by Webmaster | 02/11/2023 | IT, Apps & Social Media
Atrobe un klap duru pa Meta. E kompania no ta pèrmití mas pa usa dato di usuarionan di Facebook i Instagram den Oropa pa avisonan komersial personalisá. Segun e Komité Oropeo pa Protekshon di Dato propietario di e plataformanan Meta ta violá leinan di privasidat dor di usa datonan personal di usuario pa avisonan personalisá.
E prohibishon ta un klap duru pa e kompania. Meta ta gana un kapital enorme ku e avisonan aki. Kompanianan ku ta advertise riba Facebook i Instagram ta buta nan avisonan hustamente pa e funshonnan ku e kompania ta usa pa anunsionan dirigí.
E violashon di privacy no ta limitá na e uso di e datonan di usuario pa finnan komersial. Ta trata tambe di informashon manera kiko hende ta klek pa lesa. Meta ta usa e informashon ei tambe pa krea perfilnan komersial. Sinembargo e kolekshon di dato ei no tin un base hurídiko.
Anteriormente Norwega ya a prohibí Meta pa rekohé datonan di usuario pa metanan komersial. Awor hinter Union Oropeo a sigui e pais su ehèmpel.
by Webmaster | 01/11/2023 | Business & Economy
Balor di yen Hapones a baha e siman aki te na su balor mas abou for di 2008. Pa kada dòler bo ta haña 151,23 yen. Pa kada florin 84,01 yen. E moneda ta pèrdiendo balor for di 2019.
Mayor motibu pa e pèrdida di balor ta e posishon reservá di banko sentral di Hapon. E diferensha ku e interesnan na Merka i Oropa ta grandi. Di momentu e interes na Hapon ta fihá te asta na -0,1%, esta un porsentahe negativo. E bankonan sentral na Oropa i Merka a yùist subi interes pa asina kontené inflashon. Na Hapon sinembargo inflashon ta relativamente abou na 2,8%. Esei ta e sifra di inflashon mas haltu di último añanan.
Di otro banda mester bisa ku e balor abou di e moneda tin su bentahanan tambe. Dor di e balor abou ta hopi interesante pa importá produktonan na bon preis for di Hapon. Partikularmente kompanianan manera Toyota, Yamaha i Honda a probechá di e balor aktual di yen. Turismo den e pais tambe a probechá bon di e situashon dje moneda.
by Webmaster | 01/11/2023 | Internashonal
Un dealer di arte na Fransia mester a paresé den korte pa estafa di un pareha na edat. El a kumpra un maskarada Afrikano, ku tin orígen den siglo 19, pa un suma di 150 euro. Alguna luna despues sinembargo el a bende esaki na findishi pa mas di 4 mion euro.
E pareha a bende e maskarada ku e dealer den 2021 ora nan tabata ruim op nan kas. Nan a invitá e antikuario pa bin wak algun opheto ku lo e por tabata interesá aden. Lo el a kumpra e maskarada for di nan sin bisa esaki su berdadero balor. E dealer a bisa sinembargo ku e mes no tabata sa ku e maskarada ta bal asina tantu sèn.
E pareha a rekonosé e maskarada aña pasá ora nan a lesa riba e findishi kaminda a bend’é. E maskarada a resultá un obra di arte di e pueblo Fang na Gabon. Inisialmente a ofresé e maskarada pa 300 mil euro, pero despues di un ofèrta anónimo e maskarada a bai pa 4.2 mion euro.
E pareha ta sinti ku e dealer a estafá nan i a hib’é korte pa anulá e benta. Poko despues gobièrnu di Gabon tambe a bin dilanti demandando pa debolbé e maskarada. Esaki lo ta hòrtá i pa e motibu ei mester bai bèk su pais di orígen. E gobièrnu di Gabon a pidi den e kuadro aki pa para e kaso.
Pa fin di e aña aki wes lo tuma un desishon kiko mester pasa ku e maskarada.
by Webmaster | 01/11/2023 | IT, Apps & Social Media
Entrante promé di yanüari servisionan di streaming mester invertí 5% di nan resultado anual den kontenido lokal pa merkado Hulandes. Eerste Kamer a aprobá un proposishon di lei di departamentu di kultura. Esaki mester kondusí na fondonan pa produkshonnan Hulandes ku despues por pasa na plataformanan internashonal manera Netflix, HBO Max i Amazon Prime.
E lei ku ta regla esaki ta bálido pa servisionan di streaming ku un resultado anual di mas di 10 mion euro. Esei ta inkluí Netflix, Disney+ i Amazon Prime. E invershon di 5% ta pèrmití pa tur kontenido eksepto deporte. Tambe e lei ta regla ku 60% di e produkshonnan lokal mester ta independiente.
