by Webmaster | 23/02/2023 | IT, Apps & Social Media
Komishon Oropeo a prohibí e app TikTok riba tur aparato di komunikashon di su trahadónan. Asina e website Politico a publiká djaweps. E medida lo ta implementá relashoná ku un preokupashon pa ku spionage di China. Ku e paso aki Komishon Oropeo ta sigui ehèmpel di Merka kaminda tambe a prohibí e app TikTok riba aparatonan di gobièrnu.
Pa algun tempu kaba ta reina preokupashon serka vários servisio di inteligensha ku TikTok lo ta usá pa sigui i skucha funshonarionan polítiko. Tur funshonario di Komishon Oropeo entretantu a risibí instrukshon pa kita e app for di nan telefòn di trabou òf kualke otro telefòn ku ta usá pa trabou. Probablemente otro instanshanan manera Konseho i Parlamentu Oropeo lo sigui ku un prohibishon di akuerdo ku Politico.
by Webmaster | 22/02/2023 | Internashonal
Gobièrnu Hulandes mester stòp di warda datonan di pasaheronan di avion masalmente. Asina e Autoriteit Persoonsgegevens (AP) a publiká. E forma ku e ministerio di Hustisia Hulandes ta hasi esaki aktualmente ta un violashon serio di privasidat. E datonan aki ta wardá den un database pa 5 aña i esaki no ta pèrmití di akuerdo ku e outoridat.
Gobièrnu lo ta warda aparte di nòmber otro dato manera maleta, forma di pago i kiko bo a kome na bordo di e avion. Gobièrnu lo ta warda e datonan aki pa por sigui movementu di kriminal i terorista, pero e mayor parti di e datonan aki ta di hende ku no ta embolbí den nada ilísito. Segun e outoridat e datonan aki no ta relevante pa gobièrnu i pa e motibu ei mester limitá e rekohementu di informashon na esnan ku ta sospechá di algu na promé lugá.
by Webmaster | 22/02/2023 | Internashonal
Un tenshon kresiente a lanta entre e ehérsito mersenario Wagner Group i Rusia. Rusia tin sosten di e mersenarionan pa algun luna kaba den e parti ost di Ukrania. Segun e komandante di e ehérsito mersenario Rusia lo ta sabotiando su tropanan.
Rusia lo a keda sin suministrá munishon resultando den hopi pèrdida bou di e tropanan di Wagner Group. Awe e komandante a publiká un potrèt ku un kantidat grandi di mersenario ku a pèrdè nan bida kompañá pa un mensahe ku Rusia lo ta destruyendo e ehérsito dor di deliberadamente keda sin suministrá arma, munishon i otro material.
Rusia ta desmentí e ponensianan di e ehérsito mersenario. Segun e ministerio di defensa di Rusia lo ta trata di un intento pa krea divishon na benefisio di enemigu. E relashon entre Rusia lo a daña despues ku a prohibí e grupo di kontratá sòldat Ruso.
Ofisialmente no tin un relashon entre e grupo i Rusia, pero na vários okashon Wagner a operá na fabor di e pais.
by Webmaster | 22/02/2023 | Teknologia
E promé iPhone ku a sali fábrika den historia a bai pa 63.356 dòler na un findishi Merikano. E maestronan di findishi tabata antisipá ku e promé muestra aki, ku por sierto nunka a wòrdu usá for di 2007, lo a bai pa mas o ménos 50.000 dòler.
Ta trata di e iPhone original di 8 gigabyte ku tabata bal 599 dòler na su lansamentu. E smartphone ta den su pakete original, pues por papia di un asina yamá collectible pa kua hende ta dispuesto na paga hopi sèn.
E promé iPhone a sali den yanüari 2007 i a keda introdusí personalmente pa fundadó di Apple Steve Jobs. For di yüni 2007 e tabata disponibel pa konsumidornan. E aparato tabata un berdadero revolushon dor di e touchscreen ku ta kubri hinter e aparato. E smartphones di BlackBerry, Motorola i Palm tabatin un teklado físiko ainda òf tabata rekerí un stylus.
Direktor di Microsoft Steve Ballmer a hasi bofon di e aparato na e okashon ei, pero no a premirá e revolushon ku iPhone a lanta despues di su lansamentu. Tantu e otro markanan menshoná komo otronan ku a subi e merkado di smartphone despues a adoptá e diseño di e promé iPhone.
by Webmaster | 21/02/2023 | IT, Apps & Social Media
Un wes na Merka tin ku bai disidí si e plataforma YouTube ta responsabel pa videonan ku usuarionan ta publiká. Ta trata di un kaso basta serio ku konsekuensha serio tambe pa futuro di internet.
