by Webmaster | 19/07/2023 | Business & Economy
E plataforma pa kriptomoneda Binance ta bai sera su portanan na Hulanda. Usuarionan Hulandes mester lanta nan kriptomoneda i bandoná e plataforma promé ku 17 di ougùstùs. Ta asina ku Nederlandse Bank no a i no ta bai tampoko otorgá un pèrmit na Binance, apesar ku ta trata di un di e plataformanan mas grandi na mundu.
For di djaluna último ya no ta posibel mas pa hasi trámite na Binance. Si usuarionan no lanta nan kriptomonedanan na tempu Binance por kuminsá sera asina yamá wallets.
Binance tin un kolaborashon na Hulanda ku Coinmerce. Klientenan di Binance por pasa fásil pa e plataforma ei via funshonnan di Binance i pasa nan kriptomonedanan mesora. Ya lo tin 100 mil kliente a tuma e paso aki.
by Webmaster | 19/07/2023 | Naturalesa
Sientífikonan Chines i Canades a deskubrí un fósil ku ta sugerí un mamífero mordiendo un dinosourio. Lo ta algu úniko ya ku semper e impreshon tabata ku mamífero no ta forma menasa pa dinosourio. E estudio ta publiká den e revista Nature.
E fósil tabata bou di investigashon for di 2012 ora a deskubrí esaki na e provinsia Chines Liaoning, un lugá kaminda tin hopi fósil volkanisá. E skèlètnan tabata práktikamente intakto. Despues di un serie di kálkulo a konkluí ku e fósil ta berdadero i lo tin mas o ménos 100 pa 125 mion aña.
E mamífero tin e tamaño di un pushi komun i koriente, loke tabata e tamaño máksimo pa mamífero den e époka ei. E presa ta un dinosourio bebi di e tipo psittacosaurus, un tipo ku tabata kome vegetal so. E diseño mas abou ta duna un impreshon di e look di e animalnan.
by Webmaster | 19/07/2023 | Business & Economy
Preis di trigo i maishi a subi drástikamente djarason na bolsa di merkado na Chicago despues ku Rusia a papia palabra menasante riba tránsito marítimo den direkshon di Ukrania. E preis di trigo a subi ku 10% i maishi ku 9%.
Djaluna e palabrashonnan entre Rusia i Ukrania pa prolongá e dil pa e último por eksportá trigo a pega. Rusia a buta vários kondishon i èksigensha riba mesa pa pèrmití transporte di trigo via Mar Pretu. Rusia ta sospechá ku e ruta aki ta usá pa fasilitá ekipamentu militar na Ukrania.
Manera ta konosí e pais ta un di e eksportadónan mas grandi di trigo i maishi na mundu. Partikularmente paisnan Afrikano ta dependé di e trigo i maishi ku e pais ta eksportá. Interferensha den e entrega aki por kondusí na un krísis di alimento riba e kontinente.
by Webmaster | 18/07/2023 | Internashonal
E konosido artista i èks integrante di The Beatles Paul McCartney ta bai lansa su propio podcast e aña aki. Den e podcast aki titulá “McCartney: A Life in Lyrics” e kantante di 81 aña ta konta e historianan tras di tekstonan ku el a skirbi i lansa durante su karera. Segun e revista Rolling Stone ta trata di 12 episodio ku lo ta disponibel riba tur plataforma konosí entrante 20 di sèptèmber.
Den kada episodio McCartney lo papia di un kansion di sea su karera solo, The Beatles òf e banda di dje i su kasá Wings. Títulonan ku ta konfirmá ku lo e trata ta Eleanor Rigby, Let It Be i Live and Let Die. E podcast, manera indiká, lo ta disponibel riba tur plataforma popular entrante 20 di sèptèmber.
by Webmaster | 18/07/2023 | Naturalesa
No ta na Kòrsou so nos a sinti’e. Ta bèrdat ku tin un ola di kalor sofokante ta pasando riba vários lugá rònt mundu. Nos ta repasá e situashon aktual di region pa region. Pasobra ta rèkòrt tras rèkòrt ta kibra den último simannan.
