Segun fuentenan ku a papia ku e revista The Hollywood Reporter e konosido aktor Eddie Murphy lo protagonisá e reboot di The Pink Panther. Eddie Murphy lo hunga e ròl di inspektor Jacques Clouseau. E pelíkulá lo ta un vershon live-action kombiná ku cgi, está imágennan digital agregá. Den e reboot aki Clouseau i e pantera ros lo partner up pa promé biaha pa trata un kaso.
E kuenta original di Pink Panther por sierto no ta e personahe ku nos a bin konosé den trankurso di añanan. E kuenta original ku a forma e base pa e otro pelíkulanan di Pink Panther ta atribuí e nòmber na un diamanta úniko ku un mancha ros den forma di un pantera. E promé tabata ku Peter Sellers den 1963 komo inspektor Clouseau i e di dos den 2009 ku Steve Martin komo protagonista.
E konosido aktor Sueko Dolph Lundgren, konosí pa su ròl históriko den Rocky IV i den último añanan den film manera Creed II, Aquaman i The Expendables, ta kebrante di salú pa un par di aña. Den 2015 a konstatá kanser serka e aktor. Te ku resien Lundgren no a papia riba su estado di salú, ounke nos por a mir’é bèk den vários produkshon basta grandi.
Den 2015 a konstatá un tumor maligno na su nir. Ora ku a kita esaki tur kos tabata indiká ku su salú ta bayendo den un bon direkshon. Pero den 2020 un scan di MRI a mustra ku e tabatin tumor den su kurpa atrobe. Esei tabata den temporada ku e tabata filmando Aquaman i The Expendables. Na e okashon ey dòkter a pronostiká ku el a sobra pa mas tantu 2 pa 3 aña mas di bida. Asina el a konta den un entrevista ku e periodista Graham Bensinger.
Despues di un second opinion a resultá ku e malesa a lanta kabes den su pulmonnan. E tratamentu pa esei tambe a resultá eksitoso. Di momentu e ta rekuperando. Si e herida di e tratamentu kura e por konsiderá su mes librá di e malesa. Lundgren ta konosí mundialmente pa e pelíkulanan ya menshoná i tambe pa su ròl den A View to a Kill i Masters of the Universe.
Un casting ku nòmbernan di taya ta mará na un pelíkula riba e asesinato di e presidente Merikano John F. Kennedy, titulá Assassination. Segun e revista Deadline ta trata di aktornan prominente manera John Travolta, Al Pacino, Shia LaBeouf, Viggo Mortensen i Courtney Love. Segun e revista Deadline e siman aki na Cannes lo ofresé e pelíkula na studionan internashonal pa produkshon.
Segun su sinópsis, esta su deskripshon, e pelíkula ta sigui un teoria di mafiosonan di rango haltu ku lo a duna òrdu pa e asesinato kreando asina un kòmplòt ku impakto duradero na Merka. Assasssination ta dirigí pa David Mamet, konosí di e pelíkulanan Heist i Wag the Dog. El a skirbi e script huntu ku Nicholas Celozzi, subrinu di Sam Giancana, ku segun algun teoria lo a hunga un ròl importante den e plan pa asesiná John F. Kennedy.
E film lo bai konsentrá riba e último 48 oranan promé ku e asesinato i ta kontá for di perspektiva di mafia na Chicago.
Senaristanan, esta screen writers, di televishon i pelíkula na Hollywood a buta trabou abou masivamente. Nan ta demandá mas sèn di studionan grandi i servisionan di streaming. Na total ta trata di 11500 eskritor di akuerdo ku The New York Times.
Nan no ta di akuerdo ku e pago ku nan ta risibí di studionan grandi manera Universal i Paramount i servisionan di streaming manera Netflix i Amazon. Entretantu ya lo a ofresé un pago mas haltu, pero e sindikato Writer’s Guild of America (WGA) no a aseptá e ofèrta.
Partikularmente talkshows ta e promé programanan ku ta afektá dor di e wèlga. Probablemente mester anulá e shownan di Jimmy Fallon, Stephen Colbert i kisas asta Saturday Night Live. Segun e presentadó Seth Meyers, ku tambe ta miembro di e sindikato, a bisa den un deklarashon ku nan no a tuma e paso aki di un dia pa otro.
Pa mundu di sine e impakto ta ménos grandi, ounke e wèlga ta nifiká si ku sierto produkshon ta haña retraso. I si e wèlga pèrsistí mas largu e proyektonan mester warda mas largu. E wèlga ta tumando lugá partikularmente na New York i Los Angeles, kaminda mayoria kompania di entertainment ta operá.
