E reglanan pa keda nominá pa un Oscar pa mihó film a bira mas severo ainda. Entrante 2025 pa un pelíkula tin un chèns di keda nominá e film mester a drai mas tantu tempu den teaternan ku aworakí. Pa otro kategorianan tur kos ta keda meskos. Entrante 2025 e film mester a drai por lo ménos un siman den teaternan grandi na sea New York, Los Angeles, San Francisco, Chicago, Miami òf Atlanta.
Aparte di e eksigensia ey e film mester a estrená den por lo ménos 10 otro siudat Merikano. Ku e medida aki Academy of Motion Picture Arts and Sciences ke logra pa solamente pelíkulanan ku berdaderamente ta traha pa sali den teater keda nominá. Konsekuentemente pelíkulanan ku ta sali riba servisionan di streaming manera Netflix i Amazon Prime no tin chèns di keda nominá. E medida aki ta sigui despues ku e pelíkula CODA riba e servisio di streaming di Apple a gana un Oscar dos aña pasá. Esey a resultá den basta protesta bou di direktornan renombrá ku ta konsiderá streaming parti di televishon.
No ta promé kambio den e reglanan pa mihó film. Asina tin kondishonnan mará tambe na porsentahenan obligatorio di minorianan ku a kolaborá na e obra pa e por keda nominá. Asina por lo ménos 1 di e protagonistanan di e film MESTER ta sea un persona di koló, hende muhé, un miembro di e komunidat LGBTQ òf deshabilitá òf e pelíkula mester trata un tema relashoná ku un di e gruponan ey. Sino e pelíkula lo no yega na remarke pa un nominashon.
E medida ey a sigui despues di hopi krítika na un okashon ku tabatin un pelíkula so nominá ku tabata inkluí persona di koló. Pero e medida no tin un efekto positivo riba sintonia. E oudiensia pa e premionan Oscar ta kada aña mas abou. For di 2014 e publiko ku ta sintonisá pa wak e otorgashon di premio a baha di kasi 43.7 mion televidente te na 18.7 mion televidente e aña aki. 2 aña pasá e sintonia tabata na su punto mas abou, esta 10.4 mion televidente.
Aktor Jonathan Majors mester paresé den korte na Manhattan riba 3 di ougùstùs. Asina vários medio Merikano a publiká djamars. Manera ta konosí un dama a hasi denunsia di maltrato kontra Majors den mart último.
Majors a mèldu na korte djamars pa tende ki dia lo trata e kaso. Tambe wes a reiterá e prohibishon di kontakto ku e dama te ku e dia di tratamentu di e kaso. Majors ta akusá di a choka, maltratá i intimidá e dama, ku a keda trasladá pa hospital ku herida leve na kabes i den su nèk.
E akusashonnan no tabata sin konsekuensha pa e aktor. Asina su manager a terminá su kontrakt i tambe tin duda ku e por kontinuá ku vários proyekto ku e tabata embolbé den dje. Segun e abogadonan di Majors e aktor ta inosente i bon mirá e víktima den e kaso aki. E abogadonan lo tin prueba ku ta e dama a agredí e aktor.
E último pelíkula ku defuntu aktris Carrie Fisher ta estrená 23 di yüni, esta diabièrnè awor, na Merka. Fisher, konosí rònt mundu pa su ròl komo prinsesa Leia Organa den e saga di Star Wars, a fayesé den 2016. Nèt un par di siman despues di e grabashonnan di e pelíkula Wonderwell.
Direktor di e pelíkula Vlad Marsavin a splika e revista Deadline ku a tarda ku lansamentu di e film pasobra hopi tempu a bai den e efektonan visual di e pelíkula. E pandemia di Covid tambe a okashoná retraso den e trabounan di finalisashon. Segun e direktor Fisher tabata yen di energia ora e tabata grabando e pelíkula.
Wonderwell ta un historia ku ta tuma lugá entre Italia kontemporáneo i un mundu di Fantasia. Entrante djabièrnè ta lansa Wonderwell den un kantidat limitá di teater na Merka. Despues lo figa un fecha di lansamentu digital pa públiko rònt mundu.
E kompania di produkshon Disney a kambia su planning di lansamentu pa próksimo añanan drástikamente. Konsekuentemente fanátikonan lo mester warda algun aña pa wak e próksimo pelíkula di e saga di Avatar. E di tres parti di e saga tabata planiá pa desèmber próksimo aña pero esaki ta posponé awor te desèmber 2025 di akuerdo ku The Hollywood Reporter.
