by Webmaster | 27/11/2023 | IT, Apps & Social Media
Sigur 33 estado na Merka ta akusá e kompania propietario di Facebook i Instagram Meta di a rekohé datonan personal di mucha menor di 13 aña di forma ilegal riba Instagram. Luna pasá ya a entamá un kaso kontra e kompania pa e daño sikológiko ku e plataformanan lo ta okashoná serka mucha i hóben.
E wikènt aki e korant The New York Times a publiká a base di un dokumento nobo ku e estadonan ta bai demandá e kompania tambe pa violashon di privacy.
Ofisialmente muchanan bou di 13 aña no ta pèrmití riba Instagram. Pero segun e estadonan ku ke hiba e kompania dilanti atrobe Meta ta disponé di i tambe ta mantené datonan personal di miónes di mucha bou di 13 aña.
Instagram lo no ta kontrolá sufisiente si usuarionan nobo ta kumpli ku e rekerimentu aki. For di e-mails i mensahenan di chat interseptá e kompania lo a asta atraé usuarionan ku ta muchu yòn pa e plataforma. Tambe e kompania lo a ignorá atevertensha ku tin usuariona muchu yòn ta registrá.
by Webmaster | 24/11/2023 | IT, Apps & Social Media
OpenAI, e kompania ku tabata hala hopi atenshon último dianan den mundu di inteligensha artifisial, lo tabata trahando riba un modelo asina avansá ku esaki a spanta vários trahadó. Pa ta mas eksakto nan a denominá e modelo aki komo un peliger pa humanidat.
Asina agensia di prensa Reuters a informá a base di fuentenan na e kompania. No tin klaridat sinembargo si ta trata di e model Q* (pronunsiá Q Star) i si ta esei tabata motibu pa retiru di Sam Altman siman pasá.
E modelo Q* lo ta asina potente ku investigadónan ta bati alarma. E programa lo a desaroyá su mes muchu lihé. Segun e revista online di teknologia The Information e sistema lo a siña kalkulá masha lihé mes sin konosementu previo di kon hasi sierto kálkulo.
Na momentu ku un sistema por siña kalkulá su so básikamente e por funshoná independiente kaba.
Manera indiká, no tin klaridat si e retiru inesperá di Sam Altman komo direktor di e kompania ta relashoná ku e desaroyo aki. Un dia promé ku a retir’é Aktman a bisa ku tabatin un fase nobo den desaroyo di inteligensha artifisial. Na e okashon ei Altman tampoko a menshoná Q*.
OpenAI, ku ta produsí tambe ChatGPT, no kier a reakshoná riba preguntanan di e korant The Guardian.
by Webmaster | 22/11/2023 | IT, Apps & Social Media
E drama rondó di retiru di èks direktor di e kompania di inteligensha artifisial OpenAI ta kontinuá. Siguiendo e òntslag di Sam Altman komo direktor di e kompania djabièrnè siman pasá i anunsio ku el a haña un trabou nobo na Microsoft, entretantu Altman ta bèk na OpenAI.
Despues di hopi preshon di invershonistanan riba gerensha di OpenAI, esaki a mir’é fòrsá di pidi Altman bini bèk. A resultá tambe ku lo remplasá algun miembro di e direktiva di e kompania ku a èksigí retiru di Altman anteriormente. E miembronan aki no tabatin konfiansa den Altman.
Djaluna a resultá ku Sam Altman lo a haña un trabou nobo na Microsoft kaminda lo el a bai guia un team nobo dediká na inteligensha artifisial. Microsoft ta alabes un di e invershonistanan mas grandi di OpenAI ku no tabata kontentu ku e desishon pa retirá Altman.
Direktor di Microsoft Satya Nadella a duna di konosé djarason mainta ku e reinstalashon di Altman komo direktor mester stabilisá e kompania. Tambe mester instalá un gerensha nopbo ku ta mihó informá riba funshonamentu di e direktor.
E preshon riba e gerensha di OpenAI tabata bini di tur banda inkluso di den e kompania mes. Hopi trahadó a indiká di lo retirá si Altman no bini bèk.
Despues di tur e preshon parti di e gerensha lo retirá. Pero te asina leu no tin klaridat ainda dikon sierto miembro kier a mira Sam Altman retirá.
by Webmaster | 21/11/2023 | IT, Apps & Social Media
Sam Altman, for di djabièrnè èks direktor di OpenAI, a haña un posishon na Microsoft kaminda lo e guia un team ku lo traha riba inteligensha artifisial. Direktor di Microsoft Satya Nadella a partisipá e notisia personalmente. No solamente Altman, pero tambe ko-fundadó di OpenAI Greg Brockman tambe a bandoná e kompania pa bai traha na Microsoft.
