Gobièrnunan di Suesia i Dinamarka ta man na kabes ku un serie di protesta kaminda manifestantenan ta pega koran, esta e buki religioso di mòslem, na kandela. Na Suesia i Dinamarka entretantu a lanta e miedu ku e protestanan aki por kondusí na reakshonnan violento di islamista.
E kimamentu di e buki sagrado di mòslem tin un karákter provokativo. Asina un refugiado for di Irak a kima un koran dilanti parlamentu di Suesia. Na Irak hende a reakshoná ku protestanan violento na e embahadanan di Dinamarka i Suesia.
Pa e motibu ei e paisnan ta evaluando si mester prohibí kimamentu di e buki sagrado. Pero den tal kaso e paisnan ta kore un riezgo di protestanan lokal di nan propio siudadanonan si konsiderá ku libertat di ekspreshon ta un di e balornan mas importante den e paisnan aki.
E situashon entretantu tin un karákter internashonal i a resultá den un reunion ku karákter di urgensha di paisnan Islámiko pa papia riba e asuntu. 57 pais ta reuniendo riba inisiativa di Saudi Arabia i Irak. Espektativa ta ku nan lo publiká un deklarashon konhunto pronto.
Entrevista ku Kaylee de Haas alias Rabbit Season riba su kansion i videoclip Band’i Mi.
Video Directed & Edited by Najee Werners
Music & Lyrics by Rabbit Season
Produced by Rabbit Season, Joshua Sakoetoe, & Denzel Ignacia
Mixed & Mastered by Joshua Sakoetoe & Denzel Ignacia
More info:
Instagram: @rabbitseasonnn
Twitter: @rabbitseason
E-mail: rabbitsznmusic@gmail.com
E konosido kantante Irlandes Sinéad O’Connor a fayesé na 56 aña di edat. O’Connor ta mas ku klaro konosí pa e konosido hit Nothing Compares To You di 1990. E kousa di morto te asina leu no ta konosí. Den un deklarashon kòrtiku na prensa famia di e kantante a bisa ku e pèrdida ta grandi i ta pidi tur hende pa respetá nan privacy den tempu benidero.
Durante su karera e kantante a lansa 10 album. E menshonado hit Nothing Compares To You tabata e kansion number 1 durante e Billboard Music Awards di 1990. Por sierto ku e kansion ta komponé pa e defuntu artista Prince.
Na 2021 O’Connor a bisa ku e ta bai stòp ku musik. Na e okashon el a skirbi riba Twitter ku el a bira grandi i ta kansá, pero el a bin bèk pronto riba e desishon ei.
Den e mesun aña tambe el a publiká su biografia kaminda el a kompartí su pasado difísil. Dor di algun di su ponensianan den publisidat den último añanan no tabata un sekreto ku e kantante tabata sufri di bipolaridat.
Tambe e kantante a lanta un kontroversia di proporshonnan mundial den 1992 ora el a sker un potrèt di Papa Juan Pablo II durante un interpretashon a capella di e kansion War di Bob Marley.
Te ku aña pasá O’Connor tabata mama di 4 yu. Su yu hòmber Shane a fayesé den e mesun aña na 17 aña di edat. Entrante e momentu ei e kantante a laga intern’é den un kas di kuido pasobra e tabatin difikultat pa prosesá e pèrdida.
Inesperá e notisia ta sigur konsiderando ku e luna aki mes e kantante a publiká ku e tabata finalisando un album i ku e tabata kier a hasi un gira mundial atrobe…
Ku 155 mion dòler e pelíkula Barbie a registrá e lansamentu mas eksitoso den historia pa un direktor femenino. Pa komparashon e rèkòrt anterior tabata Captain Marvel ko-dirigí pa Anna Boden ku a alkansá 153 mion dòler i Wonder Woman di direktor Petty Jenkins ku a alkansá un resultado di 103 mion dòler den promé wikènt.
Barbie di Greta Gerwig a logra un resultado total di 155 mion dòler loke ta buta e film mesora tambe na e mihó resultado den promé wikènt pa 2023. E honor ei te asina leu tabata pa e pelíkula The Super Mario Bros. Movie ku a alkansá 146 mion dòler den promé wikènt.
Loke a hunga un ròl den e éksito di Barbie tabata e asina yamá “Barbenheimer effect”. Hopi hende ku a bishitá sine den e wikènt di lansamentu a hasi reservashon dòbel pa wak e pelíkulanan Barbie i Oppenheimer di Christopher Nolan tras di otro. E último pelíkula ei a generá 80,5 mion dòler den su promé wikènt.
