Falta poko pa Netflix para kompartimentu di account grátis. Asina entre otro The Verge a publiká. Manera anunsiá algun luna pasá e plataforma kier para esaki pa limitá pèrdida di entrada. E usuario original di e account mester ta dispuesto na paga èkstra pa kompartí su account ku terseronan.
E medida a drenta na vigor na Canada, Nova Zelandia, Spaña i Portugal kaba i awor e roll-out lo bira mundial. Netflix a indiká na kabamentu di 2022 ku e tabata pèrdè basta sèn na usuarionan agregá ku no tabata pagando pa e servisio. Kada account èkstra ta bai kosta 8 dòler èkstra pa luna.
Despues di e anunsio Netflix a mira e kantidat di usuarionan fiho baha drástikamente, pero despues esaki a rekuperá un poko atrobe. Ta kuestion di tempu pues ku wak Netflix lo no ta grátis mas…
Na Nova Zelandia a para un kompetensha di yagmentu riba pushi ku ta biba den naturalesa. Asina BBC News ta informá. E kompetensha ta forma parti di un evento anual den e region Canterbury. Eynan un grupo grandi di mucha i adulto ta partisipá na un kompetensha di yagmentu riba porko, biná i konènchi.
Nova Zelandia tin un populashon enorme di pushi ku ta biba den mondi ku ta yag riba para indígeno i paranan ku ta bula pasa riba e pais. Pushi no ta un animal indígeno. Pa kombatí e problema e organisashon di e evento kier a laga mucha yag tambe riba e pushinan pa un rekompensa di 250 dòler Nova Zelandes.
Despues di e anunsio e organisashon a haña hopi krítika di amantenan di animal, entre e mensahenan tambe vários menasa. Tambe tin hopi hende ku ta sostené e plan original pa pèrmití yagmentu riba e bestianan relashoná ku e daño ku nan ta kousa.
Polis na Merka a detené dos hóben di 16 i 17 aña relashoná ku un kaso mas di tiroteo na Alabama den wikènt tras di lomba. E hóbennan lo a bai un selebrashon di un fiesta di sweet sixteen na Alabama i kuminsá tira riba hende. Por lo ménos 4 otro hóben entre 17 i 23 aña a pèrdè nan bida i mas di 30 persona a keda heridá.
E tiroteo a tuma lugá na un skol di baile na e sitio Dadeville, un lugá ku mas o ménos 3200 habitante den parti sùit di Alabama. No ta konosí ainda kiko a motivá e sospechosonan, ku manera a resultá, no ta biba na e sitio di e krímen. Segun ministerio públiko lo huzga e sospechosonan manera adulto.
E skelèt di un tyrannosaurus rex (T. Rex) bendé pa 5 mion euro na un findishi probablemente lo disparsé den un kolekshon privá. E 5 mion euro ta ménos si ku e 8 mion ku a konta inisialmente ku n’e. Tantu e bendedó komo e kumpradó a keda anónimo.
Ta trata di un skelèt di kasi 4 meter di altura i ku un largura di mas o ménos 11.5 meter. E rekonstrukshon di e animal yama Trinity, esta Trinidat. E ta konsistí di wesu di tres animal separá hañá na Montana i Wyoming den 2008 i 2013. Segun kálkulonan e restunan tin mas o ménos 67 mion aña. Por sierto ku mas o ménos mitar di e konstrukshon ta konsistí di wesu falsu.
Ta un desaroyo un poko preokupante ku dia pa dia mas i mas skelèt di dinosourio ta kabando den kolekshon privá. Ta asina den òktober 2020 un otro T. rex a kaba den un kolekshon privá pa 32 mion dòler. Aña pasá yüli un Gorgosourio a kaba den un otro kolekshon privá pa 6.1 mion dòler.
Sientífikonan no ta masha kontentu ku e desaroyo aki. Si hende sigui skonde e rekonstrukshonnan aki pa públiko den kolekshonnan privá, esaki por afektá e aspekto edukativo di e skelètnan aki. No ta èksistí hop skelèt original. Rònt mundu a haña apénas 30 skelèt di T. rex. di kua tur den Nort Amérika.
