Sigur 21 persona a pèrdè nan bida dor di un kandela den un kampamentu di refugiado na e Estrecho di Gaza na Palestina. Entre e víktimanan lo tin sigur 10 menor di edat. Probablemente e kantidat di víktimanan mortal ta bai subi di akuerdo ku servisionan di emergensha n’e sitio.
No tin klaridat kiko a okashoná e kandela. Segun outoridatnan lo tabatin kombustibel wardá den e edifisio kaminda e kandela a kuminsá plama. Outoridatnan na Palestina a pidi Israèl pa yuda ku pasahe di pashèntnan. Poko despues e ministerio di Defensa Israelí a aprobá yudansa na e servisionan di emergensha.
Partido Republikano na Merka definitivamente a atkirí un mayoria den e Kas di Representantenan, e parlamentu dje pais. E Demókratanan a logra di otro banda pa mantené nan mayoria den Senado. Ku e resultado aki e Republikanonan por opstakulisá maneho di presidente Joe Biden den vários sintí den próksimo dos aña.
Asina e mayoria dje Republikanonan por para sierto proposishon di lei di e Demókratanan. Den próksimo dianan lo bin mas klaridat den e resultado aki. Na total tin 435 asiento den e parlamento i e Republikanonan a kaba di pasa e mínimo di 218 pa un mayoria.
E impakto di rakèt djamars na Polonia no ta okashoná pa un misil Ruso sino probablemente kousá pa un sistema di defensa na Ukrania mes. Esei ta resultado te asina leu di e investigashon ku a sigui e insidente. E sistemanan di defensa tambe ta lansa rakèt i den e kaso spesífiko aki probablemente e misil lo a desviá den direkshon di Polonia.
Hefe di OTAN Jens Stoltenberg (potrèt) tambe a konfirmá e splikashon aki. Presidente di Polonia Andrzej Duda a duna di konosé ku e no ta mira prueba di un atake intenshonal.
Den e promé oranan siguiendo e insidente tabata asumí ku ta trata di un rakèt di Rusia ku a hiba un serie di atake ku misil riba instalashonnan di koriente na Ukrania, inkluso blanku no masha leu for di e frontera entre Ukrania i Polonia. Apesar di e echonan ku ta konosí aworakí OTAN a konkluí ku e insidente lo no a tuma lugá si Rusia no tabata atakando Ukrania.
E protestanan na Iran a drenta nan di tres luna. Esaki apesar di akshonnan represivo severo di gobièrnu dje pais. Djarason i awe atrobe outoridatnan a usa forsa ku arma di kandela di kua e kantidat di víktima ainda no ta konosí.
E protestanan a sigui un insidente riba 16 di sèptèmber ora outoridatnan a usa violensha desproporshonal kontra e dama di 22 aña Masha Amini ku a fayesé finalmente na man di e agentenan embolbé. Amini lo no tabatin su duki korektamente bistí riba su kabes.
Segun kálkulonan alrededor di 350 manifestante lo a muri den e konfrontashonnan ku outoridatnan. Nashonnan Uní ta preokupá ku e situashon na Iran. Den último dianan vários manifestante a keda kondená na morto.
E konflikto entre Rusia i Ukrania a tuma un buèlta inesperá i preokupante djamars último. Misilnan Ruso a kai riba e lugá Polako Przewodów okashonando morto di por lo ménos 2 Polako. E Organisashon di Tratado di Atlántiko Norte, paisnan den G7 i G20 ta teniendo vários reunion siguiendo e insidente.
No ta trata di un atake direkto di Rusia riba Polonia, sino di un aterisahe imprevisto despues ku sistemanan antirakèt na Ukrania a basha algun misil di Rusia abou. Ta asina ku Rusia a hiba un serie atake dirigí riba instalashonnan di energia na Ukrania djamars. Polonia a yama embahador di Rusia pa bin responsablisá e atake.
Pa awe (djarason) ta antisipá un dia di hopi tenshon durante e reunionnan entre e paisnan. Ta asina ku Polonia komo miembro di OTAN a apelá na artíkulo 4 den e reglamentunan di OTAN pa yama un reunion ora un miembro ta sinti’é menasá. E siguiente artíkulo, esta artíkulo 5, ta stipulá ku un atake riba un miembro, ta un atake riba tur.