Ta promé biaha den historia tambe ku ta e kantidat di damanan ku a bai sine a pusha e sifranan di benta. Generalmente ora un pelíkula pasa e suma di 100 mion dòler den promé wikènt esei ta dor di e kantidat di bishitantenan maskulino.
E kantidat di usuarionan di e app Spotify a subi, pero e kompania ta sigui drai pèrdida. Asina entre otro Tech Crunch ta informá. Spotify tin entretantu 220 mion usuario rònt mundu ku ta paga pa e servisio. Asina mes pronto e kompania ta bai subi e preis.
Ta asina ku e kantidat di usuarionan ku ta paga a subi ku 17%, ku ta igual na 37,4 mion persona. Na total Spotify tin 551 mion usuario frekuente di kua mayoria via account grátis.
Esei ta mesora e mayor problema pa e plataforma tambe: miéntras e kantidat di usuarionan ku ta paga ta subi, e kantidat di usuario ku NO ta paga ta subi mas lihé. Konsekuentemente e balor di e abono ta baha i e servisio ta obligá na subi e preis di account pagá. Usuarionan di Spotify lo mester a risibí un e-mail ku mas informashon riba e kambionan.
Commander, e kachó hèrdèr Aleman di presidente di Merka Joe Biden, a morde sigur 7 kolaboradó di Kas Blanku. Commander tin mas o ménos mitar aña bibando den Kas Blanku, pero tin un komportashon basta agresivo di akuerdo ku The New York Post.
Den último 4 luna tabatin sigur 7 okashon kaminda Commander a morde hende, entre otro un kolaboradó di e servisio di siguridat. Asina tin skirbí den dokumentonan i e-mail di e ministerio di Asuntunan di Interior. Na un okashon e kolaboradó en kuestion mester a keda trasladá pa hospital pa tratamentu. Si konta okashonnan anterior for di 2021 aserka lo ta trata na total di 10 okashon ku e kachó a ataká hende.
Commander tin 2 aña i lo ta hañando training di komportashon na e momentu aki. E ruman di Commander, yamá Major, tambe mester a bandoná Kas Blanku aña pasá dor di komportashon agresivo. Pronto e rumannan lo ta huntu atrobe na Delaware, e estado kaminda Biden ta biba originalmente.
Studiantenan di e Universidat Tékniko di Delft a diseñá un armadura spesial pa yuda pashèntnan di dwarslaesie kana di nobo. Den un vershon anterior ainda tabatin mester di krùk spesial pa hasi esaki posibel, pero esei no ta nesesario mas.
E èksoskelèt, manera ta yama e armaduranan aki, yama MARCH 8. Èksoskelèt ta nifiká literalmente struktura di wesu pafó di kurpa. E konstrukshon ta konektá ku selebro di e usuario pa asina esaki por duna señal pa e kana òf para ketu.
Básikamente e ta brinda un pashènt di dwarslaesie e oportunidat pa partisipá na aktividatnan ku ta rekerí moveshon. Tambe a agregá sensornan ku ta midi e ritmo di kana di e MARCH 8 pa hasi esaki mas komfortabel.
Credit Suisse tabata hasi negoshi ku e fondo di invershon Archegos ku a kai ku pèrdida grandi dor di maneho iresponsabel riba bolsa. Credit Suisse lo a sirbi komo intermediario i asina kontaminá su aktividatnan bankario resultando den pèrdidanan ku despues a kontaminá UBS.
Federal Reserve na Merka a imponé komo medida un multa di 269 mion dòler i Bank of England un multa di 87 mion pound. Na total mas o ménos 388 mion dòler. UBS a reservá di antemano 4 mil mion dòler pa akapará e demandanan aki.
Propietario di Twitter Elon Musk a kambia e logo di e plataforma di mensahe. E logo di para a bira un X. E kambio a drenta na vigor entrante djaluna. Na e kantor sede di Twitter tambe a kambia e logo di para den un X. E account prinsipal di Twitter tambe a bira un X i tambe e website su logo a kambia.
No ta promé biaha por sierto ku Musk ta usa e X komo logo, vários otro proyekto di e multibionario tambe ta identifiká ku e X. Asina X.com tabata e promé nòmber pa e plataforma di pago PayPal, fundá pa Elon Musk. Su marka di outo Tesla tambe a introdusí un modelo X i laga nos no lubidá su otro kompania SpaceX. De echo Elon Musk su yu literalmente yama X.