Si nos kuminsá opservá for di Asia bin den nos direkshon mester bisa ku partikularmente China ta registrá vários rèkòrt último tempu. Djadumingu atrobe. Riba e dia ei e pais a registrá un temperatura di 52.2 grado na e siudat Sanbao. Esei ta kasi 2 grado mas kalor ku e rèkòrt anterior. Pero esei mester keda konfirmá ainda pa World Meteorological Organization (WMO). Na Beijing a registrá temperatura riba 35 grado durante 27 dia konsekutivo. Na India, Bangladesh, Tailandia i Vietnam tambe a kibra vários rèkòrt. Na vários lugá na Asia a registrá 40 grado òf mas.
Pasando pa Oropa mester bisa ku partikularmente e paisnan den sùit manera Spaña, Italia i Gresia ta asotá pa kalor. Den vários parti tin un kódigo oraño òf kòrá emití relashoná ku kalor ekstremo. Asina a midi 41.8 grado na Roma, un rèkòrt pa e kapital Italiano. Na Sardinia a midi te asta 46 grado. Na Spaña a registrá 45 grado òf mas na vários sitio. Na Spaña i Gresia a surgi vários kandela di mondi tambe.
Na Áfrika partikularmente den Sahara ta registrá temperatura ekstremo. E kalor aki ta okashoná e temperatura ekstremo den parti nort di Áfrika i parti sùit di Oropa. Na Maroko i Algeria a registrá temperaturanan di 47.5 i 48 grado respektivamente.
Na Merka tambe ta registrá kalor ekstremo. Death Valley partikularmente ta aproksimando e temperatura mas haltu na mundu. E desierto, ku ta keda na California, a midi 53.3 grado riba djadumingu. Den un region pegá ku Death Valley a registrá asta 53.9 grado. Death Valley tin ketu bai e rèkòrt di temperatura mas haltu midí den historia. Einan a midi 56.7 grado den 1913. Na Texas a midi kasi 48 grado i na Phoenix (Arizona) temperaturanan di mas di 43.3 grado durante 19 dia konsekutivo.
by Webmaster | 17/07/2023 | Cinema News
E wèlga di aktornan na Hollywood a bira bisto pa públiko den wikènt tras di lomba. Djasabra e pelíkula di Disney Haunted Mansion no por a konta ku presensia di e respektivo aktornan riba e anochi di estreno. Esei ta nifiká ku red carpet tabata bashí.
E próksimo Comic Con, un konferensha pa kultura popular, ta parse e próksimo evento ku no por konta ku presensia di vários aktor pa enkuentro ku fanátikonan. Studionan manera Marvel, HBO, Lucasfilm i Netflix a partisipá kaba ku nan lo no ta presente relashoná ku e wèlga.
Tantu aktornan komo trahadónan den produkshon di sine a buta trabou abou. Nan ta èksigí mihó pago i tambe ke limitá e subida di inteligensha artifisial den sine.
Mester bisa por sierto ku e ousensia di aktornan na seshonnan ku fanátikonan ta stipulá den e reglanan di nan sindikato. Ora e sindikato drenta wèlga enkuentro ku fanátiko ta konsiderá komo trabou.
by Webmaster | 17/07/2023 | IT, Apps & Social Media
Por lo pronto Facebook i Instagram no por publiká aviso komersial dirigí mas na Norwega. E supervisor di privacy den e pais a prohibí esaki temporalmente relashoná ku posibel aktividat ilegal. E kompania ta haña 3 luna di tempu entrante 4 di ougùstùs pa kumpli ku regulashonnan vigente den e pais. Si Meta, e kompania propietario di e plataformanan, no kumpli e ta rizga un but di 89 mil euro pa dia. Facebook i Instagram ta keda pues disponibel, pero no por publiká aviso komersial dirigí.
