E supervisor di privacy na Irlanda a imponé un but di 345 mion euro riba e plataforma TikTok. E kompania lo no a hasi sufisiente pa protgé e privacy di muchanan Oropeo.
Segun e Data Protection Commission na Irlanda videonan ku mucha ta buta riba TikTok ta standart ahustá pa buta kontenido públiko hasiendo e muchanan asina vulnerabel pa hende ku nan no konosé. TikTok lo no a informá riba esaki i tampoko nan no tabata na altura ku tur hende por mira nan videonan.
E funshon Family Pairing, esta e funshon pa akoplá e account di e mucha na esun di su mayornan, tambe tabata funshoná malu. Asta terseronan por a hasi esaki ku e account di muchanan. E sede Oropeo di TikTok ta keda na Irlanda. Pa e motibu ei e medida a keda imponé na Irlanda mes.
Por sierto ku vários supervisor Oropeo lo ta siguiendo i vigilando e efektonan di inteligensha artifisial riba mucha, inkluso na Hulanda. Lo ta trata di e funshon di inteligensha artifisial di un app konosí, pero ainda no a revelá di kua app ta trata.
No ta probabel ku interes lo baha den promé mitar di 2024. Asina miebro di direktiva di Banko Sentral Oropeo Martins Kazaks a bisa durante un rueda di prensa. Siman pasá e Banko Sentral di Oropa a subi interes te na 4%. Tabata ya di 10 okashon konsekutivo i ta e sifra di interes mas haltu den historia di Banko Sentral di Oropa.
Spekuladónan a antisipá ku esaki lo ta fin di e sifra haltu di interes i ku pronto esaki lo baha atrobe. Pero segun Kazaks ainda e kresementu di salarionan no a pik i tampoko ta konosí si e inflashon ku ta kompañá esaki lo frena. Pa e motibu ei mester asta tene kuenta ku un posibel subida di interes atrobe. Segun e Banko Sentral e situashon por pèrsistí te di dos mitar di próksimo aña.
Resien e obra Rumannan Purunchi di Milushka Birge a estrená na Huize Habaai. E piesa teatral-musikal ta basá riba historianan real di infansia dje eskritor Loekie Morales. Den su buki Rumannan Purunchi, Morales ta kompartí ku nos herensia familiar intangibel di e rumannan Moral.
Milushka Birge, eskritor i direktor di esena, a nutri su mente ku e herensia familiar di rumannan Moral, pa krea un storia nobo den kual ta papia ku e hóben entre 10 i 14 aña, tokante entre otro spiritu komunitario, forsa i impontensia. Milushka Birge huntu ku músiko i kompositor Eric Calmes ta forma un nèshi kaluroso pa e aktornan hunga diferente personahe dunando espasio pa ekspresá kantikanan bunita komponé speshalmente pa e obra akí. E aktornan ku ta forma e elenko ta: Greysha Niebe, Gian van Eiker, Rachelle Le Blanc, Kionn Yung i Maxine Fabian.
Tur skol di fundeshi, skol sekundario i skol spesial na Kòrsou, a risibí dos siman pasá un pakete ku material di Rumannan Purunchi pa prepará promé ku wak e obra teatral-musikal Rumannan Purunchi. Den e pakete tin material edukativo, poster i flyer ku informashon di e piesa teatral-musikal. E buki Rumannan Purunchi ‘saga di un nèshi tropikal’ di eskritor Loekie Morales tambe ta forma parti di e pakete aki.
Tin hopi konfushon rondó di e kantidat di hende ku a bira víktima di e tormenta Daniel na Libia. Asina entre otro agensia di prensa Reuters ta informá.
Anteriormente Luna Kòrá na Libia a informá ku lo tabatin ya 11 mil víktima mortal. Mas lat atrobe Luna Kòrá a desmentí su informe anterior. Turesten Krus Kòrá a informá ku lo tabatin 20 mil persona pèrdí. Dado momentu Krus Kòrá a kuminsá kontradesí e informenan di Luna Kòrá. Loke a hasi e konfushon mas grandi tabata ku medionan manera BBC, agensia di prensa AP i Al Arabiya tabata hasi menshon di e sifranan di Luna Kòrá.
