by Webmaster | 08/08/2023 | Internashonal
Mas o ménos 1400 persona mester a evakuá den parti sùit di Portugal relashoná ku kandelanan di mondi feros. Mas di 850 bombero ta mobilisá pa kombatí e kandela. E kandela a kuminsá djasabra pegá ku e lugá Odemira, un siudat pegá ku e kosta sùit dje pais.
E kandelanan ta ekspandé den direkshon di e region Algarve, un di e lugánan mas turístiko di e pais. Portugal i Spaña ya ta pasando dor di e terser ola di kalor di e verano aki.
Djaluna a midi temperaturanan ku a alkansá 46,4 grado na Portugal, e temperatura mas haltu midí e aña aki.
by Webmaster | 04/08/2023 | Internashonal
Entrante djabièrnè hopi artefakto i propiedat di defuntu kantante Freddie Mercury di e konosido banda Queen a bai findishi. Pa e motibu ei e portanan di kas di findishi Sotheby’s na Londen lo ta habri un luna largu pa interesadonan.
Den e galeria tin mas di 1400 item provenientew di e kas di Freddie Mercury, entre nan e piano riba kua el a komponé vários di su hitnan mas grandi, inkluyendo Bohemian Rhapsody i Barcelona. Ekspertonan ta pronostiká ku e instrumento lo generá entre 2 pa 3 mion pound.
Mas aleu tin vários paña, potrèt original, buki, wega, pintura, ornamentu i e kolekshon di disko di Freddie Mercury. E sèn generá ta destiná entre otro pa proyektonan di karidat.
by Webmaster | 04/08/2023 | Business & Economy
E kompania di transporte via kònteiner Maersk tambe ta sinti e efektonan di e situashon ekonómiko rònt mundu. E kompania ku sede na Dinamarka ta antisipá riba un pèrdida konsiderabel e aña aki i ta tene kuenta ku un kontrakshon di 4%. Anteriormente e kompania tabata antisipá riba 2.5%.
Dor di e inflashon haltu di momentu konsumidornan ta kumprando ménos produkto. Aparte di esei produktornan ta deshasí di stòk eksistente promé pa nan por krea stòk nobo. Konsekuentemente tin ménos transporte di bienes entre e ekonomianan mas fuerte.
Pa bo tin un indikashon di e embergadura di e situashon: Maersk so ta para pa mas di 16% di e transportenan di kònteiner rònt mundu. Aña pasá tabata un bon aña pa e mundu di transporte ku kònteiner ora ku mundu a kuminsá rekuperá di e impakto di e pandemia di Covid-19, sinembargo e subida mundial di inflashon a para e desaroyo aki.
by Webmaster | 04/08/2023 | Business & Economy
E preis mundial di alimento a subi pa promé biaha atrobe den 3 luna. Den promedio preisnan di alimento rònt mundu a subi ku 1.3%. Mester bisa aserka si ku e frakaso di e deal di grano entre Rusia i Ukrania no ta e motibu prinsipal pa e subida aki. Wer ekstremo i e efektonan di esaki riba kosecha tambe a hunga un ròl.
Asina e parti sùit di Oropa tabata konfrontá ku sekura i China ku kaida pisá di awa. Tambe e preis di zeta vegetal a subi ku 12%. India ta eksportá ménos aros na e momentu aki tambe, loke ta buta e preis di aros na e balor mas haltu den último 10 aña. Asta Hulanda ta konfrontando problema ku kosecha di chèri i batata dor di efektonan di wer ekstremo.
E asina yamá Food and Agriculture Organization di Nashonnan Uní a atvertí dos siman pasá kaba pa e senario aki ora ku palabrashonnan entre Rusia i Ukrania pa sigui pèrmití transporte di alimento den Mar Pretu a frakasá. E preokupashon pa falta di alimento den sierto parti di mundu ta real na e momentu aki.
by Webmaster | 03/08/2023 | Siensia
E teleskop James Webb a kapta imágennan impreshonante di e asina yamá Renchi di Neblina, un neblina planetario na un distansha di 2600 aña di lus for di nos. E neblina ta konosí pa su forma di ‘donut’ i kolónan bèrdè i ros klaro. E imágennan ta disponibel riba e website di Universidat di Manchester i mester bisa ku e klaridat di e imágennan ta hopi impreshonante i detayá.