Hopi plataforma manera YouTube, Reddit, Facebook i Twitter ta protegé dor di un lei. Sekshon 230 di e lei aki ta stipulá ku no por trata usuarionan òf provedornan di un servisio digital interaktivo komo distribuidor di informashon. Segun e interpretashon aktual di e lei plataformanan online no ta responsabel pues pa potrèt, video òf mensahe ku usuarionan ta kompartí, pero e demandantenan den e kaso aki ta èksigí un interpretashon nobo di e lei.
E kaso ta entamá pa un famia di un dama Merikano ku a pèrdè su bida durante e atentadonan terorista na Paris den 2015. Segun e famia YouTube lo ta responsabel. Segun e famia YouTube lo a kontribuí na e konosementu ku e teroristanan a atkirí pa kometé e atentadonan.
Si wes bai di akuerdo ku e demanda aki e konsekuenshanan ta serio. E lo nifiká ku otro plataformanan manera Google, Wikipedia i retnan sosial tambe mester para responsabel. Konsekuentemente e plataformanan mester kontrolá tur kontenido di usuarionan. Opviamente ta bira difísil pa hende ku mal intenshon publiká sierto kontenido. Pero e ta nifiká mesora tambe un violashon di libertat di ekspreshon di usuarionan si mester bai kontrolá tur kontenido riba internet.
by Webmaster | 21/02/2023 | Internashonal
Un temblor nobo i vários aftershock a tuma lugá djaluna den parti sùit di Turkia den e provinsia Hatay. Ta trata di dos sismo, un di 6.4 i un otro di 5.8 riba e skala di Richter.
E insidente ta sigui e dos temblornan di dia 6 di febrüari, pero tabata ménos fuerte. E temblornan di 6 di febrüari tabatin un forsa di respektivamente 7.8 i 7.5. Sifranan definitivo no ta konosí pero ta kalkulá ku ta trata di algun desena di morto i un kantidat mas grandi ainda di persona heridá.
E tragedia no por a tuma lugá na un pió momentu. Hopi hende ya a pèrdè nan hogar i e trabounan di reparashon andando mester a para, ya ku hopi servisio manera koriente i suministro di awa a kai afó atrobe.
by Webmaster | 21/02/2023 | IT, Apps & Social Media
Meta, e kompania propietario di Facebook i Instagram, kier introdusí abono pagá ku usuarionan por usa pa verifiká nan account. E kompania ta sigui e ehèmpel di Twitter ku resien a introdusí abono pagá. E accountnan pagá tin ku bai kosta 11,99 dòler. Via iOS, esta Apple, e abono lo ta 2 dòler mas karo. E kompania ta mek en partikular riba kreadornan di kontenido. Otro siman e promé tèstnan ta bai tuma lugá na Oustralia i Nova Zelandia.
Retnan sosial ta dependé pa gran parti di anunsio komersial, pero e entradanan a baha konsiderablemente den 2022. Konsekuentemente nan ta buskando formanan nobo pa generá entrada. E pregunta ta keda solamente si usuarionan ta bai hasi uso masalmente di e accountnan pagá aki, pasó te ku aworakí no tabatin mester di paga.
by Webmaster | 17/02/2023 | Internashonal
Na e siudat Merikano Chicago a pidi 25 aña mas kontra R. Kelly. E kastigu ei tin ku bin riba e 30 aña ku e kantante tin ku sinta na New York. Aña pasá un hurado a hañ’é kulpabel di vários akto di inmoralidat, entre nan produkshon di material pornográfiko ku ta inkluí menor di edat.
Segun e fiskal R. Kelly ketu bai ta forma un peliger pa sosiedat. R. Kelly ta será for di 2019 i ta sintando un kastigu pues di 30 aña na New York. Sentensia ta sigui djaweps próksimo.
by Webmaster | 17/02/2023 | Cinema News
Aktor Bruce Willis a kaba di haña un diagnóstiko mas spesífiko relashoná ku su salú. Despues ku aña pasá a bira konosí ku e ta sufri di afasia, un malesa ku ta afektá komunikashon i a para su karera komo aktor, resien e aktor a tende ku e ta sufri di un forma di demensia: demensia frontotemporal pa ta mas eksakto. Asina su famia a konfirmá den publisidat Merikano.
Lamentablemente no ta èksistí un kura p’e malesa aki i ademas e ta lanta kabes na edat relativamente yòn. E forma di demensia aki ta afektá memoria den un stadium mas lat.
by Webmaster | 17/02/2023 | Business & Economy
E balor di kambio di bitcoin a temporalmente surpasá 25 mil dòler djaweps anochi, e balor di kambio mas haltu den 8 luna. For di yanüari e moneda virtual a mira su balor subi ku 50%. Esaki relashoná ku pronóstikonan positivo pa ekonomia. 25 mil naturalmente no ta komparabel ku e nivel rèkòrt di 68.992 dollar den novèmber 2021, pero invershonistanan ta positivo ku e pió temporada ya ta tras di lomba.