E plataforma online pa video YouTube a hasi su maneho pa ku kontenido ku ta inkluí problemanan di komementu mas skèrpi. E tipo di kontenido aki por resultá den komportashon di copy-cat i pa e motibu ey e plataforma ta bai kita nan aktivamente.
Asina no ta pèrmití video mas kaminda hende ta vomitá deliberadamente pa no subi di peso. YouTube tabatin su reglanan kaba pa ku e fenómeno aki, pero awor ta bai pues un paso mas leu.
Entre otro ta bai inkluí un kòntròl di edat pa videonan por ehèmpel di hende ku a rekuperá di un malesa di komementu i lo kontrolá bon tambe si esakinan no ta inkluí e tepnan ku promotornan sa duna nan oudiensia.
Entretantu tin inisiativanan a lanta tambe pa buta un lus riba e otro ekstremo: videonan ku ta promové komementu dimas.
Kuerponan polisial di vários pais den Sentro- i Suramérika a hasi sigur 14260 detenshon durante un akshon masivo riba e dos kontinentenan. Ta trata di e akshon mas grandi den historia di Interpol pa saka armanan di kandela for di sirkulashon.
Esnan detené ta partikularmente miembronan di mas di 20 organisashon kriminal. Na total a konfiská 8200 arma di kandela di akuerdo ku Interpol. Tambe a konfiska droga ku un balor total di kaya di 5700 mion dòler.
E operashon a tuma lugá bou di e nòmber di kódigo ‘Trigger IX’. Na total 15 pais a kolaborá den e akshon aki. E akshon a lanta hopi skandal tambe den publisidat dor di kasonan di korupshon, froude, trafikashon di persona i kontrabanda ku a bin dilanti, mustrando asina kon sierto laso ku mundu kriminal ta tuma lugá.
Resientemente varios organisashon lokal ku ta envolví den e mundu di ekonómiko digital, manera ICT, Ekipo Elektróniko, e-Commerce, Medio sosial, Inteligensha artifisial, Cloud Computing i Seguridad Sibernétiko a lansa Digital Hub Americas [DHA], un plataforma pa promové atkisishon di servisio digital for di Kòrsou. E servisionan akí ta inkluí entre otro produkshon di sistema di pago elektróniko, protekshon di dato personal, protekshon kontra di atake sibernétiko i almasenage di dato i mas servisio relatá na sentro di dato.
Inisiadornan di e proyekto, Bureau Telecommunicatie en Post, Blue NAP Americas, CINEX, KVK, CIFC, IPE, FINTECH i SIMIA komo miembronan fundadó ta rekonosé potensial di kompanianan lokal. Ademas, e infrastruktura legal, infrastruktura di komunikashon elektróniko, sektor laboral, e edukashon i Kòrsou su posishon geográfiko sentral ku tiki okurensha di desaster natural ta hasi Kòrsou atraktivo pa kompanianan internashonal hasi uso di e servisionan.
DHA t’ei pa promové e pilar di ekonomia digital i yuda kompania lokal eksportá nan servisio òf produkto pa sobrá di mundu. E sektor digital ta brinda oportunidat pa krea empleo den un industria ku demanda haltu i asina trese nos hendenan ku ta biba i traha pafó di Kòrsou bèk, i tambe hende di otro nashonalidat ku lo aportá konosementu i kontrubuí na nos ekonomia.
Lo lansa e plataforma internashonalmente na e próksimo konferensha di CANTO na Miami na Yüli awor. Na e konferensha lo tin representante regional di entre otro operador di kompania di komunikashon elektróniko, kompania ku ta bende ekipo, eksperto riba e tereno industrial, sentro di dato, i tambe minister i hefe di gobernashon di diferente pais den nos region. Si mira e lista di partisipante e konferensia lo ta un plataforma perfekto ku oudiensia potensial kaminda nos kompanianan por showcase solushon, inovashon, teknologia i proyekto nobo.
