E inkietut riba merkadonan finansiero ku resien a lanta kabes ketu bai ta afektando e preis di akshonnan. Bankonan Oropeo a haña algun klap basta fuerte: djabièrnè mèrdia balor di akshonnan di Deutsche Bank tabata 11% mas abou, loke a kontagiá akshonnan di otro bankonan Oropeo tambe. E balor di akshonnan di ING tabata 4% mas abou i esnan di ABN Amro na mas o ménos 2% mas abou.
E inkietut riba merkadonan finansiero a kuminsá ku kaida di Silicon Valley Bank kasi 2 siman pasá siguí siman pasá pa problemanan na Credit Suisse. E banko ku a adoptá Credit Suisse a mira su balor di akshonnan baha ku 5% riba djabièrnè. Analistanan ta atribuí e problemanan den e sektor na miedu bou di invershonistanan.
Bankonan Sentral a subi interes pa asina frena e inflashon ku por nota rònt mundu aworakí. Di un banda e oumento di interes ta afektá e produktonan finansiero di bankonan, pero di otro banda e ta generando entrada. Analistanan ta konta ku e bankonan lo presentá sifranan positivo di e promé kuartal di e aña aki. Posiblemente esei por restourá konfiansa atrobe riba merkado finansiero.
Propietario di TikTok Shou Zi Chew a paresé den e Kas di Representantenan, e parlamentu di Merka. E direktor di un di e retnan sosial mas popular na mundu mester a bin duna kuenta i rason relashoná ku preokupashonnan ku ta biba rondó di e app. Shou Zi Chew a haña vários pregunta riba e relashon entre TikTok i gobièrnu di China i riezgonan pa cyber security na Merka.
Gobièrnu di Merka ta básikamente èksigí di e kompania Chines propietario di TikTok ByteDance pa bende e ret ku un otro entidat si TikTok ke sigui den uso na Merka. Den liñanan general Shou Zi Chew a splika e parlamentu Merikano ku TikTok ta operá for di Merka i Singapore i ku no tin lasonan ku gobièrnu sentral di China. El a splika mas aleu ku na China mes niun hende ta usa TikTok sino su kontrapartida Chines Douyin. E último app ey por sierto tambe ta propiedat di ByteDance.
E direktor di TikTok sinemabrgo no a logra kombensé e komishon parlamentario ku a interog’é. E tabatin problema pa duna kontesta direkto i tambe e tabata desviá for di preguntanan riba bendementu di datonan di usuarionan. E no a kontestá tampoko ken a yud’é prepará pa e interogashon.
Ta di warda awor kua ta e konklushonnan ku e komishon di e Kas di Representantenan ta bai saka a base di e kontestanan ku Shou Zi Chew a duna:
Korte a seponé un kaso di abusu doméstiko kontra Justin Roiland, un di e kreadornan di e konosido serie animá Rick and Morty. Wes a yega na e desishon aki dor di falta di prueba di akuerdo ku e revista Variety. Den un reakshon Roiland a bisa ku te ainda e no a bin bei di e shòk, pero e ta kontentu ku tur kos ta aklará.
Den yanüari a sali informashon den publisidat ku Roiland tabata akusá di violensha doméstiko i menasa i ku esaki lo a tuma lugá den 2020. For di e momentu ey e eskritor a bisa ku e ta inosente, pero asina mes e kanal Adult Swim a disidí para e kolaborashon ku n’e. Meskos ta konta pa e servisio di streaming Hulu, kaminda Roiland tabata traha riba Solar Opposites i Koala Man.
Den tempu benidero e ta bai wak kiko ta e pasonan ku e ta bai tuma pa drecha su nòmber. E kaso aki ta buta kòrda riba e situashon Johnny Depp vs Amber Hurt. Den e kaso ey Johnny Depp tambe tabata akusá di violensha doméstiko, pero durante tratamentu di e kaso a resultá ku e situashon tabata tòg diferente for di loke Amber Hurt a trese dilanti.
Djaweps tabata un dia di wèlga nashonal na Fransia kontra di plannan di gobièrnu pa reformá e sistema di penshun di e pais. Mas ku 1 den 5 dosente a buta trabou abou i hopi skol a disidí sera pa nan no keda blòkiá manera sierto skol ku a disidí keda habrí. Meskos ta konta pa trahadónan na aeropuerto.