Segun e supervisor Norwego e forma ku Facebook i Instagram ta traha e avisonan aki ta a base di e lokalidat di usuario, ki tipo di mensahe nan ta lesa i kiko nan ta publiká. Eseinan ta konsiderá violashonnan serio di privasidat den e pais. E supervisor ta argumentá ku usuarionan na Norwega mester duna pèrmit eksplisitamente pa e plataformanan hasi uso di e perfil di usuarionan i tantu Facebook komo Instagram mester puntra esaki eksplisitamente na usuarionan.
by Webmaster | 17/07/2023 | IT, Apps & Social Media
E konosido wega Call of Duty lo keda disponibel riba Playstation. Asina Microsoft a konfirmá despues di atkisishon di e produktor di videogames Activision Blizzard. E kompania a indiká mas aleu ku esei ta reglá den un akuerdo.
Manera nos a informá anteriormente e take-over di Activision Blizzard ta esun mas grandi den historia di video gaming. Instanshanan di supervishon tabata kontra di e take-over aki relashoná ku posibel kompetensha inhustu si videogames sali solamente pa Xbox, e gaming console di Microsoft. Ainda Reino Uní no a duna aprobashon pa e take-over.
by Webmaster | 14/07/2023 | Internashonal
E 4 muchanan ku tabata pèrdí pa un luna den jungle na Colombia algun siman pasá ya no ta bou di opservashon mas i por a bai kas. Nan ta den bon estado di salú. E muchanan tabata bou di opservashon médiko despues di e aventura peligroso ku nan a pasa aden i a keda trasladá pa un tehuis kaminda nan lo keda por lo pronto.
E abuelonan di parti di mama di e muchanan a pidi pa nan kustodia. Manera konosí e muchanan tabata pèrdí den jungle despues ku e avion ku tabata transportá nan a kai. E mama di e muchanan a muri un par di dia despues. A resultá ku e abuelonan di e muchanan a siña nan kon sobrebibí den un situashon asina. Nan tabata sa kon biba di hariña di yuka i fruta.
Tabatin poko speransa ku e muchanan lo a sobrebibí dor ku ta trata di un di e partinan ménos aksesibel di e jungle. Riba 10 di yüni por fin a haña nan. A trasladá nan pa e hospital militar ku nan a kaba di bandoná.
by Webmaster | 14/07/2023 | Internashonal
Na Hulanda ta definitivamente prohibí pa desmentí òf hustifiká holokousto. Esnan ku no kumpli mester tene kuenta ku un kastigu di prison di pa mas tantu 1 aña.
No ta asina ku anteriormente no tabata posibel pèrsiguí un hende pa desmentí holokousto tampoko. Esei tabata kai anteriormente bou di e leinan ku ta regardá diskriminashon i rasismo, pero awor e ta un lei riba su mes.
E desishon por sierto no ta konta solamente pa holokousto, pero tambe krímennan di guera, krímennan kontra humanidat i genosidio.
by Webmaster | 14/07/2023 | IT, Apps & Social Media
Tin basta konsternashon riba retnan sosial pa e sentensia di un wes Italiano ku a laga un conciërge di 66 aña bai liber despues di a mishi ku partinan privá di un alumno di 17 aña. E wesnan a argumentá ku e mishimentu no a dura mas ku 10 sekònde.
E insidente a tuma lugá aña pasá na Roma. E damita lo tabata bayendo lès ora el a sinti un hende hala su karson abou i kuminsá mishi ku su partinan privá. E mishimentu lo a dura 5 pa 10 sekònde di akuerdo ku e alumno. E conciërge lo a bisa e alumno despues ku e sa ku ta wega.
Ministerio públiko di Italia a pidi un kastigu di 3,5 aña, pero e wesnan a disidí ku no tabata trata di un krímen ya ku e mishimentu a dura ménos di 10 sekònde.
A partir di e momentu ei a lanta un ola di krítika riba retnan sosial kaminda usuarionan a publiká un video kaminda nan ta mishi ku nan mes banda di un oloshi ku ta kana 10 sekònde pa demonstrá ku 10 sekònde ta dura mas largu ku hende ta kere.
by Webmaster | 13/07/2023 | Internashonal
Alrededor di 15 mil habitante di e siudat Aleman Berlin mester a bandoná nan bibienda relashoná ku desmantelashon di un bòm proveniente di e di dos guera mundial. Segun e korant Aleman Der Tagesspiegel ta trata di un bòm di 500 kilo.
