by Webmaster | 14/11/2023 | IT, Apps & Social Media
Nepal ta bai prohibí e plataforma sosial TikTok relashoná ku e influensha negativo di e app riba e harmonia sosial di e pais. Asina ámtenarnan di e pais a bisa den un deklarashon. E prohibishon lo mester drenta na vigor asina ku esaki ta téknikamente posibel di akuerdo ku e ministerio di Komunikashon i Informátika.
Lo tin hopi mal uso di TikTok na Nepal. Asina tin 1.600 insidente di atake sibernétiko registrá den último 4 aña. Segun gobièrnu di e pais e plataforma ta sirbi pa plamamentu di mensahenan di odio.
Polítikonan den oposishon ta kritiká e desishon komo un violashon di libertat di ekspreshon. Ta asina ku anteriormente gobièrnu di Nepal a anunsiá introdukshon di direktivanan pa kontrolá kontenido di retnan sosial den e pais.
Algun pais manera India ya a prohibí TikTok. Den e pais bisiña Pakistan a prohibí i despues lanta prohibishon atrobe na sigur 4 okashon.
by Webmaster | 10/11/2023 | IT, Apps & Social Media
Vários partido polítiko na Hulanda a viola e lei di privasidat dor di usa cookies pa follow usuario sin pidi outorisashon pa esaki. Asina por dedusí for di un investigashon di NOS. Lo ta trata di BoerBurgerBeweging (BBB), Forum voor Democratie (FvD), SGP i Volt. Di e 4 partidonan embolbé, 3 a indiká ku ta trata di un eror ku nan lo resolvé mas pronto posibel. SGP so no a reakshoná riba petishon di NOS.
Cookies ta un funshon riba plataformanan di internet pa konektá ku usuarionan. Ku e cookies aki e partidonan por aserká hende ku bishitá nan website den futuro atrobe ku anunsionan polítiko via social media manera YouTube òf sierto website di notisia kaminda nan ta publiká anunsio polítiko. Cookies ta útil pa e funshon di mensahenan personalisá di e plataformanan.
No ta asina ku e cookies aki ta prohibí kompletamente, pero e partidonan ta obligá si for di 2012 na puntra pa pèrmit di hende ku bishitá nan website pa aprobá e uso di cookies pa social media.
by Webmaster | 07/11/2023 | IT, Apps & Social Media
E plataforma X (ántes Twitter) tin 1 persona so ku ta komprondé Hulandes bou di su team di moderadó. E team aki ta responsabel pa kontrolá si e mensahenan riba e plataforma ta kumpli ku e respektivo reglanan di kondukta.
E team kompleto di moderadó ta konsistí di 2294 persona segun un rapòrt publiká pa e kompania. No ta konosí sinembargo si e persona aki ta berdaderamente Hulandes òf si e ta e úniko persona ku ta kontrolá mensahenan na Hulandes. Tampoko no ta konosí si ta semper e situashon tabata asin’aki òf si e lo sigui di e mesun forma.
Ta remarkabel ku ta 1 persona so tin den e team ku ta papia Hulandes kaminda tin sigur 81 ku ta dominá Aleman, 52 ku ta papia Franses i 41 ku ta papia Portugues. Segun X tur moderadó ta spesialisá den evaluashon i tratamentu di mensahenan prohibí riba e plataforma.
by Webmaster | 02/11/2023 | IT, Apps & Social Media
Atrobe un klap duru pa Meta. E kompania no ta pèrmití mas pa usa dato di usuarionan di Facebook i Instagram den Oropa pa avisonan komersial personalisá. Segun e Komité Oropeo pa Protekshon di Dato propietario di e plataformanan Meta ta violá leinan di privasidat dor di usa datonan personal di usuario pa avisonan personalisá.
E prohibishon ta un klap duru pa e kompania. Meta ta gana un kapital enorme ku e avisonan aki. Kompanianan ku ta advertise riba Facebook i Instagram ta buta nan avisonan hustamente pa e funshonnan ku e kompania ta usa pa anunsionan dirigí.
