E kantidat di mortonan dor di e kandelanan di mondi na Hawaii a subi te na 96 persona. Te ainda outoridatnan ta buskando personanan pèrdí. Entretantu outoridatnan a emití un komunikado pidiendo turista pa no bishitá e islanan i si ta posibel pa anulá biahenan ku no ta nesesario. Asina The Guardian ta informá.
Den un entrevista ku BBC e konosido aktor Hawaiano Jason Momoa a reiterá e petishon aki. Segun e aktor tur loke a sobra mester keda reservá pa habitantenan di partikularmente Maui kaminda e mayor daño a tuma lugá. Lo tin ketu bai turista pasando fakansi entre e trabounan di reskate.
Riba imágennan ku ta sirkulá riba retnan sosial bo por haña un impreshon di e devastashon. Tur monumento di e siudat históriko Lahaina na e isla Maui a disparsé pa semper den e kandelanan.
Sapunan fluoresente por kambia nan koló masivamente den blou, bèrdè òf oraño fèl. Esei tabata konosí kaba. Loke no tabata konosí ta ku ta trata di un forma sekreto di komuniká. Kada koló ta representá un mensahe. Asina e revistanan sientífiko BioRxiv i Sciencenews a publiká.
Dor di kambia di koló sapunan por komuniká ku otro dor di iluminá den sukú. Durante un investigashon sientífikonan a kompará e kolónan ku diferente tipo di lus. Nan a opservá sigur 151 sorto di sapu fluoresente na Brazil, Colombia, Ecuador i Perú.
Interesante ta ku e sapunan ta iluminá mas fèl ora ku nan yena nan boka ku airu. Ora a opservá e animalnan di serka por a nota ku e kolónan ta konsistí di strepi ku ta vária. E komportashon di e animalnan tambe ta kambia ora ku nan kambia di koló.
Por sierto ku iluminashon no ta algu di sapu só. Den último añanan a deskubrí vários otro animal manera platipus, salamander i sierto roedor.
E film Barbie ta ketu bai e pelíkula mas mirá den sinenan Merikano. Asina entre otro The Hollywood Reporter ta informá. Direktor Greta Gerwig ta e promé direktor femenino den historia ku a dirigí un pelíkula ku a generá mas di mil mion dòler. De echo ya e ta konsiderá e direktor femenino ku e título mas eksitoso den historia.
Den wikènt tras di lomba Barbie a generá 33.7 mion dòler. Entretantu e kapital generá pa e pelíkula ta kalkulá na 526 mion dòler na Merka só i 1200 mion dòler rònt mundu. Oppenheimer a sigui Barbie na di dos lugá, generando 18.8 mion dòler. Otro pelíkula ku di momentu ta hala hopi atenshon ta Meg 2: The Trench ku siman pasá tabata na di dos lugá.
Twitter ta definitivamente algu di pasado. Propietario Elon Musk a buta tur opheto ku e logo di e para na benta, inkluyendo e bòrchi grandi parti dilanti di e sede di e kompania. Pa kita esaki Musk mester haña pèrmit ainda paso e trabounan lo tuma lugá den espasio públiko. Por sierto ku esun ku ke kumpra e bòrchi lo mester kubri e gastunan tambe pa kit’e.
Na total ta trata di 584 artefakto manera mesa, pinturanan di Tweet ku a bira viral i asta algun instrumento musikal. E artefaktonan lo ta na benta a partir di 25 dòler via un findishi online. E findishi ta planiá pa 12 di sèptèmber. Mas informashon lo sigui.
X, e kompania anteriormente konosí komo Twitter, a tuma su promé paso pa transformá den un app ku por tur kos. X ta bini awor ku e posibilidat di videocall i transferensha di sèn. Asina e direktor di X Linda Yaccarino a bisa den un entrevista na CNBC. Manera ta konosí Yaccarino a kuminsá resien komo direktor di Twitter pa asina transformá e kompania.
Segun rumornan Elon Musk, proietario di Twitter (awor X), lo ke transformá X den un all-in-one app komparabel ku WeChat na China. Esei ta un plataforma ku den su base ta un app pa chat, pero ku hopi funshon adishonal, manera online shopping, notisia, fiansa i bestèl kuminda òf un taksi. Konhuntamente e funshonnan ei ta forma e super app WeChat.
X ke bai pues den e mesun direkshon pa bira un plataforma ku interaktividat sin límite. I mas ku klaro ta bai tin un ròl tambe pa inteligensha artifisial.
