by Webmaster | 27/09/2023 | Cinema News
Entrante djarason script writers na Hollywood ta trahando atrobe. Djamars anochi e sindikato di eskritornan a aprobá e akuerdo di CAO resien negoshá ku e studionan grandi.
Durante e negosiashonnan a traha afsprak relashoná ku oumento di salario, e kompensashon pa online streaming i uso limitá di inteligensha artifisial. Asina studionan grandi no ta pèrmití pa èksigí uso di esaki. Eskritornan si ta liber pa usa esaki.
Awor ku negosiadónan i direktivanan di sindikato a aprobá e akuerdo, ta na e miembronan pa adoptá e akuerdo aki definitivamente. Entre 2 i 9 di òktober nan lo tene un votashon.
E promé aktividatnan ku lo reanudá lo ta probablemente talkshows. Serie i pelíkula lo mester warda ainda ya ku aktornan ainda ta den wèlga.
by Webmaster | 25/09/2023 | Cinema News
E studionan di sine na Hollywood i e sindikato di eskritornan WGA a yega na un akuerdo temporal pa un CAO. Esaki por marka fin di e wèlga ku ya a dura kasi 150 dia. E CAO nobo aki ta bálido pa un periodo di tres aña. Si un mayoria di e 11.500 miembronan di e sindikato bai di akuerdo nan lo reanudá trabou.
Segun vários medio ta informá trahadónan ta bai haña un oumento di salario i tambe lo paga mas royalty pa serie i pelíkulanan ku ta disponibel riba servisionan di streaming. Tambe a stipulá regla pa uso di inteligensha artifisial (AI).
Manera ta konosí eskritornan di esenario a buta trabou abou den mei despues ku negosiashonnan a frakasá ku Alliance of Motion Picture and Television Producers, e asosiashon di studionan i servisionan di streaming.
Den yüli aktornan a uni e wèlga. Esaki a para práktikamente tur aktividat na Hollywood. E aktornan si lo kontinuá ku nan wèlga por lo pronto.
by Webmaster | 20/09/2023 | Cinema News
Aktor Keanu Reeves a pidi e produktornan di e serie di pelíkula di John Wick pa laga su personahe muri den e di 4 pelíkula. Asina e produktor Basil Iwanyk a bisa e revista di entertainment Collider.
Segun Iwanyk e ròl ta emoshonalmente i físikamente basta pisá. E pelíkulanan di John Wick ta konta e kuenta di un èks asesino i ta kontené hopi esena di akshon hopi intensivo. E produktor ta kòrda un okashon ku Keanu Reevs, ku entretantu tin 59 aña, tabata asina kansá ku el a indiká ku mester mata e personahe.
Tin plannan pa un di 5 pelíkula pero e futuro di e serie no ta sigur di momentu.
by Webmaster | 07/09/2023 | Cinema News
Aktor Danny Masterson a keda sentensiá na un kastigu di trinta aña te bida largu riba djaweps, despues ku na yüni e aktor Merikano, konosí di e serie popular That ’70s Show, a tende ku e ta kulpabel di violashon den dos kaso. Danny Masterson tabata akusá di 3 kaso.
Sinembargo, hurado no por a yega na un akuerdo pa ku e di tres akusashon. Tres dama, tur èks miembro di Scientology di kua Masterson tambe ta miembro, a akusá e aktor di violashon na su kas entre 2001 i 2003.
Na final di aña pasá, wes a para e kaso pasobra e miembronan di hurado no por a yega na un akuerdo. Pa e motibu ei, ministerio públiko a inisiá un kaso nobo. Masterson semper a nenga tur akusashon. E ta den prisón for di mei, pasobra tabata konsiderá ku e por hui.
by Webmaster | 04/09/2023 | Cinema News
Barbie ta di momentu e pelikula mas eksitoso e aña aki. For di su lansamentu na yüli, Barbie ta un éksito rotundo i e pelikula a kibra vários rèkòrt.
E pelikula dirigí pa Greta Gerwig a logra un benta di 1360 mion dòler na benta di ticket. Ku esaki, Barbie a superá e pelikula The Super Mario Bros. Movie ku a generá 1350 mion dòler.
