E kompania di produkshon Disney a kambia su planning di lansamentu pa próksimo añanan drástikamente. Konsekuentemente fanátikonan lo mester warda algun aña pa wak e próksimo pelíkula di e saga di Avatar. E di tres parti di e saga tabata planiá pa desèmber próksimo aña pero esaki ta posponé awor te desèmber 2025 di akuerdo ku The Hollywood Reporter.
E lansamentu di e di 4 i 5 partinan ta planiá awor pa 2029 i 2031. I esei miéntras ku e promé dos partinan di Avatar a generá 2.9 mil mion i 2.3 mil mion dòler respektivamente, butando nan den e tòp 3 pelíkulanan mas mirá den teater den historia.
Un motibu spesífiko Disney no a duna, pero si por a nota ku a inkluí vários título nobo di Star Wars te ku e lansamentu di e próksimo Avatar. E 2 próksimo pelíkulanan di Avengers ku tabata planiá pa 2025 i 2026, tambe ta posponé ku un aña.
Pronto ta bai lansa un kansion nobo di e konosido banda Ingles The Beatles. Ta trata aki di un kansion finalisá usando inteligensha artifisial. Ku e teknologia aki a isolá e vokalnan di e miembro defuntu John Lennon pa finalisá e kansion. Asina Paul McCartney mes a bisa na e programa di radio na BBC 4 Today.
E lansamentu lo tuma lugá e aña aki mes. McCartney no a duna masha detaye, pero por ta trata aki di ‘Now And Then’ di 1978. E kansion ta sirkulá riba internet pero ta trata di un demo di hopi mal kalidat. John Lennon, kende a fayesé dos aña despues no tabatin oportunidat pa kaba e grabashon.
E grabashon original no ta inkluí kuplèt por ehèmpel i ta di kalidat malu, pero ku teknologia moderno a logra isolá e vokalnan di John Lennon i su piano ku tabatin riba e demo pa kaba di finalisá esaki. Despues den studio a kaba di mix i agregá sobrá partinan. Dje tantu ey si por a saka for di e palabranan di Paul McCartney.
Famia di Bella Montoya na Ecuador a pasa dor di un spantu ora a resultá ku nan ser kerí ku tabata deklará morto a resultá di ta na bida. E famia ya tabata preparando pa entiero di e señora. Anteriormente tabata asumí ku el a fayesé di un atake di kurason, pero durante despedida su famia a ripará ku e tabata hala rosea ainda.
E dama a keda trasladá pa intensive care di e hospital mas serka. Señora Montoya ya tabatin un par di ora den su kaha ora ku e famia a tende sonido sali for di e kaha.
Segun e dokumentonan kaminda a deklará Montoya morto e no tabata reakshoná mas despues ku a purba rewanim’é. Su kurason i rosea a para segun e dòkter ku a konstatá su morto. E grabashon di e insidente a bira viral riba retnan sosial.
E kiebro di dam na e riu Dnipro na Ukrania ta bai tin konsekuensha serio pa siguridat di alimento. Esaki di akuerdo ku Nashonnan Uní. Motibu pa e pronóstiko aki ta e echo ku e awa ku ta skapa awor a move den direkshon di regionnan kaminda agrikultura di trigo ta tuma lugá. E awa ta bai okashoná inundashon den e regionnan aki, loke ta bai tin konsekuenshanan direkto pa preis di alimento.
Aparte di esey e agreshonnan di último tempu ta limitá akseso di agrikultor na nan propio tereno dor di e tiramentu entre militarnan lokal i tropanan di Rusia. Aparte di esey nan ta konfrontá ku mina antipersonal riba e kamindanan ku nan ta trafiká. Aparte di e konsekuenshanan pa agrikultura e kiebro di dam a resultá den un falta di awa pa bebe tambe pa sigur 700 mil persona.
Te ainda e kousa eksakto pa e kiebro di dam no ta konosí. Tantu Rusia komo Ukrania ta kulpa otro di e desaster. Segun kálkulonan di e instituto di seismologia na Norwega i satélitenan e kiebro definitivamente ta okashoná pa un eksploshon. Te asina leu tin 13 morto sivil raportá.
E konosido multibionario, superinvershonista i filántropo di 92 aña George Soros ta bai pasa su imperio pa su yu Alex di 37 aña. Su yu ta meresé pa manehá e fortuna. Asina e invershonista di orígen Húngaro a bisa e korant The Wall Street Journal.
