E ministerio di Defensa Merikano a lansa un website pa informá riba desaroyonan rondó di UFO, esta ophetonan bulando no identifiká. E website tin un sekshon spesial kaminda militarnan por raportá kualke fenómeno ku no tin splikashon.
Ta asina ku for di 2020 ora ku gobièrnu di Merka a publiká algun video ku pilotonan a graba tin hopi interes bou di públiko. Den e grabashonnan ei por mira ophetonan ku ta move hopi lihé di un forma ineksplikabel.
Por sierto ku Merka no ta usando e abreviashon UFO – esta Unidentified Flying Object – mas. Ta papia awor di UAP kua ta para pa unidentified aerial phenomenon (esta fenómeno aéreo no identifiká).
Riba e website por haña informashon riba kasonan ku no tin splikashon ku potrèt i video. Tambe por haña rapòrtnan ofisial, transkripshon i komunikado di prensa.
Por lo pronto ta militarnan so por entregá material ku imágennan ku no tin splikashon. Tin plannan pa hasi esaki disponibel pa públiko tambe, pero ainda no tin un fecha fiho pa esaki.
Entretantu India por konsiderá su mes e di 4 pais na mundu ku a logra aterisá riba luna. Djarason e moonlander di India a baha ku éksito riba su superfísie. E mishon Chandrayaan-3, manera esaki yama, a kuminsá den yüli.
Esaki ta e di dos intento di India despues di un intento frakasá den 2020 dor di un eror di software. Ta promé biaha por sierto ku un moonlander ta aterisá na e sùitpol di luna. Den próksimo dos siman e moonlander ta bai eksplorá e region aki.
Tin indikashon ku por tin awa einan presente. Tambe tin hopi lus di solo ta kai riba e parti ei pues e panelnan solar di e rover tin sufisiente suministro di energia. E kondishonnan aki ta perfekto pa un posibel base riba luna.
Manera ta konosí Rusia tambe a hasi un intento resien pa aterisá riba luna pero esaki a frakasá dor di un fayo di motor.
E eksplorashon lunar di Rusia a frakasá dor di un fayo den e motor di e moon lander Luna-25. Djasabra a bira konosí ku e nave a crash riba superfísie di luna. E motor mester a funshoná eksaktamente 84 sekònde pa drenta i despues sirkulá den órbita di luna. E maniobra ei ta forma e último paso pa e aterisahe por tuma lugá. E motornan sinembargo a keda funshoná 127 sekònde. Asina e organisashon pa eksplorashon espasial na Rusia Roscosmos a konfirmá na medionan estatal.
No ta konosí dikon e motornan no a paga na tempu. E moonlander mester a aterisá e siman aki. Ku e eksplorashon aki Rusia kier a kontinuá su programa di 1976 ora ku astronoutanan di Rusia a bishitá luna pa delaster biaha. Te asina leu ta Rusia, China i Merka ta e úniko paisnan ku a hasi biahenan eksitoso pa luna. Paisnan manera India, Hapon i Israèl tambe a hasi intento, pero no a logra esaki. Djarason awor por sierto India lo inisiá su propio eksplorashon lunar.
Despues di a logra detektá palabra i frasenan kompleto awor sientífikonan a logra detektá asta melodia produsí dor di olanan serebral. Esaki ta otro paso dilanti den e siensia rondó di olanan serebral. Músika i formulashon di palabra i frase ta tuma lugá den áreanan separá den nos serebro.
Durante e investigashon e sientífikonan a nota serka 29 persona ku mester a operá pa epilepsia ku nan mente tabata produsí un melodia konosí. Despues di e operashonnan a pasa e señalnan ku nan a logra registrá via waya pegá na e pashèntnan su kabes den un computer pa un programa di inteligensha artifisial reprodusí e melodia.
Pa nan gran sorpresa e olanan serebral di e pashèntnan a produsí un meldoia ku ta zona kasi idéntiko na Another Brick in the Wall di e konosido banda Britániko Pink Floyd. Ta trata di e melodia bou di e palabranan “All in all, it’s just another brick in the wall”.
