E daño okashoná pa desasternan natural manera inundashon, orkan i otro wer ekstremo den aña tras di lomba tin un balor total di 268 mil mion dòler. Asina Munich Re, un di e kompanianan di seguro mas grandi na mundu, a kalkulá. Ta un kantidat normal si bo wak e promedio di último 5 aña i en todo kaso un suma mas abou ku e 322 mil mion dòler den 2021.
Un di e motibunan prinsipal pa e suma di 268 mil mion ei ta orkan Ian kua a okashoná daño na un balor total di kasi 100 mil mion dòler den e region di Florida. Pakistan tambe a sufri basta daño dor di e kantidat enorme di áwaseru i glècher ku ta dirti. E pais ei so a registrá 15 mil mion dòler na daño. Oustralia tambe a sufri daño dor di kaida di awa pisá, miéntras Oropa tabatin problema ku sekura ekstremo den zomer.
Segun Munich Re, ku ta fungi komo seguro pa otro kompanianan di seguro rònt mundu, e daño ta influenshá pa kambio di klima.
Fundadó di FTX Sam Bankman-Fried ta desmentí kulpabilidat. Bankman-Fried a aparesé den korte na New York kaminda e mester duna kuenta i rason pa su ròl den e kaida di e bolsa pa kriptomoneda FTX. E èks bionario ta akusá di a desinformá invershonista i klientenan i uso personal di kapital di terseronan. Bankman-Fried lo a pasa sèn di kliente pa e fondo Alameda Research, ku tabata invertí e kapital den vários otro kompania.
Bankman-Fried a keda detené na Bahamas despues ku FTX a pidi bankarota, despues a ekstradit’e pa Merka. Na Bahamas entretanu a buta beslag riba propiedatnan di FTX ku tabata suma na total 3.500 mion dòler na momentu di e bankarota. E pais a komprometé su mes na debolbé e propiedatnan aki na kliente i otro debedornan.
Na Merka Bankman-Fried a paga un bòrg di 250 mion pa e no tin mester di sinta warda tratamentu di su kaso den prison. E ta bou di huisarrest na kas di su mayornan na California.
Den 2023, un den kada tres pais ta bai pasa dor di un reseshon. Esaki pa motibu di kontratempu ekonómiko ku e Fondo Monetario Internashonal (IMF) ta pronóstika pa Merka, Union Oropeo i China. Asina direktor di IMF Kristalina Georgieva a bisa e kanal di notisia Merikano CBS. Merka i Union Oropeo tin basta difikultat ku maneho di inflashon. Konsekuentemente Bankonan Sentral ta subi interes pa asina evitá ku konsumidor i kompanianan ta gasta muchu sèn.
Di e forma ei bo por limit’a inflashon, pero segun Georgieva e mesun medida aki ta stroba kresementu ekonómiko. Pa loke ta trata China mester konsiderá e ola di Covid-19 ku ta afektando e pais severamente, loke tin su influensha riba ekonomia di e pais. IMF ta pronostiká ku e aña aki lo ta pa promé biaha den 40 aña ku ekonomia di China ta bou di e promedio mundial. Segun e direktor di IMF e sifranan ofisial no ta disponibel ainda. Den transkurso di yanüari IMF lo publiká mas detaye.
E káos riba Twitter for di momentu ku Elon Musk a atkirí e plataforma dos luna pasá ta kousando daño na su otro kompanianan. Esaki a kulminá e siman aki den un anunsio ku Musk ta retirá komo CEO di Twitter asina ku e haña un kandidato adekuá pa manehá e plataforma.
Twitter mester a bira un plataforma pa libertat di ekspreshon, pero poko despues di e atkisishon di e kompania Muska a lanta un diskushon riba kobramentu pa “blue ticks”. Tambe el a reaktivá e kuentanan di vários usuario kontroversial manera Donald Trump i e artista Ye. Asina a sigui vários insidente mas manera su intentonan pa para e account @elonjet. Tur e insidentenan aki a kulminá pues den anunsio di su retiro komo CEO despues di un enkuesta ku e mes a tene bou di su 122 mion siguidónan. Einan kasi 58% di su siguidónan a indiká ku ta mihó kos ku e por hasi.
E káos rondó di Twitter no tabata sin konsekuensha pa su otro kompanianan.
Elon Musk tabatin un éksito komersial nunka bisto ku su kompanianan SpaceX i Tesla pa kua el a hala hopi invershonista. Despues di su aventura ku Twitter kos a kambia. Kuminsando ku kaida di advertisement riba Twitter di kompanianan grandi. Mas aleu ta kalkulá ku Musk a bende alrededor di 23 mil mion dòler (un suma di 11 sifra) na akshonnan di Tesla pa tapa pèrdidanan di Twitter.
