E ola di kalor mundial di momentu ta okashonando vários problema den vários pais.
Italia i Fransia a emití un kódigo kòrá den vários parti relashoná ku kalor ekstremo. Den algun parti di Italia ta tene kuenta ku temperaturanan lo alkansá 38 grado òf mas. Siudadanonan ta avisá pa evitá solo i kalor mas tantu posibel, partikularmente den oranan ku ta hasi mas kalor. Mitar di Fransia tin un kódigo oraño vigente na e momentu aki. Den kasi binti departamentu tin un kódigo kòrá. Na Fransia ta tene kuenta ku temperaturanan ku por alkansá 42 grado.
Turesten na Gresia kandelanan di mondi den parti nort di e pais a okashoná 26 morto. Ta trata di kurpanan kimá. Segun outoridatnan por ta trata di migrantenan mirando ku no tin petishon pa búskeda di persona disparsé. E pais ta hañando yudansa for di vários pais bisiña pa kombatí e kandelanan. Aparte di esei pronóstikonan ta indiká ku temperaturanan lo keda haltu i ku sekura lo pèrsistí por lo pronto. Na Tenerife por sierto e situashon ta un relativamente bou di kòntròl. Na kabamentu di siman pasá tabatin peliger ainda ku e kandelanan lo a move den direkshon di áreanan turístiko kaminda tin hopi bishitante aworakí.
E kalidat di airu den parti Wèst di Canada ta na un nivel peligroso na e momentu aki. Dor di kandelanan di mondi e kantidat di huma den airu ta hasi halamentu di rosea hopi difísil. Segun e índise mundial pa kalidat di airu di momentu partinan di e region ta skor 350. Pa bo por hasi un komparashon e kalidat di airu standart na Lahore, e siudat ku e pió kalidat na mundu a skor 97 aña pasá pa su kalidat di airu.
Barkunan ku tin ku pasa dor di e kanal di Panamá tin ku warda kada bes mas largu. Dor di sekura i e nivel abou di awa tin un estrago serio a surgi. E kanal di Panamá ta un di e rutanan di transporte mas importante na mundu ya ku e ta evitá ku barkunan mester nabegá rondó di e kontinente di Suramérika. Dor di e sekura di algun siman kaba e nivel di awa de echo ta sigui baha.
Ta e barkunan mas chikitu so por pasa i asina mes e kantidat ku tin mag di pasa pa dia tambe ta limitá. Di momentu tin mas o ménos 160 barku ku mester warda pa nan por pasa. Segun agensia di prensa Bloomberg barkunan mester warda den promedio 4 dia pa nan por pasa, anteriormente esaki tabata 2 dia. Dor di e situashon aktual tin algun barku ku tin un retraso di mas di 20 dia.
E konosido lugá turístiko Tenerife, un isla Spañó, tambe ta senario di momentu di kandelanan di mondi kaminda mas o ménos 4500 hende mester a evakuá. Si e situashon no kambia probablemente mester evakuá mas persona.
Ta parse manera outoridatnan no tin kòntròl riba e kandela. Bombero i militarnan ta trahando duru pa dominá e kandela. Segun e presidente regional di e isla Fernando Clavijo ta e pió kandela den último 40 aña.
E kandelanan a kuminsá pegá ku pia di e volkan Teide. Dor ku akseso na e tereno ta difísil ta kasi imposibel kontené e kandela. Outoridatnan mester traha un plan lihé. Si e kandela sigui move den mesun direkshon esaki por yega na un vaye ku vários camping.
Outoridatnan ta spera di kontrolá e kandelanan promé ku wikènt. Pronóstikonan ta indiká ku ta bai hasi hopi kalor atrobe.
Sapunan fluoresente por kambia nan koló masivamente den blou, bèrdè òf oraño fèl. Esei tabata konosí kaba. Loke no tabata konosí ta ku ta trata di un forma sekreto di komuniká. Kada koló ta representá un mensahe. Asina e revistanan sientífiko BioRxiv i Sciencenews a publiká.
Dor di kambia di koló sapunan por komuniká ku otro dor di iluminá den sukú. Durante un investigashon sientífikonan a kompará e kolónan ku diferente tipo di lus. Nan a opservá sigur 151 sorto di sapu fluoresente na Brazil, Colombia, Ecuador i Perú.