E violashon di privacy no ta limitá na e uso di e datonan di usuario pa finnan komersial. Ta trata tambe di informashon manera kiko hende ta klek pa lesa. Meta ta usa e informashon ei tambe pa krea perfilnan komersial. Sinembargo e kolekshon di dato ei no tin un base hurídiko.
Anteriormente Norwega ya a prohibí Meta pa rekohé datonan di usuario pa metanan komersial. Awor hinter Union Oropeo a sigui e pais su ehèmpel.
by Webmaster | 01/11/2023 | IT, Apps & Social Media
Entrante promé di yanüari servisionan di streaming mester invertí 5% di nan resultado anual den kontenido lokal pa merkado Hulandes. Eerste Kamer a aprobá un proposishon di lei di departamentu di kultura. Esaki mester kondusí na fondonan pa produkshonnan Hulandes ku despues por pasa na plataformanan internashonal manera Netflix, HBO Max i Amazon Prime.
E lei ku ta regla esaki ta bálido pa servisionan di streaming ku un resultado anual di mas di 10 mion euro. Esei ta inkluí Netflix, Disney+ i Amazon Prime. E invershon di 5% ta pèrmití pa tur kontenido eksepto deporte. Tambe e lei ta regla ku 60% di e produkshonnan lokal mester ta independiente.
Paisnan manera Alemania, Fransia i Bèlgika ya a adoptá leinan komparabel pa asina nan produkshonnan lokal por kompetí ku otro produkshonnan internashonal.
by Webmaster | 31/10/2023 | IT, Apps & Social Media
Entrante novèmber usuarionan Oropeo por opta pa un account pagá di Facebook òf Instagram sin avisonan komersial. Di e forma aki Facebook mester kumpli ku leinan Oropeo ku ta regardá privasidat di usuarionan. Si e usuario ke e por sigui usa Facebook i Instagram grátis pero esei ta nifiká ku e ta di akuerdo ku avisonan komersial personalisá.
Usuarionan di e website di Facebook por paga 9,99 euro pa luna pa usa esaki sin anunsio komersial i usuarionan di e app lo mester paga 12,99 euro pa luna. E uso di e app pagá ta mas karo dor ku Google i Apple ta kobra un komishon riba pagonan via Play Store i App Store.
E preisnan por sierto ta un ganashi konsiderabel pa Meta. E abono spesial aki sin anunsio komersial ta mas haltu ku e ganashi ku Facebook tin riba kada usuario di Facebook, Instagram òf WhatsApp. Den último kuartal Meta a gana un poko mas di 3,50 dòler pa kada usuario.
by Webmaster | 27/10/2023 | IT, Apps & Social Media
Den dianan tras di lomba a lanta basta konsternashon ora a konstatá ku tin tin hopi estafa ta tuma lugá riba e konosido website Booking.com. Vários usuario a opservá ku tin mensahenan falsu ta paresé den e sistema di e website.
Asina tin mensahe ku ta atvertí ku tin problema ku credit card i ku pa e motibu ei no por reservá na sierto hotel. E mensahenan ta parse real pasobra nan ta mandá for di e adrès di e-mail noreply@booking.com. E mensahe ta sugerí ku mester manda e datonan di credit card di nobo sino lo anulá un reservashon i lo por kobra gastunan adishonal.
Den prinsipio Booking.com no a rekonosé e problema i na un okashon a asta bisa un kliente ku e link den e mensahe falsu mester ta konfiabel. Servisionan di credit card sinembargo tambe a nota e problema i den algun kaso a paga pa e daño.
Booking.com a keda insistí segun The Guardian ku su sistema ta funshoná bon i ku e problema ta debí na un fayo serka hotèlnan ku e ta traha ku n’e.
Investigadónan di e kompania di cyber security Heimdal ta sostené e ponensia di Booking.com pa loke ta trata e fayo na e hotèlnan. Hackers lo ta usa datonan hòrtá pa asina kontaktá klientenan via e sistema di Booking.com. Konsekuentemente hopi kliente ta haña nan konfrontá ku atakenan di phishing.