Miónes di aña pasá nos planeta ruman Mars tabatin diferente temporada, meskos ku nos planeta. Asina sientífikonan di e universidatnan di Lyon i Toulouse na Fransia a konkluí a base di imágennan di e eksplorador Merikano Curiosity ku ta kore riba e planeta kòrá for di 2012.
E no ta nifiká mesora ku tabatin bida, pero ku e sirkunstanshanan tabata adekuá pa desaroyo di bida i evolushon manera riba nos planeta. E parti eksterior di nos planeta Tera ta konsistí di plachinan ku ta schuif konstantemente i ku ta okashoná temblor i aktividat volkániko. Riba Mars e fenómeno ei no ta tuma lugá i pa e motibu ei ta relativamente fásil pa haña spornan fósil ku ta revelá kambionan ku a tuma lugá den transkurso di añanan.
For di e imágennan di Curiosity ta parse ku tabatin lago i riu riba Mars. E imágennan ta mustra depósito di salu, meskos ku esnan na Suramérika riba nos planeta. Esakinan ta forma ora awa evaporá. Esei ta segun e sientífikonan prueba ku Mars a konosé temporadanan di sekura i humedat.
Te asina leu siensia ta konkluí ku e sirkunstanshanan aki ta adekuá pa formashon di bida i evolushon. E resultadonan ta publiká den e revista sientífiko Nature.
Pa di dos biaha sientífikonan Merikano di Lawrence Livermore National Laboratory a logra generá energia èkstra dor di fushon nuklear. Esaki siguiendo pues un eksperimento den desèmber último. Na e okashon aki e sientífikonan a asta logra generá mas energia èkstra.
E di dos tèst a tuma lugá na kabamentu di yüli. Motibu dikon awor numa nos ta tende di e resultadonan ta dor ku mester a kompará e resultadonan di e dos tèstnan ku otro.
Pa e tèst aki e sientífikonan a dispará 192 laser ku 2 megajoule na energia den un silindro. Esaki ta okashoná un reakshon di fushon den e kombustibel generando asina hopi mas energia ku despues por usa pa generá koriente.
Si siensia logra aselerá e proseso aki, nos ta un paso mas serka di energia relativamente limpi i duradero. Kontrali na fishon nuklear (ku i), fushon nuklear (ku u) no ta laga desperdisio radioaktivo atras. Pero por dura algun dékada ainda promé ku nos por hasi uso masal di fushon nuklear pa konsumo general.
E teleskop James Webb a kapta imágennan impreshonante di e asina yamá Renchi di Neblina, un neblina planetario na un distansha di 2600 aña di lus for di nos. E neblina ta konosí pa su forma di ‘donut’ i kolónan bèrdè i ros klaro. E imágennan ta disponibel riba e website di Universidat di Manchester i mester bisa ku e klaridat di e imágennan ta hopi impreshonante i detayá.
E Renchi di Neblina ta resultado di un strea ku a muri ku despues a laga tur gas ku e tabata tene skapa bai den espasio i kubri e planetanan den serkania. Esei ta splika e forma di e fenómeno. Loke ta hasi e imágennan èkstra interesante ta ku e region interior di e neblina ta hopi skèrpi.
Studiantenan di e Universidat Tékniko di Delft a diseñá un armadura spesial pa yuda pashèntnan di dwarslaesie kana di nobo. Den un vershon anterior ainda tabatin mester di krùk spesial pa hasi esaki posibel, pero esei no ta nesesario mas.
E èksoskelèt, manera ta yama e armaduranan aki, yama MARCH 8. Èksoskelèt ta nifiká literalmente struktura di wesu pafó di kurpa. E konstrukshon ta konektá ku selebro di e usuario pa asina esaki por duna señal pa e kana òf para ketu.
Básikamente e ta brinda un pashènt di dwarslaesie e oportunidat pa partisipá na aktividatnan ku ta rekerí moveshon. Tambe a agregá sensornan ku ta midi e ritmo di kana di e MARCH 8 pa hasi esaki mas komfortabel.
