5W Press Newsletter #27 2023
Resúmen di tur item di 9 yüli – 15 yüli 2023
Usuario di smartphone por scroll di artíkulo pa artíkulo tambe.
Muchanan ku tabata pèrdí den jungle na Colombia no ta bou di opservashon mas i a bai kas
E 4 muchanan ku tabata pèrdí pa un luna den jungle na Colombia algun siman pasá ya no ta bou di opservashon mas i por a bai kas. Nan ta den bon estado di salú. E muchanan tabata bou di opservashon médiko despues di e aventura peligroso ku nan a pasa aden i a keda trasladá pa un tehuis kaminda nan lo keda por lo pronto.
E abuelonan di parti di mama di e muchanan a pidi pa nan kustodia. Manera konosí e muchanan tabata pèrdí den jungle despues ku e avion ku tabata transportá nan a kai. E mama di e muchanan a muri un par di dia despues. A resultá ku e abuelonan di e muchanan a siña nan kon sobrebibí den un situashon asina. Nan tabata sa kon biba di hariña di yuka i fruta.
Tabatin poko speransa ku e muchanan lo a sobrebibí dor ku ta trata di un di e partinan ménos aksesibel di e jungle. Riba 10 di yüni por fin a haña nan. A trasladá nan pa e hospital militar ku nan a kaba di bandoná.
Desmentí òf hustifiká holokousto definitivamente prohibí na Hulanda
Na Hulanda ta definitivamente prohibí pa desmentí òf hustifiká holokousto. Esnan ku no kumpli mester tene kuenta ku un kastigu di prison di pa mas tantu 1 aña.
No ta asina ku anteriormente no tabata posibel pèrsiguí un hende pa desmentí holokousto tampoko. Esei tabata kai anteriormente bou di e leinan ku ta regardá diskriminashon i rasismo, pero awor e ta un lei riba su mes.
E desishon por sierto no ta konta solamente pa holokousto, pero tambe krímennan di guera, krímennan kontra humanidat i genosidio.
Konsternashon grandi despues di desishon di wes den kaso di abusu
Tin basta konsternashon riba retnan sosial pa e sentensia di un wes Italiano ku a laga un conciërge di 66 aña bai liber despues di a mishi ku partinan privá di un alumno di 17 aña. E wesnan a argumentá ku e mishimentu no a dura mas ku 10 sekònde.
E insidente a tuma lugá aña pasá na Roma. E damita lo tabata bayendo lès ora el a sinti un hende hala su karson abou i kuminsá mishi ku su partinan privá. E mishimentu lo a dura 5 pa 10 sekònde di akuerdo ku e alumno. E conciërge lo a bisa e alumno despues ku e sa ku ta wega.
Ministerio públiko di Italia a pidi un kastigu di 3,5 aña, pero e wesnan a disidí ku no tabata trata di un krímen ya ku e mishimentu a dura ménos di 10 sekònde.
A partir di e momentu ei a lanta un ola di krítika riba retnan sosial kaminda usuarionan a publiká un video kaminda nan ta mishi ku nan mes banda di un oloshi ku ta kana 10 sekònde pa demonstrá ku 10 sekònde ta dura mas largu ku hende ta kere.
Outoridatnan na Berlin ta desmantelá bòm den bario drùk
Alrededor di 15 mil habitante di e siudat Aleman Berlin mester a bandoná nan bibienda relashoná ku desmantelashon di un bòm proveniente di e di dos guera mundial. Segun e korant Aleman Der Tagesspiegel ta trata di un bòm di 500 kilo.
Un tim di eksperto tabata sa di laga e bòm eksplotá di forma kontrolá pa e no hasi daño na e lugá kaminda a hañ’é. Segun polis e bòm tabata operashonal i den bon estado ainda, pero nunka a eksplotá. E trahadóna públiko ku a haña e eksplosivo a skapa di un tragedia.
Finalmente tur hende por a bai bèk nan hogar.
Eerste Kamer a adoptá lei pa hasi plamamentu di informashon konfidensial kastigabel
Net promé ku reseso Eerste Kamer na Hulanda a adoptá un lei ku ta hasi plamamentu di informashon konfidensial di hende pa intimidá nan kastigabel. E lei ta drenta na vigor entrante 1 di yanüari 2024. Esnan ku kometé e akto aki pa lei lo por konta ku un kastigu di prison ku por yega 2 aña òf un but ku por alkansá 22.500 euro. Pa personanan den sierto funshon e kastigu lo ta mas haltu.
Den último añanan tin un fenómeno a lanta kabes kaminda hende di mala fe ta kompartí adrès privá, number di telefòn, informashon personal i asta potrèt di famia di hende via gruponan di chat riba internet of retnan sosial. Polítikonan, sientífiko, periodista i agentenan polisial ta víktima frekuente di e práktika aki. Si ta trata di persona den un di e funshonnan aki, esnan responsabel por konta pues ku un kastigu mas haltu.