Di momentu tin un kapital di 25 mil mion dòler den Soros Fund Management. Soros a akumulá basta sèn den añanan 90 atraves di invershonnan inteligente pa su Open Society Foundation. E organisashon ey ta dediká na sosten pa demokrasianan den paisnan kaminda demokrasia ta kore peliger.
Soros a muda pa Merka despues di e di dos Guera Mundial kaminda el a gana un fortuna danki na su talento pa invertí den proyektonan ku potensial. Den 1992 el a bira mundialmente konosí despues di a gana mil mion dòler ku spekulashon riba Pound Sterling.
E mama di e 4 muchanan ku tabata pèrdí den jungle na Colombia lo a biba 4 dia mas despues di e aksidente. Asina e tata di e muchanan Manuel Ranoque a deklará despues di a kòmbersá ku e yu mayó di 13 aña na hospital. Outoridatnan no a reakshoná ekstensivamente riba òf konfirmá e deklarashon di e tata.
E muchanan ta kedando na un hospital militar na Bogotá kaminda nan lo permanesé den próksimo 2 siman. Manera ta konosí ehérsito di Colombia a bin haña Lesly (13 aña), Soleiny (9 aña), Tien Noriel (4 aña) i Cristin (ku a kumpli entretantu 1 aña durante e 40 dianan ku nan tabata pèrdí. E muchanan tabata pèrdí despues ku e avion ku tabata transportá nan i nan mama a kai riba 1 mei. 2 siman despues a haña e avion i e kurpanan di tres adulto, inkluyendo e mama di e muchanan.
Despues di un búskeda organisá pa militarnan i habitantenan indígeno por fin a bin haña e muchanan 5 kilometer mas leu den un parti habrí ku ménos vegetashon mei mei di e jungle. Durante e 40 dianan ehérsito tabata bula riba e ária ku un spiker ku un mensahe di e wela di e muchanan ku un yamada pa keda un kaminda. Tambe ehérsito a dròp vários pakete di alimento sperando ku e muchanan lo a haña esakinan.
Segun informenan preliminar e echo ku e muchanan a krese den i pues konosé e área a yuda nan sobrebibí ku yuka, fruta i simia. Nan tabata hopi deshidratá, pero entretantu nan ta komiendo mihó i ta bayendo basta bon.
Èks promé minister di Italia Silvio Berlusconi a fayesé djaluna na 86 aña di edat. Berlusconi lo keda kòrdá tambe komo magnate mediátiko, komersiante i selebridat. Djabièrnè a hib’é hospital San Raffaele na Milan kaminda el a fayesé djaluna. Anteriormente e aña aki el a pasa 45 dia den hospital pa un infekshon na pulmon relashoná ku e leukemia ku e tabata sufri di dje pa algun aña kaba.
Te na su morto e tabata lider di e partido derechista Forza Italia ku ta forma parti aworakí di e koalishon liderá pa Giorgia Meloni di Fratelli d’Italia. Berlusconi no tabatin un ròl den e gabinete, pero su morto por nifiká un tèst pa e stabilidat di e koalishon den lunanan benidero di akuerdo ku agensia di prensa Reuters.
Den último añanan Berlusconi tabata den publisidat prinsipalmente pa e vários kasonan entamá kontra di dje relashoná ku korupshon i tambe su ponensianan kontroversial. Promé ku esey e tabata basta popular pa su estilo di bida. Silvio Berlusconi tabata promé minister di Italia den 4 gobièrnu.
Un programa kaminda partisipantenan na Miss Curaçao Teenager 2023 huntu ku panelistanan a interkambiá opinion riba temanan importante pa formashon di nos hóbennan. Pa esnan ku a pèrdè e evento interesante aki e live stream ta disponibel riba Facebook. E interkambio entre e partisipantenan i panelistanan ta kuminsá na 58:35.
Komunikado:
International Beauty and Fashion Foundation ke gradisi na prome luga e audiensia di mas ku 10.000 hende ku a wak e programa: KIKO HOBEN TA PENSA? Nos komo Fundashon aunke nos ta traha den Beyesa pa nos ta importante pa e hoben keda sentral paso mañan ta nan tin ku karga nos pais! Tur hoben tin derechi di skohe loke ta entretene nan i nos ku amor ke sigui eduka nos hobenan pa nan logra nan soñonan, semper basta DISPLINA I RESPET ta na prome luga!
