Bista bunita di eklipse lunar for di vários lokalidat
Miónes di hende rònt mundu tabata testigu di un eklipse lunar total. Den e video aki bo por mira un bunita kompilashon.
Temblor na parti ost di Italia
Na Italia a registrá un temblor ku un forsa di 5.7 riba skala di Richter. E temblor a tuma lugá nèt dilanti e kosta ost di e pais. Te asina leu no a registrá ningun víktima mortal di e temblor. Si a registrá bastante daño material na kasnan i edifisionan. Na vários lugá den e region a sera skolnan i tambe transporte públiko ta paralisá. E temblor a tuma lugá na un profundidat di 7 kilometer bou di awa, pero esaki afortunadamente no a okashoná un tsunami.
Rusia ta retirá tropanan for di Kherson
Rusia ta bai retirá su tropanan na e siudat Ukraniano Kherson. Asina e ministerio di defensa di Rusia a disidí pa evitá un masakre den e siudat ku ta kompletamente rodiá pa tropanan Ukraniano. Algun siman pasá Rusia a okupá Kherson ku ta forma un entrada importante na e península Krimea ku Rusia a aneksá algun aña pasá.
E come-back i atakenan dirigí di e tropanan Ukraniano den último simannan ta isolando e áreanan okupá dor di Rusia, hasiendo nan presensia den Ukrania mas difísil ku antisipá.
Ebola plamando na velosidat haltu na Uganda
Na Uganda e vírus ebola ta plamando na un velosidat haltu. Konsekuentemente e pais a disidí implementá medidanan mas stringente pa evitá pió. Pero e pregunta a lanta si outoridatnan na Uganda ta na tempu ku e medidanan aki pasobra e brote aktual a lanta kabes for di sèptèmber.
Asina gobièrnu a disidí pa sera skolnan promé ku fin di e aña eskolar, pero esaki ta tuma lugá efektivamente te aki dos siman, esta riba 25 di novèmber. Dos lockdown den e siudatnan mas afektá no ta parse di kontené e problema.
Hòmber ta gana lòt di $2.000.000.000
E premio di number ganadó mas grandi den historia a kaba di kai na Merka. Ta trata na total di 2 mil mion dòler (un sifra ku 9 sero). E ganadó tabatin tur sifra korekto di e loteria Merikano Powerball. Den e loteria ei e montante ganadó ta sigui subi miéntras e jackpot no kai.
Si e ganadó ke e pago den 1 tiru e ta risibí kasi mil mion dòler. E por bai tambe pa e premio kompleto, pero den tal kaso por dura 29 aña promé ku e haña e montante kompleto riba su kuenta. No ta konosí ken e ganadó ta eksepto ku el a kumpra e lòt na un negoshi den Altadena, un lugá pegá ku Los Angeles. Segun Powerball e chèns ku algu asin’akí por a pasa ta 1 den 292,2 mion.
Rekompensá pa kaptura lider di gang Haitiano
Merka ta ofresé un rekompensa di 1 mion dòler pa informashon ku por kondusí na detenshon di e 7 lidernan di gangnan Haitiano Mawozo i Kraze Barye. E hòmbernan ta responsabel pa sekuestro di siudadanonan Merikano. Segun ministerio di hustisia na Merka lo tin tres sospechoso detené kaba pa nan ròl aña pasá den sekuestro di un grupo di misionario pegá ku kapital di Haiti Port-au-Prince.
Sekretario di estado Ingles ta retirá den ménos ku 2 siman
Su gobièrnu tin apénas dos siman sintá, pero ya kaba promé minister di Inglatera Rishi Sunak mester a tuma despedida di un di su ministernan. Ta trata di su aliado polítiko i sekretario di estado sin kartera Gavin Williamson kende a disidí retirá despues di akusashonnan di tentamentu i komportashon menasante. Tambe Williamson lo a buta preshon inadekuá riba miembronan di su partido konservativo.
For di un prinsipio tabatin krítika riba nombramentu di e èks sekretario di estado. Williamson no tabatin kartera i su nombramentu lo ta un rekompensa di Sunak pa servisionan di Williamson durante kampaña.
Barku ku migrante desviá di Italia pa Fransia
Un barku di reskate ku sigur 230 migrante meser a desviá pa Franisa despues ku Italia a rechasá di risibí esaki. Un otro grupo di migrante di un poko mas di 200 persona ku a bini riba tres otro barku si por a drenta e pais.
Organisashonnan di derechinan humano a protestá kontra e desishon di Italia ku den último dianan no kier a desviá for di e maneho di promé minister Giorgia Meloni, por sierto e promé dama den e funshon aki. Te na último momentu ta hende muhé i menornan di edat so tabata pèrmití pa bandoná e barku.
E gobièrnu di Giorgia Meloni ta hiba un maneho di migrashon hopi stringente. Despues di a komuniká ku presidente di Fransia Emmanuel Macron Meloni a konkluí e kontakto bisando ku migrashon ta un asuntu Oropeo.