E lansamentu di e di 4 i 5 partinan ta planiá awor pa 2029 i 2031. I esei miéntras ku e promé dos partinan di Avatar a generá 2.9 mil mion i 2.3 mil mion dòler respektivamente, butando nan den e tòp 3 pelíkulanan mas mirá den teater den historia.
Un motibu spesífiko Disney no a duna, pero si por a nota ku a inkluí vários título nobo di Star Wars te ku e lansamentu di e próksimo Avatar. E 2 próksimo pelíkulanan di Avengers ku tabata planiá pa 2025 i 2026, tambe ta posponé ku un aña.
E pelíkula animá nobo di Spiderman “Across the Spider-Verse” tabatin un eksitoso promé wikènt ku un resultado impreshonante di $120.5 mion, si bo realisá ku su antesesor “Into the Spider-Verse” a generá $35.3 mion den su promé wikènt. Mester bisa aserka si ku despues e resultado total di “Into the Spider-Verse” a subi te na $375.5 mion na nivel mundial.
Loke ta hasi e resultado di e pelíkula aki asina remarkabel ta ku ta pa promé biaha ku resultado di un susesor ta tres biaha mas ku e resultado di su antesesor. Ku e logro aki Spiderman “Across the Spider-Verse” ta e di dos pelíkula ku promé wikènt mas eksitoso e aña aki.
E título di pelíkula mas eksitoso den promé wikènt te ainda ta bai pa “The Super Mario Bros. Movie” ku a alkansá un benta di $146.3 mion. Esei a hasi e pelíkula mesora tambe e mihó interpretashon di un video game riba pantaya den historia.
Ta posibel traha un pelíkula inklusivo SIN inklusividat fòrsá? “Woke done right” ta èksistí? Bo por “race swap” un personahe, sin daña e origin story original? Ta posibel traha un pelíkula moderno ku no ta resultá den divishon riba social media? Awèl sigui lesa e spoiler-free review aki and let’s find out!
Den 2018 Sony a kontestá e promé 2 di e 4 preguntanan ey kaba ku un SI rotundo ku lansamentu di Spiderman – Into The Spiderverse. I Sony ta deliver ATROBE ku Spiderman – Across The Spiderverse. Sony a logra ku e film aki ($120.5 mion na Merka den promé wikènt) loke Disney NO a logra ku e remake di Little Mermaid ($118.6 mion na Merka den promé wikènt). Esei ta gewoon the hard facts…
Mi ta bai un paso mas leu! Ku un ekselente mix di good storytelling & character development, humor i diseño 3D impekabel, Sony a logra loke Marvel mes nunka a logra: hasi Ultimate Spiderman (a.k.a. Miles Morales) un personahe no solamente aseptá, pero tambe stimá. Asta pa esnan ku nunka a gust’é!
Those who know, know… Originalmente Miles Morales tin e notorio reputashon di ta un asina yamá “tokenized character”: e ta èksistí djis pa bisa ku “tin un Spiderman di otro rasa tambe”… Loke ta molostiá hopi fanátiko ta e echo ku tokenized characters hopi biaha ta haña èkstra abilidat for di e personahe original òf hopi biaha nan no tin e mesun debilidatnan ku e personahe original.
E fout mas grandi di esnan responsabel pa e kambionan ey ta buta nan meimei di kanon eksistente. I ta nèt e kanon, debilidatnan i falta di abilidatnan ey ta e partinan esensial di e historia di personahenan original. E ta hasi nan mas “relatable” pa e oudiensia ku stima nan pa dékadas kaba. Pa un públiko por aseptá un otro persona tras di un alias bo mester hustifiká dikon e personahe ey ta meresé e nòmber.
Sony a fix e problema ey for di un prinsipio ku Spiderman – Into The Spiderverse dor di krea un setting den un dimenshon diferente i duna Miles un “character development” mas sólido i konsistente ku su kreadornan original. Into The Spiderverse ta un bunita kuenta kon Miles ta siña aseptá di ta e “exception to the rule”. Kontrali na Peter, Miles ke ta “part of the group”, tin un hopi bon bida sosial i e no ta un mucha ku nan ta “bully”.
E dinámika ku su mayornan tambe ta diferente: nan ta stimul’é pa usa su brains mas tantu i ku ta ok pa ta diferente from the group. Miles mester a bai un skol pa mucha sabí pasó skol regular ta muchu fásil p’e. Miles su eksperensha pa bira Spiderman ta kompletamente diferente for di Peter Parker i e ta sinti hustifiká. Sony a deliver gewoon un obra maestral ku Into The Spiderverse!