Danki speshal na Muhénan Firme pa apoya nos proyekto, danki ma e Team di KONTENTU ku e tremendo studio i transmishon. Danki na Maurilhio Nobrega ku tabata e konduktor di e programa. Danki speshal na nos panel Sra. Geselle Coffie, Sra. Judeline Gijsbertha, Sra. Renata Fullinck i Sra.
Silvern Jhon. Ban keda stimulá nos hobenan pa keda riba e kaminda positivo pa asina nan karga e isla🇨🇼 aki ku HONOR, na final ta di nos e ta!
E algoritmo di Instagram por aselerá distribushon di kontenido imoral. Esei ta resultado di un investigashon di vários universidat Merikano. Aparentemente tin un negoshi lukrativo riba Instagram kompará ku otro retnan sosial. E algoritmo di Instagram ta asina efisiente ku e ta hiba esnan interesá den kontenido ku abusu di mucha fasilmente pa esnan ku ta ofresé e kontenido aki via otro plataforma klandestino.
Pa e investigashon aki sientífikonan a krea account nobo i a sigui sierto hashtag ku ta hiba nan pa esnan ku ta ofresé e kontenido. Di e forma aki esnan interesá den video ku kontenido imoral ta drenta den konakto ku otro. E investigadónan a keda sorprendé pa e ofèrta amplio disponibel via Instagram.
E investigashon aki a tuma lugá riba vários plataforma sosial, pero for di nan tur Instagram tin e mayor tráfiko di hende ku ta kompartí kontenido imoral. Den un reakshon e kompania propietario Meta a rekonosé ku ta difísil kombatí e fenómeno dor di e forma klandestino ku e usuarionan ta komuniká. E kompania ta bai lanta un departamentu spesial pa vigilá e tipo di tráfiko aki.
E kiebro di dam na Ukrania riba djamars ta yega na momentu ku e pais tabata den preparashon pa un kontra ofensiva riba tropanan di Rusia. Ta asina ku djaluna presidente di Ukrania Volodymyr Zelenski a bisa den e konosido korant The Wall Street Journal ku e pais tabata preparando un ofensiva grandi. E kiebro di dam ta trese un retraso konsiderabel den e liña frontal di Ukrania.
E tropanan di Ukrania i Rusia ta separá di momentu dor di e riu Dnipro, ku a keda inundá ku awa dje dam, ku ta situá pues den teritorio okupá pa tropanan di Rusia. E inundashon ta forma un problema mas grandi pa Ukrania ku no por avansá, miéntras e parti okupá pa Rusia ta intakto ainda, dunando asina un bentaha.
Den Konseho di Siguridat di Nashonnan Uní a kuminsá reuní for di ayera, pero ainda tin diskushonnan fuerte andando riba e kuestion. Miéntras Ukrania i Rusia ta keda kulpa otro di kiebro di e dam entretantu ta kalkulá ku e kiebro di dam lo afektá alrededor di 40 mil persona direktamente i un otro 100 mil indirektamente. Rekonstrukshon di e region ta bai bira algu difísil. Dor di e daño ya okashoná kaba pa e agreshonnan hopi hende lo no ke bai bèk nan kas di akuerdo ku ekspertonan.
E operashon na barika di Papa Francisco a kana sin problema. Asina Vatikano a publiká djarason. Papa Francisco lo tin ku keda algun dia mas den hospital Gemelli na Roma despues di e operashon di djamars. Den próksimo 11 dia no tin oudiensia planiá. For di 2021 e pontífise ta tratá na su tripanan pa diverticulitis, algu basta frekuente serka hende grandi. Esaki tin ora por kondusí na infekshonnan ku mester keda tratá.
Ta probablemente muchu lat pa salba e eis di verano na nortpol. Te asta si logra redusí emishon di gasnan dañino kompletamente, probablemente entre aña 2030 i 2050 no ta bai tin eis mas durante verano na e nortpol di nos planeta. Segun kálkulonan anterior e eis lo a disparsé no mas promé ku 2050.