Sientífikonan a deskubrí un strea ku dos kara. Ta trata di un opheto den espasio ku ta kambiando di elemento. Na un banda e strea ta konsistí prinsipalmente di helium, miéntras e otro banda ta konsistí di hidrógeno. E bon notisia ta ku ta trata di un fenómeno ku por opservá hopi bon pa promé biaha den historia.
Janus, manera sientífikonan a yama e strea, ta un asina yamá enano blanku, un strea ku ta kasi morto i básikamente ta kayendo den otro. E strea ta rekohé hopi lihé i alabes e proseso ta generá hopi kalor i ta subi e densidat di e strea. Segun kálkulonan nos propio solo tambe lo bira un enano blanku aki 5 mil mion aña.
E nòmber Janus ta derivá for di e dios Romano ku mesun nòmber ku ta konosí pa su dos karanan ku ta simbolisá komienso i fin. E luna di yanüari su nòmber tambe ta derivá for di e dios Romano ei.
Sientífikonan rònt mundu ta maraviyá ku e fenómeno aki. Nan no por splika ta kiko ta okashoná e dos karanan aki. Te asina leu tabata konosí ku ora un strea transformá den un enano blanku e elementonan mas pisá ta move pa e núkleo di e strea. Hidrógeno ta e elemento mas leve ku nos konosé. Pa e motibu ei lo e mester tabata notabel riba hinter e superfísie. No ta normal ku hidrógeno ta kompartí espasio ku helium, manera ta pasando ku Janus.
Kisas pues ku tin un vèlt magnétiko desbalansá ku ta okashoná e fenómeno straño aki òf nos lo ta testigu di algu ku no sa pasa normalmente. Mas detaye rondó di e deskubrimentu aki ta publiká den e revista Nature.
Nos por tende silensio òf nò? Silensio ta hasi sonido òf tin su propio frekuensha? Filósofonan a debatí pa basta siglo riba e pregunta ei, pero awor sientífikonan di John Hopkins University tin un posibel kontesta definitivo: nos ta tende silensio di mesun forma ku nos por tende un sirena di polis, ambulans òf brantwer. E pregunta semper tabata si hende literalmente por tende silensio.
Pa investigá esaki e sientífikonan a usa un asina yamá ilushon auditivo. Esei ta un sonido ku bo orea ta registrá, pero ku nos seleber ta interpretá diferente. E sientífikonan a usa un forma adaptá di un téknika eksistente kaminda un persona ta eksponé na un silensio, siguí pa dos blip kòrtiku i na final un blip djis un poko mas largu. Ounke e dos blipnan kòrtiku ta dura mes largu ku e blip ku un durashon djis un poko mas largu, nos seleber ta laga nos kere ku e último blip ei ta zona mas largu.
Den e investigashon nobo aki e partisipantenan a haña un fragmento di un restorant yen di hende pa tende i ku a keda interumpí di mesun forma pero pues ku silensio na lugá di blip. Meskos ku e experimento original e partisipantenan su seleber a registrá dos silensio kòrtiku i unu un poko mas largu miéntras e durashonnan original di silensio tabata igual na otro. Esaki a kondusí na e konklushon ku nos selebronan ta registrá silensio meskos ku sonido, o sea: nos por literalmente tende silensio.
Sientífikonan a deskubrí olanan di sonido den espasio okashoná pa un choke entre dos black hole na un distansia konsiderabel for di nos. Esaki por ta promé biaha ku ta registrá kreashon di un black hole nobo.
Manera ta konosí black holes ta forma e sentro di un sistema solar i ta konsistí di materia ku un forsa di gravedat asina fuerte ku nada pegá ku e materia aki no ta skapa.
E choke entre e dos ophetonan enorme aki ta asina fuerte ku nan por kambia espasio i tambe tempu. Di momentu sientífikonan ta investigando kiko ta e otro efektonan di e fenómeno spektakular aki.