Delaster biaha ku tabatin un wèlga komparabel tabata den 2007. E wèlga ey a dura 100 dia i a kosta e industria mas di 2 mil mion dòler.
Siguiendo e éksito di e serie rondó di e asesino di serie Jeffrey Dahmer, Netflix ta bai traha un serie riba e rumannan Lyle i Erik Menéndez. Nan a keda kondená pa bida largu den 1996 pa asesinato di nan mayornan.
Ta trata di e di dos parti di e kolekshon di serie Monsters. E promé a trata pues e ya menshoná Jeffrey Dahmer, por sierto un di e serienan mas eksitoso den historia di Netflix banda di Stranger Things i Squid Game.
The Lyle and Erik Menéndez Story tambe ta dirigí pa Ryan Murphy, kende segun e revista Deadline lo tabatin kontakto eksklusivo ku e rumannan ku a tira nan mayornan mata den 1989. Lyle tabatin 21 i Erik 19 aña na e momentu ey.
Den novèmber Netflix a disidí kontinuá ku por lo ménos dos kolekshon mas di Monsters. The Lyle and Erik Menéndez Story tin ku sali otro aña.
Netflix ta bai invertí mas den film i serie produsí na Sur Korea. E servisio di streaming ta bai invertí 2500 mion dòler den próksimo 4 aña. Asina e revista Deadline a publiká.
Gerensha di Netflix ta satisfecho ku e originalidat di e produkshonnan. For di 2016 ora ku e servisio a bira disponibel den Sur Korea e pais a produsí vários pelíkula i serie eksitoso pa Netflix ku a haña hopi akohida den eksterior, inkluso na Kòrsou kaminda e serie Squid Game tabata un tópiko relativamente popular. Otro produkshonnan manera The Glory i Physical: 100 tambe por a konta ku hopi akohida.
Lionsgate Studios ta trahando riba un serie basá riba e di e konosido kolekshon di buki Twilight di Stephenie Meyer. Asina The Hollywood Reporter a anunsiá. No ta konosí si e serie lo sigui e liña di e bukinan òf si ta trata di un kuenta kompletamente nobo. Tampoko ta konosí riba kua plataforma e ta bai sali òf na kua kanal di televishon.
Ta trata akinan di e bukinan ku ta konta e kuenta di Bella Swan ku ta namorá di e vampiro Edward Cullen. E bukinan a sali riba pantaya kaba den forma di 5 pelíkula ku a sali entre 2008 i 2012, ku Kristen Stewart i Robert Pattinson den e ròlnan prinsipal.
Ya ta di dos anunsio di serie di buki ku ta pasa pa televishon. Asina tin plan tambe pa un serie basá riba e bukinan di Harry Potter.
Tin testigu i un grabashon ku ta demostrá ku aktor Jonathan Majors no ta kulpabel di maltrato. Asina su abogado a bisa den un deklarashon. Majors a bira tópiko di kontroversia despues ku un dama a hasi denunsia di maltrato físiko. Un hòmber ku tabata transportá e aktor i ku lo ta testigu di dicho insidente ta dispuesto na duna testimonio di loke el a mira pasa entre e pareha.
E grabashon lo ta demostrá ku e dama no tabatin ningun leshon ora ku el a sali bai baila despues. Outoridatnan a detené Majors fin di luna pasá siguiendo un denunsia di violensha doméstiko. E dama lo a keda ku leshon na kabes i su nèk. El a bisa tambe ku el a kibra un dede dor di e maltrato.
E testigu a indiká sinembargo ku e no a mira e aktor hisa man pa e dama, pero ku el a mira e dama si dal e aktor i huñ’é. E imágennan lo ta mustra ku e dama por a usa su telefòn sin problema despues di e insidente, kua ta un indikashon ku su dede no por ta kibrá. Tambe e dama a manda vários mensahe pa Majors despues den kua no tin ningun reklamo di loke e lo a hasi ku e dama.
E kaso ta delikado. Asina e revista Variety a skirbi resien ku mas dama lo a mèldu pa entregá keho kontra Majors. Anteriormente e siman aki e management di Jonathan Majors a para su kolaborashon ku e aktor.
Den e promé dianan despues di su lansamentu The Super Mario Bros. Movie, ku ta konta e kuenta di e personahe di Nintendo Mario, a generá mas di 377 mion dòler. Ku e resultado aki e pelíkula animá a kibra vários record. E pelíkula a estrená djarason siman pasá i registrá mesora e mihó wikènt di estreno pa un pelíkula animá den historia. E record anterior tabata pa e pelíkula Frozen 2 ku a generá 358 mion dòler den 2019.
