by Webmaster | 06/09/2023 | Business & Economy
Preis di petroli a registrá djamars e nivel mas haltu den último 10 luna, pero a baha un poko atrobe riba djarason. Un barí di petroli Brent a kosta djamars un tiki mas ku 90 dòler i a kaba siguiente dia na mas o menos 89 dòler. Asina Business Insider ta informá.
E subida di preis di petroli a sigui despues di un deklarashon di e agensia di notisia Saudí, ku a indiká ku Arabia Saudita i Rusia lo prolongá nan limitashon riba produkshon di petroli ku tres luna mas te na desèmber.
E paso aki no tabata antisipá pa merkado mundial. Na kabamentu di aña e produkshon di krudo Saudí lo a keda figo pues na 9 mion barí pa dia pa sigur seis luna. Arábia Saudita a limitá su produkshon di petroli den yüli mas ku otro miembronan di OPEC.
Analistanan tabata spera ku e Saudinan lo a subi nan produkshon di petroli bèk entrante sèptèmber. E prolongashon ta nifiká probablemente un défisit di 1.5 mion barí pa dia nénos riba merkado mundial den último kuartal di 2023. Si no bin un kambio den esaki pa fin di aña e preis di Brent por a subi te na 95 dòler pa barí.
by Webmaster | 05/09/2023 | Naturalesa
Emishon di gasnan dañino ta afektá eksistensha di ber polar. E ponensia aki ya tabata konosí, pero awor e prueba sientífiko a keda entregá. Investigadónan di Polar Bears International, University of Washington i University of Wyoming a publiká nan estudio den e revista Science.
E investigadónan a logra visualisá e relashon entre emishon di gasnan dañino i e kantidat di dia pa aña ku no tin eis na polo nort. Ya tabatin algun verano kaminda no tabatin eis mas riba polo nort durante zomer. Si e situashon kontinuá bernan polar lo no tin akseso mas na nan presa.
Normalmente ber polar ta kome entre otro foka i walrùs pero dor di e situashon aktual nan mester keda riba tera den e parti mas ekstremo nort di e kontinente Nort Amérika kaminda nan no tin kuminda. Esaki ta afektá futuro generashonnan di ber polar tambe.
by Webmaster | 05/09/2023 | IT, Apps & Social Media
E aplikashon di video TikTok ta bai warda e datonan di usuarionan Oropeo den un datacenter nobo na Dublin, Irlanda. Segun e ret sosial asin’akí e ta den kumplimentu ku reglanan di privasidat.
E regulashon Oropeo ta stipulá ku kompanianan no por simplemente warda dato di hende pafó di Oropa. Esei ta pèrmití solamente si e lei di privasidat di e respektivo pais ta por lo menos mesun severo ku na Oropa.
Anteriormente TikTok tabata warda e datonan di usuarionan Oropeo na Singapur i Merka, pero den e paisnan ei e reglanan di privasidat ta ménos severo. Esei ta nifiká ku tin un posibilidat ku, por ehèmpel, e gobièrnunan ei por pasa dor di dato di hende.
Den e datacenter Oropeo “solamente empleado aprobá tin akseso limitá na sierto dato” di akuerdo ku TikTok. Aparte di e datacenter na Dublin, TikTok ta trahando datacenter tambe na Norwega i un otro sitio na Irlanda. E sede Oropeo di TikTok tambe ta lokalisá na Dublin.
by Webmaster | 05/09/2023 | Naturalesa
Despues di un par di siman di kalor ekstremo kompañá pa kandelanan di mondi awor vários parti di Gresia ta senario di kaida di awa pisá i inundashon okashoná pa e tormenta Daniel. Te asina leu outoridatnan ta papia di un morto i un persona pèrdí.
Habitantenan di e regionnan afektá mester keda paden di akuerdo ku outoridatnan. No opstante e atvertenshanan di antemano vários outmobilista a subi kaya tòg i keda pegá den nan vehíkulo dor di e nivel di awa ku a subi. E persona pèrdí ta un outomobilista ku a skapa su outo pero despues e forsa di awa a bai ku n’e.
