Lider di e grupo di mersenario Wagner Group Yevgeny Prigozhin posiblemente a pèrdè su bida den un aksidente di avion na Rusia. Asina medionan na Rusia a informá djarason a base di e lista di nòmber di pasahero. E avion a kai nort di kapital di Rusia Moskú. Niun pasahero a sobrebibí.
Entretantu a rekobrá 8 kurpa, pero no ta konosí si e kurpa di Prigozhin ta entre e víktimanan. E kousa di e aksidente tampoko ta konosí. E avion su destinashon en todo kaso tabata Sint Petersburg.
Manera ta konosí Wagner Group tabata sostené Rusia den e konflikto ku Ukrania, pero dor di vários insidente kaminda mersenarionan a pèrdè nan bida e kolaborashon a fria. Den yüni Prigozhin a organisá un marcha den direkshon di Moskú pa rebeldiá kontra presidente di Rusia Vladimir Putin.
Despues di intermediashon di Belarus e mersenarionan a deskontinuá nan rebeldia. Na e okashon ei presidente di Rusia Vladimir Putin a papia di traishon haltu.
E ola di kalor mundial di momentu ta okashonando vários problema den vários pais.
Italia i Fransia a emití un kódigo kòrá den vários parti relashoná ku kalor ekstremo. Den algun parti di Italia ta tene kuenta ku temperaturanan lo alkansá 38 grado òf mas. Siudadanonan ta avisá pa evitá solo i kalor mas tantu posibel, partikularmente den oranan ku ta hasi mas kalor. Mitar di Fransia tin un kódigo oraño vigente na e momentu aki. Den kasi binti departamentu tin un kódigo kòrá. Na Fransia ta tene kuenta ku temperaturanan ku por alkansá 42 grado.
Turesten na Gresia kandelanan di mondi den parti nort di e pais a okashoná 26 morto. Ta trata di kurpanan kimá. Segun outoridatnan por ta trata di migrantenan mirando ku no tin petishon pa búskeda di persona disparsé. E pais ta hañando yudansa for di vários pais bisiña pa kombatí e kandelanan. Aparte di esei pronóstikonan ta indiká ku temperaturanan lo keda haltu i ku sekura lo pèrsistí por lo pronto. Na Tenerife por sierto e situashon ta un relativamente bou di kòntròl. Na kabamentu di siman pasá tabatin peliger ainda ku e kandelanan lo a move den direkshon di áreanan turístiko kaminda tin hopi bishitante aworakí.
E kalidat di airu den parti Wèst di Canada ta na un nivel peligroso na e momentu aki. Dor di kandelanan di mondi e kantidat di huma den airu ta hasi halamentu di rosea hopi difísil. Segun e índise mundial pa kalidat di airu di momentu partinan di e region ta skor 350. Pa bo por hasi un komparashon e kalidat di airu standart na Lahore, e siudat ku e pió kalidat na mundu a skor 97 aña pasá pa su kalidat di airu.
Barkunan ku tin ku pasa dor di e kanal di Panamá tin ku warda kada bes mas largu. Dor di sekura i e nivel abou di awa tin un estrago serio a surgi. E kanal di Panamá ta un di e rutanan di transporte mas importante na mundu ya ku e ta evitá ku barkunan mester nabegá rondó di e kontinente di Suramérika. Dor di e sekura di algun siman kaba e nivel di awa de echo ta sigui baha.
Ta e barkunan mas chikitu so por pasa i asina mes e kantidat ku tin mag di pasa pa dia tambe ta limitá. Di momentu tin mas o ménos 160 barku ku mester warda pa nan por pasa. Segun agensia di prensa Bloomberg barkunan mester warda den promedio 4 dia pa nan por pasa, anteriormente esaki tabata 2 dia. Dor di e situashon aktual tin algun barku ku tin un retraso di mas di 20 dia.
E elekshon presidensial na Ecuador ta pasa pa un di dos buèlta kaminda Luisa González i Daniel Noboa Azin lo kompetí pa e presidensia di e pais. Despues di e promé konteo no tabatin un kandidato ku mayoria di voto.