Otro logro ta ku The Super Mario Bros. Movie te asina leu ta e pelíkula mas eksitoso den sine e aña aki. Aparte di tur esei normalmente pelíkula basá riba videogames no ta bende bon.
E stèmnan di Mario i Luigi ta interpretá pa Chris Pratt i Charlie Day respektivamente. Tambe tin aktuashonnan di stèm di Anya Taylor-Joy (Princess Peach), Jack Black (Bowser), Keegan-Michael Key (Toad) i Seth Rogen (Donkey Kong). The Super Mario Bros. Movie ta dirigí pa Aaron Horvath i Michael Jelenic, ku ta responsabel tambe pa Teen Titans Go!.
E ta konta komo un di e streanan den subida na Hollywood, pero un posibel insidente lamentabel, por para esaki. Aktor Jonathan Majors a keda detené den wikènt riba sospecho di maltrato di un dama ku ta akus’é di a purba choka, maltratá i intimid’é. Segun abogado di Majors Priya Chaudhry e aktor ta inosente i de echo e víktima den e kaso aki.
Segun e medio TMZ Majors a keda trasladá pa warda di polis na New York djasabra despues ku un dama a bin hasi denunsia. Polis a konfirmá den un deklarashon despues ku e damam tabatin herida leve na su kabes i ku el keda trasladá den estado stabil pa un hospital den serkania.
Majors resien a subi den popularidat despues di su ròl den e pelíkula Creed III huntu ku Michael B Jordan. Tambe e aktor ta konosí komo Kang den e serie Loki i e pelíkula Ant-Man – Quantumania, tur dos di e saga di pelíkula di Marvel.
Korte a seponé un kaso di abusu doméstiko kontra Justin Roiland, un di e kreadornan di e konosido serie animá Rick and Morty. Wes a yega na e desishon aki dor di falta di prueba di akuerdo ku e revista Variety. Den un reakshon Roiland a bisa ku te ainda e no a bin bei di e shòk, pero e ta kontentu ku tur kos ta aklará.
Den yanüari a sali informashon den publisidat ku Roiland tabata akusá di violensha doméstiko i menasa i ku esaki lo a tuma lugá den 2020. For di e momentu ey e eskritor a bisa ku e ta inosente, pero asina mes e kanal Adult Swim a disidí para e kolaborashon ku n’e. Meskos ta konta pa e servisio di streaming Hulu, kaminda Roiland tabata traha riba Solar Opposites i Koala Man.
Den tempu benidero e ta bai wak kiko ta e pasonan ku e ta bai tuma pa drecha su nòmber. E kaso aki ta buta kòrda riba e situashon Johnny Depp vs Amber Hurt. Den e kaso ey Johnny Depp tambe tabata akusá di violensha doméstiko, pero durante tratamentu di e kaso a resultá ku e situashon tabata tòg diferente for di loke Amber Hurt a trese dilanti.
E konosido direktor di sine Quentin Tarantino ta trahando riba loke e mes ta konsiderá su di 10 i último pelíkula. E grabashonnan di e pelíkula, ku ta karga e título The Movie Critic, ta kuminsá den e di tres kuartal di e aña aki. Asina e revista The Hollywood Reporter a publiká.
Ta asina ku Tarantino a indiká na mas ku un okashon ku su di dies pelíkula ta bai ta su delaster obra. Ounke téknikamente Tarantino ya a pasa dies pelíkula e ke kòrda tur hende ku Kill Bill Volume 1 i 2 ta konta komo unu. Quentin Tarantino por skirbi títulonan legendario bou di su nòmber manera Reservoir Dogs, Pulp Fiction i Django Unchained.
Segun The Hollywood Reporter e pelíkula The Movie Critic ta tuma lugá den añanan 70 i probablemente ta konta, manera nos a kustumá di Tarantino, un kuenta alternativo di e krítiko di sine Pauline Kael kende te dia di awe ta konsiderá un outoridat riba evaluashon di pelíkulanan di sine. Mas detaye no ta konosí te asina leu.
Djadumingu a skohe e ganadónan di e premionan Oscar pa 2023. Ken ta e ganadónan (den bold) prinsipal?