Spiderman – Across The Spiderverse ta pick up from there di un forma ku ta sinti hopi natural i ta introdusí mas inklusividat ainda ku na ningun momentu ta sinti fòrsá. Den e context ku Sony a krea e ta funshoná perfektamente i ta tene bo invested in the story. Sony ta asina sabí di no inkluí diversidat via mensahe polítiko sino via un actual story. And a damn good one!
Loke ta trese mi na e di tres pregunta ku mi a hasi na kuminsamentu di e review aki. E asuntu di race swapping…
Miles Morales NO ta e “race swapped” character akinan… E “título” ey ta bai pa Jessica Drew, alias Spiderwoman. Sony a krea un forma ekselente di hustifiká e “race swap” via e Spiderverse setting. Kontrali na Disney ku ta “race swap” i kambia e kuenta original pa loko, anto despues ke tilda hende di rasismo… Yes! Esaki ta un race swapped Jessica Drew ku hende por biba ku n’e!
Tambe Sony su Spiderverse ta “make sense” si bo kompará esaki ku e Marvel Multiverse di Disney. Pa esnan ku gusta i komprondé e konsepto di “multiverso”: eventonan no ta kana paralèl, pues hende por “look completely different indeed”. Si bo sa di inkorporá esei di un forma sabí den bo story bo no tin mester di ofendé un fanatikada eksistente inesesariamente manera Disney ta hasi. Sony made it part of the story! Mi ta sinti mi invested!
Mayoria hende no ta interesá den identifiká nan mes ku personahe: nan ke simplemente sinti nan mes invested den e personahenan. No ta pa personahe bo ta wak… Bo ta wak pa tur i damn it… e filmnan aki ta deliver!
Loke ta trese mi na e di 4 pregunta….. Ta posibel krea un interpretashon moderno SIN okashoná divishon?
HELL YEAH! Último añanan Disney a ataká hopi hende ku e asina yamá “race card”… Si en bèrdat tin asina tantu hende “rasista”, dikon no ta mira e problema ey ku Spiderman – Into & Across The Spiderverse? ‘Cause you have to make sure it makes sense!
Kontrali na otro títulonan ku ta lanta diskushonnan basta fuerte riba social media generalmente públiko a aseptá e kambionan den Across The Spiderverse. Su antesesor Into The Spiderverse no tabata eksitoso na momentu di lansamentu.
Pero despues hopi reviewers notorio i krítiko inesperadamente a elogiá e diversidat di Into The Spiderverse. It can be done! Into The Spiderverse a bira popular poko poko i por fin hende ta aseptá Miles Morales komo un otro Spiderman.
E voice-acting tambe ta tremendo i ta sinti natural. E personahenan i diálogonan ta hopi bon skirbí i bo ta sinti ku e eskritornan a hasi nan bèst pa duna e partinan emoshonal bon kontenido ku ta relatable i ménos genériko ku otro interpretashonnan moderno.
Loke Sony ta komprondé mihó ku Disney tambe ta e dinámika maskulino i femenino. Algu ku Nintendo i Universal a hasi magistralmente tambe den The Super Mario Bros Movie. Disney a introdusí un fórmula algun aña pasá kaminda personahenan maskulino ku públiko tabata stima a wòrdu kompletamente desmaskulinisá òf ridikulisá na fabor di personahe femenino “over-powered” ku un aktitut i personalidat ku ta duna bo gana di vomitá. P’esei awe niun hende no ta tuma Thor òf The Hulk serio mas….. I’m just saying…
Sony i Universal NO a kometé fout aki. E personahenan femenino den e Spiderverse no ta prediká òf kompará nan mes ku hende hòmber. Na ningun momento nan ta parse di ta dependé di hende hòmber tampoko. They trust the guys and the guys trust the girls. Esei ta hasi nan hopi mas likeable.
Pa bo kompletamente enjoy e eksperensha aki bèrdat bo mester konosé Spiderman basta bon pa bo rekonosé tur e referenshanan “cross media” ku ta genialmente inkorporá den e serie nobo aki.
Yep! Spiderverse ta un serie i “het smaakt verdorie naar meer” i Miles ta meresé di ta e lead Spiderman! Ta SU story! Spiderman – Into The Spiderverse i Across The Spiderverse ta forma parti di un storyline mas largu ku ta laga bo ku un smak di satisfakshon total i vooral investment den personahenan hopi bon skirbí pa e kreadornan di e Spiderverse aki.