E sektor a pasa den un temporada difísil despues di kaida di e bolsa pa kriptomoneda FTX. For di e tempu ei instanshanan di supervishon ta vigilá e sektor mas intensivamente i tin algun kompania bou di investigashon. Despues di a pik riba 25 mil dòler e balor di kambio pa bitcoin a baha bèk te 23.700 dòler.
by Webmaster | 16/02/2023 | Internashonal
Segun un kálkulo nobo Hapon no ta konsistí di kasi 7 mil sino mas di 14 mil isla. E pais a usa un teknologia digital nobo ku a lokalisá mas di 7 mil isla nobo. Na total Hapon ta konsistí awor di 14.125 isla.
Te ku aworakí no tabata fásil hasi un kálkulo eksakto, pasobra e zona kompleto ta konsistí di 370 mil kilometer kuadrá. Ademas tabatin formashon i desaparishon di algun isla dor di aktividat volkániko.
E diferensha grandi entre e kantidat ku tabata asumí promé ta debí na e echo ku e wardakosta Hapones a usa mapa di papel pa konta e islanan. Durante e konteo ei den 1987 a disidí ku solamente e pidanan riba awa ku un sirkunferensha (omtrek) di 100 meter òf mas ta konta komo isla, resultando pues den un total ofisial pero inkorekto di 6.852 isla.
Pa e konteo nobo a usa un sistema digitalisá kombiná ku potrèt di ariba. E kantidat mas haltu di isla por sierto no ta nifiká ku e pais a amplia su teritorio marítimo. E kantidat mas haltu ta registrá den e teritorio ya establesé.
by Webmaster | 16/02/2023 | Cinema News
E konosido aktris Merikano Raquel Welch a fayesé djarason na 82 aña di edat. Asina e revista di entertainment TMZ a informá a base di un famia di e aktris. Raquel Welch ta entre otro konosí pa su ròl den e pelíkula klásiko The Three Musketeers di 1973 pa kua el a risibí un Golden Globe. E aktris tabata partikularmente popular pa su sex appeal dor di otro pelíkulanan manera One Million Years B.C. Welch a fayesé despues di tabata kebrante di salú pa algun dia.
by Webmaster | 16/02/2023 | Teknologia
E kompania Apple a bolbe posponé lansamentu di su brel pa Virtual i Augmented Reality. Asina agensia di prensa Bloomberg ta informá. E lansamentu tabata planiá pa mart próksimo, pero esaki ta planiá awor pa yüni. Segun Bloomberg Apple lo ta wardando pa hasi esaki durante e siguiente World Wide Developers Conference (WWDC). Esei ta un kongreso ku Apple mes ta organisá tur aña den mei òf yüni. Lo no ta promé biaha en todo kaso ku e kompania ta lansa un produkto nobo durante e konferensha ei.
E brel pa Virtual i Augmented Reality ta antisipá for di 2017. Den kaso di Virtual Reality e usuario ta sinti’é den un ambiente virtual. Ku augmented reality e brel ta agregá imágen na realidat. Esnan ku ta interesá mester kuminsá spar for di awor. E brel probablemente ta bai kosta alrededor di 3 mil dòler.
by Webmaster | 15/02/2023 | Lifestyle & Art
Plein Air – Di 23 di febrüari te 4 di mart nos bunita kapital Willemstad lo ta senario di arte den airu liber. Bin enjoy abo tambe!
by Webmaster | 15/02/2023 | Internashonal
Un kompania fantasma na Israèl lo ta tras di vários kampaña di desinformashon i manipulashon di elekshon. Asina un team di mas di 100 periodista for di vários pais a konkluí despues di un investigashon grandi guiá pa entre otro e korant Britániko The Guardian i e emisora públiko di Alemania ZDF.
Tres periodista, di kua 2 Israelí i un Franses, a bai undercover na e kompania ku por sierto no ta registrá niun kaminda. Nan a fingi di ta traha pa un komersiante ku supuestamente kier a manipulá un elekshon na Áfrika.
E doño di e kompania Tal Hanan (potrèt) a bisa nan ku di 33 intento, 27 kampaña tabatin éksito. E investigadónan no a logra konfirmá si esaki berdaderamente ta asina, pero en todo kaso si a logra konfirmá ku e kompania aki tabatin influensha riba elekshon presidensial na Nigeria den 2015 kaminda e ya konosido kompania Merikano Cambridge Analytica tambe tabata embolbé.
E kompania tin un software ku por krea te 33 mil profil falsu riba social media pa manda mensahenan negativo dirigí na sierto grupo riba Twitter, LinkedIn, Facebook, Telegram i Instagram.
E identidat di esnan ku a hasi uso di e servisionan di e kompania fantasma aki no ta konosí, pero si por dedusí ku ta trata di hende ku influensha den kompania, partidonan polítiko i servisionan di inteligensha. E doño Tal Hanan en todo kaso a bisa e periodistanan ku e no ta haña ku e ta hasi algu robes.