Den yüli Rusia a generá mas entrada for di benta di petroli. Esaki despues ku e pais a yuda pusha e preis pariba dor di entre otro baha produkshon, di akuerdo ku International Energy Agency. Espektativa ta ku Rusia lo kontinuá esaki te ku sèptèmber.
Di momentu Rusia ta bende su petroli partikularmente ku India i China. Segun e International Energy Agency 4 den kada 5 transporte a bai den direkshon di e paisnan ei. Paisnan den parti wèst a práktikamente kongelá importashon di petroli for di Rusia.
Na total Rusia a produsí alrededor di 7.3 mion barí pa dia ku ta bon pa mas o ménos 15 mil mion dòler den yüli.
Resien su videonan riba e orígen di Jonnhy Cake i saté ku batata a bai viral den un par di dia! E videonan ta produsí pa Trevor Bakhuis, produktor i presentadó di e programa di historia Kompas.
Ken e ta? Kiko ta motiv’é? Kon e ta investigá? Ku mesun entusiasmo ku e ta presentá su programa el a sinta kòmbersá ku 5W Press.
X, e kompania anteriormente konosí komo Twitter, mester paga un multa di 350.000 dòler. E kompania a tarda ku suministro di informashon na korte relashoná ku un investigashon kontra èks presidente di Merka Donald Trump.
Ta trata aki di e investigashon si Trump a trata di influenshá e resultado di elekshon den 2020. Na yanüari fiskal a haña aprobashon pa solisitá informashon riba e account di Twitter di e èks presidente. Wes a konsiderá ku tabatin sufisiente motibu pa kontrolá e account, pero no ta konosí kiko eksaktamente fiskal ta buskando.
X (Twitter) a apelá i indiká 4 dia despues ku e plaso pa pasa e informashon a vense ku e no ta bai desvelá e informashon. E apelashon a keda rechasá, pero no ta konosí si e plataforma ta bai koperá òf nò. Aparte di esei mester bisa ku miéntras e account di Trump ta disponibel atrobe, Trump no a bolbe usa esaki mas.
E seremonia pa otorgashon di premionan Emmy a keda posponé te 15 di yanüari. Debí na e wèlga di trahadónan i aktornan na Hollywood ya tabata antisipá ku lo a posponé e evento. E nominadonan pa e premionan Emmy ta konosí for di yüli. E premionan lo keda otorgá pa produkshonnan ku a sali na televishon Merikano entre 1 di yüni 2022 i 31 di mei 2023.
Te asina leu no ta hasi menshon di kambionan notabel. Manera ya ta konosí serienan manera Succession i The White Lotus ya por konta ku mayoria premio konsiderando ku nan ta nominá den tur kategoria.
Pa loke ta toka e wèlga mester bisa ku ya esaki ta pasando su di 100 dia. Mayoria produkshon di Hollywood na e momentu aki ta sea anulá òf posponé.
Miónes di aña pasá nos planeta ruman Mars tabatin diferente temporada, meskos ku nos planeta. Asina sientífikonan di e universidatnan di Lyon i Toulouse na Fransia a konkluí a base di imágennan di e eksplorador Merikano Curiosity ku ta kore riba e planeta kòrá for di 2012.
E no ta nifiká mesora ku tabatin bida, pero ku e sirkunstanshanan tabata adekuá pa desaroyo di bida i evolushon manera riba nos planeta. E parti eksterior di nos planeta Tera ta konsistí di plachinan ku ta schuif konstantemente i ku ta okashoná temblor i aktividat volkániko. Riba Mars e fenómeno ei no ta tuma lugá i pa e motibu ei ta relativamente fásil pa haña spornan fósil ku ta revelá kambionan ku a tuma lugá den transkurso di añanan.
For di e imágennan di Curiosity ta parse ku tabatin lago i riu riba Mars. E imágennan ta mustra depósito di salu, meskos ku esnan na Suramérika riba nos planeta. Esakinan ta forma ora awa evaporá. Esei ta segun e sientífikonan prueba ku Mars a konosé temporadanan di sekura i humedat.
Te asina leu siensia ta konkluí ku e sirkunstanshanan aki ta adekuá pa formashon di bida i evolushon. E resultadonan ta publiká den e revista sientífiko Nature.
Foka ta mantené distansia for di otro pa evitá kontagio di malesa. Asina Koninklijk Nederlands Instituut voor Onderzoek der Zee a konkluí. E organisashon a opservá gruponan di foka normal i foka shinishi den e konosido Waddengebied.