Paisnan manera Alemania, Fransia i Bèlgika ya a adoptá leinan komparabel pa asina nan produkshonnan lokal por kompetí ku otro produkshonnan internashonal.
by Webmaster | 31/10/2023 | Internashonal
E paisnan reuní den G7 a stipulá un kódigo di kondukta pa kompanianan ku ta desaroyá inteligensha artifisial. E kódigo aki mester garantisá seguridat i konfiabilidat di e teknologia nobo aki.
Ekspertonan a bin ta atvertí na kuminsamentu di e aña aki pa ku e riezgonan di uso di inteligensha artifisial. E programanan ta hasi un trabou impreshonante pero e informashon ku e sistemanan ta produsí no ta kuadra semper.
Ademas e sistemanan ta sirbi hopi biaha pa krea informashon ku no ta kuadra, inkluyendo fake news. E desaroyonan ta kana asina lihé ku hende por pèrdè kòntròl riba e konsekuenshanan. E kódigo di kondukta aki lo mester kambia esei.
E kódigo ta konsistí di 11 punto di atenshon pa e kompanianan. Di otro banda e kódigo no ta obligatorio. E kompanianan no ta mará pues na direktivanan ku ta prohibí nada.
Si ta asina ku e kódigo aki ta buta preshon riba paisnan pa traha lihé riba leinan ku ta regardá inteligensha artifisial. Te asina leu no ta èksistí regulashon integral relashoná ku inteligensha artifisial na Merka, pero Oropa ya a tuma algun paso anteriormente e aña aki.
by Webmaster | 31/10/2023 | IT, Apps & Social Media
Entrante novèmber usuarionan Oropeo por opta pa un account pagá di Facebook òf Instagram sin avisonan komersial. Di e forma aki Facebook mester kumpli ku leinan Oropeo ku ta regardá privasidat di usuarionan. Si e usuario ke e por sigui usa Facebook i Instagram grátis pero esei ta nifiká ku e ta di akuerdo ku avisonan komersial personalisá.
Usuarionan di e website di Facebook por paga 9,99 euro pa luna pa usa esaki sin anunsio komersial i usuarionan di e app lo mester paga 12,99 euro pa luna. E uso di e app pagá ta mas karo dor ku Google i Apple ta kobra un komishon riba pagonan via Play Store i App Store.
E preisnan por sierto ta un ganashi konsiderabel pa Meta. E abono spesial aki sin anunsio komersial ta mas haltu ku e ganashi ku Facebook tin riba kada usuario di Facebook, Instagram òf WhatsApp. Den último kuartal Meta a gana un poko mas di 3,50 dòler pa kada usuario.
by Webmaster | 31/10/2023 | Business & Economy
Apesar di un subida fuerte di preis na e kadena di restorant di fast food Mc Donald’s ketu bai klientenan ta haña nan kaminda pa e sukursal mas serka. Asina entre otro The Financial Times ta informá.
E resultado ta un sorpresa pa e kompania ku a tene kuenta ku e subida di preis lo a spanta kliente. E kontratempu ekonómiko aktual no ta parse di tin un influensha riba e kompania. Anteriormente e kompania a eliminá hopi kupo di trabou relashoná ku pronóstikonan ekonómiko negativo.
Segun su propio análisis Mc Donald’s a benefisiá hopi di kampañanan komersial i home delivery. Segun e sifranan di e kuartal mas resien Mc Donald’s lo a generá mundialmente mas o ménos 2.200 mion dòler di ganashi na benta di hamburger, salada i happy meals. Esei ta buta e resultado total di e kuartal mas resien na 6.300 mion dòler. Esei ta un subida di 14% kompará ku aña pasá.
by Webmaster | 30/10/2023 | Cinema News
Koleganan i amigunan ta den shòk despues di e notisia ku e aktor Merikano-Canades Matthew Perry a fayesé. Perry, partikularmente konosí pa su ròl komo Chandler den e serie Friends, a fayesé djasabra na 54 aña di edat. Segun Los Angeles Times e asistente di e aktor a hañ’é morto den su jacuzzi na kas.
Vários aktor ku a traha ku Perry i otro konosínan a subi retnan sosial pa kompartí nan tristesa. Asta promé minister di Canada Justin Trudeau a reakshoná riba e notisia. Su koleganan di Friends mes a keda remarkablemente ketu.