Gobièrnu di Hulanda a argumentá ku e lei ta nesesario ya ku ta trata di un violashon serio di privasidat di hende. Lo bin un lei separá pa plamamentu di material ku kontenido seksual. E lei lo bin kai bou di e Wet seksuele misdrijven. E lei ei ta regla entre otro kon penalisá krímennan ku un karakter seksual.
Aktornan Merikano tambe ta drenta wèlga
Aktornan Merikano definitivamente ta drenta wèlga despues ku negosiashonnan entre sindikato di un banda i di otro banda e studionan mas grandi i servisionan di streaming a pega. Asina Deadline a publiká djaweps.
E wèlga aki ta un gòlpi duru pa Hollywood ku ya tin vários problema ku produkshonnan andando. Asina a posponé siguiente temporadanan di serienan eksitoso manera The Last of Us, Stranger Things, The Handmaid’s Tale i un spin-off nobo di Game of Thrones. Despues ku eskritornan i otro trahadónan a drenta wèlga awor aktornan tambe ta ninga di hasi nan trabou. Práktikamente tur produkshon di pelíkula i televishon Merikano a stagna.
Partikularmente aktornan di stèm no ta kontentu ku nan entrada despues ku servisionan di streaming a lanta kabes. Promé ku servisionan manera Netflix i Amazon, nan tabata gana bon sèn ku ripitishonnan na televishon. Tambe e aktornan tin nan reservashonnan pa ku inteligensha artifisial. Produkshonnan ya ta hasiendo uso di esaki pa krea vershonnan mas hóben ora ta nesesario. No solamente e aktornan ta ninga di aktua, pero tampoko nan no ta kumpliendo mas ku trabounan di promoshon.
Succession nominá pa 27 Emmy siguí pa Ted Lasso ku 21 nominashon
E último temporada di e serie Succession na HBO a logra optené sigur 27 nominashon pa e otorgashon di premionan Emmy. Asina Variety ta informá. Succession, ku ta konta e kuenta di un famia poderoso tras di un kompania di media, tin chèns di gana e premio pa mihó serie dramátiko i mihó protagonistanan.
Tin vários otro serie di HBO ku tin chèns di gana un premio, manera The Last of Us, House of the Dragon i e di dos temporada di The White Lotus, kaminda partikularmente e aktrisnan Jennifer Coolidge i Aubrey Plaza ta buta furor ku nan ròl den The White Lotus.
E serie kómiko di Apple TV+ Ted Lasso tambe a haña vários nominashon: 21 na total. E otorgashon di premionan Emmy ta tuma lugá 18 di sèptèmber.
Migrashon ta buta preshon riba merkado di bibienda na Hulanda
E demanda pa bibienda na Hulanda ta kada bes mas haltu. Asina ABF Research a publiká. E konstrukshon di kasnan nobo no por kompetí ku e kresementu di populashon. Esei ta okashoná entre otro pa e kantidat di migrantenan ku ta drenta Hulanda i tambe e echo ku hende grandi ta keda biba kada bes mas largu na kas.
Segun e investigashon ku a tuma lugá alrededor di 110 mil famia lo bin aserka te ku 2031, kua ta mas haltu ku kalkulá anteriormente. Hende grandi ta keda biba mas tempu na kas pa falta di lugá den kasnan di kuido. Tambe famianan ta birando dia pa dia mas chikitu i tambe tin mas i mas famia ku un mayor so. E desaroyonan ei ta buta un preshon grandi riba e demanda pa bibienda.
Pero e faktor mas importante ta keda tòg e kresementu di populashon na Hulanda. Aña pasá tin hopi hende mas a drenta pais ku tabata antisipá. Pa kumpli ku e demanda Hulanda mester di sigur 981 mil bibienda nobo promé ku 2030. E faktor ku ainda por kontribuí na e kresementu di populashon ta tòg migrashon di akuerdo ku ABF Research.
Grupo di hacker Chines ta haña akseso na mailbox di ministerionan Merikano
Un grupo di hackers Chines a logra haña akseso na mailbox di sigur 25 organisashon Merikano di kua vários ministerio di gobièrnu. Microsoft a deskubrí e hack, pero no a partisipá ta di kua ministerionan ta trata. Segun e ministerio di Asuntunan di Eksterior, no tin informashon konfidensial a kai den man di e hackers.
E grupo di hacker lo a purba esaki via e sistema di e-mail pa yega na datonan konfidensial. Lo ta trata di un grupo notorio ku a kondusí vários atake tambe riba organisashonnan Oropeo.
Segun Microsoft e hack a tuma lugá den un periodo promé ku e bishita di e minister di Asuntunan di Eksterior na China. E propósito di e bishita ei tabata pa normalisá e relashon entre Merka i China.
Nos por literalmente tende silensio
Nos por tende silensio òf nò? Silensio ta hasi sonido òf tin su propio frekuensha? Filósofonan a debatí pa basta siglo riba e pregunta ei, pero awor sientífikonan di John Hopkins University tin un posibel kontesta definitivo: nos ta tende silensio di mesun forma ku nos por tende un sirena di polis, ambulans òf brantwer. E pregunta semper tabata si hende literalmente por tende silensio.