Entretantu e kompania a pasa den sentido komersial dor di un di su pió añanan. E balor di akshonnan di Tesla a baha e aña aki ku mas di 60%. Hopi akshonista di Tesla no a keda kontentu ku nan invershonnan tabata disparsé den Twitter i a hala atras. Esnan ku tin sèn den Tesla ainda a èksigí di Musk pa e konsentrá riba su otro kompanianan atrobe.
Su otro kompania SpaceX tambe ta kore peliger dor di e eskapada ku Twitter. E konsekuenshana finansiero te asina leu ta parse limitá si tene kuenta ku SpaceX no ta un kompania ku ta bende stocks. Tòg direktor di NASA Bill Nelson a aserká CEO di SpaceX Gwynne Shotwell pa ta na altura di Musk su prioridatanan.
Ta asina ku Lockheed Martin, ku tambe ta traha ku i pa NASA, a pèrdè hopi kapital dor di un mensahe riba Twitter proveniente di un fake account. Via e account ei, LockheedMartini, a kompartí un mensahe anunsiando un paro di benta di arma na paisnan manera Merka i Israèl.
I asina vários otro kompania a keda perhudiká pa e káos riba Twitter. Ta keda e pregunta ta ken ta esun ku lo mester bin para e kaida di Twitter a korto plaso pa Musk por atendé ku e káos den su otro kompanianan.
Guera, konsekuenshanan di un pandemia i bolsanan ku ta kremp. Segun e revista Forbes 2022 tabata un aña hopi malu pa esnan mas riku na mundu. Kompará ku 2021 sigur 87 bionário a pèrdè nan status finansiero. E kapital total di esnan ku mas sèn a baha ku sigur 400 mil mion dòler (un montante di 12 sifra) te na e suma di 12.7 mil bion dòler (un montante di 15 sifra).
E mayor pèrdèdónan ta biba segun Forbes na Rusia. Einan tin 34 bionário ménos ku 2021. Mas aleu Forbes ta skirbi ku na total tin 2.668 persona rònt mundu ku mas di mil mion riba nan kuenta di banko, di kua 1000 e aña aki hustamente a mira nan kapital oumentá. E lista ta inkluí tambe 236 bionário nobo.
Merka ta ketu bai e pais ku mayoria bionário, siguí pa China. Elon Musk ta number 1 riba e lista ku un kapital total di 219 mil mion dòler riba su kuenta di banko.
E paisnan miembro di OPEC no ta bai adaptá nan produkshon di petroli despues di a baha esaki na òktober. Asina e organisashon a disidí den wikènt despues di un reunion kòrtiku. Promé ku esei tabata antisipá ku limitashon di e produkshon lo a kondusí na preisnan mas haltu, pero produkshon redusí no ta al kaso aworakí.
Apesar di esei te ainda no por antisipá kiko e efekto lo ta riba e preis mundial. Ta asina ku paisnan manera Rusia i Kazachstan tambe ta produsí i eksportá petroli loke tin un efekto adishonal riba e preis. Si nan suministro baha esaki lo afektá e preis internashonal al final tòg.
Ta bin aserka ku mester wak kiko lo ta e efektonan a plaso medio largu di sanshonna ku a keda imponé djaluna riba Rusia. E sanshonnan aki ta inkluí e plafònt di preis akordá djabièrnè pa e paisnan G7 i Union Oropeo. E plafònt ta nifiká ku kompanianan no por partisipá den komèrsio di petroli for di Rusia si e ta kosta mas ku 60 dòler pa barí. Esaki por buta preshon atrobe riba e preis internashonal.
Den òktober e miembronan di OPEC a limitá nan produkshon kaba pa evitá ku e preis lo a baha dimas i resultá den pèrdida.
Nunka ántes desempleo na Oropa tabata asina abou manera na e momentu aki. Asina agensia di estadístika Eurostat a publiká. Den òktober di e aña aki desempleo Oropeo den promedio a keda kalkulá na 6%, kua ta igual na 12.9 mion Oropeo sin trabou na e momentu aki.
E paisnan ku mayor desempleo ta Gresia ku 11.6% i Spaña ku un porsentahe di desempleo di 12.5%. E desempleo mas abou a keda midí na Repúblika Cheko ku 2.1% i Alemania ku 3%. Hulanda ta pará na di 6 lugá di e lista Oropeo ku un desempleo di 3.7%. Mas aleu por bisa ku den e grupo di persona bou di 25 aña na Oropa 2.9 mion hóben no tin trabou.