Mester a anulá alrededor di 30% di buelonan di akuerdo ku e korant Le Parisien. Un otro konosido korant, Le Monde, ta skirbi ku e manifestantenan a blòkia un sala di salida na aeropuerto Charles de Gaulle.
E protestanan tin un impakto grandi riba bida diário. Tráfiko aereo i públiko ta plat, kareteranan ta blòkiá i sushi no ta wòrdu rekohé. Tin te asta bario kaminda no tin suministro di koriente.
E protestanan ta dirigí kontra plannan di gobièrnu pa subi e edat di penshun di 62 pa 64 aña. E kantidat di penshonadonan na Fransia ta oumentando hopi lihé i e medida mester frena esaki pa e sistema no kai den otro. No opstante vários opheshon gobièrnu a implementá e plan via un lei separá den konstitushon di Fransia. Den transkurso di e aña aki e plannan mester konkretisá.
Tin mas kos ku a kontribuí na morto di e konosido kompositor klásiko Ludwig van Beethoven. Segun un investigashon na Universidat di Cambridge riba DNA for di kabei ku atmiradónan a warda a resultá ku Beethoven tabatin problema kongenital ku su igra. E investigashon ta publiká den e revista sientífiko Cell Current Biology.
Beethoven a fayesé kasi 200 aña pasá na 56 aña di edat. For di e tempu ey tabatin gritunan pa investigá su morto, su problemanan ku tripa i tambe e echo ku e tabata surdu. E investigashon a mustra ku Beethoven tabatin posibel problema ku su igra. Asina a bin haña spor di hepatitis B den su DNA. Kombiná ku un konsumo haltu di alkohòl opviamente esaki a resultá fatal pa e kompositor.
Loke e investigashon no por a mustra ta kon bin e tabata surdu. El a kuminsá pèrdè oido entre 20 i 30 aña i a bira kompletamente surdu ora el a pasa 40. Tambe tabata konosí ku e tabatin problema di tripa, pero for di e investigashon no a sali na kla kiko tabata okashoná esei. Pa esei, e sientífikonan ta bisa, por tin vários kousa.
Outoridatnan Franses a limitá e kuotanan pa piska despues ku den poko tempu laman a trese sentenáres di dolfein morto kosta. Un korte haltu na Fransia a duna òrdu (nota di redakshon: artíkulo original tin imágen gráfiko!) pa prohibí piskamentu den partinan Franses di Atlántiko. Gobièrnu tin 6 luna di tempu pa indiká e áreanan kaminda por piska ainda i kuminsá supervisá e sektor di piskadó pa evitá ku nan ta fangu dolfein inintenshonalmente.
For di fin di aña pasá sigur 910 kadaver di dolfein a bin kaba riba kosta wèst di Fransia. Hopi kadaver tabatin nèt, hèrmènt di piska pegá na nan òf herida di propèler di boto.
Dor di falta di populashon di piská mas chikitu ta inevitabel ku e animalnan i piskadó ta haña nan konfrontá ku otro. Te ku aworakí gobièrnu no tabata kier a tuma medida severo, pero ku e òrdu di wes Fransia mester tuma pasonan mas drástiko pa protehá e animalnan aki kontra ekstinshon.
E populashon di orka na parti wèst di Merka ta kore peliger dor di endogamia. Asina e revista Nature, Ecology & Evolution ta informá. E populashon ta asina chikitu ku e ehemplarnan ta kaba ta par ku famia di serka. Konsekuentemente e orkanan ta fayesé hopi yòn i e populashon no ta haña chèns pa rekuperá. E orkanan femenino ta mas fértil rònt di 20 aña, pero hopi di nan no ta ni alkansá e edat ey mas.
E problema sinembargo no ta solamente e endogamia. Tin tres grupo grandi ku ta move na parti wèst di Canada i Merka pero e gruponan aki no a krusa i topa ku otro sufisiente den e último 30 generashonnan. Esaki ta okashoná pa e impakto di aktividat humano den siglo 20, ku ta inkluí kaptividat pa rekreo, polushon i piskamentu pa konsumo humano, lagando ménos pa e animalnan atras.
Segun sientífikonan e úniko manera pa salba e espesie di ekstinshon ta dor di limitá aktividatnan humano den e áreanan aki via e vários programanan di konservashon rònt mundu.