Ta asina ku e nivel di awa di e riu mas grandi den e region ta tres meter mas haltu ku normal. I segun pronóstikonan awa lo sigui kai riba djamars i djarason.
by Webmaster | 04/09/2023 | Naturalesa
Komishon Oropeo ta evaluá si mester limitá e protekshon di wòlf na sierto lugá. Di momentu e espesie ta protehá via regulashon severo, pero posiblemente esaki lo kambia. No ta e intenshon en todo kaso pa mata nan masalmente.
E protekshon aktual ta limitá práktikamente tur akshon pa atendé ku eventual molèster ku e animalnan por kousa. Asina, por ehèmpel, no ta permití pa tira riba nan òf trasladá nan. Tampoko ta pèrmití hasi daño na nan habitat.
Kriadónan di bestia ta kontra di e come-back di e animal. Partikularmente kriadó di karné ta konfrontá ku atake riba nan animalnan. I no ta semper nan por protehá nan bestia debidamente.
Komishon Oropeo ta den konsulta ku entre otro sientífiko i interesadonan pa nan opinion tokante e kantidat di wòlf i e konsekuenshanan di esaki. Nan tin te ku 22 di sèptèmber pa bin ku un otro proposishon.
Despues di esaki, e komishon lo tuma un desishon pa kambia e status di protekshon di wòlf den Union Oropeo. Pero manera indiká no tin ningun plan pa pèrmití yagmentu riba nan. Parlamentu Oropeo a aprobá na novèmber di aña pasá un resolushon pa limitá protekshon di e espesie.
by Webmaster | 04/09/2023 | Cinema News
Barbie ta di momentu e pelikula mas eksitoso e aña aki. For di su lansamentu na yüli, Barbie ta un éksito rotundo i e pelikula a kibra vários rèkòrt.
E pelikula dirigí pa Greta Gerwig a logra un benta di 1360 mion dòler na benta di ticket. Ku esaki, Barbie a superá e pelikula The Super Mario Bros. Movie ku a generá 1350 mion dòler.
E pelíkula a kibra varios rekòrt kaba. Barbie ta e promé pelikula dirigi pa un muhé ku a alkansá un benta 1000 mion dòler na benta di ticket. I awor pues Barbie ta e título mas éksitoso di e aña aki den sine Merikano. E papelnan prinsipal ta wordu interpretá pa Margot Robbie i Ryan Gosling.
by Webmaster | 04/09/2023 | Cinema News
E presentashon di pelíkulanan di e direktornan Roman Polanski i Woody Allen na e festival di film di Venesia tabata senario di resistensha. Un grupo di manifestante a reuní na e festival ku pankarta ku teksto di protesta kontra e direktornan.
Segun e manifestantenan e organisadónan ta brinda un podio na violadó. Asina e manifestantenan ke sa si e premio mayó (esta un Leon di Oro) lo bai pa un violadó.
Polanski a keda kondená pa a tene relashon ku un mucha di 13 aña i ta akusá pa varios muhé di malkondukta seksual. Su pelíkula ‘The Palace’ ta estrená na Venesia, aunke mester bisa ku e direktor di nobenta aña no tabata presente.
Den kaso di Woody Allen su yu muhé ta akus’é di abusu. Su pelikula ‘Coup de chance’ tambe a estrená djaluna na e festival di film. Allen si tabata presente.
Por sierto ku e pelikulanannan di e direktornan kontroversial aki no tin chèns pa gana un Leon di Oro. Ámbos pelíkula ta drai lòs for di e otorgashon di premio i no ta den kontienda.
Ta posibel tambe ku e pankartanan ta referí na e direktor Franses Luc Besson, kende anteriormente a wòrdu akusá di abuso seksual. Su pelikula ‘Dogman’ si ta kontienda pa un Leon di Oro.
by Webmaster | 01/09/2023 | Siensia
E ministerio di Defensa Merikano a lansa un website pa informá riba desaroyonan rondó di UFO, esta ophetonan bulando no identifiká. E website tin un sekshon spesial kaminda militarnan por raportá kualke fenómeno ku no tin splikashon.