I love it!
Across The Spiderverse ta meresé mi skor máksimo pa superhero movies: 8 out of 10!
Apesar di e reakshonnan no masha positivo riba e último edishon di e pelíkula Fast & Furious, aktor Dwayne Johnson a konfirmá ku e lo bin bèk komo Hobbs den e Fast & Furious-franchise. Su personahe lo bin bèk den parti 2 di Fast X. E promé parti ku aworakí ta drai bou di e nòmber Fast & Furious 10, a sali 2 siman pasá kaminda nos por a mira e aktor na kabamentu di e pelíkula. Dos aña pasá ainda Johnson tabata bisa ku e tabata kla ku e serie.
Direktor di sine Martin Scorsese ta bai traha otro pelíkula inspirá pa e bida di Hesus. Scorsese a haña inspirashon despues di un ekuentro personal ku Papa Francisco. E papa aktual a hasi un yamada na artistanan pa transmití e mensahe di Hesus di un forma spesial.
Segun e revista Variety Scorsese lo a reakshoná bisando ku e úniko manera ku e konosé ta atraves di sine. Scorsese tin 80 aña kaba pero ainda e tin e energia pa produsí e pelíkula aki. Mas detaye Scorsese, ku por sierto ta un katóliko ku fé, no a duna.
No ta promé biaha ku Scorsese (konosí di pelíkulanan klásiko manera Taxi Driver, Goodfellas i The Wolf of Wall Street) ta bai traha un pelíkula ku ta trata temanan di katolisismo. Anteriormente el a produsí The Last Temptation of Christ den 1988 i Silence den 2016.
Segun fuentenan ku a papia ku e revista The Hollywood Reporter e konosido aktor Eddie Murphy lo protagonisá e reboot di The Pink Panther. Eddie Murphy lo hunga e ròl di inspektor Jacques Clouseau. E pelíkulá lo ta un vershon live-action kombiná ku cgi, está imágennan digital agregá. Den e reboot aki Clouseau i e pantera ros lo partner up pa promé biaha pa trata un kaso.
E kuenta original di Pink Panther por sierto no ta e personahe ku nos a bin konosé den trankurso di añanan. E kuenta original ku a forma e base pa e otro pelíkulanan di Pink Panther ta atribuí e nòmber na un diamanta úniko ku un mancha ros den forma di un pantera. E promé tabata ku Peter Sellers den 1963 komo inspektor Clouseau i e di dos den 2009 ku Steve Martin komo protagonista.
E konosido aktor Sueko Dolph Lundgren, konosí pa su ròl históriko den Rocky IV i den último añanan den film manera Creed II, Aquaman i The Expendables, ta kebrante di salú pa un par di aña. Den 2015 a konstatá kanser serka e aktor. Te ku resien Lundgren no a papia riba su estado di salú, ounke nos por a mir’é bèk den vários produkshon basta grandi.
Den 2015 a konstatá un tumor maligno na su nir. Ora ku a kita esaki tur kos tabata indiká ku su salú ta bayendo den un bon direkshon. Pero den 2020 un scan di MRI a mustra ku e tabatin tumor den su kurpa atrobe. Esei tabata den temporada ku e tabata filmando Aquaman i The Expendables. Na e okashon ey dòkter a pronostiká ku el a sobra pa mas tantu 2 pa 3 aña mas di bida. Asina el a konta den un entrevista ku e periodista Graham Bensinger.
Despues di un second opinion a resultá ku e malesa a lanta kabes den su pulmonnan. E tratamentu pa esei tambe a resultá eksitoso. Di momentu e ta rekuperando. Si e herida di e tratamentu kura e por konsiderá su mes librá di e malesa. Lundgren ta konosí mundialmente pa e pelíkulanan ya menshoná i tambe pa su ròl den A View to a Kill i Masters of the Universe.
Un casting ku nòmbernan di taya ta mará na un pelíkula riba e asesinato di e presidente Merikano John F. Kennedy, titulá Assassination. Segun e revista Deadline ta trata di aktornan prominente manera John Travolta, Al Pacino, Shia LaBeouf, Viggo Mortensen i Courtney Love. Segun e revista Deadline e siman aki na Cannes lo ofresé e pelíkula na studionan internashonal pa produkshon.