E pelíkula a kibra varios rekòrt kaba. Barbie ta e promé pelikula dirigi pa un muhé ku a alkansá un benta 1000 mion dòler na benta di ticket. I awor pues Barbie ta e título mas éksitoso di e aña aki den sine Merikano. E papelnan prinsipal ta wordu interpretá pa Margot Robbie i Ryan Gosling.
by Webmaster | 04/09/2023 | Cinema News
E presentashon di pelíkulanan di e direktornan Roman Polanski i Woody Allen na e festival di film di Venesia tabata senario di resistensha. Un grupo di manifestante a reuní na e festival ku pankarta ku teksto di protesta kontra e direktornan.
Segun e manifestantenan e organisadónan ta brinda un podio na violadó. Asina e manifestantenan ke sa si e premio mayó (esta un Leon di Oro) lo bai pa un violadó.
Polanski a keda kondená pa a tene relashon ku un mucha di 13 aña i ta akusá pa varios muhé di malkondukta seksual. Su pelíkula ‘The Palace’ ta estrená na Venesia, aunke mester bisa ku e direktor di nobenta aña no tabata presente.
Den kaso di Woody Allen su yu muhé ta akus’é di abusu. Su pelikula ‘Coup de chance’ tambe a estrená djaluna na e festival di film. Allen si tabata presente.
Por sierto ku e pelikulanannan di e direktornan kontroversial aki no tin chèns pa gana un Leon di Oro. Ámbos pelíkula ta drai lòs for di e otorgashon di premio i no ta den kontienda.
Ta posibel tambe ku e pankartanan ta referí na e direktor Franses Luc Besson, kende anteriormente a wòrdu akusá di abuso seksual. Su pelikula ‘Dogman’ si ta kontienda pa un Leon di Oro.
by Webmaster | 29/08/2023 | Cinema News
E serie The Idol lo no haña un temporada nobo. Asina entre otro e revista Variety a publiká. Tantu krítikonan komo públiko ta malkontentu ku e promé temporada. Asta e personal embolbí den produkshon di e serie ta negativo riba e resultado. The Idol lo tabata partikularmente un fantasia provokativo di e kreadónan.
E serie ta un proyekto inisiá pa Abel Tesfaye, mundialmente konosí komo The Weeknd kende aparte di a skribi e serie tambe ta aktua den The Idol. E serie ta konta e kuenta di un artista femenino ku ta bira popular i ta sera konosí ku e otro kara di mundu di farandula ora e namorá ku e doño di nightclub i lider di un sekta.
by Webmaster | 25/08/2023 | Cinema News
E pelíkula altamente antisipá Dune: Part Two a keda posponé te mart 2024. Esaki pa motibu ku e aktornan den e film no ta dunando entrevista pa promové esaki. Originalmente e pelíkula mester a sali mundialmente den novèmber próksimo.
Debí na e wèlga di trahadónan na Hollywood aktornan no ta duna entrevista. E kompania tras di e film, esta Warner Bros., a invertí hopi sèn den produkshon di Dune: Part Two, ku en prinsipio ta kla pa lansamentu, pero e kompania no ke hasi esaki si no tin promoshon.
E pelíkula aki ta e di dos parti di un saga kreá originalmente pa Frank Herbert. Dune ta un kuenta épiko riba un lucha pa e planeta Arrakis, kaminda tin un mineral ku ta alargá bida.
by Webmaster | 14/08/2023 | Cinema News
E film Barbie ta ketu bai e pelíkula mas mirá den sinenan Merikano. Asina entre otro The Hollywood Reporter ta informá. Direktor Greta Gerwig ta e promé direktor femenino den historia ku a dirigí un pelíkula ku a generá mas di mil mion dòler. De echo ya e ta konsiderá e direktor femenino ku e título mas eksitoso den historia.