E konferensia di CANTO ta tuma lugá na Miami di 16 te 19 di Yüli. Komo parti di DHA lo bo risibí preis atraktivo, akseso na tur evento di Canto i asistensha pa kontakto ku kliente potensial. Si bo kompania ta interesá pa djòin e delegashon di DHA, tuma kontakto ku DHA na info@digitalhubamericas.com pa mas informashon. Mas informashon ta disponibel tambe riba www.digitalhubamericas.com i e páginanan sosial di Digital Hub Americas.
Un proseso di ekstinshon 260 mion aña pasá no ta konsistí di un desaster masivo, sino dos. Sientífikonan a deskubrí ku tin un periodo di sigur 3 mion aña entre e dos insidentenan. Ta trata di e transishon entre e épokanan perm i trias. Ta un periodo karakterisá pa vários erupshon volkániko masivo.
E proseso di ekstinshon mas konosí a tuma lugá 252 mion aña pasá ora ku kasi 90% di bida bou di awa i 70% di bida riba tera a disparsé. Den e époka ey ainda tabatin dinosourio di e tipo Titanophoneus ku ainda tabata alkansá un altura di 3 meter.
E sientífikonan a yega na nan konklushonnan a base di muestranan haña pegá ku e kosta sùit di China. For di e muestranan a resultá ku tabatin dos momentu ku no tabatin oksígeno bou di awa di laman, respektivamente 259 i 262 mion aña pasá.
E sientífikonan ta investigando si e kambio di klima aktual ta komparabel ku e kambionan ku nan a registrá. Na e momentu aki tambe óksigeno den laman ta bahando. E resultadonan di e estudio ta publiká riba e website sientífiko Phys.org.
Den wikènt vários pais Oropeo a implementá un prohibishon riba importashon di produktonan agríkola for di Ukrania. E medidanan di e paisnan lo kana te ku fin di yüni. Un paso ku Komishon Oropeo a kondená enfátikamente.
Despues di e invashon di Rusia na Ukrania algun haf den Mar Pretu ta blòkiá, loke a limitá eksportashon di alimento for di Ukrania. Komishon Oropeo a traha un plan den mei aña pasá pa laga e importashonnan for di Ukrania tuma lugá via paisnan bisiña manera Polonia i Hungria, pa despues sigui transportá esakinan pa Áfrika i Medio Oriente.
No tabata e intenshon pa e alimento aki keda Oropa i kompetí riba merkado Oropeo na preis redusí. Pero den último simannan esaki tabata pasa tòg. Esaki a lanta iritashon bou di 5 pais bisiña di Ukrania ku ta miembro di Union Oropeo, resultando den protestanan masivo di agrikultornan Oropeo. Finalmente Polonia i Hungria a tuma e paso pa prohibí importashonnan for di Ukrania. Slovakia a tuma un paso komparabel djaluna.
Rovio Entertainment, e kompania Finlandes tras di e video game popular Angry Birds, ta bira propiedat di e konosido distribuidor di video games SEGA. E kompania ta dispuesto na paga un poko mas di 750 mion dòler pa e take-over. Den wikènt kaba e korant The Wall Street Journal a publiká ku tabatin un deal na kaminda.
E gerensha di Rovio a konsehá su akshonistanan pa aseptá e ofèrta di SEGA. SEGA ta partikularmente konosí pa e personahe Sonic the Hedgehog, ku kasi semper ta fungi komo nan maskota meskos ku Mario Bros pa Nintendo. Motibu prinsipal pa kumpra Rovio ta pa SEGA haña un posishon riba e merkado di mobile video games.
Rovio ta un distribuidor konosí bou di mobile gamers i a alkansá un balor di merkado di kasi mil mion dòler den 2017 ora el a subi merkado di bolsa. E video game Angry Birds a sali den 2009 riba App Store di Apple i despues Google Play Store. Ta e promé video game den historia ku a alkansá mas di mil mion downloads.
As of this upcoming summer, Curaçao will be enjoying direct flights between the island and Brazil executed by Azul Linhas Aéreas. It’s therefore with great pleasure that CCR Aeroportos, the main shareholder of Curaçao Airport Partners, announces the official start of a promotional campaign for Curaçao around airports in Brazil.