Motibu pa e konfushon ta e situashon polítiko den e pais. Libia ta manehá pa 2 gobièrnu diferente for di kaida di Moammar Kadafi ku ta duna informashon diferente. Asina e gobièrnu rekonosé internashonalmente ta papia di 7000 víktima konfirmá miéntras e gobièrnu no rekonosé, i kaminda e inundashonnan de fakto a tuma lugá, ta papia di 5500 víktima konfirmá.
Libia ta asotá pa inundashon masivo siguiendo tormenta Daniel ku anteriormente e siman aki a pasa riba Mediteranio. Na kabamentu di siman pasá e tormenta a okashoná bastante daño tambe na entre otro Gresia.
Banko Sentral Oropeo, den un esfuerso pa sigui kontené inflashon, ta bolbe subi interes. Entrante 20 di sèptèmber interes lo keda fihá na 4%. Ta promé biaha ku interes a yega na e porsentahe aki i ta di 10 okashon kaba for di yüli aña pasá ku e Banko Sentral di Oropa ta subi interes.
For di kuminsamentu di ougùstùs presidente di e banko Christine Lagarde a atvertí ku interes lo sigui subi si inflashon keda muchu haltu. Ounke e subida di preis ta ménos fuerte ku resien te ainda preisnan na Oropa ta hopi mas haltu ku normal.
Presidente Christine Lagarde a indiká ku e enfoke di momentu ta pa frena inflashon gradualmente te na 2%.
Usuarionan di WhatsApp por awor risibí aktualisashon di persona òf organisashon via kanalnan spesial diseñá pa e plataforma. E funshon aki no ta funshoná meskos ku grupo: e siguidónan por solamente lesa mensahe.
Propietario di WhatsApp Meta a tèst e funshon aki for di yüni na Colombia i Singapur i ta kla awor pa lans’é ofisialmente den 150 pais mas. Persona públiko i organisashonnan por usa e kanalnan pa mantené nan siguidónan na altura di nan aktividatnan. Asina bo por risibí e últimonan updates di un artista òf klup di deporte ku bo ke sigui.
E mensahenan lo drenta den un sekshon separá den WhatsApp. Usuarionan por buska e kanal riba nan telefòn i inskribí grátis. Kanalnan di WhatsApp lo filtra outomátikamente a base di e pais kaminda bo ta biba. Tambe bo por indiká si bo kier mira e kanalnan mas nobo, mas aktivo òf mas popular.
Usuarionan lo por reakshoná solamente ku emoji riba e mensahenan den e kanalnan ku despues lo keda registrá pa otro usuarionan mira e kantidat di reakshonnan. Updates ta keda disponibel 30 dia i despues ta keda eliminá outomátikamente.
Number di telefòn tampoko lo ta visibel. Tur number di manehadónan di kanal i siguidó ta keda privá. Pronto e funshon lo bira visibel den bo WhatsApp.
E siman aki algun imágen i vídeo a bira viral riba retnan sosial mustrando prueba di eksistensha di ekstraterestre. Ta trata di prueba ku a keda presentá den Parlamentu di Mexico pa Jaime Maussan Flota, na Mexico konosí komo periodista, influencer i, den su propio palabranan, un spesialista den UFO’s. 5W Press a hasi un fact-check riba e informe aki.
Kiko ta e informashon ku ta sirkulá?
E notisia a plama hopi lihé despues di un mensahe riba X (ántes Twitter) ku ta bisa “Two 1,000 year old alleged alien corpses were shown to Mexico congress yesterday, originally found in Peru”:
Two 1,000 year old alleged alien corpses were shown to Mexico congress yesterday, originally found in Peru.pic.twitter.com/kJi41fETla
Otro mensahe riba X ta bisa “DEAD ALIEN BODIES presented at MEXICAN UFO CONGRESSIONAL HEARINGS”, kompañá pa screenshot trahá durante e presentashon den parlamentu di Mexico:
DEAD ALIEN BODIES presented at MEXICAN UFO CONGRESSIONAL HEARINGS
E mensahenan aki a haña miónes di view den un par di ora.