E Renchi di Neblina ta resultado di un strea ku a muri ku despues a laga tur gas ku e tabata tene skapa bai den espasio i kubri e planetanan den serkania. Esei ta splika e forma di e fenómeno. Loke ta hasi e imágennan èkstra interesante ta ku e region interior di e neblina ta hopi skèrpi.
by Webmaster | 03/08/2023 | IT, Apps & Social Media
Si ta na e departamentu di supervishon na China denter di poko tempu muchanan bou di 18 aña na China no ta haña mas ku dos ora akseso na internet. E supervisor Chines entretantu a traha un proposishon pa implementashon. Ta trata di un kontinuashon di un maneho ku China ta hiba pa un par di aña kaba.
E reglanan proponé ta bai asina leu ku muchanan bou di 8 aña no ta haña mas ku 40 minüt akseso na internet. Muchanan den e edat di 8 pa 16 aña ta haña pa mas tantu 1 ora akseso na internet. Hóbennan entre 16 i 18 aña ta haña 2 ora akseso. Entre 10or di anochi i 6or di mainta menornan di edat no tin akseso na internet.
Fabrikantenan di tablet i smartphones na China ta obligá na inkorporá e limitashonnan aki pa usuarionan di internet por kumpli ku e reglanan. Ta asina si ku mayornan ta haña e posibilidat pa desaktivá e limitashonnan di tempu. Ta antisipá ku hopi mayor lo hasi uso di e posibilidat ei. Aparte di esei e medidanan aki ta rekerí hopi esfuerso i kapital di plataformanan di internet na China.
Por lo pronto ta trata di un proposishon, pues no tin klaridat si gobièrnu di China berdaderamente lo implementá e reglanan aki. China ta hiba un maneho pa promové i stimulá un uso sano di internet i alabes kombatí adikshon na internet.
No ta promé restrikshon ku gobièrnu di China ta imponé. For di 2021 muchanan tin pa mas tantu 3 ora pa siman akseso na online games i for di aña pasá nan no tin akseso mas na internet despues di 10or pa wak livestreams.
by Webmaster | 03/08/2023 | IT, Apps & Social Media
Nunka e kompania Nintendo a hasi mes tantu ganashi manera den e di dos kuartal di e aña aki. Den último tres luna Nintendo a gana alrededor di 1300 mion dòler.
Motibu prinsipal pa esaki ta e ganashi generá for di benta di e game Zelda: Tears of the Kingdom. For di su lansamentu den mei Nintendo a bende 18.5 mion kopia di e game. E éksito di Zelda tabatin un efekto positivo tambe riba e benta di e console Nintendo Switch. Na total Nintendo a bende 3.9 mion unidat di Switch.
Loke a kontribuí pa un gran parti tambe ta e éksito di e pelíkula The Super Mario Bros Movie. Mundialmente 168 mion persona a bai wak e film.
Konsekuentemente e resultado komersial di Nintendo a subi di 2160 mion dòler aña pasá te 3230 mion dòler e aña aki. Tambe tin rumornan ta bai rònt ku Nintendo ta diseñando un console mas avansá ku Nintendo Switch, pero detayenan no ta konosí.
by Webmaster | 02/08/2023 | Internashonal
Kuerpo polisial di e kapital di Alemania Berlin tabata ariba’bou atrobe djarason pa un leon ku lo tabata kana lòs. Pero kontrali na loke a resultá luna pasá ta trata e biaha aki di un peluche grandi posishoná den un parke.
E animal tabata señalá den e parti sùit wèst di e siudat pa un hòmber na edat ku a kere ku e peluche tabata un leon berdadero. Deskonosínan a koloká e peluche riba un kashi di koriente den un posishon manera e tabata sosegá riba dje.