Ta asina ku for di 2020 ora ku gobièrnu di Merka a publiká algun video ku pilotonan a graba tin hopi interes bou di públiko. Den e grabashonnan ei por mira ophetonan ku ta move hopi lihé di un forma ineksplikabel.
Por sierto ku Merka no ta usando e abreviashon UFO – esta Unidentified Flying Object – mas. Ta papia awor di UAP kua ta para pa unidentified aerial phenomenon (esta fenómeno aéreo no identifiká).
Riba e website por haña informashon riba kasonan ku no tin splikashon ku potrèt i video. Tambe por haña rapòrtnan ofisial, transkripshon i komunikado di prensa.
Por lo pronto ta militarnan so por entregá material ku imágennan ku no tin splikashon. Tin plannan pa hasi esaki disponibel pa públiko tambe, pero ainda no tin un fecha fiho pa esaki.
by Webmaster | 01/09/2023 | Naturalesa
Korte di Gelderland no ta pèrmití pa tira ku rifel di paintball riba un wòlf si nan yega muchu serka di hende. Asina NOS ta informá. Djabièrnè un wes a disidí ku no tin un motibu bálido pa hasi esaki.
E provinsia ke pèrmití pa tira e animalnan ku paintball pa nan haña miedu di hende i asina evitá konfrontashon entre humano i animal. Pero segun e korte vários pregunta te ainda no a haña un kontesta satisfaktorio. Preguntanan manera si ta trata di e mesun animal òf kuantu di nan tin den e área kaminda e provinsia ke pèrmití esaki.
Tambe e wes a pidi e maneho di provinsia pa buska medidanan alternativo. Gelderland tin 6 siman pa duna kontesta konkreto riba e preguntanan di korte.
by Webmaster | 01/09/2023 | Internashonal
Èks promé minister di Finlandia Sanna Marin a bandoná polítika. Djabièrnè Marin a tuma retiro komo lider di partido sosial demókrata di e pais. Sanna Marin por lo pronto tin e rèkòrt di promé minister femenino mas yòn den historia. E tabatin apénas 34 aña ora el a bira promé minister di Finlandia den 2019.
E tabata hopi popular riba social media i tabata paresé riba e kaft di revistanan prominente manera Vogue i Time Magazine. Bou di su guia Finlandia a bira miembro di OTAN ora nan pais bisiña Rusia a invadí Ukrania. Marin ke biba un bida privá atrobe.
El a pèrdè hopi simpatia sinembargo durante su gobièrnu relashoná ku e fiestanan ku e tabata organisá den e kas reservá p’e komo promé minister. Asina un grabashon di dje bailando na un di e fiestanan ei a bai rònt mundu lantando bastante krítika. Dado momentu a èksigí te asta pa e hasi un tèst si e ta usa droga òf nò.
by Webmaster | 31/08/2023 | Internashonal
Na Gran Bretaña un hòmber di 54 aña a demandá BBC pa un video den kua el a paresé aksidentalmente. E video ta disponibel riba YouTube i tin miónes di view. E hòmber ta haña ku e tin derechi riba e parti di e sèn ku BBC a generá ku e video.
Guy Goma, manera e yama, a solisitá na BBC den 2006 pa un funshon den e departamentu di IT. El a mèldu na resepshon kaminda e mester a warda te ora nan bin busk ‘é pa su afsprak. Na mes momentu e asistentenan di un programa a konfundi’é ku un invitado i a lag’é tuma asiento den un programa live.
Na e momentu ei el a realisá ku tabata un eror pero ya e programa a bai den aire. Pa kolmo el a rospondé e preguntanan di e presentadó di e mihó forma ku e tabata por. Poko despues BBC a ripará e eror. E grabashon di e insidente naturalmente a bira viral.