Na kuminsamentu di su presentashon Jaime Maussan a hasi referensha na e asina yamá House Oversight and Accountability Subcommittee Hearing ku a tuma lugá den yüli di e aña aki den parlamentu na Merka kaminda a papia entre otro riba e nòmber nobo pa UFO’s unidentified anomalous phenomena (o sea UAP). Esaki pa enfatisá ku asta Merka ta tuma e tema di UFO’s / UAP’s komo algu serio.
E presentashon kompleto di Jaime Maussan Flota ta disponibel riba e kanal di YouTube di e parlamentu di Mexico titulá “Audiencia Pública: Fenómenos Aéreos Anómalos No Identificados en México”:
Despues di un diskurso di kasi 2,5 ora Maussan a mustra un video ku ta mustra e kurpanan momifiká di dos figura ku en todo kaso no ta parse humano. E kurpanan lo a keda deskubrí na Perú. Den e video ku Maussan a presentá por skucha Jois Mantilla, un periodista i investigadó di Otromundo Comunicaciones, ku ta bisa ku despues di análisis profundo di e DNA di e kurpanan a konkluí ku e kurpanan no ta originalmente di nos planeta. E grabashon lo ta di 2017, o sea 6 aña pasá.
Tambe e parlamentu Mehikano a duna palabra na Avi Loeb ku a duna informashon riba e proyekto Galileo di Harvard University, un proyekto berdadero ku a start den 2021 ku e meta di buska evidensia di teknologia ekstraterestre ku ta proba ku nos planeta a risibí bishitante di otro planeta den pasado.
Opviamente un claim sensashonal asin’akí den un parlamentu tabata sufisiente pa desenkadená diskushonnan fuerte riba internèt kompañá pa mas claim sensashonal ku mester keda investigá te ora a bòltu e último piedra. Di modo di papia.
Kiko ta bèrdat i kiko no ta bèrdat?
En todo kaso ta bèrdat ku e imágennan aki riba a keda presentá den parlamentu di Mexico. Loke NO por konfirmá ta e outentisidat di loke bo ta mira den e video presentá pa Jaime Maussan. Ta básikamente e kontenido di e video i su palabra.
Mas aleu mester bisa ku 8 aña pasá na 2015 el a raportá riba e asina yamá “Momia di Nazca” ku lo tin un orígen ekstraterestre. Na e okashon ei el a asta organisá un evento pa hende bin wak e kurpa. Sinembargo, investigashon mas profundo a demostrá despues ku tabata trata di un kurpa di mucha humano ku a pasa dor di un proseso di momifikashon.
Tambe mester bisa ku Maussan no a spesifiká si ta e mesun figuranan hañá den e mesun region di Nazca 2 aña despues den 2017. Outoridatnan na Perú ya a informá kaba ku ta trata di obra di man.
Agensia di prensa Associated Press a kòmbersá entretantu ku Julietta Fierro, un investigadó ku a traha den pasado ku Maussan. Segun Fierro e periodista lo a yega di bis’é ku e por komuniká ku ekstraterestre i asta ku e Bírgen di Guadalupe.
Pues ta bèrdat ku parlamentu di Mexico a trata e asuntu, pero no por konkluí pues ku loke a keda presentá den parlamentu di Mexico ta prueba definitivo di eksistensha di bida ekstraterestre.
A base di loke ta konosí te asina leu riba e asuntu por konkluí ku e tema aki ta kuestionabel den mihó kaso. Si resultá ku e imágennan ku Jaime Maussan a presentá den parlamentu di Mexico no ta outéntiko, sigur lo no ta promé biaha.
Alrededor di 75 krokodel, pues no kaiman, a hui for di un krio den parti sùit di China siguiendo tifon Haikui, ku a asotá e region kasi un siman largu. E animalnan a hui ora ku e nivel di awa di un lago a subi den e provinsia Guangdong.
Te asina leu a kapturá 8 animal. Habitantenan di e área a haña atvertensha pa keda paden te ora a kapturá sufisiente di nan. Ta trata di krokodel Siamés ku por alkansá mas o ménos 3 meter di largura i pisa 75 kilo.