Djabièrnè último e notisia di retiru fòrsá di Sam Altman for di OpenAI, e kompania ku ta produsí ChatGPT, a lanta hopi stòf den mundu di IT. Direktiva di e kompania no tabatin konfiansa mas den Altman. Poko despues di e òntslag di Altman, ko-fundadó Brockman tambe a bandoná e kompania.
Microsoft ta un di e invershonistanan mas importante pa OpenAI. E gigante a finansiá mayor parti di e start-up di OpenAI. E kambionan na OpenAI no a kambia Microsoft su disposishon pa sigui traha ku e kompania.
by Webmaster | 20/11/2023 | IT, Apps & Social Media
Invershonistanan ku a hinka kapital den OpenAI, e kompania tras di e konosido programa di inteligensha artifisial ChatGPT, ta butando hopi preshon riba gerensha pa drai bèk e desishon pa retirá Sam Altman komo direktor. Asina agensia di prensa Bloomberg a publiká despues di e òntslag di Altman djabièrnè último. E notisia inesperá a lanta basta stòf.
Invershonistanan no a keda kontentu ku e desishon di gerensha di OpenAI. Altman lo ta dispuesto na bai bèk. Di momentu e direktor tékniko di OpenAI ta okupando e funshon temporalmente.
E gerensha di OpenAI a bisa djabièrnè ku su retiru ta relashoná ku un investigashon ku a mustra ku e no a komuniká semper habrí ku e gerensha i ku esei tabata stroba su bon funshonamentu.
Microsoft, un di e invershonistanan mas grandi di OpenAI lo ta pará tras di e direktor retirá. Den e kompania tambe lo tin vários stèm a lanta siguiendo e retiru. Asina e ko-fundadó di OpenAI Greg Brockman lo a retirá komo forma di protesta i asina lo tin vários trahadó klave ku ta pensa di sigui su ehèmpel. Nan lo ke uni Altman den lantamentu di un otro kompania di inteligensha artifisial di akuerdo ku fuentenan ku a papia ku agensia di prensa Reuters.
Segun agensia di prensa Bloomberg tin un diferensha di vishon entre Altman i gerensha di e kompania relashoná ku siguridat di inteligensha artifisial, e rapides di e desaroyonan i e aspketo komersial ku ta hasiendo su entrada den e mundu di inteligensha artifisial.
by Webmaster | 17/11/2023 | IT, Apps & Social Media
E korant The Guardian a kita un karta di Osama Bin Laden for di su website. Den e karta Bin Laden ta splika ku e atake riba Merka riba 11 di sèptèmber 2001 ta entre otro pa motibu di e pais su sosten pa Israèl. Den último dianan e karta a bira viral riba TikTok.
E karta a keda publiká 21 aña pasá riba 24 di novèmber di 2002. E korant no a kita e página kompleto sino solamente e karta. Riba e página original tin un mensahe kaminda The Guardian ta motivá su desishon.
Ta trata di videonan kaminda hóbennan ta reakshoná riba e kontenido di Bin Laden su karta. Un di e videonan aki a haña mas di 1 mion di views despues ku e usuario a yama otronan pa bai lesa e karta.
Despues a sigui vários otro video di usuarionan ku sea ta lesa e karta kompleto na bos haltu òf partinan di e karta. Otronan ta bisa ku nan ta den shòk pasobra nan ta pa un gran parti di akuerdo ku Bin Laden ku ta referí na inhustisianan kontra di Palestino.
No ta masha komun ku korantnan ta kita artíkulonan bieu for di nan website. Pero den e kaso aki, asina The Guardian a splika e website 404 Media, e usuarionan di TikTok a kompartí e karta sin menshoná su konteksto original.
Ta asina ku no ta 100% sigur ku e karta ta di Bin Laden mes. E karta original ta bin di un website kaminda Al Qaida tabata kompartí mensahe 21 aña pasá. Te asina leu tabata asumí ku e karta por ta di Bin Laden, pero esaki nunka a keda konfirmá.
by Webmaster | 16/11/2023 | IT, Apps & Social Media
Facebook a kometé un eror remarkabel djarason ku anunsio di dia di elekshon pa parlamentu na Hulanda. Sinembargo elekshon na Hulanda ta próksimo siman.
Djarason mainta Hulandesnan de pronto a mira e mensahe “Vandaag zijn de verkiezingen. Krijg officiële informatie om vandaag, 22 november, te gaan stemmen voor de Tweede Kamerverkiezingen van 2023.”