Poblashon mundial ta sigui oumentá. Di momentu e populashon di nos planeta ta kalkulá na 8 mil mion habitante, den sifra 8.000.000.000. Segun kálkulonan di Nashonnan Uní nos a alkansá e kantidat ei djamars último.
11 aña pasá riba 31 di òktober 2011 a kalkulá 7 mil mion. Segun Nashonnan Uní e echo ku tin tantu hende asina riba nos planeta ta debí na e mihó espektativa di bida kompará ku ántes. Esaki ta konsekuensha di modernisashon di kuido, alimento i higiena.
Segun algun eksperto e mayor problema ta sinembargo ku e kresementu mas haltu ta tuma lugá den paisnan mas pober. Alabes Nashonnan Uní ta di opinion ku ta e grado di konsumo den paisnan mas riku ta okashoná e mayor menasa pa nos planeta.
Nashonnan Uní ta estimá ku populashon lo alkansá 9 mil mion aki 15 aña, esta den 2037. Segun e organisashon e tèmpo di kresementu ta bai baha.
Manera tabata antisipá èks presidente di Merka Donald Trump a anunsiá su kandidatura pa e próksimo elekshon presidensial na Merka. Ku e anunsio aki Trump ta e promé Republikano ku ta anunsiá su kandidatura pa 2024. Djamars anochi el a duna un spich na su club Mar-a-Lago na Florida.
Komentaristanan ta sospechá ku Trump a sali ku su anunsio pa skapa di e kasonan kontra dje den korte. Den su partido no ta tur hende ta kontentu ku su kandidatura. Segun algun Republikano Trump su kampaña durante e último elekshon pa parlamentu i senado na Merka tabatin un infuensha negativo riba e resultadonan.
Trump lo a duna su sosten na kandidatonan ku kada un a pèrdè di nan kontrinkantenan Demókrata den nan respektivo estadonan. Tur kos ta indiká sinembargo ku Republikanonan ta bai tin tòg un mayoria den parlamentu, faltando 2 asiento pa un mayoria.
Fransia i Reino Uní a sera un serie di akuerdo pa baha e kantidat di refugiadonan ku ta purba krusa e kanal entre e dos paisnan. Asina nan ta bai implementá sentronan di kòntròl i mas kolaboradó di siguridat. E deal ta enserá mas aleu ku Fransia ta bai risibí alrededor di 72,2 mion euro di Reino Uní pa kontratá mas kolaboradó na e servisionan di siguridat pa patruyá kosta. Tambe Fransia lo bai ta responsabel pa maneho di e sentronan di kòntròl.
Ámbos pais ta bai invertí den kachó di reskate, drone i helikòpter. E paisnan mester a sinta huntu mirando e situashon agúdo riba e pida laman entre e paisnan. E aña aki so mas di 40 mil persona a hasi un intento pa biaha di Fransia pa Inglatera krusando e kanal.
Presidente di Ukrania Volodymyr Zelensky a hasi un bishita na su tropanan den e siudat Kherson ku a keda rekuperá di e Rusonan. Durante un spich na e militarnan Zelensky a bisa ku e viktoria aki ta marka komienso di fin di e konflikto harmá entre Ukrania i Rusia.
Mas aleu e presidente a bisa ku Ukrania a i ta pagando un preis haltu pa e viktorianan aki, refiriendo na e kantidat di víktimanan ku a kai durante e konfrontashonnan. Tambe el a gradisí OTAN i otro aliadonan pa e sosten i entrega di material pa por kontrarestá e atakenan di Rusia. Zelensky a keda mas o ménos mei ora den e siudat.
E lider di e organisashon Taliban Haibatullah Akhundzada a duna òrdu na wesnan na Afganistan pa kontinuá ku e partinan mas severo di sharia, e lei Islamítiko ku ta pèrmití entre otro ehekushonnan públiko, kastigu ku piedra i batimentu ku zwip. Esaki lo a keda palabrá durante un palabrashon kara a kara entre e lider i e wesnan.
E organisashon Taliban a yega na poder atrobe aña pasá ougùstùs ora ku tropanan Merikano a bandoná e pais despues di un presensia di hopi aña. Anteriormente Taliban a indiká di lo hiba un maneho mas humano ku esun ku tabata konta di 1996 pa 2001.
Pero poko despues a resultá ku Talian no tabata bai kumpli ku e promesa aki. For di aña pasá hende muhé a mira nan derechinan deteriorá rápidamente bou di e maneho di Taliban.