Einan a nota ku e animalnan normal ta drumi ku un distansha di den promedio 1 meter for di otro. Esnan shinishi na mas o ménos mitar di e mesun distansha. E konklushon ku ta pa evitá kontagio no ta apsoluto, pero e komportashon definitivamente ta notabel.
Ta asina ku foka shinishi ta parse di tin un resistensha fuerte kompará ku esnan normal. Ora tin malesa ta reina esnan shinishi no sa bira malu, pero esnan normal si.
Pa di dos biaha sientífikonan Merikano di Lawrence Livermore National Laboratory a logra generá energia èkstra dor di fushon nuklear. Esaki siguiendo pues un eksperimento den desèmber último. Na e okashon aki e sientífikonan a asta logra generá mas energia èkstra.
E di dos tèst a tuma lugá na kabamentu di yüli. Motibu dikon awor numa nos ta tende di e resultadonan ta dor ku mester a kompará e resultadonan di e dos tèstnan ku otro.
Pa e tèst aki e sientífikonan a dispará 192 laser ku 2 megajoule na energia den un silindro. Esaki ta okashoná un reakshon di fushon den e kombustibel generando asina hopi mas energia ku despues por usa pa generá koriente.
Si siensia logra aselerá e proseso aki, nos ta un paso mas serka di energia relativamente limpi i duradero. Kontrali na fishon nuklear (ku i), fushon nuklear (ku u) no ta laga desperdisio radioaktivo atras. Pero por dura algun dékada ainda promé ku nos por hasi uso masal di fushon nuklear pa konsumo general.
Hawaii tambe ta senario di kandelanan di mondi feros na e momentu aki. Algun siudadano a drenta laman pa hui di e kandela wardano wardakosta bin reskatá nan.
Outoridatnan a yama estado di emergensha i mobilisá warda nashonal, pero e trabounan ta kana ku hopi difikultat dor ku liñanan di komunikashon i koriente ta plat.
E sektor di kuido riba e isla Maui ta sobrekargá ku pashèntnan ku sea problema di rosea òf kimá na kurpa. Mester evakuá hopi hende i no tin transporte disponibel.
E siudat Lahaina den parti nortwèst di Maui kaminda hopi edifisio históriko ta ubiká a keda kompletamente destruí.
Prins Harry i su kasá Meghan huntu ku Netflix ta bai produsí un vershon sinematográfiko di e buki Meet Me at the Lake. E pareha a kumpra e derechinan pa traha e film huntu ku Archewell Productions. E buki ta skirbí pa Carley Fortune i a sali den mei di e aña aki. E buki ta konta e kuenta di un dama ku ta haña e amor di su bida despues ku su mama a fayesé den un aksidente di outo.
E tabloid Britániko The Sun a raportá anteriormente riba rumornan pa un pelíkula, pero awor ta sigur. Ta promé biaha ku e prens i su kasá ta embolbé den produkshon di un film. E pareha tin un deal ku Netflix for di 2020 kaminda nan a akordá di produsí vários dokumental, film i serie. Te asina leu nan a produsí dos dokumental di kua un serie di 6 episodio kaminda nan ta papia ampliamente di i mustra nan bida privá.
Un grupo di hacker na Rusia a hiba un atake riba vários website Hulandes i logra baha esakinan. Ta trata entre otro di e website di Maastricht Aachen Airport i e asosiashon di kompanianan di transporte públiko ku no tabata aksesibel djaluna.
Ta trata di un asina yamá DDOS attack, kaminda e server di e website ta keda inundá ku traffic hasiendo esaki inaksesibel pa otro usuario. Pa djaluna anochi e website di e airport di Maastricht tabata funshoná atrobe i operashonnan por a kontinuá kompleto atrobe. E atake en todo kaso no tabatin efekto riba e tránsito aério. Meskos ta konta pa e kompanianan di transporte públiko.
E atake lo ta konsekuensha di e desishon di Hulanda pa sostené Ukrania ku barku i otro material militar. E grupo NoName0571 ta tras di e atake i ta responsabel pa vários atake sibernétiko riba aliadonan di Ukrania. Asina tabatin atakenan tambe riba website di De Rechtspraak, Eerste Kamer i e hafanan di Rotterdam, Amsterdam, Den Helder, Eemshaven/Delfzijl i Vlissingen/Terneuzen. Na e okashonnan ei e atakenan tampoko a afektá e operashonnan diário di e respektivo instanshanan.