E di dos bolsa di kriptomoneda mas grandi na mundu FTX a pidi “faillissement”. I esei miéntras ku 2 siman pasá e kompania tabata parse super eksitoso. Awor sinembargo FTX a resultá un di e frakasonan mas grandi den historia.
What: Kiko a pasa?
FTX tabata un plataforma hopi aktivo pa transakshonnan via kriptomoneda. FTX un dado momentu a traha vários debe huntu ku su supsidiario Alameda Research. Un dado momentu e kantidat di debenan tabata asina haltu ku FTX no por a kumpli mas.
Asina e maneho di datonan konfidensial no tabata optimal i tambe lo a usa hopi plaka pa kumpra kas pa trahadónan.
Why: Dikon kos a sali for di man?
Tin hopi spekulashon ainda tras di kon bin kos por a sali asina drástiko for di man. Asina a lanta hopi pregunta rondó di fundadó di FTX Sam Bankman-Fried ku te ku 2 siman pasá tabata parse un persona integro.
E tabata hopi biaha na Washington pa papia ku polítikonan Merikano riba regulashon mas severo pa kriptomonedanan. Irónikamente Bankman-Fried a resultá di ta responsabel pa skùifmentu di míles di mion pa asina tapa e pèrdidanan enorme di FTX i Alameda Research.
When: Kiko por antisipá ku kaida di FTX?
Pa kuminsá tur kompania rondó di FTX lo kai un pa un den otro, entre otro esnan ku a invertí hopi sèn den FTX òf kompanianan ku a fia FTX sèn. Di momentu ta inventarisando ta di kuantu kompania afektá ta trata.
Opviamente klientenan di FTX tambe lo keda afektá dor di e kaida di e bolsa. Ta asina ku hopi plaka di kliente a bai den gastunan personal. Sèn ku probablemente nan lo no mira bèk, pasobra nan ta esnan delaster den rei di tur esnan ku FTX debe kapital.
Apesar di e agreshonnan entre e paisnan, Rusia i Ukrania a logra yega na un akuerdo pa prolongá e asina yamá akuerdo di grano ku a firma anteriormente e aña aki. Den e akuerdo ei ta garantisá pasahe sigur i liber di entrega di produktonan agríkola for di Ukrania. E akuerdo a vense djasabra último, pero a disidí pa tòg prolong’e.
E akuerdo ta di gran importansha pa mundu. Ta práktikamente tur kaminda tin demanda pa grano, maishi i zeta di girasol. Produktonan ku pa un gran parti di e suministro mundial ta produsí na Ukrania. Ku e prolongashon di e akuerdo di grano entre Ukrania i Rusia, preisnan tin espasio pa normalisá atrobe.
Inflashon na Oropa a alkansá un rèkòrt nobo. Segun sifranan di e agensia di estadístika Eurostat, inflashon a subi den òktober te 10.6% a base anual. Den sèptèmber inflashon tabata kalkulá ainda na 9.9%. Di otro banda e subida di inflashon ta ménos fuerte ku antisipá. E sifra haltu di inflashon ta okashoná ketu bai pa e oumento di preis di energia i otro produktonan di konsumo.
Den hinter Union Oropeo preisnan a subi den promedio ku 11.5%. Den sèptèmber e oumento tabata un poko ménos di 11%. E mayor inflashon a keda registrá na Estonia ku a midi un inflashon di 22%. E inflashon mas abou a keda registrá na Fransia kaminda inflashon tabata kalkulá na 7.1%. Na Hulanda inflashon tabata 16,8% den òktober.
KOMUNIKADO – E Asosiashon di Komèrsio i Industria “VBC” a tuma nota di Gobièrnu su intenshon pa subi salário mínimo. Segun VBC a komprondé e intenshon tabata pa subi esaki ku 58 sèn na sèptèmber último i adishonalmente ku 50 sèn entrante 1 yanüari 2022. Esaki lo nifiká un subida di en total 11.2%.