Dos siman pasá tambe Berlin tabata ariba’bou ora ku siudadanonan lo a nota un leon ta kana lòs den e region Brandenburg. Tambe tabatin un grabashon di loke tabata parse un leon, pero despues di studia e imágennan i e sushi vegetal ku e animal a laga atras a resultá ku tabata trata di un porko salvage.
by Webmaster | 02/08/2023 | Cinema News
Writers Guild of America (WGA), e sindikato di eskritornan na Hollywood, i e studionan grandi i servisionan di streaming ta bai sinta ku otro na mmesa djabièrnè próksimo. Ta pa promé biaha ku e dos partidonan ta bai reuní despues ku e eskritornan a drenta wèlga eksaktamente 3 luna pasá riba 2 di mei.
Segun medionan di komunikashon na Merka e inisiativa ta bin di representante di e studionan i servisionan di streaming Alliance of Motion Picture and Television Producers (AMPTP). E eskritornan ta den wèlga entre otro pa un mihó kompensashon i pa negoshá riba uso di inteligensha artifisial den film i serienan di Hollywood.
Dos siman pasá aktornan a uni ku e sindikato di eskritornan den nan wèlga pa e mesun kousa. Fran Drescher, presidente di e sindikato di aktornan SAG-AFTRA, a bisa djamars den e programa The Today Show ku e wèlga aki probablemente ta bai dura largu. Debí na e wèlganan vários produkshon na Hollywood a keda sea posponé òf den algun kaso asta anulá.
by Webmaster | 02/08/2023 | Business & Economy
E preis mundial di trigo i maishi a bolbe subi despues di un atake ku drone di Rusia riba e siudat Ukraniano Izmail. E subida di preis ta marka kontinuashon di e trènt di último par di siman.
Ta asina ku despues ku negosiashonnan pa kontinuá e deal di grano entre Rusia i Ukrania aña pasá a pega, Rusia a hiba vários atake riba e infrastruktura di agrikultura i hafnan na Ukrania. E pais ta un di e eksportadónan di grano mas grandi na mundu i ta akusá Rusia di ta sabotiando eksportashon di grano pa termino largu.
Manera ta konosí un parti grandi di e grano aki ta destiná pa konsumo na Áfrika. Ora Ukrania no por eksportá grano esaki no tin solamente konsekuensha pa e kontinente ei, pero tambe pa e preis mundial.
by Webmaster | 01/08/2023 | Naturalesa
Den e parti sùitwèst di Veluwe na Hulanda a bin haña un nèshi di wòlf ku probablemente a nase den mei di e aña aki. Ta pa promé biaha ku a registrá un nèshi di e animalnan den e region aki.
Esaki lo ta e di sinku nèshi registrá aktualmente na Hulanda. E famia aki ta biba den e region sùitwèst di Friesland i Drenthe. Esaki ta por sierto e mesun region kaminda resien a tira un wòlf mata despues ku esaki a ataká un kriadó di karné. E nèshi ta konsistí di 5 yu.
E ekspertonan ku ta sigui e animalnan a warda ku e notisia te ku awor pa wak promé si tur yu lo sobrebibí. Pues ta posibel ku Hulanda tin mas nèshi di wòlf na e momentu aki. Hulanda tin di momentu 8 teritorio kaminda tin wòlf ta biba.
by Webmaster | 01/08/2023 | IT, Apps & Social Media
X, e kompania te ku resien konosí komo Twitter, a bai korte ku un organisashon ku ta hiba kampaña kontra plamamentu di odio via internèt. Segun e kompania e asina yamá Center for Countering Digital Hate (CCDH) lo ta mina libertat di ekspreshon. I esei miéntras X lo ta hasiendo su máksimo esfuerso pa hende por bisa loke nan ta pensa.
Den un blòg X a skirbi ku e ta hasi su máksimo esfuerso tambe pa kombatí mensahenan di odio riba e plataforma anteriormente konosí komo Twitter. Sinembargo Center for Countering Digital Hate (CCDH) lo ke influenshá diskushon públiko i pa e motibu ei X ta bai korte ku nan.