Den wikènt tras di lomba Barbie a generá 33.7 mion dòler. Entretantu e kapital generá pa e pelíkula ta kalkulá na 526 mion dòler na Merka só i 1200 mion dòler rònt mundu. Oppenheimer a sigui Barbie na di dos lugá, generando 18.8 mion dòler. Otro pelíkula ku di momentu ta hala hopi atenshon ta Meg 2: The Trench ku siman pasá tabata na di dos lugá.
by Webmaster | 10/08/2023 | Cinema News
E seremonia pa otorgashon di premionan Emmy a keda posponé te 15 di yanüari. Debí na e wèlga di trahadónan i aktornan na Hollywood ya tabata antisipá ku lo a posponé e evento. E nominadonan pa e premionan Emmy ta konosí for di yüli. E premionan lo keda otorgá pa produkshonnan ku a sali na televishon Merikano entre 1 di yüni 2022 i 31 di mei 2023.
Te asina leu no ta hasi menshon di kambionan notabel. Manera ya ta konosí serienan manera Succession i The White Lotus ya por konta ku mayoria premio konsiderando ku nan ta nominá den tur kategoria.
Pa loke ta toka e wèlga mester bisa ku ya esaki ta pasando su di 100 dia. Mayoria produkshon di Hollywood na e momentu aki ta sea anulá òf posponé.
by Webmaster | 08/08/2023 | Cinema News
Prins Harry i su kasá Meghan huntu ku Netflix ta bai produsí un vershon sinematográfiko di e buki Meet Me at the Lake. E pareha a kumpra e derechinan pa traha e film huntu ku Archewell Productions. E buki ta skirbí pa Carley Fortune i a sali den mei di e aña aki. E buki ta konta e kuenta di un dama ku ta haña e amor di su bida despues ku su mama a fayesé den un aksidente di outo.
E tabloid Britániko The Sun a raportá anteriormente riba rumornan pa un pelíkula, pero awor ta sigur. Ta promé biaha ku e prens i su kasá ta embolbé den produkshon di un film. E pareha tin un deal ku Netflix for di 2020 kaminda nan a akordá di produsí vários dokumental, film i serie. Te asina leu nan a produsí dos dokumental di kua un serie di 6 episodio kaminda nan ta papia ampliamente di i mustra nan bida privá.
by Webmaster | 02/08/2023 | Cinema News
Writers Guild of America (WGA), e sindikato di eskritornan na Hollywood, i e studionan grandi i servisionan di streaming ta bai sinta ku otro na mmesa djabièrnè próksimo. Ta pa promé biaha ku e dos partidonan ta bai reuní despues ku e eskritornan a drenta wèlga eksaktamente 3 luna pasá riba 2 di mei.
Segun medionan di komunikashon na Merka e inisiativa ta bin di representante di e studionan i servisionan di streaming Alliance of Motion Picture and Television Producers (AMPTP). E eskritornan ta den wèlga entre otro pa un mihó kompensashon i pa negoshá riba uso di inteligensha artifisial den film i serienan di Hollywood.
Dos siman pasá aktornan a uni ku e sindikato di eskritornan den nan wèlga pa e mesun kousa. Fran Drescher, presidente di e sindikato di aktornan SAG-AFTRA, a bisa djamars den e programa The Today Show ku e wèlga aki probablemente ta bai dura largu. Debí na e wèlganan vários produkshon na Hollywood a keda sea posponé òf den algun kaso asta anulá.
by Webmaster | 31/07/2023 | Cinema News
Sony Pictures ta posponé vários título di pelíkula relashoná ku e wèlga di trahadó i aktornan na Hollywood. Asina e pelíkula antisipá Kraven the Hunter i Spider-Man: Beyond the Spider-Verse lo estrená hopi mas despues ku antisipá pa fanátikonan. Asina agensia di prensa Bloomberg ta informá a base di un komunikado interno di Sony.
Kraven the Hunter, ku aktornan Aaron Taylor-Johnson i Russell Crowe, tabata planiá pa òktober próksimo, pero ta pasa pa ougùstùs. Spider-Man: Beyond the Spider-Verse mester a sali den mart próksimo, pero no tin un fecha nobo konosí ainda.