Realidat ta ku for di medio 2021 preisnan riba merkado mundial a bin ta subi poulatinamente. E inflashon aki a oumentá mas ainda, dor di e invashon di Rusia na Ukraïna na febrüari 2022 i e konsekuenshanan ku esaki a trese ku ne pa preis di krudo i básikamente tur otro produkto riba merkado mundial. Segun nos Ofisina di Estadístika “CBS”, na agosto último e inflashon tabata 5.8%. Segun e último sifranan ofishal, na Merka e inflashon ta riba 8% i na Hulanda riba 16%. Mirando ku nos ta importá kasi tur kos for di exterior, inkluso e inflashon, tin tur indikashon ku nos lo sera 2022 ku un inflashon anual mas haltu ku e 5.8% ku e tabata na agosto último. Tumando e realidat aki na konsiderashon i tambe ku no tabatin indeksashon di e suèldo mínimo na 2020 i 2021 VBC tin komprenshon ku Gobièrnu ke oumentá e suèldo mínimo i ta bai di akuerdo ku esaki, pero e mester bai akompañá ku un flankerend beleid!
Tin algun realidat mas ku tambe mester tene kuenta ku ne.
Pa kuminsá e komersiante tambe ta sinti e peso di e subida fuerte di inflashon riba bida diario di dje i su famia.
Varios negoshi ketu bai ta den “survival mode” despues di e pandemia, kaminda ku nos ekonomia a kontraé (“kremp”) ku 18.4%. Espesialmente negoshinan kaminda tin hopi empleado ku suèldo mínimo ta laborá lo mira nan gastunan operashonal subi drástikamente, ku tur e konsekuenshanan negativo ku esaki ta trese ku ne.
Na 2021 tabatin un kresementu ekonómiko di 4.2% i pa 2022 ta pronostika 5.5%. Pues ainda falta hopi pa rekuperá i neutralisá ful e kontrakshon di 18.4% di 2020.
Dor di emigrashon hopi hende ku tabatin bon forsa di kompra a bandoná Kòrsou i bai biba Hulanda òf Boneiru, hasiendo asina nos merkado mas chikí.
Gobièrnu su propio Ministerionan i konseheronan a bisa Gobièrnu ku e oumento di salário mínimo aki lo (por) tin konsekuensha negativo pa kresementu ekonómiko na 2023. Tambe ta kore riesgo ku desempleo lo oumentá i e oumento lo por pone ku preisnan pa e konsumidó lo subi aun mas tantu. VBC tambe ta hopi prekupá pa e konsekuenshanan no deseá aki.
Ta bon konosí ku VBC ta boga pa tin un kresementu ekonómiko aselerá i duradero. VBC ta firmemente konvensí ku kresementu ekonómiko ta e uniko solushon pa yuda nos sali for di e krisis sosial-ekonómiko ku nos ta aden. Na varios okashon den pasado VBC a trese dilanti ku mester atendé ku nos ekonomia den un forma di krisis. Meskos ku a hasi den pandemia pa atendé ku Covid i manera ta hasiendo awor aki ku salubridad, kaminda a instituí un Regiegroep.
Enfin, apesar di e konsekuenshanan negativo ku e oumentu di salário mínimo por trese ku n’e, VBC ta bai di akuerdo pasobra mester yuda e grupo ku ta sufriendo mas hopi dor di e inflashon devastador aki, pa mantené nan forsa di kompra. Mantenshon di forsa di kompra ta bon pa nos ekonomia. Ta bon pa Gobièrnu realisa sí, ku no ta tur negoshi por akapará e oumentu di salário mínimo, sin haña nan mes den problema finansiero. Den e kuadro aki VBC ta sugerí Gobièrnu enfátikamente pa bini ku un maneho (flankerend beleid) ku ta hasi posibel ku e negoshinan por kumpli ku e oumentu di sálario mínimo, sin haña nan mes den problema i sin tin ku rekurí na outomátikamente traspasá e subida kompletu pa e konsumido. Den esaki ta sumamente importante pa envolví e partnernan sosial den e proseso pa huntu nan yega na un flankerend beleid riba termino kòrtiku i ku realmente lo baha e “cost of doing business”.
Algun ehèmpel di medidanan den un flankerend beleid pa mantené forsa di kompra i redusí cost of doing
business:
Redukshon temporal riba prima sosial ku empleadonan i doño di trabou ta kontribuí ku ne;
Redukshon adishonal temporal di aksèins riba kombustibel;
Redukshon temporal riba gas pa kushiná;
No kobra empleado “bijzondere belasting” ora ku e traha overtaim;
Supsidio temporal riba energia pa personanan ku ta biba bou di e “bestaansmininimum”;
Supsidio temporal riba energia pa empresanan ku tin hopi empleado ku suèldo mínimo den servisio;
Un pago na e minimumloner kual e no ta paga impuesto riba dje i kual e doño di trabou por dedusí for di e OB ku e mester paga;
Modernisashon di lei di retiro pa esaki no mas ta un opstákulo pa tuma hende den servisio;
Subi e “lunchvergoeding” na por lo menos 15 florin, sin kobra impuesto, den kaso di overtaim;
Oumento temporal di huursubsidie;
Oumento temporal di kinderbijslag pa esnan ku ta biba bou di bestaansminimum.