Ámtenarnan di Reino Hulandes a haña un konseho urgente di gobièrnu di Hulanda pa stòp di usa apps for di China i Rusia inmediatamente riba nan telefòn. Ku e paso aki gobièrnu di Hulanda ta sigui ehèmpel di Merka i Komishon Oropeo ku a disidí prohibí uso di entre otro TikTok riba telefòn di ámtenarnan.
Ainda no tin un prohibishon total pa ámtenarnan Hulandes, pero esaki probablemente lo sigui pronto. Gobièrnu di Hulanda a haña konseho di servisio di inteligensha AIVD ku a atvertí ku paisnan manera China i Rusia por ta usando e apps aki den nan ofensivanan digital, sea pa spionage òf pa influenshá hende durante elekshon.
Sekretario di estado Alexandra van Huffelen, ku ta enkargá ku e kartera Digitalisashon tambe, a splika ku Hulanda lo bai un paso mas leu ku Merka i Oropa. Hulanda ta bai fasilitá telefòn nobo ku reglanan manera e tipo di apps ku ta pèrmití riba telefòn di trabou.
Amazon ta bai eliminá 9000 puesto di trabou èkstra na e servisio di streaming Twitch i e cloud service AWS. Segun Amazon e klima ekonómiko ta pió ku nan a pensa. Aña pasá e kompania a registrá un pèrdida di 3 mil mion dòler.
Esaki ya ta e di dos buèlta di retiru den tiki tempu si nos kòrda ku na kuminsamentu di e aña aki ya a eliminá 18000 kupo di trabou. E buèlta di retiru aki ta remarkabel si konsiderá ku Amazon a bisa den febrüari ku no ta antisipá riba mas retiru.
Meskos ta bai pasa por sierto na Facebook kaminda 10 mil kupo di trabou ta bai disparsé. Entretantu e malesa ekonómiko a kuminsá impaktá kompanianan ku ta produsí hardware tambe. HP a kita 6 mil persona for di trabou i Cisco Systems i IBM kada un a skrap alrededor di 4000 posishon.
Banko Sentral di Oropa, Federal Reserve na Merka i por lo ménos 4 otro banko sentral ta ofresé bankonan den tempu benidero espasio pa fia sèn. Aparte di Banko Sentral Oropeo i Federal Reserve, Suisa, Reino Uní, Canada i Hapon tambe a tuma pasonan komparabel. Di e forma ey konsumidornan i kompanianan por sigui lanta sèn den tempunan di insiguridat ekonómiko.
E medida a drenta na vigor djadumingu ora ku UBS na Suisa a tuma Credit Suisse over. Meta di e medida ta pa krea konfiansa bou di invershonistanan atrobe. Segun e bankonan sentral e medidanan aki ta nesesario pa garantisá likides. Silicon Valley Bank ta un bon ehèmpel di un banko ku a bati bankarota dor di falta di likides dor ku e sèn di e banko ta pegá na sierto produkto finansiero.
Te ainda no tin un bista klaro riba e magnitut di e daño. E bankonan ku a haña problema den último par di siman a pèrdè hopi kapital dor di invershonnan den produktonan finansiero ku a pèrdè hopi balor.
Balor di bitcoin a subi djaluna mainta te na 28500 dòler. Esaki ta e balor mas haltu registrá for di yüni aña pasá. Segun analistanan kriptomoneda ta benefisiando di e inkietut ku ta reina den merkadonan finansiero, dor ku invershonista ta invertí nan sèn den otro aktividat.
Siman pasá tabata un siman dramátiko pa mundu bankario. Na Merka tres banko a bati bankarota i na Suisa e banko Credit Suisse tambe a hañ’e den problema. Credit Suisse a bin kaba den man di otro banko Suiso, esta e banko UBS. Na Merka gobièrnu a invertí kapital ku yudansa di krédito di bankonan konkurente. Esei ta baha e konfiansa pa invertí den banko.
Entretantu hende ta buskando rekurso riba e merkado di kriptomoneda. For di kuminsamentu di e aña aki bitcoin su balor a subi ku mas o ménos 70%. Otro kriptomonedanan tambe ta probechando di e situashon. Den 1 siman di tempu Solana su balor a oumentá ku 19%, balor di Ethereum i BNB a subi ku 12% i Dogecoin a subi ku 7%.