Manera ta konosí e sindikato di aktornan SAG-AFTRA a kanta wèlga riba 12 di yúli último despues ku negosiashonnan riba kompensashon i uso di inteligensha artifisial den sine a pega. Dor di e wèlga tin vários aktor ku no ta paresé mas riba red carpet durante estreno di pelíkula i tampoko nan no ta dunando entrevista pa promové pelíkula. Esei por tin konsekuensha pa e asistensha di públiko.
Por sierto ku e kompania di produkshon Disney ta deliberando pa posponé sierto fecha di lansamentu. Asina e studio a posponé e lansamentu di Poor Things. Warner Bros. tambe ta pensando pa posponé algun título di akuerdo ku Bloomberg.
Mas aleu mester bisa ku e seremonia pa otorgashon di premionan Emmy tambe ta posponé. E seremonia lo a tuma lugá 18 di sèptèmber, pero ta planiá awor pa yanüari.
by Webmaster | 25/07/2023 | Cinema News
Ku 155 mion dòler e pelíkula Barbie a registrá e lansamentu mas eksitoso den historia pa un direktor femenino. Pa komparashon e rèkòrt anterior tabata Captain Marvel ko-dirigí pa Anna Boden ku a alkansá 153 mion dòler i Wonder Woman di direktor Petty Jenkins ku a alkansá un resultado di 103 mion dòler den promé wikènt.
Barbie di Greta Gerwig a logra un resultado total di 155 mion dòler loke ta buta e film mesora tambe na e mihó resultado den promé wikènt pa 2023. E honor ei te asina leu tabata pa e pelíkula The Super Mario Bros. Movie ku a alkansá 146 mion dòler den promé wikènt.
Loke a hunga un ròl den e éksito di Barbie tabata e asina yamá “Barbenheimer effect”. Hopi hende ku a bishitá sine den e wikènt di lansamentu a hasi reservashon dòbel pa wak e pelíkulanan Barbie i Oppenheimer di Christopher Nolan tras di otro. E último pelíkula ei a generá 80,5 mion dòler den su promé wikènt.
Ta promé biaha den historia tambe ku ta e kantidat di damanan ku a bai sine a pusha e sifranan di benta. Generalmente ora un pelíkula pasa e suma di 100 mion dòler den promé wikènt esei ta dor di e kantidat di bishitantenan maskulino.
by Webmaster | 21/07/2023 | Cinema News
Fanátikonan di e konosido aktor Britániko Sean Bean (no di konfundi ku e otro konosido aktor Merikano Sean Penn) ta kansá di mira nan ídolo muri den sea un serie òf pelíkula. A bira un kustumber ku Sean Bean su personahe semper ta fayesé den fase tempran di sea un pelíkula òf serie den kua e ta hunga un ròl. I bèrdat mester keda bisá: ya ta di 25 biaha ku su fanátikonan a mira su personahe muri den e serie World On Fire. Fanátikonan di Bean ta furioso i mas ku fadá.
Den pasado ya tabatin petishonnan na produktornan di pelíkula i serie pa no laga e personahe di Sean Bean muri òf en todo kaso lag’e fayesé mas na kabamentu. Ta bèrdat ku Sean Bean a muri ya na final di e promé temporada di e serie popular Game of Thrones, den e promé pelíkula di e trilogia The Lord of the Rings i den e pelíkula di James Bond GoldenEye.
Resien por a mira Sean Bean komo e personahe Douglas Bennett den e serie World On Fire. Fanátikonan tabata aliviá ku el a sobrebibí e promé temporada di e serie. Pero e personahe ta muri de repente den e promé episodio di e di dos temporada dje serie. Bean a yega di rekonosé ku ta un poko repititivo i muchu fásil di antisipá ku kada bes su personahe ta muri.
Di otro banda mester bisa ku semper e mortonan di Sean Bean tin un impakto emoshonal enorme riba e historia di e serie òf pelíkula. Sean Bean sa kon gana simpatia di oudiensia hopi lihé ku personahenan humilde òf otro personahenan importante pa e plòt di e serie òf film. Pa e motibu ei semper su morto ta shòk. Algu inevitabel ora bo ta hopi bon den bo trabou.