Luisa González, miembro di e partido di èks presidente Correa i e únikodama durante e kampaña aki, te ainda ta konsiderá e kandidato ku mas chèns pa gana. Den e promé buèlta el a saka 33% di votonan i Noboa 24%. E susesor di Fernando Villavicencio, kende a keda asesiná siman pasá, a saka 16% di e votonan i no a pasa pa e siguiente buèlta.
E asesinato di Villavicencio tabata e momentu mas lamentabel di e kampaña aki ku a bai kompañá pa hopi vilensha okashoná pa gangs, inkluyendo algun asesinato. Tabatin asta intentonan di hacker pa influenshá e sistema di konteo, pero esaki no a kambia nada na e biyetenan di voto. Riba 15 di òktober Ekuatorianonan ta bai urna atrobe.
E eksplorashon lunar di Rusia a frakasá dor di un fayo den e motor di e moon lander Luna-25. Djasabra a bira konosí ku e nave a crash riba superfísie di luna. E motor mester a funshoná eksaktamente 84 sekònde pa drenta i despues sirkulá den órbita di luna. E maniobra ei ta forma e último paso pa e aterisahe por tuma lugá. E motornan sinembargo a keda funshoná 127 sekònde. Asina e organisashon pa eksplorashon espasial na Rusia Roscosmos a konfirmá na medionan estatal.
No ta konosí dikon e motornan no a paga na tempu. E moonlander mester a aterisá e siman aki. Ku e eksplorashon aki Rusia kier a kontinuá su programa di 1976 ora ku astronoutanan di Rusia a bishitá luna pa delaster biaha. Te asina leu ta Rusia, China i Merka ta e úniko paisnan ku a hasi biahenan eksitoso pa luna. Paisnan manera India, Hapon i Israèl tambe a hasi intento, pero no a logra esaki. Djarason awor por sierto India lo inisiá su propio eksplorashon lunar.
Teatro Bulabanda ta presentá, den koperashon ku Teatro KadaKen, E Dekonstrukshon di Edsel K. E produkshon akí ta un ‘reprise’ di e obra trahá originalmente pa Teatro Kadaken na aña 2009, bou di mesun título. E obra skibí pa Albert Schoobaar. Teatro Bulabanda a tuma inisiativa pa bolbe trese e obra akí paso su temanan: amistat, traishon i toleransha ku ta mesun urgente ku 14 aña pasá.
E historia
Edsel i Kai ta krese komo mihó amigu den e mes un bario. Nan amistat ta e amistat di mas grandi na mundu. Ora Kai su kurpa sin bida aparesé tirá den un mondi un dia, Edsel ta presentá na warda di polis pa entregá su mes bisando ku ta e a mata Kai.
Durante e obra, Inspektor Mendez ta purba, huntu ku públiko presente, saka afó kiko a pasa.
Dos aktor hobén
Pa e presentashonnan di nobo akí di E Dekonstrukshon di Edsel K., Teatro Bulabanda a reklutá dos aktor hobén pa e papelnan di Edsel i Kai: Christopher Damiana i Sean- Curtis Girigorie. Christopher a haña lès aktuashon i presentá den La Tentashon, i tambe den obranan di Arawak Teater. Sean- Curtis ta alumno di aktuashon na Elisa Academy, i a traha komo figurante entre otro den ‘De Droevige Kampioen.’
Teatro Bulabanda a ekstendé un invitashon tambe na e aktris Suzy Eisden pa kompartí aktuashon di e ròlnan di mama ku Norma Cova. Suzy Eisden ta hopi konosí di nos teatro popular di Kòrsou. Invitando Suzy Eisden pa aktua ku nos Teatro Bulabanda ke buska laso ku e dos mundunan di teatro, e dos tiponan di teatro (popular i posmoderno); por ta trese nan mas serka di otro, pa wak kon nos por nutri i inspirá otro.
Konsepto i Direkshon: Silvia Andringa
Teksto: Albert Schoobaar
Aktuashon: Norma Cova, Albert Schoobaar, Christopher Damiana i Sean- Curtis Girigorie i Suzy Eisden (understudy di Norma Cova)
Lider di Produkshon: Yndra Leito
Lider Artístiko: Albert Schoobaar
Lider General: Marlon Reina
E Dekonstrukshon di Edsel K. a risibí skolnan sekundario, kuminsando 14 di Òugùstùs i ta habri pa públiko general djabièrnè 25 (8 P.M.), djasabra 26 (8 P.M.) i djadumingu 27 (6 P.M.) di Òugùstùs den Aula di Huize Welgelegen na Habaai, un monumento nashonal. Entrada ANG 25.00. Por kumpra na Caribbeanticketshop.com, Mensing’s Caminada, Van den Tweel, Sentro di Pago Tu y Yo.
