E demanda pa bibienda na Hulanda ta kada bes mas haltu. Asina ABF Research a publiká. E konstrukshon di kasnan nobo no por kompetí ku e kresementu di populashon. Esei ta okashoná entre otro pa e kantidat di migrantenan ku ta drenta Hulanda i tambe e echo ku hende grandi ta keda biba kada bes mas largu na kas.
Segun e investigashon ku a tuma lugá alrededor di 110 mil famia lo bin aserka te ku 2031, kua ta mas haltu ku kalkulá anteriormente. Hende grandi ta keda biba mas tempu na kas pa falta di lugá den kasnan di kuido. Tambe famianan ta birando dia pa dia mas chikitu i tambe tin mas i mas famia ku un mayor so. E desaroyonan ei ta buta un preshon grandi riba e demanda pa bibienda.
Pero e faktor mas importante ta keda tòg e kresementu di populashon na Hulanda. Aña pasá tin hopi hende mas a drenta pais ku tabata antisipá. Pa kumpli ku e demanda Hulanda mester di sigur 981 mil bibienda nobo promé ku 2030. E faktor ku ainda por kontribuí na e kresementu di populashon ta tòg migrashon di akuerdo ku ABF Research.
Un grupo di hackers Chines a logra haña akseso na mailbox di sigur 25 organisashon Merikano di kua vários ministerio di gobièrnu. Microsoft a deskubrí e hack, pero no a partisipá ta di kua ministerionan ta trata. Segun e ministerio di Asuntunan di Eksterior, no tin informashon konfidensial a kai den man di e hackers.
E grupo di hacker lo a purba esaki via e sistema di e-mail pa yega na datonan konfidensial. Lo ta trata di un grupo notorio ku a kondusí vários atake tambe riba organisashonnan Oropeo.
Segun Microsoft e hack a tuma lugá den un periodo promé ku e bishita di e minister di Asuntunan di Eksterior na China. E propósito di e bishita ei tabata pa normalisá e relashon entre Merka i China.
Nos por tende silensio òf nò? Silensio ta hasi sonido òf tin su propio frekuensha? Filósofonan a debatí pa basta siglo riba e pregunta ei, pero awor sientífikonan di John Hopkins University tin un posibel kontesta definitivo: nos ta tende silensio di mesun forma ku nos por tende un sirena di polis, ambulans òf brantwer. E pregunta semper tabata si hende literalmente por tende silensio.
Pa investigá esaki e sientífikonan a usa un asina yamá ilushon auditivo. Esei ta un sonido ku bo orea ta registrá, pero ku nos seleber ta interpretá diferente. E sientífikonan a usa un forma adaptá di un téknika eksistente kaminda un persona ta eksponé na un silensio, siguí pa dos blip kòrtiku i na final un blip djis un poko mas largu. Ounke e dos blipnan kòrtiku ta dura mes largu ku e blip ku un durashon djis un poko mas largu, nos seleber ta laga nos kere ku e último blip ei ta zona mas largu.
Den e investigashon nobo aki e partisipantenan a haña un fragmento di un restorant yen di hende pa tende i ku a keda interumpí di mesun forma pero pues ku silensio na lugá di blip. Meskos ku e experimento original e partisipantenan su seleber a registrá dos silensio kòrtiku i unu un poko mas largu miéntras e durashonnan original di silensio tabata igual na otro. Esaki a kondusí na e konklushon ku nos selebronan ta registrá silensio meskos ku sonido, o sea: nos por literalmente tende silensio.
Microsoft a haña lus bèrdè pa atkirí e produktor di videogames Activision Blizzard, konosí entre otro pa games manera Call of Duty, World of Warcraft i e na Kòrsou konosido Candy Crush. Esaki despues ku e kompania a haña aprobashon na tantu Oropa komo Merka.
Pa basta tempu e supervisor Merikano FTC a purba para e deal pa evitá un eventual konkurensha inhustu. Ta trata di e take-over mas grandi den mundu di videogames na un balor total di kasi 70 mil mion dòler ku ta buta Microsoft den 1 tiru den tòp di video games pa smartphone i tablet.
Tambe tabatin miedu ku sierto título lo tabata disponibel solamente riba Microsoft su konosido Xbox. A kambio di aprobashon pa e take-over Microsoft mester a garantisá ku e ta bai produsí videogames pa otro console tambe, manera Nintendo i Playstation. Den Reino Uní ainda sinembargo Microsoft no tin aprobashon pa e take-over.
Ukrania a keda desapuntá ku e promé dia di reunion di e Organisashon Transatlántiko di Nort (OTAN). Te ainda no tin un trayektoria definí pa Ukrania kuminsá forma parti di e aliansa, pero si e promesa ku e pais por bira miembro una bes ku e kumpli ku tur e kondishonnan pa bira miembro. Asina e aliadonan a akordá segun medionan internashonal durante e promé dia di reunion na Lituania.