Interesante ta ku e sapunan ta iluminá mas fèl ora ku nan yena nan boka ku airu. Ora a opservá e animalnan di serka por a nota ku e kolónan ta konsistí di strepi ku ta vária. E komportashon di e animalnan tambe ta kambia ora ku nan kambia di koló.
Por sierto ku iluminashon no ta algu di sapu só. Den último añanan a deskubrí vários otro animal manera platipus, salamander i sierto roedor.
Foka ta mantené distansia for di otro pa evitá kontagio di malesa. Asina Koninklijk Nederlands Instituut voor Onderzoek der Zee a konkluí. E organisashon a opservá gruponan di foka normal i foka shinishi den e konosido Waddengebied.
Einan a nota ku e animalnan normal ta drumi ku un distansha di den promedio 1 meter for di otro. Esnan shinishi na mas o ménos mitar di e mesun distansha. E konklushon ku ta pa evitá kontagio no ta apsoluto, pero e komportashon definitivamente ta notabel.
Ta asina ku foka shinishi ta parse di tin un resistensha fuerte kompará ku esnan normal. Ora tin malesa ta reina esnan shinishi no sa bira malu, pero esnan normal si.
Den e parti sùitwèst di Veluwe na Hulanda a bin haña un nèshi di wòlf ku probablemente a nase den mei di e aña aki. Ta pa promé biaha ku a registrá un nèshi di e animalnan den e region aki.
Esaki lo ta e di sinku nèshi registrá aktualmente na Hulanda. E famia aki ta biba den e region sùitwèst di Friesland i Drenthe. Esaki ta por sierto e mesun region kaminda resien a tira un wòlf mata despues ku esaki a ataká un kriadó di karné. E nèshi ta konsistí di 5 yu.
E ekspertonan ku ta sigui e animalnan a warda ku e notisia te ku awor pa wak promé si tur yu lo sobrebibí. Pues ta posibel ku Hulanda tin mas nèshi di wòlf na e momentu aki. Hulanda tin di momentu 8 teritorio kaminda tin wòlf ta biba.
E populashon di tigernan na Bhutan a krese te 131 ehemplar. E programa pa restourá e populashon di tigernan den e pais ta dunando fruta. Asina World Wildlife Fund (WWF) a publiká djasabra riba e dia internashonal pa protekshon di tiger.
Na Bhutan e animalnan tin un parke kasi mesun grandi ku Hulanda kaminda nan por biba trankil. Asina a konstatá algun ehemplar ku ta biba den áreanan na altura di 4000 meter. Delaster biaha ku a konta e animalnan na Bhutan tabata den 2015. Na e okashon ei a konta 103 tiger.
Enkuentronan entre humano i tiger ta skars na Bhutan. Pero na Nepal e programa a resultá asina eksitoso ku enkuentronan ku entre humano i tiger si a resultá den algun konfrontashon. Segun WWF mester traha riba un plan pa evitá esaki.
N’e momentu aki tin apénas 4500 tiger na mundu ku ta biba den naturalesa. Na otro paisnan manera India, Nepal, Rusia i China e populashon ta rekuperando poko poko pero sigur.
Di otro banda mester bisa ku na Malasia i Indonesia kos ta kana un poko mas difísil. Na Laos, Cambodja i Vietnam e animal a te asta disparsé kompletamente. E mayor menasa pa e animalnan ta keda tòg hende ku ta yag riba e animalnan pa hasi negoshi ku sierto parti di e animal.
Commander, e kachó hèrdèr Aleman di presidente di Merka Joe Biden, a morde sigur 7 kolaboradó di Kas Blanku. Commander tin mas o ménos mitar aña bibando den Kas Blanku, pero tin un komportashon basta agresivo di akuerdo ku The New York Post.
Den último 4 luna tabatin sigur 7 okashon kaminda Commander a morde hende, entre otro un kolaboradó di e servisio di siguridat. Asina tin skirbí den dokumentonan i e-mail di e ministerio di Asuntunan di Interior. Na un okashon e kolaboradó en kuestion mester a keda trasladá pa hospital pa tratamentu. Si konta okashonnan anterior for di 2021 aserka lo ta trata na total di 10 okashon ku e kachó a ataká hende.