E kompania ta konsehá pa kontrolá e link den e mensahe promé ku klek riba esaki. Esaki ta bai mas fásil riba un laptop òf computer kaminda bo por schuin abou den bo pantaya na unda e link lo hiba bo. Si esaki no ta kuadra ku e adrès di e hotèl, e mensahe definitivamente ta falsu.
by Webmaster | 26/10/2023 | IT, Apps & Social Media
Klientenan di Apple TV+ ta bai paga mas di 40% èkstra pa luna pa nan abono aktual. Na Merka so e preis ta bai subi di 6,99 dòler pa 9,99 dòler pa luna. Na Oropa probablemente lo bai tin un subida komparabel.
Tambe klientenan di Apple mester paga èkstra pa servisionan manera Apple Arcade (e servisio di video games) i Apple News+ (e servisio di notisia). Mas o ménos 20% di Apple su entradanan ta bin for di su servisionan. Esei ta inkluí èkstra garantia, servisio di pago manera Apple Pay i abono riba Apple Music.
Segun agensia di prensa Bloomberg di momentu e kompania ta diseñando su TV app di nobo pa inkluí mas servisio di video. Tambe e kompania ta bai amplia su ofèrta di pelíkula riba Apple TV+ i e kantidat di games riba Apple Arcade.
by Webmaster | 25/10/2023 | IT, Apps & Social Media
Mas di 30 estado na Merka a demandá propietario di Facebook Meta. E kompania lo ta abusá di usuarionan hóben di Facebook i Instagram pa ganashi i tambe lo e ta eksponé nan na kontenido ku ta hasi daño sikológiko. Resien a hasi e petishon pa e kaso na un korte federal na California.
Meta no ta e promé kompania di ret sosial kontra ken a lanta kaso den korte. Anteriormente tambe a demandá TikTok, Google i Snapchat.
Entretantu por papia di sentenáres di kaso den korte entamá kontra kompanianan di ret sosial pa problema mental di usuarionan hóben. Retnan sosial lo ta okashoná adikshon, loke ta resultá despues den depreshon, problema ku drumimentu i komementu.
Mayoria kompania a indiká ku nan lo ta trahando riba medidanan pa protegé hóben kontra uso prolongá di internet. Di otro banda nan ta bisa si ku e kasonan tin e meta pa influenshá e kontenido di nan plataformanan.
by Webmaster | 06/10/2023 | IT, Apps & Social Media
Aktor Tom Hanks a emití un mensahe kaminda e ta distansiá su mes for di un propaganda pa un seguro di djentista. Pa e propaganda aki lo a usa un vershon di Tom Hanks trahá ku inteligensha artifisial. Den un mensahe riba Instagram Hanks ta splika ku e no tin nada di haber ku e aviso komersial ei.
Sinembargo, e no ta duna masha detaye i e grabashon ku e ta referí na dje no ta parse di ta disponibel niun kaminda. Asina The New York Times ta informá ku no por a haña e grabashon menshoná riba retnan sosial. Tampoko no por a haña e representante di e aktor pa komentario. Aparte di Tom Hanks tin vários otro persona prominente ku a bin dilanti ku keho ku a traha vershon digital di nan sin ku nan sa di esaki.
E senario aki ta nèt un di e puntonan ku tin esnan krítiko riba inteligensha artifisial ta atvertí p’e: ku nan ta traha imágen falsu di bo i asta kopia bo stèm den sinkronia ku imágen falsifiká. Partikularmente hende di kua tin hopi material audio visual disponibel ta kore riesgo di wòrdu kopiá.
by Webmaster | 03/10/2023 | IT, Apps & Social Media
Tin un chèns ku na Oropa ta bai tin un vershon disponibel di Facebook sin propaganda. Pa e vershon di browser (esta, e programa standart di internet riba tur aparato digital awendia) ta papiando di 10 euro pa luna i pa e appnan di Facebook i Instagram ta papiando di 13 euro pa luna. Usuarionan ku no gusta propaganda lo por bai disfrutá di Facebook asin’aki sin propaganda. Asina The Wall Street Journal ta informá.