Por sierto ku no ta un sorpresa. Ta for di un prinsipio despues ku Elon Musk a atkirí Twitter ku e tabata bai kambia e plataforma den un, pa usa Musk su palabranan, “app pa tur kos”. Segun rumornan ku ta bai rònt Elon Musk lo kier krea un plataforma kompará ku WeChat na China. Ta trata di un chat app básiko ku vários opshon adishonal pa online shopping, notisia, fiansa, bestèl kuminda i / òf un taksi. Dor di e vários opshonnan aki WeChat ta konsiderá pa insiders un berdadero super app.
Fanátikonan di e konosido aktor Britániko Sean Bean (no di konfundi ku e otro konosido aktor Merikano Sean Penn) ta kansá di mira nan ídolo muri den sea un serie òf pelíkula. A bira un kustumber ku Sean Bean su personahe semper ta fayesé den fase tempran di sea un pelíkula òf serie den kua e ta hunga un ròl. I bèrdat mester keda bisá: ya ta di 25 biaha ku su fanátikonan a mira su personahe muri den e serie World On Fire. Fanátikonan di Bean ta furioso i mas ku fadá.
Den pasado ya tabatin petishonnan na produktornan di pelíkula i serie pa no laga e personahe di Sean Bean muri òf en todo kaso lag’e fayesé mas na kabamentu. Ta bèrdat ku Sean Bean a muri ya na final di e promé temporada di e serie popular Game of Thrones, den e promé pelíkula di e trilogia The Lord of the Rings i den e pelíkula di James Bond GoldenEye.
Resien por a mira Sean Bean komo e personahe Douglas Bennett den e serie World On Fire. Fanátikonan tabata aliviá ku el a sobrebibí e promé temporada di e serie. Pero e personahe ta muri de repente den e promé episodio di e di dos temporada dje serie. Bean a yega di rekonosé ku ta un poko repititivo i muchu fásil di antisipá ku kada bes su personahe ta muri.
Di otro banda mester bisa ku semper e mortonan di Sean Bean tin un impakto emoshonal enorme riba e historia di e serie òf pelíkula. Sean Bean sa kon gana simpatia di oudiensia hopi lihé ku personahenan humilde òf otro personahenan importante pa e plòt di e serie òf film. Pa e motibu ei semper su morto ta shòk. Algu inevitabel ora bo ta hopi bon den bo trabou.
E plataforma pa kriptomoneda FTX, kua a kai aña pasá, ta demandá èks gerensha di e plataforma pa un suma di mil mion dòler. Entre nan èks direktor Sam Bankman-Fried, kende huntu ku tres otro akusado lo a malversá kapital di FTX. E plaka lo a bai pa entre otro apartamentunan di luho, donashonnan polítiko i invershonnan riezgoso.
Tres miembro di e gerensha ya a konfesá, sinembargo Bankman-Fried ta sigui ninga kulpabilidat. Te ku aña pasá FTX tabata un di e plataformanan di kriptomoneda mas grandi na mundu, pero den novèmber a sali afó ku e kompania tabatin problema finansiero enorme. For di e atministrashon a resultá ku a pasa hopi kapital pa e kompania ruman Alameda Research, ku despues a invertí e sèn den invershonnan ku riezgonan enorme. E kompania a kai den otro i Bankman-Fried mester a retirá mesora pa motibu di froude.
Entretantu e ta den aresto di kas serka su mayornan na California pendiente tratamentu di e kaso. Despues di pidi bankarota FTX a sigui ku su direktor nobo John Ray. Un di su promé akshonnan ta pues e kaso aki pa rekobrá mil mion dòler bèk pa asina por kompensá esnan ku a keda perhudiká dor di e kaida di FTX.
E siudat Aleman Berlin tabata ariba’bou djaweps despues ku informashon a sali ku un leon tabata kana lòs. Pero ku tur probabilidat ta trata di un porko salvage. Asina e alkalde di e parti spesífiko ei di Berlin Michael Grubert a partisipá djabièrnè mainta. Entretantu ya no tin estado di emergensha vigente.
E búskeda pa e animal a kuminsá mesora despues ku a publiká un posibel grabashon dje animal. E leon lo a ataka un porko salvage segun testigunan. Pero despues di un estudio mas profundo di e imágennan a resultá ku finalmente no ta trata di un leon.
