Eligio Melfor ta presentá “Karni Kaduká”
“Karni Kaduká”, un obra nobo skibí i dirigí pa Eligio Melfor. Bin hari i gosa 4, 5 i 6 di novèmber 8or na Teater Luna Blou.
“Parkland Shooter” Nikolas Cruz kondená na bida largu
Nikolas Cruz, e hòmber ku den 2018 a asesiná 17 persona den un kaso di tiroteo na un skol na Florida, ta bai será pa bida largu. Asina korte na Florida a disidí. E kastigu ta ekskluí e oportunidat pa redukshon di kastigu. Ministerio Públiko a pidi kastigu di morto, pero hurado a konsiderá un kastigu di sèl pa restu di su bida sufisiente.
E tiroteo a tuma lugá den febrüari di 2018 na Stoneman Douglas High School na Parkland. Nikolas Cruz tabata di skòrs for di e skol ora el a kometé su krímen.
Èks lider rebelde Liberiano kondená na bida largu
E kriminal di guera Liberiano Kunti Kamara a keda sentensiá djarason na Fransia pa bida largu. Segun korte Kamara a kometé krímen kontra di humanidat i aktonan di tortura na Liberia. E kondenado a biba anteriormente 12 aña di forma klandestino na Hulanda kaminda el a haña asilo den 2004. Den 2016 el a bai biba na Bèlgika i dos aña despues na Fransia kaminda el a keda detené.
Dos luna promé ku su detenshon e organisashon Civitas Maxima a hasi un petishon pa su detenshon. Tur e tempu ku el a biba na Hulanda e hòmber a usa un nòmber falsu. Na 2012 el a atkirí nashonalidat Hulandes. Segun NOS, Hulanda lo a haña atvertensha riba e hòmber, pero no tin klaridat kua ta e pasonan ku e pais a tuma.
Promé ku el a hui pa Oropa Kamara tabata un lider rebelde di e organisashon armá United Liberation Movement for Democracy (ULIMO) na Liberia kaminda den 1993 i 1994 el a kometé krímennan kontra humanidat.
Nort Korea a bolbe lansa rakèt segun Hapon i Sur Korea
Nort Korea a bolbe lansa un serie di rakèt. E biaha aki ta na Hapon mester a yama estado di emergensha relashoná ku e lansamentunan. Poko despues outoridatnan den e pais a anulá esaki ora a resultá ku e proyektilnan a disparsé for di radar. Segun un bosero di gobièrnu Hapones e proyektil a alkansá un altura di 2000 kilometer i un distansha di 750 kilometer. E pais a kere ku tabata trata di rakèt interkontinental.
Sur Korea tambe lo a detektá e lansamentunan indikando ku esakinan a frakasá. Nort Korea a kuminsá ku lansamentu di rakèt despues di a atvertí kontra presensia di militarnan Merikano den e region. E Merikanonan ta hasiendo ehersisionan militar huntu ku Sur Korea.