Awor ku e video a generá miónes di view e hòmber ta argumentá ku BBC mester pag’é un paarti di e sèn ku e video a generá. Por sierto ku e ‘sollicitatiegesprek’ nunka a tuma lugá. E hòmber ta traha di momentu na un instansha pa mucha ku problema ku siñamentu.
by Webmaster | 31/08/2023 | Internashonal
Por lo ménos 73 persona a pèrdè nan bida den un kandela den un edifisio di 5 piso na e siudat Surafrikano Johannesburg. Sigur 52 persona ta heridá. E chèns ku lo haña mas sobrebibiente ta nihil di akuerdo ku outoridatnan.
E kousa di e kandela no ta konosí. E edifisio lo tabata sirbi komo un lugá di opvang pa hende sin dak riba nan kabes. Alrededor di 200 persona lo tabata bibando einan.
E edifisio tabata yen di provishon improvisá i kosnan ku e habitantenan tabata kolekshoná. Esaki lo a stroba hopi víktima hui for di e kandela. E opstákulonan aki tabata forma un problema tambe pa timnan di reskate por hasi nan trabou.
Den e respektivo bario tin mas edifisio den e estado aki kaminda hende sin dak riba nan kabes ta buska un lugá pa drumi.
by Webmaster | 31/08/2023 | Internashonal
Despues di Reino Uní, Italia i Merka awor Nova Zelandia tambe ta investigando un hòmber Canades ku a manda paketenan pa hende ku kier a buta un fin na nan bida. E sospechoso ta Kenneth Law di 57 aña ku ya ta detené na Canada.
Law tabata traha komo kòki na un hotel na Toronto kaminda polis a deten’é den mei. E hòmber lo a konfesá na un agente undercover ku el a yuda hopi hende buta un fin na nan bida ku un supstansha ku el a bende nan.
Tin sospecho ku e hòmber lo tabatin kliente den por lo ménos 40 pais kaminda el a manda 1200 pakete. Den Reino Uní tin sospecho ku 88 kaso di hende ku a buta un fin na nan bida ta relashoná ku e supstansha ku e hòmber aki tabata fasilitá. Den sèptèmber e hòmber su kaso ta bin dilanti.
by Webmaster | 30/08/2023 | Naturalesa
Orkan Idalia a yega kosta di Florida djarason. Ounke ku e forsa di e tormenta a baha bastante te na kategoria 1, esei no ta kita ku e habitantenan di Florida mester keda tene koutela. E tormenta a yega djarason mainta na Taylor County i trese inundashon i bientu basta fuerte ku n’e ku a basha hopi palu abou.
Pa banda di 11or asina 260 mil hogar a pèrdè koriente. Te asina leu tin un morto konfirmá dor di un aksidente den tráfiko. E tormenta lo sigui move segun pronóstikonan den direkshon di South Carolina, North Carolina i Georgia. Di momentu e forsa di bientu di Idalia ta kalkulá na 90 mia pa ora. Hopi buelo pa Florida a keda kanselá.
by Webmaster | 30/08/2023 | Business & Economy
Burger King na Merka mester paresé den korte relashoná ku e imágennan di e konosido Whopper. Riba potrèt e ta mustra hopi mas yená ku den realidat, di akuerdo ku klientenan malkontentu ku e kadena di restorant. Segun e demandantenan e Whopper ta parse 35% mas grandi riba potrèt ku den realidat.
Tambe lo e tin mitar di e kantidat di karni manera propagandanan ta primintí, kaminda por mira ku e karni ta mas hanchu ku e pan. E kompania ta desmentí e akusashonnan, pero mester paresé den korte tòg pasó un wes a argumentá ku engaño di kliente ta un tema serio.
No ta promé biaha ku ta demandá un kadena restorant. Anteriormente kadenanan manera McDonald’s i Taco Bell tambe a keda demandá pa e imágen ku nan ta presentá di nan produktonan.