Segun su sinópsis, esta su deskripshon, e pelíkula ta sigui un teoria di mafiosonan di rango haltu ku lo a duna òrdu pa e asesinato kreando asina un kòmplòt ku impakto duradero na Merka. Assasssination ta dirigí pa David Mamet, konosí di e pelíkulanan Heist i Wag the Dog. El a skirbi e script huntu ku Nicholas Celozzi, subrinu di Sam Giancana, ku segun algun teoria lo a hunga un ròl importante den e plan pa asesiná John F. Kennedy.
E film lo bai konsentrá riba e último 48 oranan promé ku e asesinato i ta kontá for di perspektiva di mafia na Chicago.
Senaristanan, esta screen writers, di televishon i pelíkula na Hollywood a buta trabou abou masivamente. Nan ta demandá mas sèn di studionan grandi i servisionan di streaming. Na total ta trata di 11500 eskritor di akuerdo ku The New York Times.
Nan no ta di akuerdo ku e pago ku nan ta risibí di studionan grandi manera Universal i Paramount i servisionan di streaming manera Netflix i Amazon. Entretantu ya lo a ofresé un pago mas haltu, pero e sindikato Writer’s Guild of America (WGA) no a aseptá e ofèrta.
Partikularmente talkshows ta e promé programanan ku ta afektá dor di e wèlga. Probablemente mester anulá e shownan di Jimmy Fallon, Stephen Colbert i kisas asta Saturday Night Live. Segun e presentadó Seth Meyers, ku tambe ta miembro di e sindikato, a bisa den un deklarashon ku nan no a tuma e paso aki di un dia pa otro.
Pa mundu di sine e impakto ta ménos grandi, ounke e wèlga ta nifiká si ku sierto produkshon ta haña retraso. I si e wèlga pèrsistí mas largu e proyektonan mester warda mas largu. E wèlga ta tumando lugá partikularmente na New York i Los Angeles, kaminda mayoria kompania di entertainment ta operá.
Delaster biaha ku tabatin un wèlga komparabel tabata den 2007. E wèlga ey a dura 100 dia i a kosta e industria mas di 2 mil mion dòler.
Siguiendo e éksito di e serie rondó di e asesino di serie Jeffrey Dahmer, Netflix ta bai traha un serie riba e rumannan Lyle i Erik Menéndez. Nan a keda kondená pa bida largu den 1996 pa asesinato di nan mayornan.
Ta trata di e di dos parti di e kolekshon di serie Monsters. E promé a trata pues e ya menshoná Jeffrey Dahmer, por sierto un di e serienan mas eksitoso den historia di Netflix banda di Stranger Things i Squid Game.
The Lyle and Erik Menéndez Story tambe ta dirigí pa Ryan Murphy, kende segun e revista Deadline lo tabatin kontakto eksklusivo ku e rumannan ku a tira nan mayornan mata den 1989. Lyle tabatin 21 i Erik 19 aña na e momentu ey.
Den novèmber Netflix a disidí kontinuá ku por lo ménos dos kolekshon mas di Monsters. The Lyle and Erik Menéndez Story tin ku sali otro aña.
Netflix ta bai invertí mas den film i serie produsí na Sur Korea. E servisio di streaming ta bai invertí 2500 mion dòler den próksimo 4 aña. Asina e revista Deadline a publiká.
Gerensha di Netflix ta satisfecho ku e originalidat di e produkshonnan. For di 2016 ora ku e servisio a bira disponibel den Sur Korea e pais a produsí vários pelíkula i serie eksitoso pa Netflix ku a haña hopi akohida den eksterior, inkluso na Kòrsou kaminda e serie Squid Game tabata un tópiko relativamente popular. Otro produkshonnan manera The Glory i Physical: 100 tambe por a konta ku hopi akohida.
Lionsgate Studios ta trahando riba un serie basá riba e di e konosido kolekshon di buki Twilight di Stephenie Meyer. Asina The Hollywood Reporter a anunsiá. No ta konosí si e serie lo sigui e liña di e bukinan òf si ta trata di un kuenta kompletamente nobo. Tampoko ta konosí riba kua plataforma e ta bai sali òf na kua kanal di televishon.
Ta trata akinan di e bukinan ku ta konta e kuenta di Bella Swan ku ta namorá di e vampiro Edward Cullen. E bukinan a sali riba pantaya kaba den forma di 5 pelíkula ku a sali entre 2008 i 2012, ku Kristen Stewart i Robert Pattinson den e ròlnan prinsipal.
Ya ta di dos anunsio di serie di buki ku ta pasa pa televishon. Asina tin plan tambe pa un serie basá riba e bukinan di Harry Potter.