E link ku tabata kompañá e mensahe tabata dirigí usuarionan pa e website Rijksoverheid. No tin masha klaridat ta kiko a bai robes i kuantu usuario di Facebook a mira e mensahe. Entretantu e eror ta resolvé. E mensahe ta bisa awor “Bereid je voor om te gaan stemmen” kompañá pa un link pa mas informashon riba e elekshon.
Facebook no a reakshoná den prensa Hulandes ainda riba e insidente. Dor di reorganisashon Facebook no tin un team pa atendé ku prensa mas den Benelux for di komienso di e luna aki.
Ta pa motibu di insidentenan asin’akí mes ku retnan sosial i inteligensha artifisial ta un tema di interes durante e kampaña aki na Hulanda. Opservadónan ta vigilá e plataforma ku wowo di falki relashoná ku posibel fake news ku ta sirkulá den periodo di elekshon òf intentonan pa influenshá esaki.
Mas o ménos 9 mion Hulandes, o sea un poko mas ku mitar di e poblashon di Hulanda, ta hasi uso di Facebook.
by Webmaster | 15/11/2023 | IT, Apps & Social Media
TikTok i YouTube mester splika Komishon Oropeo kiko nan ta hasi pa protegé mucha di kontenido ku no ta adekuá pa nan. Relashoná ku esaki e komishon a start un investigashon.
For di ougùstùs e kompanianan mester kumpli ku reglanan mas severo ku ta konta den hinter Union Oropeo. Asina e kompanianan mester vigilá e bienestar sikológiko i físiko di usuarionan.
Ta asina ku a someté ámbos plataforma na un asina yamá ‘stress test’ pa kontrolá si e plataformanan ta ‘safe’ pa mucha, pero nan no a pasa e tèst. Den próksimo 2 siman e kompanianan lo mester duna kuenta i rason. Si e kompanianan no kumpli nan mester tene kuenta ku un but na un suma hopi haltu.
Partikularmente TikTok a haña pregunta adishonal riba plamamentu di fake news, glorifikashon di terorismo i mensahenan di odio. No ta promé biaha ku Union Oropeo ta hala e kompania su atenshon pa ku e partikularidat aki.
Otro plataformanan manera X (ántes Twitter) i Facebook tambe mester kumpli ku e reglanan.
by Webmaster | 15/11/2023 | IT, Apps & Social Media
TikTok pronto lo implementá e funshon Add to Music App. Ku e funshon nobo aki usuarionan por warda kansionnan ku nan haña via TikTok riba nan servisio di streaming di preferensha pa musik. E funshon nobo lo sali promé na Merka i Reino Uní i despues lo sigui un lansamentu mundial.
E funshon Add to Music App lo ta integrá ku entre otro Amazon Music i Spotify. Segun Music Business World e funshon lo ta disponibel tambe pa usuarionan di Apple Music.
by Webmaster | 14/11/2023 | IT, Apps & Social Media
Nepal ta bai prohibí e plataforma sosial TikTok relashoná ku e influensha negativo di e app riba e harmonia sosial di e pais. Asina ámtenarnan di e pais a bisa den un deklarashon. E prohibishon lo mester drenta na vigor asina ku esaki ta téknikamente posibel di akuerdo ku e ministerio di Komunikashon i Informátika.
Lo tin hopi mal uso di TikTok na Nepal. Asina tin 1.600 insidente di atake sibernétiko registrá den último 4 aña. Segun gobièrnu di e pais e plataforma ta sirbi pa plamamentu di mensahenan di odio.
Polítikonan den oposishon ta kritiká e desishon komo un violashon di libertat di ekspreshon. Ta asina ku anteriormente gobièrnu di Nepal a anunsiá introdukshon di direktivanan pa kontrolá kontenido di retnan sosial den e pais.
Algun pais manera India ya a prohibí TikTok. Den e pais bisiña Pakistan a prohibí i despues lanta prohibishon atrobe na sigur 4 okashon.
by Webmaster | 10/11/2023 | IT, Apps & Social Media
Vários partido polítiko na Hulanda a viola e lei di privasidat dor di usa cookies pa follow usuario sin pidi outorisashon pa esaki. Asina por dedusí for di un investigashon di NOS. Lo ta trata di BoerBurgerBeweging (BBB), Forum voor Democratie (FvD), SGP i Volt. Di e 4 partidonan embolbé, 3 a indiká ku ta trata di un eror ku nan lo resolvé mas pronto posibel. SGP so no a reakshoná riba petishon di NOS.
Cookies ta un funshon riba plataformanan di internet pa konektá ku usuarionan. Ku e cookies aki e partidonan por aserká hende ku bishitá nan website den futuro atrobe ku anunsionan polítiko via social media manera YouTube òf sierto website di notisia kaminda nan ta publiká anunsio polítiko. Cookies ta útil pa e funshon di mensahenan personalisá di e plataformanan.