Segun analistanan presidente Zelensky di Ukrania lo no ta masha kontentu ku e akuerdo aki, ya ku for di un prinsipio e ta boga pa miembresia di OTAN. Promé ku el a biaha pa e reunion e presidente Ukraniano a skirbi riba Twitter ku su pais ta meresé rèspet. Tambe el a bisa ku ta insólito i apsurdo si no fiha un trayektoria pronto pa Ukrania por bira miembro. Ku e miembresia Ukrania ke sigurá su mes di protekshon internashonal pa situashonnan manera esun aktual kaminda Rusia ta invadiendo e pais.
Un malesa ku konsekuensha fatal a plaso largu ta menasando e populashon di turtuga den awanan rondó di Kòrsou. Alrededor di 80% di e animalnan ta sufri di Fibro Papillomatosis. Sea Turtle Conservation Curaçao den kolaborashon ku Jefferson University na Philadelphia ta investigando e fenómeno. Nos a kòmbersá ku Ard Vreugdemhil di Sea Turtle Conservation Curacao.
Inflashon na China a baha te na 0%. Esaki ta kousá pa un demanda redusí di produktonan Chines tantu lokal komo den eksterior. Esaki a resultá den un bahada di preis i pues tambe un bahada di inflashon. Asina vários medio internashonal ta informá a base di un publikashon di e Bureau di estadístika Chines.
Kompará ku aña pasá preisnan ta mas di 5% mas abou. Loke ta hunga un ròl tambe ta e bahada di preis di materianan prima, butando ku konsumidornan ta paga un preis mas abou. Di e forma ei balor di un moneda por subi. Den promé instansha e ta parse un bon kos, pero mester vigilá tambe ku preisnan no ta baha muchu i konsumidornan warda pa preisnan sigui baha pa hasi sierto gastu.
Ora konsumidornan no ta hasi kompra, fábrikanan ta produsí ménos, loke ta resultá direktamente tambe den ménos entrada i pues ménos sèn pa paga trahadó. Si muchu hende pèrdè trabou konsumo ta sigui baha loke por okashoná un spiral negativo.
E kantidat di usuarionan di e app nobo Threads a sigui subi i entrentantu den kasi 1 siman di tempu ya e app tin mas di 100 mion usuario rònt mundu. Djaweps último e kantidat tabata pará ainda na un poko mas di 10 mion usuario. Pa djabièrnè esaki a pasa 70 mion usuario. Meta Platforms a lansa e app 5 dia pasá.
E logro aki ta impreshonante pero ketu bai Threads no ta yega na e 240 milon usuario diario di Twitter. Manera nos a informá anteriormente Threads ta akoplá na e app Instagram. Esei ta hasi posibel pa pasa tur bo kontaktonan riba Instagram pa Threads.
Outoridatnan di e provinsia Hulandes Drenthe a laga tira un wòlf mata djadumingu despues ku esaki a ataká un kriadó di karné. E hòmber a keda trasladá pa hospital. Ta pa promé biaha despues ku a señalá e animalnan den parti ost di Hulanda ku un atake riba hende a tuma lugá.
E insidente a tuma lugá den oranan tempran di mainta entre 7.00 i 8.00. E kriadó a nota ku un wòlf tabata ataká su karnénan i a bin kore ku n’e te ku e animal a mord’é. E insidente tabata motibu pa e burgemeester di e lugá duna òrdu pa mata e wòlf, ku ainda tabata riba e vèlt kaminda e karnenan ta biba.
Sientífikonan ta investigando e kurpa dje animal. Segun kálkulonan lo tin dos pareha di wòlf ta biba den e region di Drenthe. Un di e parehanan aki ya lo a haña un par di yu. Mayoria di nan ta konosí pa sientífikonan, pero ainda no a determiná ta kua a laga tira mata. Di momentu tin un investigashon andando pa determiná si e menasa tabata di tal índole ku mester a kaba ku e wòlf.
Albert Heijn ta bai stòp ku benta di kuchú den su tiendanan. Asina e plataforma NH Nieuws a publiká. Luna pasá un trahadó di e kadena di supermerkado a fayesé despues ku un hòmber a hink’é ku kuchú.
E kompania lo a tuma e paso aki pa e agreshon ku ta lantando den sosiedat, pero no a komentá riba e kaso di luna pasá relashoná ku e respektivo investigashon andando.
Albert Heijn no ta e úniko kompania ku a tuma e paso aki. Den último añanan kompanianan manera HEMA, Xenos i IKEA a limitá benta di kuchú na adultonan so. Tambe vários gemeente a introdusí prohibishon di kanamentu ku kuchú riba kaya, sperando ku ta bin un prohibishon den hinter Hulanda.