Commander tin 2 aña i lo ta hañando training di komportashon na e momentu aki. E ruman di Commander, yamá Major, tambe mester a bandoná Kas Blanku aña pasá dor di komportashon agresivo. Pronto e rumannan lo ta huntu atrobe na Delaware, e estado kaminda Biden ta biba originalmente.
Sientífikonan Chines i Canades a deskubrí un fósil ku ta sugerí un mamífero mordiendo un dinosourio. Lo ta algu úniko ya ku semper e impreshon tabata ku mamífero no ta forma menasa pa dinosourio. E estudio ta publiká den e revista Nature.
E fósil tabata bou di investigashon for di 2012 ora a deskubrí esaki na e provinsia Chines Liaoning, un lugá kaminda tin hopi fósil volkanisá. E skèlètnan tabata práktikamente intakto. Despues di un serie di kálkulo a konkluí ku e fósil ta berdadero i lo tin mas o ménos 100 pa 125 mion aña.
E mamífero tin e tamaño di un pushi komun i koriente, loke tabata e tamaño máksimo pa mamífero den e époka ei. E presa ta un dinosourio bebi di e tipo psittacosaurus, un tipo ku tabata kome vegetal so. E diseño mas abou ta duna un impreshon di e look di e animalnan.
No ta na Kòrsou so nos a sinti’e. Ta bèrdat ku tin un ola di kalor sofokante ta pasando riba vários lugá rònt mundu. Nos ta repasá e situashon aktual di region pa region. Pasobra ta rèkòrt tras rèkòrt ta kibra den último simannan.
Si nos kuminsá opservá for di Asia bin den nos direkshon mester bisa ku partikularmente China ta registrá vários rèkòrt último tempu. Djadumingu atrobe. Riba e dia ei e pais a registrá un temperatura di 52.2 grado na e siudat Sanbao. Esei ta kasi 2 grado mas kalor ku e rèkòrt anterior. Pero esei mester keda konfirmá ainda pa World Meteorological Organization (WMO). Na Beijing a registrá temperatura riba 35 grado durante 27 dia konsekutivo. Na India, Bangladesh, Tailandia i Vietnam tambe a kibra vários rèkòrt. Na vários lugá na Asia a registrá 40 grado òf mas.
Pasando pa Oropa mester bisa ku partikularmente e paisnan den sùit manera Spaña, Italia i Gresia ta asotá pa kalor. Den vários parti tin un kódigo oraño òf kòrá emití relashoná ku kalor ekstremo. Asina a midi 41.8 grado na Roma, un rèkòrt pa e kapital Italiano. Na Sardinia a midi te asta 46 grado. Na Spaña a registrá 45 grado òf mas na vários sitio. Na Spaña i Gresia a surgi vários kandela di mondi tambe.
Na Áfrika partikularmente den Sahara ta registrá temperatura ekstremo. E kalor aki ta okashoná e temperatura ekstremo den parti nort di Áfrika i parti sùit di Oropa. Na Maroko i Algeria a registrá temperaturanan di 47.5 i 48 grado respektivamente.
Na Merka tambe ta registrá kalor ekstremo. Death Valley partikularmente ta aproksimando e temperatura mas haltu na mundu. E desierto, ku ta keda na California, a midi 53.3 grado riba djadumingu. Den un region pegá ku Death Valley a registrá asta 53.9 grado. Death Valley tin ketu bai e rèkòrt di temperatura mas haltu midí den historia. Einan a midi 56.7 grado den 1913. Na Texas a midi kasi 48 grado i na Phoenix (Arizona) temperaturanan di mas di 43.3 grado durante 19 dia konsekutivo.
Un malesa ku konsekuensha fatal a plaso largu ta menasando e populashon di turtuga den awanan rondó di Kòrsou. Alrededor di 80% di e animalnan ta sufri di Fibro Papillomatosis. Sea Turtle Conservation Curaçao den kolaborashon ku Jefferson University na Philadelphia ta investigando e fenómeno. Nos a kòmbersá ku Ard Vreugdemhil di Sea Turtle Conservation Curacao.
Outoridatnan di e provinsia Hulandes Drenthe a laga tira un wòlf mata djadumingu despues ku esaki a ataká un kriadó di karné. E hòmber a keda trasladá pa hospital. Ta pa promé biaha despues ku a señalá e animalnan den parti ost di Hulanda ku un atake riba hende a tuma lugá.