Durante un konferensha di prensa a presentá imágennan di un leon berdadero i a kompará esaki ku e imágennan publiká anteriormente. E operashon inisial pa buska e animal tabata basta spektakular. A mobilisá sigur 120 agente polisial, un vehíkulo militar blindá, drone i asta helikòpter. Habitantenan di e region mester a keda paden ku nan animalnan di kas.
For di un prinsipio tabatin duda ku tabata trata di un leon ya ku no tabatin un melding a drenta na outoridatnan di un leon pèrdí for di sea dierentuin, sirko òf sanktuarionan pa animal.
Sientífikonan a deskubrí un strea ku dos kara. Ta trata di un opheto den espasio ku ta kambiando di elemento. Na un banda e strea ta konsistí prinsipalmente di helium, miéntras e otro banda ta konsistí di hidrógeno. E bon notisia ta ku ta trata di un fenómeno ku por opservá hopi bon pa promé biaha den historia.
Janus, manera sientífikonan a yama e strea, ta un asina yamá enano blanku, un strea ku ta kasi morto i básikamente ta kayendo den otro. E strea ta rekohé hopi lihé i alabes e proseso ta generá hopi kalor i ta subi e densidat di e strea. Segun kálkulonan nos propio solo tambe lo bira un enano blanku aki 5 mil mion aña.
E nòmber Janus ta derivá for di e dios Romano ku mesun nòmber ku ta konosí pa su dos karanan ku ta simbolisá komienso i fin. E luna di yanüari su nòmber tambe ta derivá for di e dios Romano ei.
Sientífikonan rònt mundu ta maraviyá ku e fenómeno aki. Nan no por splika ta kiko ta okashoná e dos karanan aki. Te asina leu tabata konosí ku ora un strea transformá den un enano blanku e elementonan mas pisá ta move pa e núkleo di e strea. Hidrógeno ta e elemento mas leve ku nos konosé. Pa e motibu ei lo e mester tabata notabel riba hinter e superfísie. No ta normal ku hidrógeno ta kompartí espasio ku helium, manera ta pasando ku Janus.
Kisas pues ku tin un vèlt magnétiko desbalansá ku ta okashoná e fenómeno straño aki òf nos lo ta testigu di algu ku no sa pasa normalmente. Mas detaye rondó di e deskubrimentu aki ta publiká den e revista Nature.
Den último par di luna Netflix a haña miónes di usuario nobo. Esaki despues ku e kompania a limitá kompartimentu di account ku hende ku no ta paga pa e servisio. Esei a fòrsa hopi hende ku no tabata paga pa tuma un abono riba e servisio di streaming.
For di mart e kompania a haña 5.9 mion usuario nobo. Esei ta dòbel di loke analistanan na Wall Street a pronostiká. Promé ku e medida e kompania lo tabata pèrdè hopi entrada dor ku usuarionan tabata kompartí nan account ku amigunan i famia. Na total Netflix tin 238 mion usuario rònt mundu. 100 mion di nan tabata kompartí nan account. Entretantu usuarionan eksistente mester paga èkstra si nan ke kompartí nan account.
Por sierto ku e wèlga di aktor i produktornan di sine na Hollywood tin su impakto riba Netflix. E kompania a indiká ku ta bai tin ménos lansamentu di pelíkula i serie.
Aparentemente Apple tambe ta trahando riba su propio programa di inteligensha artifisial. Asina agensia di prensa Bloomberg a publiká. ‘AppleGPT’, manera insiders ta yama e programa, en todo kaso no ta kla pa públiko ainda.
E chatbot aki di Apple ta traha ku su propio lenguahe, esta Ajax. Ku e modelo ei ta posibel generá teksto a base di informashon ku e apsorbá. Otro chatbots, manera ChatGPT ku ta kolaborá ku Microsoft i e programa Bard di Google ta traha segun e mesun prinsipio. Segun Bloomberg Apple ta trahando ku vários team riba e proyekto. Asina nan ta investigando si tin riezgonan di privacy.
E paso di Apple ta remarkabel si konsiderá ku direktor Tim Cook a bisa den un entrevista ku Good Morning America ku e kompania ta siguiendo e desaroyonan ku wowo di falki. Den mei Cook tambe a ekspresá su reservashonnan pa ku e subida di inteligensha artifisial.
