Israelitanan a bai urna awe pa di 5 biaha den apénas 4 aña pa skohe un parlamentu nobo. Èks promé minister Benjamin Netanyahu ta spera di hasi un comeback polítiko despues di un aña den oposishon i ta hole viktoria.
Den enkuestanan su partido Likud ta parse di hala mayoria voto. Anteriormente e aña aki e koalishon aktual a pèrdè su mayoria pèrtá den parlamentu loke a resultá den un elekshon nobo. E pais ta pasando dor di un impase polítiko ku ta opstakulisando stabilidat polítiko.
Djarason mainta, orario Asiátiko, Nort Korea a lansa por lo ménos 10 tipo di rakèt. Asina ehérsito di Sur Korea a partisipá. Un di e rakètnan lo a aterisá 60 kilometer for di kosta di Sur Korea. Den un reakshon e pais a lansa tres rakèt den direkshon di frontera ku nan pais bisiña Nort Korea.
E lansamentunan a buta algun parti di Sur Korea den estado di alarma i siudadanonan mester a bai skonde den kèlder. Segun outoridatnan na Sur Korea lo ta promé biaha ku un rakèt a dal asina serka di nan kosta.
Nort Korea a indiká ku e lansamentu a keda provoká pa e ehersisionan militar masivo ku Merka i Sur Korea ta hibando pegá ku e península.
E hòmber Hulandes entretantu konosí den boka di pueblo komo Kunukuman i su grupo di boluntario a tene na total 100 akshon di limpiesa. Djadumingu último nan a bai bèk Playa Jeremi kaminda 2 aña pasá nan a kuminsá e prome akshon ku 3 persona. E grupo di boluntario a krese den transkurso di simannan despues ku Kunukuman a haña hop akohida riba retnan sosial. Entretantu e por konta ku yudansa di den promedio 15 persona ku ta bin yuda ora nan ta disponibel.
Grandi tabata nan sorpresa na yegada na Playa Jeremi ku esaki tabata hopi bon mantené i limpi! Esaki danki na Quincy ku di su mes a kuminsá tene e Playa limpi. Dor ku no a keda nada otro di hasi nan por a pasa di biaha pa selebrashon di e di 100 akshon.
Un kantidat deskonosí di bishitante ta será den Disneyland Shanghai. E parke mester a sera inmediatamente despues ku outoridatnan a anunsiá un lockdown nobo. Esaki despues ku a detektá 10 kaso nobo di kontagio ku Covid-19 den e siudat. E bishitantenan tin mag di bandoná e parke solamente si nan por presentá un tèst negativo. Despues di esei nan ta opbligá di hasi tèst tres dia siguí. Di momentu tin alrededor di 200 lockdown vigente na China.
Alkohòl ta ketu bai e supstansia mas usá na Kòrsou. Asina por konkluí for di un estudio di Fundashon pa Maneho di Adikshon (FMA) ku a investigá uso di supstansia (droga i alkohòl) bou di pueblo di Kòrsou. E investigashon a tuma lugá via un enkuesta riba uso di alkohòl bou di 418 persona. FMA a yega na e siguiente konklushonnan:
E supstansia ku mas persona a yega di usa òf ta usando ta alkohòl.
Tin un relashon entre e frekuensia di uso i e areanan di bida afektá.
Tambe e resultado nan ta mustra ku tin un relashon entre sekso i e frekuensia di uso.
43% di personanan ku a kontestá a yega di kore outo bou di influensia di alkohòl. I 4,8% a yega di kousa un aksidente bou di influensia di alkohòl.
Aproksimadamente 5% a haña problema riba algun area di nan bida.
Segun FMA, si tradusí e resultadonan aki pa poblashon di Kòrsou, aproksimadamente 7553 persona por a eksperensiá sierto problema riba area finansiero, laboral, familiar òf di salú dor di nan uso di alkohòl.
Mirando e situashon finansiero aktual di Kòrsou, ta bon pa hasi estudionan mas profundo pa sa na kiko uso di alkohòl ta kostando Kòrsou. I alabes profundisá mas riba uso di otro supstansia i konsekuensianan di esaki di akuerdo ku FMA.