Dediká na Ariande Faries (1968-2020)
E presentashonnan di E Dekonstrukshon di Edsel K. ta dediká na memoria di e artista i fotógrafo Ariadne Faries, ku a bai sosegá november 2020. Ariadne Faries tabata pintor i artista plástiko konosí, pero tambe diseñadó gráfiko di entre otro bukinan pa mucha. Faries a diseñá diferente material di promoshon pa obranan di Albert Schoobaar promé i sigur durante su liderasgo artístiko di Teatro KadaKen. I e tabata e fotógrafo ofishal pa obranan di Albert Schoobaar. Meskos ta konta tambe pa E dekonstrukshon di Edsel K. na aña 2009 bou di bandera di Teatro KadaKen e tempu ei. E lastu kolaborashon ku Albert Schoobaar, i su úniko trabou pa Teatro Bulabanda, tabata komo fotógrafo di e obra Klèsh den Bario (2020). Ku e presentashonnan di nobo akí di Edsel K., Teatro Bulabanda ta rekordá Ariande Faries i ke mustra nos gratitut pa su bunita trabou den mundu di arte i teater na Kòrsou.
Sostén finansiero
E Dekonstrukshon di Edsel K. ta posibel ku sostén finansiero di Fonds Podiumkunsten, Fonds 21, Prins Bernhard Cultuurfonds Caribisch Gebied, Give a Damn Foundation, Nederlandse Vertegenwoordiging Willemstad.
Inteligensha artifisial por ‘rei’ bo password. Investigadónan a konkluí den un estudio resien ku Inteligensha artifisial por rei bo password ku un probabilidat di mas di 90%. E investigashon ta kondusí pa e universidat di Surrey na Inglatera.
A resultá ku inteligensha artifisial por saka afó kiko ta bo password a base di e sonido di e keyboard di bo computer. Esaki opviamente ta trese riezgonan di siguridat ku n’e. E investigadónan a tèst esaki dor di tek riba e keyboard di un MacBook Pro 25 biaha na diferente manera.
E sonidonan ta grabá ku tantu e programa Zoom komo un smartphone. Despues a pasa e grabashon di e sonidonan den un sistema di Inteligensha Artifisial ku despues di un par di okashon por a rekonosé e sonido di e keyboard di e MacBook menshoná anteriormente.
Nan no por determiná kon e sistema ta logra interpretá i prosesá e sonidonan, pero ta definitivamente sigur ku e sistema ta rekonosé kada sonido separá. Loke por hunga un ròl por ehèmpel ta otro sonidonan den serkania di e keyboard. Pa logra esaki esnan ku ke haña akseso na bo computer mester ta sufisiente serka di e aparato.
Ecuador tabata senario di un otro kaso di tiramentu durante e kampaña pa elekshon presidensial den e pais. Ta trata na e okashon aki di un insidente na un reunion di e kandidato presidensial Daniel Noboa Azin na e siudat Durán.
E kandidato ta sano i salvo. Polis no ta sigur si e tiramentu tabata un intento di asesinato. Noboa Azin ta representá e partido Ecuatoriano Unido for di 2021 den parlamentu di Ecuador.
Den último par di siman a asesiná un otro kandidato, un alkalde i un polítiko aktivo riba nivel lokal. E tema di kombatimentu di krímen organisá ta un tema sentral durante e elekshon aki.
E balor di Bitcoin a baha ku 8% den ménos ku 24 ora. Djabièrnè mainta riba beurs Oropeo e balor a baha di 26 mil euro pa kada Bitcoin te na 24 mil. E bahada a sigui despues ku e kompania SpaceX a baha balor di su propiedatnan ku ta balorá ku bitcoin.
Djaweps e korant The Wall Street Journal a publiká un artíkulo riba e sifranan finansiero di SpaceX, e kompania di Elon Musk ku ta organisá biahenan pa espasio. Segun e korant SpaceX a laga baha balor di su propiedat di bitcoins ku 373 mion dòler. Ku otro palabra: den su kuentanan SpaceX ta atribuí un balor hopi mas abou di propiedat na su bitcoins.