No ta asina ku e cookies aki ta prohibí kompletamente, pero e partidonan ta obligá si for di 2012 na puntra pa pèrmit di hende ku bishitá nan website pa aprobá e uso di cookies pa social media.
by Webmaster | 07/11/2023 | IT, Apps & Social Media
E plataforma X (ántes Twitter) tin 1 persona so ku ta komprondé Hulandes bou di su team di moderadó. E team aki ta responsabel pa kontrolá si e mensahenan riba e plataforma ta kumpli ku e respektivo reglanan di kondukta.
E team kompleto di moderadó ta konsistí di 2294 persona segun un rapòrt publiká pa e kompania. No ta konosí sinembargo si e persona aki ta berdaderamente Hulandes òf si e ta e úniko persona ku ta kontrolá mensahenan na Hulandes. Tampoko no ta konosí si ta semper e situashon tabata asin’aki òf si e lo sigui di e mesun forma.
Ta remarkabel ku ta 1 persona so tin den e team ku ta papia Hulandes kaminda tin sigur 81 ku ta dominá Aleman, 52 ku ta papia Franses i 41 ku ta papia Portugues. Segun X tur moderadó ta spesialisá den evaluashon i tratamentu di mensahenan prohibí riba e plataforma.
by Webmaster | 02/11/2023 | IT, Apps & Social Media
Atrobe un klap duru pa Meta. E kompania no ta pèrmití mas pa usa dato di usuarionan di Facebook i Instagram den Oropa pa avisonan komersial personalisá. Segun e Komité Oropeo pa Protekshon di Dato propietario di e plataformanan Meta ta violá leinan di privasidat dor di usa datonan personal di usuario pa avisonan personalisá.
E prohibishon ta un klap duru pa e kompania. Meta ta gana un kapital enorme ku e avisonan aki. Kompanianan ku ta advertise riba Facebook i Instagram ta buta nan avisonan hustamente pa e funshonnan ku e kompania ta usa pa anunsionan dirigí.
E violashon di privacy no ta limitá na e uso di e datonan di usuario pa finnan komersial. Ta trata tambe di informashon manera kiko hende ta klek pa lesa. Meta ta usa e informashon ei tambe pa krea perfilnan komersial. Sinembargo e kolekshon di dato ei no tin un base hurídiko.
Anteriormente Norwega ya a prohibí Meta pa rekohé datonan di usuario pa metanan komersial. Awor hinter Union Oropeo a sigui e pais su ehèmpel.
by Webmaster | 01/11/2023 | IT, Apps & Social Media
Entrante promé di yanüari servisionan di streaming mester invertí 5% di nan resultado anual den kontenido lokal pa merkado Hulandes. Eerste Kamer a aprobá un proposishon di lei di departamentu di kultura. Esaki mester kondusí na fondonan pa produkshonnan Hulandes ku despues por pasa na plataformanan internashonal manera Netflix, HBO Max i Amazon Prime.
E lei ku ta regla esaki ta bálido pa servisionan di streaming ku un resultado anual di mas di 10 mion euro. Esei ta inkluí Netflix, Disney+ i Amazon Prime. E invershon di 5% ta pèrmití pa tur kontenido eksepto deporte. Tambe e lei ta regla ku 60% di e produkshonnan lokal mester ta independiente.
Paisnan manera Alemania, Fransia i Bèlgika ya a adoptá leinan komparabel pa asina nan produkshonnan lokal por kompetí ku otro produkshonnan internashonal.
by Webmaster | 31/10/2023 | IT, Apps & Social Media
Entrante novèmber usuarionan Oropeo por opta pa un account pagá di Facebook òf Instagram sin avisonan komersial. Di e forma aki Facebook mester kumpli ku leinan Oropeo ku ta regardá privasidat di usuarionan. Si e usuario ke e por sigui usa Facebook i Instagram grátis pero esei ta nifiká ku e ta di akuerdo ku avisonan komersial personalisá.
Usuarionan di e website di Facebook por paga 9,99 euro pa luna pa usa esaki sin anunsio komersial i usuarionan di e app lo mester paga 12,99 euro pa luna. E uso di e app pagá ta mas karo dor ku Google i Apple ta kobra un komishon riba pagonan via Play Store i App Store.
E preisnan por sierto ta un ganashi konsiderabel pa Meta. E abono spesial aki sin anunsio komersial ta mas haltu ku e ganashi ku Facebook tin riba kada usuario di Facebook, Instagram òf WhatsApp. Den último kuartal Meta a gana un poko mas di 3,50 dòler pa kada usuario.