Den e region kaminda e insidente a tuma lugá tin un industria aktivo di krio di krokodel ku ta destiná pa produkshon di kuero i karni.
Presidente di Rusia Vladimir Putin i lider di Nort Korea Kim Jong-un a reuní ku otro na Rusia riba djarason. E lidernan ta topa otro na e instituto di investigashon espasial Vostochny, den parti sùit di Rusia, pegá ku e frontera ku China.
E motibu ofisial di e bishita no ta konosí. Den medionan Merikano tin spekulashon ku lo ta trata di asuntunan militar. Rusia lo ta interesá den sistemanan balístiko Nort Koreano miéntras Nort Korea ta buskando teknologia avansá i yudansa ku alimento.
Medionan na Rusia ta informá di otro banda ku e enkuentro ta prinsipalmente den kuadro di e kolaborashon entre e dos paisnan i pa e motibu ei no tin hopi detaye konosí.
Italia ta rizga pèrdè su posishon komo eksportadó mas grandi di biña na mundu. Esaki debí na un bahada di produkshon. Si e trènt kontinuá probablemente Fransia lo optené e título di eksportadó mas grandi pa promé biaha den nuebe aña atrobe.
Segun pronóstikonan e produkshon di biña na Italia lo baha ku 12% e aña aki. E produkshon redusí lo ta konsekuensha di kambio di klima ku a afektá e finkanan di biña sevéramente. E kosecha mas resien pues a sufri inundashon, sekura, i daño kousá dor di hagel tambe.
E kontratempu en todo kaso no a afektá e kalidat di biña Italiano i bodéganan ta yen di bòter ainda ku mester yega na un bon edat ainda. Debí na demanda redusí e produkshon mas abou no tin un efekto signifikante pa konsumidor, pero pa e produktornan Italiano e ta keda un klap duru pasobra mester sigui kubri gastunan.
Ian Wilmut, e sientífiko Britániko ku a krea e karné di klon Dolly, a fayesé na 79 aña. Asina e instituo di siensia Eskoses Roslin Institute a anunsiá. Wilmut tabata sufri di Parkinson. El a bira mundialmente konosí huntu ku su kolega Keith Campbell ora nan a krea Dolly na 1996 for di un sélula di un karné adulto.
Dolly a biba mas o ménos 6,5 aña i a fayesé dor di un infekshon na pulmon. E téknika usá tabata un revolushon ku alabes a lanta diskushonnan étiko fuerte.
Por sierto ku Dolly no tabata e promé animal di klon. For di 1958 ya a klon un sapu. Despues di Dolly a klon vários otro animal manera lamnchi i raton. Dolly a keda prepará i ta eksponé na e Museo Nashonal di Eskosia na Edinburgh.
Ya tin mas di 3 dia a pasa siguiendo e temblor djabièrnè último na Maroko. E kantidat ofisial di morto a bin para na 2.862 djaluna anochi. E chèns ku ainda lo haña víktima na bida a baha.
E momentu aki ta krusial. Ta asina ku den e promé dianan despues di un temblor e meta prinsipal di trahadónan di reskate ta pa haña sobrebibiente entre e ruinanan. Tempu ta nan enemigo mas grandi durante e prome 72 ora siguiendo un temblor.
Despues di 72 ora e chèns pa sobrebibí ta limitá den mayoria kaso. Mayoria hende por sobrebibí por lo ménos 72 ora sin awa. Despues di esei, hende por fayesé dor di set òf falta di nutrishon.
Consumentenbond na Hulanda a kuminsá un kaso kontra Google. E forma ku Google ta kolekshoná datonan di usuario ta bai kontra reglanan Oropeo di privasidat. Consumentenbond ta èksigi un kompensashon di 750 euro pa kada usuario.
E organisashon pa konsumidó Hulandes a anunsiá e kaso for di mei i awor ta bai sigui ku e plan. Alrededor di 82.000 konsumidó a uni ku Consumentenbond.
E kaso ta embolbé anunsionan pagá. Google ta bende espasio di propaganda riba website di komersiante ku usuarionan ta mira despues ora nan bishitá. E anunsionan ta sali outomátikamente pero dor di cookies, Google sa ku usuarionan ta buska, por ehèmpel, un wasmashin òf outo nobo.