Elon Musk ta konosí komo amante di kriptomoneda, pa e motibu ei mes e notisia a sorprendé hopi hende. For di djaweps anochi e balor di bitcoin ta den bahada. Loke ta duna un impulso èkstra na e bahada aki ta e rumornan ku Banko Sentral di Merka ta bai subi interes.
Apesar di e desaroyo aki bitcoin su balor ta ketu bai mas di 50% mas haltu ku na kuminsamentu di e aña aki.
Un dama na e parti Franses di Canada a keda kondená na 22 aña di prison relashoná ku un karta venená ku el a manda pa èks presidente di Merka Donald Trump den 2020. Ta trata di Pascale Ferrier di 55 aña ku a rekonosé den yanüari ku en bèrdat el a manda un karta ku ricine pa Kas Blanku. E dama lo a traha e venenu na su kas na Quebec. Ku e akto ei e dama ta den violashon di leinan ku ta prohibí armanan biológiko na Canada.
E dama a manda 8 karta mas pa polítikonan den estado Texas. Niun di nan a sufri daño. E kartanan a keda interseptá basta lihé den e prosedimentunan di pòst na Kas Blanku. Ferrier lo kier a evitá ku Trump lo a bolbe partisipá na e elekshon presidensial mas resien na Merka.
E dama a keda detené den sèptèmber 2020 na e siudat Buffalo den estado New York. Na e momentu ei Ferrier tabata den poseshon di arma di kandela, munishon, kuchú, pepperspray i dokumentonan falsifiká.
E konosido lugá turístiko Tenerife, un isla Spañó, tambe ta senario di momentu di kandelanan di mondi kaminda mas o ménos 4500 hende mester a evakuá. Si e situashon no kambia probablemente mester evakuá mas persona.
Ta parse manera outoridatnan no tin kòntròl riba e kandela. Bombero i militarnan ta trahando duru pa dominá e kandela. Segun e presidente regional di e isla Fernando Clavijo ta e pió kandela den último 40 aña.
E kandelanan a kuminsá pegá ku pia di e volkan Teide. Dor ku akseso na e tereno ta difísil ta kasi imposibel kontené e kandela. Outoridatnan mester traha un plan lihé. Si e kandela sigui move den mesun direkshon esaki por yega na un vaye ku vários camping.
Outoridatnan ta spera di kontrolá e kandelanan promé ku wikènt. Pronóstikonan ta indiká ku ta bai hasi hopi kalor atrobe.
E servisio di siguridat na Suesia a subi e alerta di menasa na e nivel promé ku e nivel mas haltu. Segun e servisio e menasa ta real siguiendo algun insidente kaminda a pega e buki sagrado di mòslem na kandela. Insidentenan ku a lanta hopi konsternashon den paisnan islámiko.
E nivel ta fihá aworakí na 4, nèt bou di nivel 5. Nivel 4 ta nifiká menasa grandi. Delaster biaha ku e pais a duna e alerta aki tabata den 2016. Segun medionan den e pais, Al Qaida lo a hasi yamada pa akshonnan di represaya den direkshon di Suesia.
Na Dinamarka, kaminda algun insidente komparabel a tuma lugá, tambe servisio di inteligensha a subi estado di alerta i subi vigilansha di frontera.
Balor di e moneda Chines yuan ta bahando. Djarason e moneda a baha te na e balor mas abou for di novèmber 2022. Motibu pa e bahada ta e vários relatonan for di ekonomia di China. Asina a sali afó ku den yüli e sektor industrial di e pais a produsí ménos ku tabata antisipá, ku bentanan di retail ta desapuntá i ku desempleo na China a subi. Riba djarason e kambio pa dòler tabata kalkulá na mas o ménos 7.3 yuan pa kada dòler.
E kresementu ekonómiko na China ta hopi abou di momentu. China ta pasando dor di un temporada di deflashon, esta ku preisnan ta bahando duru. E efekto kontrali pues di loke nos ta mira den nos parti di mundu ku inflashon. E deflashon ta okashoná pa e konsumidor Chines ku ta gastando ménos na e momentu aki.