Pero segun un estudio publiká den Nature Communications te asta ku ménos emishon esaki lo a pasa tòg, i posiblemente ya aki 7 aña. E estudio ta kondusí a base di datonan di satelit. For di potrètnan tumá tur aña den sèptèmber, ora zomer ta na su fin, a konkluí ku kada aña tin ménos eis den e region.
Manera ta konosí tambe e desaparishon di nortpol no ta okashoná subida drástiko di nivel di laman. Esaki pa motibu di e asina yamá lei di físika di Archimedes. Di otro banda desaparishon di e eis ta forma un peliger direkto pa e ekosistema di e region. Partikularmente pa e animalnan ku ta migra pa nortpol.
Un eksploshon inesperá a buta un dam enorme na Ukrania basha abou djamars, okashonando un inundashon desastroso di e área. E siudat pegá ku e dam, Nova Kakhovka, ta okupá pa Rusia. Segun e agensia di prensa estatal di Rusia mitar di e dam a basha abou i chèns ta grandi ku esei lo pasa ku sobrá di e dam tambe.
E dam ta konektá via e riu Dnipro ku un sentral di distribushon di awa 60 kilometer mas leu na e siudat Kherson. E parti nort dje riu ta okupá pa Ukrania i e parti sùit ta den man di tropanan di Rusia. Te ainda no tin klaridat ken ta responsabel pa e eksploshon. Ukrania i Rusia ta kulpa otro, miéntras ainda no tin un investigashon a tuma lugá na e sitio. No tin indikashon ku un atake militar a tuma lugá i te asina leu ta konosí ku ta Rusia ta okupá e region.
Segun informenan den otro medio Rusia lo kier a probechá di e dam su suministro di awa i a laga esaki yena muchu. Sin ku esaki tabata e intenshon esei por a resultá den un sobrekarga i desfunshonamentu di e dam. E desaster aki ta forma un problema pa tur dos partido den e konflikto. Ta asina ku e awa tabata usá pa suministro di awa na Krimea ku ta aneksá pa Rusia for di 2014 tambe.
Na banda di Ukrania tambe por surgi un problema enorme. E sentral di awa ta usá pa fria un sentral nuklear na Ukrania. Por lo pronto tur kos ta parse bou di kòntròl eynan ainda. Esey dimes ta un alivio, pero te ainda tin e problema di vários mil persona ku mester a bandoná nan hogar.
Nashonnan Uní a yama un reunion di urgensha relashoná ku e insidente.
E balor di bolsa di e plataforma pa kriptomoneda Coinbase a baha ku 20% djamars despues ku e instansha Merikano di supervishon Securities and Exchange Commission (SEC) a start un kaso penal kontra e kompania. Coinbase, e plataforma di kriptomoneda mas grandi na Merka, lo ta ofresiendo servisio sin e pèrmitnan korespondiente.
E balor a baha den un ratu di ora di un poko mas ku $58 pa $48,45. E propiedatnan di Coinbase ta kaluklá na $130 mil mion danki na kapital di un par di desena di mion invershonista.
E supervisor SEC a anunsiá mas aleu ku ta vigilando tambe e otro plataforma mas grandi na mundu Binance, ku tambe ta sospechá di ofresé servisio sin e debido pèrmitnan. Kontrali na Coinbase, Binance no ta aktivo riba merkado di bolsa. Pero Binance a sinti e klap tòg ora e balor di su kriptomoneda BNB a pèrdè 10% di su balor.
Haiti ta asotá di momentu pa hopi inundashon i movementu di tera. Por lo ménos 15 persona a pèrdè nan bida i mas di 13 mil persona mester a bandoná nan hogar. Alrededor di 1200 kas ta deklará inapropiá pa biba aden i tin sigur 7400 kas ku a raportá daño material.
Tin hopi daño tambe na kosechanan, loke ta lanta e miedu pa un situashon di mas hamber den partinan dje pais. Manera ta konosí Haiti tin hopi problema ku distribushon di alimento.
Ta bini aserka ku e pais ta asotá pa algun aña pa violensha i guera entre gangnan kriminal ku tin kòntròl riba vários parti di e kapital Port-au-Prince. Promé minister Ariel Henry a hasi un yamada urgente na instanshanan internashonal pa yuda kontené e situashon. Nashonnan Uní ta dispuesto na yuda, entre otro ku restourashon di òrdu polisial pa trese trankilidat bèk.