Te asina leu no tin sospecho di un krímen. Tampoko a haña supstansianan prohibí den e bibienda. Manera ta konosí e aktor tin un pasado di abusu di supstansianan pisá manera alkohòl, droga i remedi kontra doló. E kousa eksakto di morto ta bou di investigashon.
by Webmaster | 30/10/2023 | Business & Economy
E fabrikante di outo Hapones Toyota a bende un kantidat rèkòrt di vehíkulo den último 6 luna. Partikularmente e benta di outonan hybrid ku ta kore pa un parti riba koriente a subi bastante.
E marka no a bende solamente bon den su pais di orígen pero tambe na Merka i Oropa hopi outomobilista a opta pa un Toyota. Na Asia e benta tabata un poko mas abou dor di e kontratempu ekonómiko di Tailandia i Indonesia.
Entre aprel i òktober Toyota a bende alrededor di 5.6 mion vehíkulo. Esei ta 8% mas haltu ku e mesun periodo aña pasá.
E benta di outo eléktriko, partikularmente e modelonan hybrid, a subi ku 38% te na 1.8 mion. E benta di outo 100% eléktriko a keda kologá na mas o ménos 60 mil ehemplar.
by Webmaster | 30/10/2023 | Naturalesa
Orkan Otis a okashoná 48 morto na Acapulco. Djaluna mainta sigur 36 persona tabata pèrdí ainda. Siman pasá djaweps Otis a pasa ku un forsa kategoria 5 riba parti sùit di Mexico na banda di Pasífiko.
Segun kálkulonan e orkan a okashoná kasi 15 mil mion dòler na daño. Kuminda i awa ta skars i yudansa ta kana poko poko. Esei a kondusí na entre otro sakeo di supermarket. Konekshon di koriente, internet i telefòn tambe ta kompletamente paralisá i tráfiko ta kasi imposibel dor di e daño na kayanan i inundashon na vários parti.
Segun sientífikonan ku a studia e orkan, Otis lo a intensivá asina lihé ku servisio meteorológiko no tabatin sufisiente tempu pa atvertí habitantenan di e region.
by Webmaster | 28/10/2023 | Cinema News
…dùs mi a kaba di wak South Park: Joining The Panderverse i mi tin ku bisa ku Matt Stone i Trey Parker a bolbe produsí un masterpiece! Mi a grita hari duru na vários okashon durante e special aki. Sigui lesa e review aki pasobra mi tin un sorpresa na kabamentu!
Ku nan mix tradishonal di burla, sátiro, sarkasmo i apsurdismo, Stone i Parker ta ridikulisá aktualidat i / òf tur loke nan por buta nan man riba dje. Na bon Papiamentu bisá: “Tur hende ta haña!” den Joining The Panderverse.
Nan “víktima prinsipal” na e okashon aki ta e kompania Disney, i partikularmente direktor di Lucas Films Kathleen Kennedy. E dama aki a bira blanku di bastante krítika e aña aki pa e kaida di kalidat di algun franchise basta popular manera Indiana Jones i Star Wars.
Otro krítika prominente di e kreadornan di South Park den e special aki di 48 minüt ta e uso ripití di e konsepto di multiverso den pelíkulanan moderno. Hinter e setup di Joinging The Panderverse ta un klòmpi enorme di krítika riba e uso abusivo di e konsepto ei.
Otro punto di krítika ku ta forma e sub plot di e special aki ta e estado aktual di ekonomia ku entrada di inteligensha artifisial, inkluyendo e efekto i konsekuensha ku esei ta trese ku n’e pa e merkado laboral di futuro.
Mi no ke keda sin menshoná e tremendo voice acting di e damanan ku a fia nan stèm pa e special aki. Un tremendo trabou ku partikularmente esnan ku ta sigui South Park pa dékadas kaba meskos ku mi lo sa di apresiá hopi. E aktrisnan di stèm aki a prepará nan mes hopi bon mes pa Joining The Panderverse i e delivery ta hopi credible. I mirando nan nòmbernan den credits… yes, they sound real because they are real!
E último aspekto ei a gewoon buta mitar punto riba e skor di 8,5 ku mi tabata bai duna Joining The Panderverse anteriormente…
9 out of 10!
Autor: Maurilhio Nobrega
I wat betreft e sorpresa… Yep! Bo por wak Joining The Panderverse online kaba! Aki un par di dia e lo ta disponibel riba e website ofisial di South Park, pero si bo join mi WhatsApp Channel bo por wak e grátis.
by Webmaster | 27/10/2023 | IT, Apps & Social Media
Den dianan tras di lomba a lanta basta konsternashon ora a konstatá ku tin tin hopi estafa ta tuma lugá riba e konosido website Booking.com. Vários usuario a opservá ku tin mensahenan falsu ta paresé den e sistema di e website.