As shared last year by Curaçao Airport Partners’ new Chairman of the Board, Mr. Fábio Russo Corrêa, who’s also the CEO of CCR Aeroportos, their plan as a board is to become much more involved with CAP and contribute increasingly more to the Curaçao airport and the community of Curaçao. With this achievement, they are showing their commitment to great achievements to the benefit of the island’s tourism and overall development.
“The search for international trips among Brazilians grows annually. With this campaign, CCR Aeroportos aims to increase the number of visitors from the country to Curaçao, bringing more business and raising the island’s position among the most desired destinations in the Americas.” indicated Mônica Lamas, Commercial Director in CCR Aeroportos.
This marketing campaign has started at four of Brazil’s largest airports as well as at subway station and train stations: Congonhas International Airport (São Paulo), Santos Dumont International Airport (Rio de Janeiro), Confins International Airport (Belo Horizonte), Santa Genoveva Airport (Goiânia), São Paulo Metro (Subway) and Rio VLT (Light Rail).
Vitor Silva, general manager of Planning and Strategy at Azul shared: “We are excited and ready to start operating this new international route. Curaçao is a fantastic destination, with several paradisiacal beaches, breathtaking walks, and very welcoming people. With the new flight from Confins, the options will become much more comfortable to Customers who wish to spend a vacation in the Caribbean, and those from São Paulo, Rio de Janeiro, Goiânia, Brasília and Vitória will connections of a maximum of 1h30 at the Minas Gerais terminal. This is possible, because Azul has a capillary air network that connects Customers from various airports.”
CEO of CAP, Mr. Jonny Andersen indicated: “We are looking forward to the great possibilities this new destination will bring for the development of our airport. A new market brings along growth and also a great opportunity to learn more from another country, the culture, its people and their expectations. This is what we’ve been working hard for; developing our airport and ensuring it serves as a catalyst for the economy of the island”.
Riba 1 di aprel último Urban Adapters i Cruyff Foundation a sera un koperashon. Meta di e koperashon ta pa konhuntamente rekoudá fondonan pa e ‘Caribbean Cruyff Sportfonds’.
Cruyff Foundation ta aktivo for di aña 2005 na Aruba, Boneiru, Kòrsou, Saba, Sint Eustatius i Sint Maarten, kaminda tin Cruyff-courts ku ta fungi komo hèrmènt pa aktivá muchanan pa hasi deporte. Tur Cruyff-courts ta establesé komo terenonan seif di enkuentro pa muchanan i hóbenan hasi deporte i hunga. Riba tereno di deporte i wega tin hopi mas trayekto pa desaroyá, i p’esei a lanta e fondo aki.
Na Kòrsou tin aktualmente dos Cruyff-courts, den barionan Mon Repos i Zapateer. E siguiente stap den trabou di Cruyff Foundation na Kòrsou ta konstruí un kancha ku e nòmber di e defensor di Ajax i di desendensia lokal Jurriën Timber. E hungadó di futbòl talentoso aki ta hopi embolbé ku su famia den e proyekto akí i nan ta hopi entusiasmá di por ta den e posishon pa por duna bèk na komunidat.
Cruyff Foundation ta komprometé pa sostené e desaroyo global di proyektonan impaktante di deporte i wega, ku enfoke riba aktividatnan di deporte pa muchanan i hóbenan pa ken deporte no ta opvio.
E meta di Urban Adapters, komo Plataforma di implementashon di projektonan pa Dutch Caribbean Resilient Societies Foundation (DCRSF), ta kore riba mesun liña ku vishon i projektonan di Cruyff Foundation, i p’esei ambos partido ta sumamente eagradesido ku e kolaborashon kual a sera. Loke ta trata DCRSF, su meta ta pa stimulá i fomentá resiliensia den e komunidat di e paisnan Karibense den reino Hulandes i Sürnam, riba area físiko i sosial-ekonomiko. Deporte i transferensia di konosementu ta di gran importansia pa sostene e komunidatnan aki.