Den e demanda X ta akusá Center for Countering Digital Hate (CCDH) di ta ataká tur persona ku no ta di akuerdo ku nan prinsipionan i tambe e organisashon lo a optené datonan di X di un forma ilísito pa finalmente por hasi mal uso di esaki. Tambe e organisashon lo a hiba un kampaña pa kombensé invershonista pa no buta anunsio komersial mas riba Twitter.
by Webmaster | 01/08/2023 | IT, Apps & Social Media
Meta, e kompania propietario di Facebook i Instagram, tin plan pa inkorporá vários chatbot di inteligensha artifisial den su servisionan. Kada chatbot lo haña su propio “personalidat”. Segun The Financial Times pa próksimo luna ya nos mester kuminsá ripará nan.
Tabatin rumor kaba ku Meta kier a agregá inteligensha artifisial na WhatsApp i Instagram. E chatbots lo mester bai yuda usuarionan buska informashon i duna rekomendashon.
Manera indiká kada chatbot lo tin su propio personalidat. Asina nan a hasi un tèst ku un chatbot ku ta komuniká meskos ku èks presidente di Merka Abraham Lincoln. Otro chatbot lo a komuniká manera un surfer.
Ounke e kompania no a reakshoná ofisialmente riba e artíkulo original di The Financial Times lo no ta un sorpresa mirando ku vários otro kompania a tuma e paso aki kaba.
by Webmaster | 31/07/2023 | Naturalesa
E populashon di tigernan na Bhutan a krese te 131 ehemplar. E programa pa restourá e populashon di tigernan den e pais ta dunando fruta. Asina World Wildlife Fund (WWF) a publiká djasabra riba e dia internashonal pa protekshon di tiger.
Na Bhutan e animalnan tin un parke kasi mesun grandi ku Hulanda kaminda nan por biba trankil. Asina a konstatá algun ehemplar ku ta biba den áreanan na altura di 4000 meter. Delaster biaha ku a konta e animalnan na Bhutan tabata den 2015. Na e okashon ei a konta 103 tiger.
Enkuentronan entre humano i tiger ta skars na Bhutan. Pero na Nepal e programa a resultá asina eksitoso ku enkuentronan ku entre humano i tiger si a resultá den algun konfrontashon. Segun WWF mester traha riba un plan pa evitá esaki.
N’e momentu aki tin apénas 4500 tiger na mundu ku ta biba den naturalesa. Na otro paisnan manera India, Nepal, Rusia i China e populashon ta rekuperando poko poko pero sigur.
Di otro banda mester bisa ku na Malasia i Indonesia kos ta kana un poko mas difísil. Na Laos, Cambodja i Vietnam e animal a te asta disparsé kompletamente. E mayor menasa pa e animalnan ta keda tòg hende ku ta yag riba e animalnan pa hasi negoshi ku sierto parti di e animal.
by Webmaster | 31/07/2023 | Cinema News
Sony Pictures ta posponé vários título di pelíkula relashoná ku e wèlga di trahadó i aktornan na Hollywood. Asina e pelíkula antisipá Kraven the Hunter i Spider-Man: Beyond the Spider-Verse lo estrená hopi mas despues ku antisipá pa fanátikonan. Asina agensia di prensa Bloomberg ta informá a base di un komunikado interno di Sony.
Kraven the Hunter, ku aktornan Aaron Taylor-Johnson i Russell Crowe, tabata planiá pa òktober próksimo, pero ta pasa pa ougùstùs. Spider-Man: Beyond the Spider-Verse mester a sali den mart próksimo, pero no tin un fecha nobo konosí ainda.
Manera ta konosí e sindikato di aktornan SAG-AFTRA a kanta wèlga riba 12 di yúli último despues ku negosiashonnan riba kompensashon i uso di inteligensha artifisial den sine a pega. Dor di e wèlga tin vários aktor ku no ta paresé mas riba red carpet durante estreno di pelíkula i tampoko nan no ta dunando entrevista pa promové pelíkula. Esei por tin konsekuensha pa e asistensha di públiko.
Por sierto ku e kompania di produkshon Disney ta deliberando pa posponé sierto fecha di lansamentu. Asina e studio a posponé e lansamentu di Poor Things. Warner Bros. tambe ta pensando pa posponé algun título di akuerdo ku Bloomberg.
Mas aleu mester bisa ku e seremonia pa otorgashon di premionan Emmy tambe ta posponé. E seremonia lo a tuma lugá 18 di sèptèmber, pero ta planiá awor pa yanüari.