Consumentenbond tin sosten tambe di Stichting Bescherming Privacybelangen. Na mart Consumentenbond a gana un kaso kaba kontra Facebook siguiendo reklamonan komparabel di usuario.
Un fabrikante Merikano ta retirá un tipo di cheps pikante for di merkado despues di morto di un hóben di 14 aña na Massachusetts. Su famia ta kombensé ku konsumo di e snèk ekstrémamente pikante a kousa su morto.
Ta trata di un chep di ‘tortilla’ bendí na 10 dòler pa kaha ku por sierto ta bin den forma di un kaha di morto i dekorá ku kolebra venenoso. Siguiendo e asina yamá “One Chip Challenge” konsumidónan ta retá pa filma nan reakshon ora nan kome e snèk i warda mas tantu posibel pa aliviá esaki.
E cheps aki ta trahá ku e asina yamá Carolina Reaper i Naga Viper, dos tipo di promèntè ku ta skor 1.7 i 1.4 mion riba skala di Scovilla. Riba e skala aki tabasko ta skor rònt di 5000 i jalapeño 10.000. E pakete ta indiká tambe ku e produkto ta destiná solamente pa adulto i ta asta deskonsehá konsumo durante embaraso. Tambe ta indiká pa buska yudansa médiko si bo desmayá, tin nousea duradero òf si ta difísil hala rosea.
E hoben di 14 aña, Harris Wolobah di Worcester, a risibí e chep segun su mama di un kompañero di skol. E yu lo a mária na skol, pero tabata mustra mihó ora el a bai kas. Poko despues a hañ’é desmayá den su kamber. Na hospital a konstatá su morto poko despues. Ounke ainda outopsia mester determiná ku eksaktitut e kousa di morto, e famia ta kombensé ku e cheps a kousa su morto. E mucha lo tabata den bon estado di salú.
No ta promé biaha tampoko ku hende a kaba den hospital despues di a kome e snèk pikante aki. Tin vários adulto ku mester a bai hospital despues di kome e snèk i por lo ménos 10 otro kaso konosí di hóben ku a bira malu dor di e ‘challenge’ aki. Ta promé biaha ku unu a fayesé. Segun dòkternan e supstansia kapsaisina den e cheps ta kousa problema di kurason. Den un deklarashon fabrikante Paqui, filial di e konosido kompania Hershey, ta lamentá morto di e hóben.
E kompania a reiterá ku e produkto ta kumpli ku reglanan di siguridat i ta enfatisá ku ta un prdukto pa adulto. Pero awor ku a resultá ku mucha tòg ta logra buta nan man riba e snèk e kompania a disidí retirá esaki for di merkado.
Sientífikonan a logra krea un èmbrio kompleto sin sélula humano. Segun esnan embolbé den e estudio aki no ta trata di un èmbrio humano, sino unu ku eksaktamente mesun karakterístika.
E èmbrio ta proveniente for di sélula tronkal, na Hulandes ‘stamcel’. Esaki ta sélula ku ainda por transformá den diferente tipo di sélula den kurpa humano. Pa e estudio aki e sientífikonan a agregá supstansia na e sélulanan tronkal ku despues a transformá den e promé sélulanan ku normalmente ta presente den un èmbrio humano.
Despues a reuní e sélulanan ku konhuntamente a transformá den e èmbrio aki ku e mesun karakterístikanan ku esnan humano. Segun e sientífikonan e investigashonnan aki ta importante pa komprondé mihó e desaroyo di ser humano. Ainda tin poko informashon disponibel riba e promé dos simannan di desaroyo di bida humano, siendo ku ta trata di un periodo hopi deliká.
E sientífikonan ta suprayá ku no ta étiko i asta ilegal pa krea un èmbrio i pasa esaki pa un matris humano ku despues por krese i bira un ser humano. Pa e motibu ei a finalisá e eksperimento den 14 dia. Den vários pais ta pèrmití eksperimento ku èmbrio humano te na 14 dia, pero ta awor numa un eksperimento lo a tuma e kantidat máksimo di dia pèrmití.