Tin un situashon di preokupashon relashoná ku e populashon di foka (esta zeehond) den Waddenzee na Hulanda. Asina Wageningen Marine Research a bisa NOS. E fokanan ta haña yu manera normal, pero pa motibunan deskonosí e yunan ta muriendo poko despues ku nan nase i esei por afektá e populashon.
For di añanan 90 e populashon a krese konsiderablemente, pero e desaroyo ei a stagna. Te asina leu no tin un investigashon tumando lugá pa determiná e kousa di e mortalidat bou di yu di foka. Wageningen Marine Research ta boga pa kuminsá lo mas pronto posibel ku esei. Lo mester saka afó kiko e animalnan ta komiendo òf kiko ta e situashon aktual di nan habitat.
E kompania Twitter di Elon Musk ta akusá Meta Platforms di kompetensha inhustu ku lansamentu di e plataforma Threads. Den un tweet Musk a komentá ku kompetensha ta un bon kos, pero kompetensha inhustu nò. Segun Musk Meta Platforms lo a kontratá hopi èks trahadó di Twitter ku tabatin akseso na dokumentonan ku kontenido konfidensial di su kompania. Asina un abogado di Twitter lo a splika e revista digital Semafor. Un otro fuente a bisa Semafor ku Musk su ponensia no ta kuadra i ku no tin èks trahadó di Twitter embolbé den Threads.
E asuntu ta un indikashon fuerte ku Musk ta mira un menasa den e plataforma nobo nobo Threads di Meta Platforms. Den e promé 18 oranan despues di su lansamentu e app a alkansá 30 mion usuario nobo, inkluyendo prominentenan manera Jennifer Lopez, Shakira i Hugh Jackman i kompanianan konosí manera The Washington Post, Reuters i The Economist.
E éksito di Threads ta fásil di aklará: e plataforma ta akolpá na Instagram ku tin mas di 2 mil mion usuario rònt mundu. Tambe ta fásil pa pasa tur bo siguidónan di Instagram pa e app nobo aki. Otro alternativanan pa Twitter manera Mastodon, ku 1.7 mion usuario, i Bluesky, ku 265 mil usuario, no tabatin mesun éksito ku Threads tabatin den un dia.
Sigur 10 mion usuario ya lo a download i instalá Threads, e app di Meta Platforms ku lo bai kompetí ku Twitter. Asina direktor di Meta Mark Zuckerberg a publiká riba su propio account di Threads.
E lansamentu di e app a tuma lugá djaweps 6 di yüli den vários parti di mundu, pero na Oropa ainda e roll-out no a tuma lugá. Manera nos a indiká anteriormente Threads lo ta akoplá na accountnan eksistente di Instagram i tin hopi similaridat ku Twitter. Asina tin mas enfoke riba mensahenan ku teksto i siguimentu di otro usuarionan. Hende por reakshoná riba mensahe, kompartí esakinan òf buta un Like.
Pa loke ta Twitter mester bisa ku te ainda no tin trankilidat riba e plataforma. Resien Elon Musk a limitá e kantidat di mensahe ku usuarionan por publiká i tambe usuarionan ta malkontentu ku mester paga pa sierto funshon adishonal.
Sigur 20 outomobilista na Hulanda a haña un but di 359 euro pa filma i saka potrèt di un aksidente grave riba e karetera A2 kaminda un outo a dal den un kònteiner. E konduktor di e outo mester a bai hospital ku urgensha. A2 tabata será pa basta ratu pa polis por hasi su trabou.
Dado momentu agentenan na e sitio a nota ku outomobilistanan ku tabata kore na otro banda dje karetera tabata saka potrèt i filma masalmente. E numbernan di outo a keda registrá mesora i e respektivo outomobilistanan ta bai risibí e kuenta na kas pronto.
Polis a splika den un deklarashon ku ta di e mesun forma ku ta registrá hende ku ta sinta bèl, app òf filma tras di stür por a registrá nan mesora.
Tambe a splika mas aleu ku e infrakshon no ta ku e outmobilistanan no tin mag di filma, pero si bo hasi esaki tras di stür i pa kolmo riba un karetera bo por konta ku un but. Segun polis siguridat den tráfiko ta bai riba otro derechinan básiko una bes ku bo ta partisipando.
Segun direktor di Shell Wael Sawan un bahada di produkshon di petroli i gas ta iresponsabel i peligroso. Mundu ta den nesesidat agúdo di kombustibel fósil na e momentu aki. Den un entrevista ku BBC Sawan a splika ku energia duradero no ta na un punto ainda ku nos por kambia mesora p’e.
E direktor di Shell ta mustra mas aleu riba e demanda kresiente for di China i ku un invierno friu por afektá e preis i konsumo konsiderablemente. Shell ta bou di basta preshon pa hasi un traspaso pa energia duradero, pero ta sigui invertí den kombustibel fósil.
Sawan a indiká tambe ku Shell lo no baha produkshon ku 1 pa 2% mas pa aña i ku ta bai invertí mas tambe den produkshon di gas.