Rena Kawasaki, un damita di 17 aña di e siudat Hapones Osaka, a risibí un premio internashonal na Den Haag pa su esfuersonan pa embolbé mucha mas den polítika, medioambiente i komunidat Hapones. E premio ta konsistí di un bùrs di estudio i un fondo di proyekto na balor di 100 mil euro.
Segun KidsRights, ku ta finansiá e premio, Kawasaki tabatin 8 aña ora el a tende pa promé biaha ku muchanan den otro parti di mundu no tabatin akseso na enseñansa. Na apénas 14 aña Kawasaki a lansa e organisashon Earth Guardians Japan.
Loke a distinguí Kawasaki tabata ku e no tabata ke pa mucha pidi atenshon so pa e temanan aki, pero hustamente tuma inisiativa nan mes. Tambe el a lanta un plataforma kaminda hóbennan por drenta direktamente den kontakto ku polítikonan.
E konosido página di deporte riba Facebook GAME ON! a bira blanku di un atake sibernétiko den wikènt tras di lomba. Hackers a logra haña kòntròl di e página. Esaki a sosodé nèt algu despues di 8or di anochi na momentu ku e partido entre Pichingolo di Buenavista i Souax a keda kanselá pa motibu di áwaseru.
E team tékniko di Game On! no por a yega na e page mas i siguidónan di Game On! a kuminsá haña potrètnan ku ta ilustrá matamentu di bestia den karniseria òf despues di yagmentu ku inskripshon na chines.
E tékniko di Game On! a hasi hopi esfuerso pa rekuperá e page, pero sin resultado. Pa evitá desgustu serka fanátiko i siguidó di e Game On! a traha un pagina nobo. Gerensha di Game On! ta pidi tur fanátiko i siguidó pa ‘unlike i unfollow’ e page anterior di Game On! i sigui nan riba https://www.facebook.com/gameon4life kaminda lo agregá e produkshonan anterior.
Gerensha di Game On! ta pidi diskulpa pa kualkier molèster òf desgusto kousá pa e atake. Den un entrevista ku 5W Press, Anthony ‘Broertje’ Guillermo ta amplia riba kiko a pasa.
Na Merka 6 persona a pèrdè nan bida dor di un choke entre dos avion. E insidente a tuma lugá durante un show na e siudat Dallas pa konmemorá di dos guera mundial. E avionnan tabata un diseño bieu di e tipo Boeing B-17 Flying Fortress i un jet tipo Bell P-63 Kingcobra. Outoridatnan ta investigando kousa di e choke.
E trabounan di mantenshon na e toren Big Ben den sentro di Londen na Inglatera ta finalisá i for di ayera mèrdia e habitantenan di e kapital por tende e kampananan di e oloshi kada kuart’i ora atrobe. Ku eksepshon di algun evento spesial siudadanonan no a tende e kampananan kasi sinku aña.
Promé ku e mantenshon Big Ben a bati sigur 157 aña sin interupshon. Pero pa e trabounan por a tuma lugá sin forma peliger pa salú di e trahadónan mester a para e operashon di e kampananan. Tabata intenshon pa finalisá e trabounan den 2021, pero dor di e pandemia di Covid-19 a surgi un retraso den esei.
E gastunan tambe a sali mas haltu ku antisipá. A konta ku alrededor di 35 mion euro, pero esaki a oumentá dado momentu te 90 mion, dor ku a bin topa ku asbèst. Turistanan ku kier bishitá mester warda si te ku próksimo aña pa bishitá e toren. Inglesnan mes a kumpra kasi tur karchi di entrada disponibel pa bishitá e toren.
Na kapital di Spaña Madrid alrededor di 200 mil persona a partisipá den un protesta kontra e plannan pa salubridat di presidente regional Isabel Díaz Ayuso. Di tur e presidentenan regional Díaz Ayuso ta invertí ménos den salubridat miéntras Madrid ta e region mas riku di e pais.
E manifestantenan a sali for di 4 lokalidat i a pasa na hospital kaminda nan a aploudí e trahadónan den kuido. E asina yamá kuido di promé liña na Madrid lo ta bou di basta preshon dor di falta di personal i material. Bou di e presidente aktual e situashon lo a empeorá. Pa dia 21 di novèmber tin un wèlga den kuido planiá.
