by Webmaster | 02/11/2022 | IT, Apps & Social Media
Elon Musk tin plan pa kobra usuario di Twitter pa wak video. Tambe lo bai tin kambio den e servisio di supskripshon Twitter Blue. E preis di e servisio ta bai subi di 5 pa 8 dòler pa luna. Asina The Washington Post a duna di konosé. Musk ke hasi e kompania ménos dependiente di propaganda pa generá entrada. Tantu Twitter komo e kreadó di e video lo por kobra pa e kantidat di hende ku paga pa wak: Twitter ta kobra un parti i sobrá ta bai pa e kreadó. Pa hasi esaki posibel Musk ta bai fasilitá espasio pa krea video ku ta dura mas largu ku aworakí. Segun Musk usuarionan ta bai tin ménos molèster di “ads” riba e plataforma.
Musk a atkirí Twitter siman pasá despues di un proseso largu di negosiashon. Una bes ku e dil tabata rònt, Musk a duna hinter e tòp di e kompania ontslag. En partikular Musk ke kambia e maneho aktual di “ban” hende ku ta ekspresá opinionnan ku e gerensha anterior no tabata di akuerdo ku n’e. Segun Musk e plataforma lo a bira muchu polítiko i divisivo. Pa salbaguardiá e neutralidat di e plataforma, Musk ke instalá un konseho ku ta evaluá ki ora mensahenan berdaderamente no ta kai bou di libertat di ekspreshon. Ainda no tin klaridat si èks presidente Donald Trump lo haña su account bèk.
by Webmaster | 02/11/2022 | Notisia Lokal
Kòrsou a haña kobertura den publisidat na Madeira! Un ekipo di e kanal RTP ku tabata kompañá Miguel Albuquerque, presidente di e Gobièrnu Regional di Madeira, a graba un bunita video item ku nos no ke keda sin kompartí. Klek aki pa wak e video.
by Webmaster | 02/11/2022 | Internashonal
Minister di Asuntunan di Eksterior Hulandes Wopke Hoekstra a duna òrdu pa sera tur warda di polis Chines inmediatamente. Riba papel e wardanan tabata parse ofisina ku ta regla asuntunan atiministrativo, manera prolongashon di reibeweis i dokumentonan komparabel.
Pero tin indikashonnan hopi fuerte tambe ku e ofisinanan aki ta sirbi komo warda pa vigilá siudadanonan Chines kedando na Hulanda. Den algun kaso e ofisinanan lo ta sirbi pa buta preshon riba hende. E echonan a bin dilanti den un investigashon di RTL Nieuws i Follow The Money.
by Webmaster | 02/11/2022 | Internashonal
Presidente di Brasil Jair Bolsonaro a kibra silensio i disidí aseptá su derota. Asina e presidente saliente a partisipá den un deklarashon kòrtiku kaminda el indiká mas aleu ku e ta respetá konstitushon di e pais.
Ta promé biaha ku nos ta tende di Bolsonaro despues di e elekshon presidensial djadumingu último na Brasil. Anteriormente tabata antisipá ku lo el a apelá e resultado. Durante e aparensha kòrtiku, Bolsonaro no a bisa nada di su kontrinkante Luiz Inacio Lula da Silva.
by Webmaster | 02/11/2022 | Internashonal
Israelitanan a bai urna awe pa di 5 biaha den apénas 4 aña pa skohe un parlamentu nobo. Èks promé minister Benjamin Netanyahu ta spera di hasi un comeback polítiko despues di un aña den oposishon i ta hole viktoria.
Den enkuestanan su partido Likud ta parse di hala mayoria voto. Anteriormente e aña aki e koalishon aktual a pèrdè su mayoria pèrtá den parlamentu loke a resultá den un elekshon nobo. E pais ta pasando dor di un impase polítiko ku ta opstakulisando stabilidat polítiko.
by Webmaster | 02/11/2022 | Internashonal
Djarason mainta, orario Asiátiko, Nort Korea a lansa por lo ménos 10 tipo di rakèt. Asina ehérsito di Sur Korea a partisipá. Un di e rakètnan lo a aterisá 60 kilometer for di kosta di Sur Korea. Den un reakshon e pais a lansa tres rakèt den direkshon di frontera ku nan pais bisiña Nort Korea.
E lansamentunan a buta algun parti di Sur Korea den estado di alarma i siudadanonan mester a bai skonde den kèlder. Segun outoridatnan na Sur Korea lo ta promé biaha ku un rakèt a dal asina serka di nan kosta.
Nort Korea a indiká ku e lansamentu a keda provoká pa e ehersisionan militar masivo ku Merka i Sur Korea ta hibando pegá ku e península.