E Banko Sentral di China a anunsiá un redukshon di interes pa restourá ekonomia di e pais. E merkado di “vastgoed” na China ta pasando dor di un krísis i mester tuma medida drástiko pa stimulá e merkado. Eksportashon pa otro partinan di mundu tambe a baha. Ta di dos biaha kaba ku e banko sentral di e pais ta baha e interes pa asina hasi fiansa i invershon mas atraktivo.
Despues di a logra detektá palabra i frasenan kompleto awor sientífikonan a logra detektá asta melodia produsí dor di olanan serebral. Esaki ta otro paso dilanti den e siensia rondó di olanan serebral. Músika i formulashon di palabra i frase ta tuma lugá den áreanan separá den nos serebro.
Durante e investigashon e sientífikonan a nota serka 29 persona ku mester a operá pa epilepsia ku nan mente tabata produsí un melodia konosí. Despues di e operashonnan a pasa e señalnan ku nan a logra registrá via waya pegá na e pashèntnan su kabes den un computer pa un programa di inteligensha artifisial reprodusí e melodia.
Pa nan gran sorpresa e olanan serebral di e pashèntnan a produsí un meldoia ku ta zona kasi idéntiko na Another Brick in the Wall di e konosido banda Britániko Pink Floyd. Ta trata di e melodia bou di e palabranan “All in all, it’s just another brick in the wall”.
Klientenan di Bank of Ireland por a lanta sèn por nada na bankomátiko riba djamars. Dor di un fayo tékniko den e app di e banko klientenan por a lanta mas sèn ku nan tin riba nan kuenta. Dor di e fayo klientenan por a pasa sèn ku nan no tin pa otro kuenta pa despues lanta esaki na bankomátiko. Esei no tabata e úniko problema. Vários tarheta a keda blòkiá de pronto i online banking tampoko tabata posibel.
For di djarason e problemanan ta resolvé. Den un mensahe riba X (ántes Twitter) e banko a duna di konosé ku a deskontá tur suma ku klientenan a lanta na bankomátiko for di nan kuenta. Klientenan ku por a haña nan mes den problema dor di e insidente mester tuma kontakto ku e banko. Bank of Ireland a duna di konosé ku nan lo no kobra interes riba e sumanan lantá ku por a buta nan den debe.
Atrobe un kaso di asesinato relashoná ku e kampaña di elekshon na Ecuador. Djaluna atardi outoridatnan a konfirmá asesinato di e kandidato presidensial Pedro Briones, e di dos víktima den un siman di tempu. Segun medionan internashonal e asesinato a tuma lugá na su kas na e provinsia Esmeraldas ora ku deskonosínan riba motosaikel a kore pasa i tira e kandidato mata.
Briones lo a representá e ramo lokal di Revolución Ciudadana, di èks presidente Rafael Correa. Manera ta konosí siman pasá djarason a asesiná Fernando Villavicencio durante un evento di kampaña na e kapital Quito. Villavicencio ta un èks periodista ku vários publikashon riba e konekshon entre polítika i krímen organisá.
Despues di e asesinato riba Villavicencio e presidente aktual Guillermo Lasso a yama estado di emergensha pa un periodo di 60 dia, pero esei pues no a evitá e asesinato di Briones. E problemanan na Ecuador de fakto a kuminsá dos siman promé ku e asesinato riba Villavicencio ku otro atentado riba un alkalde na e siudat Manta, un di e siudatnan mas grandi di Ecuador. No ta kasualidat pues ku kombatimentu di krímen ta un tema importante durante e elekshon aki.
Pasobra no ta polítiko so ta víktima di e violensha. Ta trata di míles di asesinato relashoná ku krímen organisá i gèn sostené pa kartelnan ku ta bringa pa haña kòntròl riba kiko ta pasa den kaya, prison i rutanan di transporte.
Temanan manera desempleo i e situashon ekonómiko tambe ta sentral. Segun enkuestanan Luisa González ta e kandidato mas popular ku por konta ku 25% di votonan si elekshon tuma lugá aworakí. E por konta tambe ku sosten di èks presidente Correa. Komo temanan di kampaña Gonzalez ta konsentrá riba deskuento di impuesto pa kompanianan ku kontratá hóben i sosten pa mamanan ku ta traha.