Ámbos fundashon ta hasi un yamada na organisashonnan privá i públiko, pero tambe individuonan ku ke duna un sostén finansiero na e Caribbean Cruyff Sportfonds. Tur aporte finansiero ta bon biní. Por tuma kontakto libremente via jcf@urbanadapters.com pa sigui ku e proseso.
Riba potrèt di man robes pa man drechi: Cherryll Prins-Parisius – manager fundraising Johan Cruyff Foundation, Raymond Jamanika – presidente Dutch Caribbean Resilient Societies Foundation, Ellen Jamanika-Van Hoegee – sekretario i tesorero Dutch Caribbean Resilient Societies Foundation.
Tin algun kambio importante na kaminda pa usuarionan di WhatsApp. E app ta bai haña un opshon di siguridat mas fleksibel i e look pa Android ta bai kambia.
Finger Scan pa mensahe individual
Pronto usuarionan di WhatsApp por sigurá sierto kòmbersashon ku un fingerscan. E funshon nobo a sali riba algun vershon preliminar di e app pa Android di akuerdo ku WABetaInfo. Bo por sigurá sierto chat pues dor di tek riba e respektivo kontakto i usa e opshon pa lòk e kòmbersashon. E kòmbersashon ta pasa pa un pantaya separá for di otro kòmbersashonnan.
WhatsApp tabatin un protekshon general kaba ku password, finger print i face scan. E funshon ta hasi su trabou bon, pero e ta nifiká si ku kada bes ku habri WhatsApp, mester hasi e kòntròl di nobo. E opshon nobo pues ta limitá e èkstra molèster ey na e kòmbersashonnan kaminda e ta nesesario. Te asina leu e redakshon di WABetaInfo no a deskubrí nada pa iPhone, pero esei ta kuestion di tempu.
Kòrda por sierto ku for di promé di yanüari di e aña aki WhatsApp NO ta funshoná mas òf a bira instabil riba sierto modèl di smartphone. Pa un lista di e modèlnan bishitá e artíkulo aki.
WhatsApp riba Android ta haña mesun “look” ku iPhone
E vershon Android di WhatsApp ta bai haña un interface nobo basá riba esun di iPhone. E diseño nobo no ta ofisial ainda, pero riba algun vershon beta e redakshon di WABetaInfo a logra spòt algun vershon preliminar.
Lo ta trata di un vershon kaminda mester eliminá algun asina yamá bugs pa despues por lans’é pa usuarionan di Android. Manera ta konosí WhatsApp tin un look diferente riba Android i iPhone.
E nabegashon riba Android lo bai awor via un balki parti abou den pantaya di bo aparato. E pantayanan ta bai bira idéntiko pues, ounke a nota tambe ku e símbolo di ahuste, e asina yamá “Settings”, riba Android a keda igual.
Microsoft i Snapchat a introdusí un funshon nobo den Microsoft Teams. Usuarionan por usa efektonan visual awor durante nan meetings online. Asina tin filter opshonal a base di augmented reality, esta imágen èkstra agregá na e grabashon original.
Na total a agregá 26 filter di Snapchat na Microsoft Teams. No ta promé biaha ku e kompanianan ta kolaborá ku otro. Anteriormente Microsoft i Snapchat a uni forsa den e plataforma di enseñansa Flip, ku tambe ta bin ekipá ku filter opshonal di Snapchat.
Tin filter tambe ku ta, laga nos bisa, hasi hende mas yòn. E filternan ta disponibel den e vershon premium di Microsoft Teams, pues e ta disponibel kaba pa kompanianan. Pa skol i uso personal nan no ta disponibel ainda.
Resientemente varios organisashon lokal ku ta envolví den e mundu di ekonómiko digital, manera ICT, Ekipo Elektróniko, e-Commerce, Medio sosial, Inteligensha artifisial, Cloud Computing i Seguridad Sibernétiko a lansa Digital Hub Americas [DHA], un plataforma pa promové atkisishon di servisio digital for di Kòrsou. E servisionan akí ta inkluí entre otro produkshon di sistema di pago elektróniko, protekshon di dato personal, protekshon kontra di atake sibernétiko i almasenage di dato i mas servisio relatá na sentro di dato.