Pa promé biaha den historia un siudadano Chines a hasi un biahe pa espasio. Ta trata di un dosente universitario for di Beijing ku huntu ku dos taikonouta (manera Chinesnan ta yama nan astronoutanan) a hasi un biahe pa e stashon espasial Tiangong. China a inkluí e siudadano pa studia transporte di karga den espasio.
Na total e buelo pa e stashon a dura 6 ora i segun a keda konfirmá e sientífikonan a yega den bon estado di salú. Esaki ta e di 5 mishon pa Tiangong for di 2021. E planta espasial aki tabata den konstrukshon for di aprel di 2021 i ta 100% operashonal for di kabamentu di aña pasá.
E stashon Tiangong tin vários instrumento sientífiko avansá na bordo pa un operashon ku na total ta kubri kasi 10 aña. Manera ta konosí China tin plannan ambisioso pa hasi mas biahe pa luna a partir di 2030 i ta invirtiendo vários mil mion den e proyekto aki.
Arkeólogonan a deskubrí restunan di tres persona ku a pèrdè nan bida den e erupshon volkániko di Vesuvio na Pompeii den aña 79. Tambe nan a haña vários pintura di muraya i plafònt ku imágennan di diosnan ku tabata adorá den e tempu ey. Lo ta trata di e restunan di dos hende muhé i un infante ku a buska refugio den un panaderia durante e erupshon.
Den aña 79 despues di Kristu e volkan Vesuvio a drenta den erupshon pegá ku e siudat Napoli. Den e tempu ey Pompeii tabatin alrededor di 3000 habitante. E as volkániko di 2000 aña pasá a kai riba Pompeii konservando asina un gran parti dje siudat i pues e kurpanan di esnan ku a pèrdè nan bida.
Manera indiká tambe a haña vários imágen di diosnan manera Apollo, Poseidon, Daphne i Amymona. Aki dos siman e ministerio di kultura di Italia ta bai presentá e deskubrimentunan na públiko.
Un notisia alentador pa hende ku tin doló króniko pa kua no por detektá e kousa òf presensia. Sientífikonan a haña un manera pa registrá señalnan den nos seleber ku ta demostrá ku nos ta sinti un doló króniko, esta un doló ineksplikabel ku no ta pasa. Esaki ta habri un mundu nobo pa tratamentu di doló króniko.
Durante e estudio a traha ku 4 persona ku doló króniko okashoná pa sea un atake serebral òf un amputashon, e delaster ey tambe konosí komo doló fantasma. E dòkternan a usa sonda spesial pa registrá kiko nan seleber ta prosesando i tambe un remote kontrol pa indiká ki ora i kuantu nan ta sinti doló.
Durante e eksperimento a nota sierto patronchi di reakshon den e selebr di e partisipantenan. Asina nan a deskubrí ku nos selebr ta mustra un aktividat diferente ora ta trata di un doló agudo i kòrtiku. Esei ta un indikashon fuerte dikon remedi pa aliviá doló no ta funshoná pa hende ku doló króniko.
Ku e estudio aki por desaroyá formanan nobo di tratamentu pa hende ku doló króniko, pero esaki ta den un estado hopi prematuro ainda. E resultadonan ta publiká den e revista sientífiko Nature Neuroscience.
Histórikamente sernan humano ta sunchi otro riba boka pa mustra kariño mas largu ku nos ta kere. Segun un estudio resien publiká den e revista Science e sivilisashon di Mesopotamia di 4500 aña pasá lo tabata hasi esaki kaba, pues mil aña promé ku e sivilisashon di India di 3500 aña pasá.
Te ku aworakí tabata asumí ku ta eynan sunchi riba boka pa amor ta originá. E sientífikonan di Science ta basa nan teoria riba tekstonan di e époka ey na Mesopotamia, kua ta nifiká tera entre dos riu, esta Eufrat i Tigris. Un region ku tabata kubri Irak i partinan di Iran, Siria i Turkia.
E region ta konosí tambe pa hayazgo di e eskrituranan mas bieu ku ta èksistí i ku a kontribuí na loke nos sa awe di e époka ey.