Asina tin mensahe ku ta atvertí ku tin problema ku credit card i ku pa e motibu ei no por reservá na sierto hotel. E mensahenan ta parse real pasobra nan ta mandá for di e adrès di e-mail noreply@booking.com. E mensahe ta sugerí ku mester manda e datonan di credit card di nobo sino lo anulá un reservashon i lo por kobra gastunan adishonal.
Den prinsipio Booking.com no a rekonosé e problema i na un okashon a asta bisa un kliente ku e link den e mensahe falsu mester ta konfiabel. Servisionan di credit card sinembargo tambe a nota e problema i den algun kaso a paga pa e daño.
Booking.com a keda insistí segun The Guardian ku su sistema ta funshoná bon i ku e problema ta debí na un fayo serka hotèlnan ku e ta traha ku n’e.
Investigadónan di e kompania di cyber security Heimdal ta sostené e ponensia di Booking.com pa loke ta trata e fayo na e hotèlnan. Hackers lo ta usa datonan hòrtá pa asina kontaktá klientenan via e sistema di Booking.com. Konsekuentemente hopi kliente ta haña nan konfrontá ku atakenan di phishing.
E kompania ta konsehá pa kontrolá e link den e mensahe promé ku klek riba esaki. Esaki ta bai mas fásil riba un laptop òf computer kaminda bo por schuin abou den bo pantaya na unda e link lo hiba bo. Si esaki no ta kuadra ku e adrès di e hotèl, e mensahe definitivamente ta falsu.
by Webmaster | 27/10/2023 | Business & Economy
Ekonomia di Merka a krese den di tres kuartal ku 4,9%. Esaki apesar di subida di interes i e konyuktura ekonómiko aktual. Ta e mayor kresementu registrá for di 2021. Den e di dos kuartal di e aña aki e kresementu tabata ainda 2,1%.
E kresementu ta debí na un kombinashon di konsumidornan ku a gasta mas ku den añanan tras di lomba, invershonnan di gobièrnu i eksportashon.
Merka ta konfrontá ku oumentonan di preis konsiderabel. Pa frena inflashon Federal Reserve, e Banko Sentral di Merka, a subi interes na vários okashon. Ounke normalmente esaki ta frena kresementu ekonómiko e medida no ta parse di a afektá e kresementu den e kuartal mas resien.
Den último lunanan salarionan a subi mas lihé ku preisnan di produkto i servisio. Esaki ta krea espasio pa forsa di kompra. Dunadónan di trabou no tin eskoho pasobra di momentu e ofèrta di personal riba merkado ta abou.
Pa próksimo kuartal ta antisipá ku ekonomia lo krese ménos duru ku aworakí. Bankonan ta opservá ku e sèn ku Merikanonan tin di spar generalmente ta agotando.
by Webmaster | 27/10/2023 | Internashonal
Ehérsito di Merka a hiba vários atake riba dos fasilidat na Siria ku di akuerdo ku gobièrnu Merikano ta bou di kòntròl di e Guardia Revolushonario Islámiko i otro gruponan na Iran.
Segun e Ministerio di Defensa Merikano e atakenan a tuma lugá ku F-16 riba depósito pa arma i munishon. Mas aleu Pentagon a informá ku e operashon aki ta sigui un serie di atake resien riba tropanan Merikano na Irak i Siria.
E atakenan a tuma lugá riba òrdu di presidente Joe Biden kende a indiká anteriormente ku el a atvertí ayatollah Ali Khamenei, e lider spiritual di e pais, ku e atakenan riba tropa Merikano lo tabata bai tin konsekuensha. E presidente Merikano a enfatisá ku e atake no ta relashoná ku e situashon na Israèl.
by Webmaster | 26/10/2023 | Internashonal
Na Merka a demandá un pilot pa 83 intento di asesinato. Riba un buelo di Alaska Airlines di e lugá Everett pa San Francisco lo el a purba paga e motornan di e avion di akuerdo ku ABC News.
E sospechoso ta traha pa e aerolinea pero no tabata trahando na e momentu ei. Na momentu ku el a hasi su intento lo e tabatin 40 ora sin drumi. Dor di intervenshon di e kapitan i ko-pilot por a evitá un tragedia.
E tripulashon di e avion a logra dominá e hòmber i mar’é riba un stul te ora a aterisá e avion na Portland kaminda a pas’é pa outoridatnan.