E insidente a tuma lugá den oranan tempran di mainta entre 7.00 i 8.00. E kriadó a nota ku un wòlf tabata ataká su karnénan i a bin kore ku n’e te ku e animal a mord’é. E insidente tabata motibu pa e burgemeester di e lugá duna òrdu pa mata e wòlf, ku ainda tabata riba e vèlt kaminda e karnenan ta biba.
Sientífikonan ta investigando e kurpa dje animal. Segun kálkulonan lo tin dos pareha di wòlf ta biba den e region di Drenthe. Un di e parehanan aki ya lo a haña un par di yu. Mayoria di nan ta konosí pa sientífikonan, pero ainda no a determiná ta kua a laga tira mata. Di momentu tin un investigashon andando pa determiná si e menasa tabata di tal índole ku mester a kaba ku e wòlf.
Tin un situashon di preokupashon relashoná ku e populashon di foka (esta zeehond) den Waddenzee na Hulanda. Asina Wageningen Marine Research a bisa NOS. E fokanan ta haña yu manera normal, pero pa motibunan deskonosí e yunan ta muriendo poko despues ku nan nase i esei por afektá e populashon.
For di añanan 90 e populashon a krese konsiderablemente, pero e desaroyo ei a stagna. Te asina leu no tin un investigashon tumando lugá pa determiná e kousa di e mortalidat bou di yu di foka. Wageningen Marine Research ta boga pa kuminsá lo mas pronto posibel ku esei. Lo mester saka afó kiko e animalnan ta komiendo òf kiko ta e situashon aktual di nan habitat.
Dolfein tambe ta subi nan tono di stèm ora nan ta komuniká ku nan yunan. Asina investigadónan di Woods Hole Oceanographic Institution na Massachusetts a konkluí despues di opservá 19 ehemplar femenino durante 30 aña den naturalesa pegá ku Florida.
Meskos ku serka hende, dolfein su tono lo ta subi ora nan ta komuniká ku nan yunan. Tambe nan ta imitá nan yunan ku nan stèm òf ripití nan. A opservá e mamanan tantu den serkania komo apartá di e yunan pa yega na e konklushon aki. A usa ekipamentu spesial pa midi e vários sonidonan ku e animalnan ta produsí. Na e mamanan tabatin asina yamá tags pegá pa registrá sonido i movementu.
E investigashon ta interesante pero no ta aklará dikon hende, i aparentemente dolfein tambe, ta subi nan tono di stèm ora nan ta papia ku baby chikitu. Te asina leu ta sospechá ku ta asin’aki mayornan lo ta sinti ku nan mester siña nan yunan papia dor di kopia nan tono mas tantu posibel. E investigashon ta publiká den e korant The Guardian.
Investigadónan na Universidat di Warwick na Inglatera a deskubrí ku makakunan di e sorto oran-utan por produsí dos sonido pareu ku nan boka, meskos ku beatboxers. Ta dos otro ser bibiente so mas riba e planeta aki por esey, esta para ku ta kanta i hende, pertikularmente e beatboxers bou di nos.
Pa e investigashon aki a opservá dos populashon na Borneo i Sumatra. Eynan a konkluí ku oran-utan ta kapas di produsí mas di un sonido alabes pa komuniká.
A registrá mas atake di orka riba barkunan di plaser. Na e okashon aki ta trata di un atake riba un barku di bela Hulandes ku tabata nabegá pegá ku Norwega. Asina Volkskrant a publiká djarason.
Manera nos a informá algun siman pasá tin un fenómeno straño den e laman entre Spaña i Maroko último tempu kaminda orka ta ataká barkunan di plaser. For di 2020 a registrá sentenáres di atake di orka riba barku, partikularmente entre Spaña i Maroko. E orkanan ta ataká generalmente e timon di barkunan di bela. E forsa físiko di e orkanan ta sufisiente pa okashoná basta daño na e timon i te asta buta e barkunan bòltu òf senk.
No tin un splikashon eksakto kiko ta okashonando e komportashon straño aki bou di e animalnan, pero un kos ta sigur: e orkanan ta ataká di un forma dirigí. Den e kaso spesífiko aki ta difísil determiná kiko ta e kousa, pasó no ta probabel ku e ehemplar ku a ataká e barku Hulandes ta pèrtenesé na e populashon ku ta biba entre Spaña i Maroko.