Pa investigá esaki e sientífikonan a usa un asina yamá ilushon auditivo. Esei ta un sonido ku bo orea ta registrá, pero ku nos seleber ta interpretá diferente. E sientífikonan a usa un forma adaptá di un téknika eksistente kaminda un persona ta eksponé na un silensio, siguí pa dos blip kòrtiku i na final un blip djis un poko mas largu. Ounke e dos blipnan kòrtiku ta dura mes largu ku e blip ku un durashon djis un poko mas largu, nos seleber ta laga nos kere ku e último blip ei ta zona mas largu.
Den e investigashon nobo aki e partisipantenan a haña un fragmento di un restorant yen di hende pa tende i ku a keda interumpí di mesun forma pero pues ku silensio na lugá di blip. Meskos ku e experimento original e partisipantenan su seleber a registrá dos silensio kòrtiku i unu un poko mas largu miéntras e durashonnan original di silensio tabata igual na otro. Esaki a kondusí na e konklushon ku nos selebronan ta registrá silensio meskos ku sonido, o sea: nos por literalmente tende silensio.
Microsoft a haña lus bèrdè pa atkirí Activision Blizzard
Microsoft a haña lus bèrdè pa atkirí e produktor di videogames Activision Blizzard, konosí entre otro pa games manera Call of Duty, World of Warcraft i e na Kòrsou konosido Candy Crush. Esaki despues ku e kompania a haña aprobashon na tantu Oropa komo Merka.
Pa basta tempu e supervisor Merikano FTC a purba para e deal pa evitá un eventual konkurensha inhustu. Ta trata di e take-over mas grandi den mundu di videogames na un balor total di kasi 70 mil mion dòler ku ta buta Microsoft den 1 tiru den tòp di video games pa smartphone i tablet.
Tambe tabatin miedu ku sierto título lo tabata disponibel solamente riba Microsoft su konosido Xbox. A kambio di aprobashon pa e take-over Microsoft mester a garantisá ku e ta bai produsí videogames pa otro console tambe, manera Nintendo i Playstation. Den Reino Uní ainda sinembargo Microsoft no tin aprobashon pa e take-over.
Ukrania desapuntá ku promé dia di reunion di OTAN
Ukrania a keda desapuntá ku e promé dia di reunion di e Organisashon Transatlántiko di Nort (OTAN). Te ainda no tin un trayektoria definí pa Ukrania kuminsá forma parti di e aliansa, pero si e promesa ku e pais por bira miembro una bes ku e kumpli ku tur e kondishonnan pa bira miembro. Asina e aliadonan a akordá segun medionan internashonal durante e promé dia di reunion na Lituania.
Segun analistanan presidente Zelensky di Ukrania lo no ta masha kontentu ku e akuerdo aki, ya ku for di un prinsipio e ta boga pa miembresia di OTAN. Promé ku el a biaha pa e reunion e presidente Ukraniano a skirbi riba Twitter ku su pais ta meresé rèspet. Tambe el a bisa ku ta insólito i apsurdo si no fiha un trayektoria pronto pa Ukrania por bira miembro. Ku e miembresia Ukrania ke sigurá su mes di protekshon internashonal pa situashonnan manera esun aktual kaminda Rusia ta invadiendo e pais.
Sea Turtle Conservation Curaçao ta investigá malesa bou di populashon di turtuga
Un malesa ku konsekuensha fatal a plaso largu ta menasando e populashon di turtuga den awanan rondó di Kòrsou. Alrededor di 80% di e animalnan ta sufri di Fibro Papillomatosis. Sea Turtle Conservation Curaçao den kolaborashon ku Jefferson University na Philadelphia ta investigando e fenómeno. Nos a kòmbersá ku Ard Vreugdemhil di Sea Turtle Conservation Curacao.
Inflashon na China a baha te 0%
Inflashon na China a baha te na 0%. Esaki ta kousá pa un demanda redusí di produktonan Chines tantu lokal komo den eksterior. Esaki a resultá den un bahada di preis i pues tambe un bahada di inflashon. Asina vários medio internashonal ta informá a base di un publikashon di e Bureau di estadístika Chines.
Kompará ku aña pasá preisnan ta mas di 5% mas abou. Loke ta hunga un ròl tambe ta e bahada di preis di materianan prima, butando ku konsumidornan ta paga un preis mas abou. Di e forma ei balor di un moneda por subi. Den promé instansha e ta parse un bon kos, pero mester vigilá tambe ku preisnan no ta baha muchu i konsumidornan warda pa preisnan sigui baha pa hasi sierto gastu.
Ora konsumidornan no ta hasi kompra, fábrikanan ta produsí ménos, loke ta resultá direktamente tambe den ménos entrada i pues ménos sèn pa paga trahadó. Si muchu hende pèrdè trabou konsumo ta sigui baha loke por okashoná un spiral negativo.