E kompania produktor di video games EA SPORTS ta bai agregá e kampaña OneLove na e wega FIFA 23 riba 21 di mart próksimo. EA SPORTS ta hasi esaki den kuadro di Dia kontra Rasismo i Diskriminashon. Gamers ta haña un uniform spesial i por dekorá nan stadion den diseño OneLove.
E kampaña ta dirigí kontra rasismo i diskriminashon den futbòl. Via FIFA 23 e kampaña lo mester yega na un públiko yòn. OneLove ta un di e 20 partinan di un plan di akshon inisiá na Hulanda. Aparte di e opshonnan di OneLove pa FIFA 23 e inisiadónan ta duna presentashon i kurso na asosiashonnan di futbòl pa kombatí rasismo i promové diversidat.
Na kabamentu di un siman basta kaótiko pa merkadonan di akshon te ainda invershonistanan no ta kombensé ku kosnan ta bai kaba bon. Djabièrnè ainda akshonnan di bankonan tabata bou di preshon apesar di medidanan na tantu Merka komo Oropa pa trese trankilidat bèk.
Ayera nochi un banko Merikano mas, esta First Republic Bank (FRB), mester a haña un inyekshon di kapital di kasi 30 mil mion dòler. E sèn usá pa e inyekshon aki ta bin di 11 otro banko na Merka den kolaborashon ku gobièrnu. E konstrukshon aki, kaminda kompetensha ta yuda tene un otro riba pia, mester trese konfiansa bèk den e merkadonan.
Den e promé momentunan despues di e medida ey kos tabata parse di bai bon i e balor di First Republic a subi bèk i sera den sifra positivo. Pero djabièrnè e balor a baha ku un kuart atrobe. Meskos ta konta pa Credit Suisse na Suisa. E banko a parse di ta rekuperá despues di medida di gobièrnu, pero djabièrnè su balor a bolbe baha ku 10%.
Al fin al kabo tur kos ta para òf kai ku emoshon i konfiansa di invershonista i kliente. Na momentu ku esakinan invertí nan sèn otro kaminda òf lanta nan sèn masalmente bankonan lo sigui kai.
Veterinarionan na Gresia ta hasiendo tur loke ta na nan alkanse pa salba bida di un yu di tiger blanku. Tres siman pasá a haña e animal den un baki di sushi pegá ku un parke di animal na e kapital Athenas. E bebi di tiger aki tin no mas ku tres luna i ta hopi debilitá dor di falta di awa i kuminda. Tambe tabatin un opheto di metal den su pia patras.
E dòkternan ta hasiendo tur loke nan por pa salba bida di e tiger blanku aki, pero no ta sigur si e ta bai sobrebibí. Trahadónan di e parke a haña e animal den e baki di sushi i aparentemente tin grabashon di loke a pasa. Direktor di e parke a splika ku nan tin kustumber di haña animal bandoná na e parke, pero ta promé biaha ku deskonosínan a laga un tiger blanku resien nasé atras.
Si e animal sobrebibí e ta bai un santuario spesial ya ku e parke mes no por akapará tiger. E kaso aki kasi sigur ta konsekuensha di trafikashon ilegal di animalnan eksótiko. Hopi animal eksótiko for di Asia ta yega Oropa ilegalmente via paisnan manera Gresia, Cyprus i Turkia. I meskos ku den e kaso aki, ora ku kuido di e animal bira un karga muchu grandi, hende ta dùmp nan numa…
UNESCO ta pidi yagdónan di tesoro pa stòp di koba riba terenonan kaminda batayanan di promé guera mundial a tuma lugá. Partikularmente e parti Hulandes di Bèlgika Vlaanderen mester purba kumpli ku e petishon urgente aki. Einan tin hopi afisionado ku ta eksplorá e asina yamá ‘Flanders Fields‘ ku nan detektornan di metal ku ta stroba e trabou di historiadó i arkeólogonan.
E aktividatnan di e afisionadonan aki ta okashoná pèrdida permanente di informashon históriko. Wesu i otro ophetonan ta konta historianan ku mester wòrdu studiá kuidadosamente pa determiná kiko a pasa kaminda a haña nan. Afisionado no ta hasi e trabounan aki di akuerdo ku UNESCO i ta warda e ophetonan ku nan ta haña na kas.
Vlaanderen ta un di e lugánan kaminda algun di e batayanan mas intensivo di promé guera mundial a tuma lugá entre 1914 i 1918. Te dia di awe arkeólogonan ta deskubrí artefakto di e tempu ey den e área aki.