Facebook ya lo a hiba kòmbersashon ku e supervisornan Oropeo. For di e palabrashonnan lo a palabrá tambe ku servisionan grátis di Facebook lo keda grátis. Ta trata pues di un plan i no di un echo definitivo ainda.
by Webmaster | 02/10/2023 | IT, Apps & Social Media
E iPhone 15 Pro por bira masha kayente mes den e promé dianan despues di kompra, debí na un fayo den e software. Apple ta trahando riba un solushon despues di keho di usuarionan ku e aparato ta bira asina kayente ku nan no por ni ten’é den nan man. Lo ta trata di un problema ku e último software di iOS 17 ku ta buta ku e aparato por overheat ora e ta update apps manera Instagram i Uber.
Segun Apple, usuarionan no mester preokupá ku nan iPhone 15 Pro nobo lo daña pa motibu di e fayo aki. Instagram ya lo a solushoná e problema pa su propio aplikashon. Apple ainda ta papia ku otro desaroyadó di aplikashon. Un aktualisashon di software mester solushoná e problema pronto.
Hopi usuario a keha den último dianan riba retnan sosial riba e asuntu. Algun usuario a asta pone potrèt di un termómetro banda di nan iPhone. Den e potrètnan por mira ku temperatura di e aparatonan ta pasa 38 grado Celsius.
by Webmaster | 28/09/2023 | IT, Apps & Social Media
Apple ta bai konsentrá mas riba videogames i kompetí ku PlayStation, Xbox i Nintendo Switch. Asina direktor di Apple Tim Cook a bisa durante un bishita na produktor di videogames Gamehouse na Hulanda.
Ta asina ku ya tin vershonnan avansá di iPhones adekuá pa games ku a sali anteriormente riba Playstation 5 i Xbox. Benta di iPhones ta generá alrededor di mitar di e entradanan di Apple.
E vershonnan mas kostoso di iPhones, 15 Pro i Pro Max, tin un processor asina potente ku esaki por generá e mesun kalidat ku Playstation 5 i Xbox. E videogames aki ta disponibel riba Apple Arcade.
E direktor di Apple ta di bishita na Gamehouse na Hulanda pa un posibel kolaborashon. Gamehouse ta produsí partikularmente videogames diseñá pa hende muhé.
by Webmaster | 28/09/2023 | IT, Apps & Social Media
E website pa Stock Photos Getty Images ta bai lansa un programa di inteligensha artifisial ku usuarionan por usa pa traha imágen personalisá i sin copyright. Esaki pa evitá ku e sistema ta viola derechinan di outor. Getty Images a desaroyá e sistema huntu e fabrikante di chip NVIDIA.
E tool nobo aki ta bai usa solamente imágennan den e database di Getty Images. E no ta usa potrèt proveniente for di notisia pa evitá mal uso i aktonan di deepfake, esta susesonan ku no a tuma lugá. Getty Images a tuma e paso aki entre otro pa para uso ilegal di su material den programanan di AI di terseronan.
by Webmaster | 28/09/2023 | IT, Apps & Social Media
Falta poko pa Meta, propietario di WhatsApp, Instagram i Facebook presentá su sistema di inteligensha artifisial Meta AI, un alternativa riba ChatGPT. Meta AI mester sirbi pa rospondé preguntanan di usuarionan. E chatbot ta bai traha ku un modelo ku por buska kontesta pafó di Facebook riba otro partinan di internet pa informashon aktualisá.
Meta AI ta solamente 1 di e vários servisionan ku direktor Mark Zuckerberg a presentá durante Meta Connect.
Tambe el a presentá e vershon mas resien di Quest 3, un brel pa virtual i augmented reality desaroyá pa e team tékniko di Zuckerberg ku ta duna akseso na un mundu virtual pa trabounan digital. E brel ta sirbi tambe pa sierto videogame. E preis di e brel virtual di Meta ta kuminsá na $500,-
Otro produkto ku a keda presentá tabata e vershon nobo di Ray-Ban Stories, un brel inteligente desaroyá pa Ray-Ban den kolaborashon ku Meta. E brel tin un kámara spesial ku por sirbi pa entre otro live-streams. E vershon aki tin un mihó kalidat di imágen i sonido. E preis ta kalkulá na un preis básiko di $300,-