Manera ta konosi, e problema di inflashon ta unu riba eskala mundial i ta rekomendabel pa wak tambe ki medidanan otro paisnan a tuma. Pues konkretamente VBC ta di akuerdo pa e siguiente pakete integral:
subi suèldo mínimo konforme proposishon di Gobièrnu;
huntu ku partnernan sosial yega na un pakete di medida kaminda ta mantené e forsa di kompra di esnan ku ta kobra salário mínimo i na mesun momentu yega na un flankerend beleid pa;
redusí e kosto di hasi negoshi, pa asina sektor privá por kumpli ku e oumento di salário mínimo.
Además, VBC ta propone pa paralelo na e desishon pa subi salário mínimo, pa huntu ku partnernan sosial yega riba termino korto na un akuerdo di prinsipio, kaminda ta hasi e siguiente palabrashonnan:
Establesé un Economic Recovery Board (ERB) den kual partnernan sosial tin partisipashon igual;
Laga e ERB desaroyá medidanan a largo plaso ku ta kontribuí na kresementu ekonómiko duradero;
Realisá un ofisina di planifikashon, sea dentro di un instituto eksistente manera Banko Sentral of otro, ku ta disponé di metodonan di investigashon moderno i instrumentario validá, pa midi e efektonan ekonómiko ku futuro eskohonan of desishonan por tin riba nos ekonomia, por ehèmpel den kaso di un subida di salário mínimo mes.
ORANJESTAD – Awe mainta a continua cu e prome evento internacional di transporte aereo sostenibel, organisa door di Dutch Caribbean Cooperation of Airports’s: – A Flight to the Future – na Hyatt Regency Resort Spa & Casino Aruba. Minister di Transporte, Integridad, Naturalesa y Asuntonan di adulto mayor Ursell Arends, director General di Aviacion y Asunto Maritimo di e Ministerio di Infrastuctura y Administracion di Awa di Hulanda y alabes Presidente di DCCA y CEO di Aruba Airport Authority, Joost Meijs a ricibi e participantenan presente y esunnan cu a atende di forma virtual.
Tema principal durante e prome dia tabata “Discovering the undiscovered focusing on the future of Sustainable Aviation”. E discurso di apertura tabata den man di Jorge Rosillo di Corporación América y CEO di Cargo Terminal of Ecuador, TCE and the Galapagos Ecological Airport, cu ta e prome aeropuerto ecologico di mundo. Rafael Echevarne, Director General di Airports Council International of the Latin America and Caribbean y Marieke Smit, Program Manager Sustainable Aviation na e Ministerio di Infrastuctura y Maneho di Awa di Hulanda tambe a haci un presentacion tocante e roadmap pa e-flight.
Un momento historico durante e evento aki tabata e compromiso cu e ‘Memorandum of Understanding’ (MOU) entre e seis islanan di Caribe Hulandes, Hulanda, e seis aeropuertonan di Caribe Hulandes y Dutch Association of Airports (NVL). E MOU ta empodera principalmente e islanan aki pa explora y establece conectividad aereo accesibel entre Corsou, Aruba, St. Maarten, Bonaire, St. Eustatius y Saba y mas specíficamente pa explora y stimula e uzo di energia emission-free pa por ehecuta conectividad aereo.
Un total di 15 dignitario procedente for di seis isla y Hulanda a firma e MOU y a acorda pa forma un comite di directiva y un grupo di accion cu lo traha un Joint Business Plan tocante con lo por establece esaki. Lo entrega e business plan denter di e siguiente shete luna despues di firma e MOU.
Durante e proximo dianan di e conferencia lo concentra riba diferente tema interesante y importante di sostenibilidad, algun di e temanan principal:
“Built for Experience” enfocando riba turismo sostenibel
“Pushing the limits” enfocando riba e operacionnan pa un aeropuerto sostenibel
“Reality Check” enfocando riba investigacionnan andando y inversionnan
“Connecting Generations” dunando e comunidad un oportunidad pa experiencia e Pipistrel Velis Electro di cerca.
Ainda tin posibilidad pa registra y atende e evento aki di manera virtual cu lo ta transmiti “live” a traves di https://www.dccaairports.com/live-404/ di 7 pa 11 di november 2022. Pa mas informacion tocante e evento y pa por registra participacion virtual, por bishita e website www.dccaairports.com.