Mihó pelíkula
Im Westen Nichts Neues
Avatar: The Way of Water
The Banshees of Inisherin
Elvis
Everything Everywhere All at Once
The Fabelmans
Tár
Top Gun: Maverick
Triangle of Sadness
Women Talking
Mihó direktor
Todd Field (Tár)
Ruben Östlund (Triangle of Sadness)
Steven Spielberg (The Fabelmans)
Martin McDonagh (The Banshees of Inisherin)
Daniel Kwan & Daniel Scheinert (Everything Everywhere All at Once)
Mihó protagonista femenino
Ana de Armas (Blonde)
Andrea Riseborough (To Leslie)
Cate Blanchett (Tár)
Michelle Williams (The Fabelmans)
Michelle Yeoh (Everything Everywhere All at Once)
Mihó protagonista maskulino
Austin Butler (Elvis)
Colin Farrell (The Banshees of Inisherin)
Brendan Fraser (The Whale)
Paul Mescal (Aftersun)
Bill Nighy (Living)
Mihó aktris den ròl sekundario
Angela Bassett (Black Panther: Wakanda Forever)
Hong Chau (The Whale)
Kerry Condon (The Banshees of Inisherin)
Jamie Lee Curtis (Everything Everywhere All at Once)
Stephanie Hsu (Everything Everywhere All at Once)
Mihó aktor den ròl sekundario
Brendan Gleeson (The Banshees of Inisherin)
Brian Tyree Henry (Causeway)
Judd Hirsh (The Fabelmans)
Barry Keoghan (The Banshees of Inisherin)
Ke Huy Quan (Everything Everywhere All at Once)
Mihó pelíkula internashonal
Close (Bèlgika)
Im Westen Nichts Neues (Alemania)
Argentina: 1985 (Argentina)
EO (Polonia)
The Quiet Girl (Irlanda)
Mihó pelíkula animá
Guillermo del Toro’s Pinocchio
Marcel the Shell with Shoes On
Puss in Boots: The Last Wish
The Sea Beast
Turning Red
Mihó kansion
Lady Gaga – Hold My Hand (Top Gun: Maverick)
Rihanna – Lift Me Up (Black Panther: Wakanda Forever)
Sofia Carson – Applause (Tell it Like a Woman)
Rahul Sipligunj, Kala Bhairava, M. M. Keeravani – Naatu Naatu (RRR)
Son Lux, Mitski & David Byrne – This Is a Life (Everything Everywhere All at Once)
Otro premionan
Mihó montahe: Everything Everywhere All at Once
Mihó sonido: Top Gun: Maverick
Mihó script: Women Talking
Mihó script original: Everything Everywhere All at Once
Mihó efektonan visual: Avatar: The Way of Water
Mihó soundtrack: Im Westen Nichts Neues
Mihó diseño di sèt: Im Westen Nichts Neues
Mihó diseño di trahe: Black Panther: Wakanda Forever
Mihó make-up i hair styling: The Whale
Mihó kamarografia: Im Westen Nichts Neues
Mihó dokumental: Navalny
Mihó film kòrtiku: An Irish Goodbye
Mihó dokumental kòrtiku: The Elephant Whisperers
Mihó animashon kòrtiku: The Boy, the Mole, the Fox and the Horse
Netflix ta bai lansa por lo ménos 2 produkshon Hulandes. Ta trata di e comedy The Dadchelor i Bad boa’s, ku Jandino Asporaat komo protagonista.
The Dadchelor ta bai over di un tal Mark ku ta serka di bira tata i ku ta mira un fiesta dediká na dje sali kompletamente for di man.
Bad boa’s ta bai over di un buitengewoon opsporingsambtenaar (abreviá pues boa) ku ta terminal. E boa i su partner ta enkontrá un pakete di droga aksidentalmente i ta mira esaki komo un oportunidat pa gara un gang kriminal.
Tin mas pelíkula Hulandes planiá pa e aña aki, pero e espektativa pa e 2 pelíkulanan aki ta haltu.
E konosido aktor Tom Sizemore a fayesé na 61 aña di edat. Kisas e nòmber no ta zona konosí, pero lo bo rekonosé su kara mesora si bo mir’é den pantaya. Sizemore a keda hospitalisá den febrüari despues di un sangramentu na seleber i a keda den koma pa algun siman. El a fayesé poko despues ku a disidí pa paga e aparatonan ku tabata ten’é na bida.
E karera di Sizemore ta kubri vários dékada den kua el a hunga ròlnan legendario den Saving Private Ryan (1998) i Black Hawk Down (2001). Tambe el a keda nominá pa un Golden Globe Award pa su ròl den Witness Protection. Tambe Sizemore ta buta furor den entre otro Lock-Up, Passenger 57, Born Killers, Pearl Harbor i Heat. Nunka bo por a ninga su presensia den un esena kaminda e ta presente.
Lamentablemente su bida ta marká pa problemanan di adikshon ku a but’é bai será na vários okashon. Ounke su ròlnan a bira skars despues di añanan 90 su aparishonnan kòrtiku den e serienan Cobra Kai i Twin Peaks tambe a hala hopi atenshon pa su presentashon na nivel atrobe.
