu Merikano, e asina yamá House of Representatives. E republikanonan no ta aseptá oumento di e plafònt di debe sin medidanan di ousteridat, esta ekonomisashon riba sierto gastu. I Biden di otro banda ta ninga di hasi esaki sino e no por kumpli ku su plan di maneho.
Why
E mayor parti di gastunan di gobièrnu ta bai na defensa. Si ekonomisá riba esaki tin konsekuensha direkto pa Merka su intervenshon den konfliktonan rònt mundu. Alrededor di 3,5% di e produkto nashonal di Merka ta bai na gastunan di defensa.
Siman ta sera ku intrankilidat atrobe den sektor bankario na Merka kaminda First Republic, un banko regional na San Francisco kaminda klientenan a lanta tur nan kapital masalmente, ta na punto di bati bankarota.
Outoridatnan ta buskando un solushon pa evitá lo peor. Den un par di luna di tempu klientenan a lanta nan plaka i/òf sera nan kuenta na un balor total di 100 mil mion dòler for di nan kuentanan. Konsekuentemente e banko a hañ’é obligá na bende invershonnan ku a pèrdè hopi balor dor di oumento di interes.
Ta for di luna pasá tin preokupashon rondó di First Republic despues di operashonnan pa salba Silicon Valley Bank i Signature Bank. Tabatin indikashon kaba pues ku First Republic lo a bira e siguiente, pero un inyekshon finansiero di 30 mil mion dòler proveniente for di otro bankonan a aliviá e problema temporalmente. Awor ta resultá ku e medida aki no tabatin un efekto duradero.
E sifranan di e promé tres lunanan di e aña aki ta desastroso. Loke sigur no a yuda e banko ta e echo ku ehekutivonan no tabata kontestá pregunta di analistanan despues ku a presentá e sifranan. Esei a alimentá e deskonfiansa ku tabata reina kaba bou di invershonista i kliente.
Den último dianan e preis di akshonnan di First Republic tabata parse den un kaida liber. Segun fuentenan ku a papia ku agensia di prensa Reuters gobièrnu di Merka ta man na kabes pa yega na un solushon pa e fenómeno aki. Un di e opshonnan lo ta pa First Republic resortá bou di un otro banko mas grandi. Benta di departamentu tambe ta riba mesa, pero outoridatnan na Merka lo no ke kima nan dede ku un invershon di sèn di e pagadó di impuesto.
Sony a bende 6.3 mion console di PlayStation 5 den e promé tres lunanan di e aña aki. Esei ta tres biaha e kantidat bendí den e mesun periodo aña pasá debí na falta di piesa. E kompania a traha bon ganashi tambe ku benta di games, musik i pelíkula. Esei ta nifiká un resultado rèkòrt di 11.5 bion yen Hapones, ku ta igual na 85 mil mion dòler.
E ganashi despues di impuesto pa Sony ta 6%, loke ta mas ku e kompania a konta ku n’e. E kompania no tin un idea ainda kon e aña aki lo sigui kana, pasó e kompania ta vigilá e inflashon mundial ku wowo di falki. Esei a hasi klientenan rònt mundu hopi kouteloso.