Un tim di eksperto tabata sa di laga e bòm eksplotá di forma kontrolá pa e no hasi daño na e lugá kaminda a hañ’é. Segun polis e bòm tabata operashonal i den bon estado ainda, pero nunka a eksplotá. E trahadóna públiko ku a haña e eksplosivo a skapa di un tragedia.
Finalmente tur hende por a bai bèk nan hogar.
by Webmaster | 13/07/2023 | Internashonal
Net promé ku reseso Eerste Kamer na Hulanda a adoptá un lei ku ta hasi plamamentu di informashon konfidensial di hende pa intimidá nan kastigabel. E lei ta drenta na vigor entrante 1 di yanüari 2024. Esnan ku kometé e akto aki pa lei lo por konta ku un kastigu di prison ku por yega 2 aña òf un but ku por alkansá 22.500 euro. Pa personanan den sierto funshon e kastigu lo ta mas haltu.
Den último añanan tin un fenómeno a lanta kabes kaminda hende di mala fe ta kompartí adrès privá, number di telefòn, informashon personal i asta potrèt di famia di hende via gruponan di chat riba internet of retnan sosial. Polítikonan, sientífiko, periodista i agentenan polisial ta víktima frekuente di e práktika aki. Si ta trata di persona den un di e funshonnan aki, esnan responsabel por konta pues ku un kastigu mas haltu.
Gobièrnu di Hulanda a argumentá ku e lei ta nesesario ya ku ta trata di un violashon serio di privasidat di hende. Lo bin un lei separá pa plamamentu di material ku kontenido seksual. E lei lo bin kai bou di e Wet seksuele misdrijven. E lei ei ta regla entre otro kon penalisá krímennan ku un karakter seksual.
by Webmaster | 13/07/2023 | Cinema News
Aktornan Merikano definitivamente ta drenta wèlga despues ku negosiashonnan entre sindikato di un banda i di otro banda e studionan mas grandi i servisionan di streaming a pega. Asina Deadline a publiká djaweps.
E wèlga aki ta un gòlpi duru pa Hollywood ku ya tin vários problema ku produkshonnan andando. Asina a posponé siguiente temporadanan di serienan eksitoso manera The Last of Us, Stranger Things, The Handmaid’s Tale i un spin-off nobo di Game of Thrones. Despues ku eskritornan i otro trahadónan a drenta wèlga awor aktornan tambe ta ninga di hasi nan trabou. Práktikamente tur produkshon di pelíkula i televishon Merikano a stagna.
Partikularmente aktornan di stèm no ta kontentu ku nan entrada despues ku servisionan di streaming a lanta kabes. Promé ku servisionan manera Netflix i Amazon, nan tabata gana bon sèn ku ripitishonnan na televishon. Tambe e aktornan tin nan reservashonnan pa ku inteligensha artifisial. Produkshonnan ya ta hasiendo uso di esaki pa krea vershonnan mas hóben ora ta nesesario. No solamente e aktornan ta ninga di aktua, pero tampoko nan no ta kumpliendo mas ku trabounan di promoshon.
by Webmaster | 12/07/2023 | Cinema News
E último temporada di e serie Succession na HBO a logra optené sigur 27 nominashon pa e otorgashon di premionan Emmy. Asina Variety ta informá. Succession, ku ta konta e kuenta di un famia poderoso tras di un kompania di media, tin chèns di gana e premio pa mihó serie dramátiko i mihó protagonistanan.
Tin vários otro serie di HBO ku tin chèns di gana un premio, manera The Last of Us, House of the Dragon i e di dos temporada di The White Lotus, kaminda partikularmente e aktrisnan Jennifer Coolidge i Aubrey Plaza ta buta furor ku nan ròl den The White Lotus.
E serie kómiko di Apple TV+ Ted Lasso tambe a haña vários nominashon: 21 na total. E otorgashon di premionan Emmy ta tuma lugá 18 di sèptèmber.
