E kompania aéreo EasyJet i e divishon aeronoutiko di Rolls-Royce a tene un tèst eksitoso ku un diseño nobo pa motor di avion ku ta usa hidrógeno komo kombustibel. Asina e kompanianan mes a duna di konosé den un komunikado. E hidrógeno ta produsí for di fuentenan renobabel manera energia di bientu i di marea.
EasyJet a duna di konosé for di sèptèmber ku e tabata bai invertí den desaroyo di téknikanan pa redusí emishon di karbodiókseno, kua ta malu pa nos medioambiente. E siguiente paso ta pa tèst e motornan aki den práktika. Ounke e espektativanan ta duna motibu pa optimismo, mester bisa ku e tèst a tuma lugá den laboratorio.
Boeing, kompania konkurente di EasyJet, ta investigando di su banda desaroyo di motornan pa un kombustibel nobo konosí komo SAF. Esaki lo ta 75% mas efisiente ku jet fuel. KLM ya lo ta agregando e kombustibel aki na su jet fuel.
Na e isla prinsipal di Hawaii Mauna Loa, e volkan aktivo mas grandi na mundu, a drenta erupshon. Asina vários medio internashonal a raportá. Outoridatnan a atvertí e islanan den besindario pa kaida di piedra i as volkániko ku por bin kai miéntras e volkan ta erumpí. E erupshon ta bai kompañá pa riunan di lava ku te asina leu no ta forma peliger pa e pueblonan rondó di dje volkan.
Tòg outoridatnan a atvertí pa e habitantenan di e área pa prepará pa un eventual evakuashon. E promé fase di un erupshon volkániko ta karakterisá pa hopi insertidumbre i e riunan di lava por desviá inesperadamente. Mauna Loa ta sali kasi 4.000 meter riba laman i ta basta skùin, pues e lava kayente por bin abou na un velosidat basta haltu.
Outoridatnan na China a mobilisá kuerpo polisial pa para e protestanan ku a lanta kabes despues di tres aña di maneho severo pa kombatí Covid-19. E represhon ta severo. No solamente outoridatnan ta butando “dranghek”tur kaminda pa para e protestanan, pero tambe lo tin akshonnan di intimidashon tumando lugá.
Den dianan tras di lomba vários protesta a lanta den diferente siudat kontra e medidanan di e gobièrnu Chines. E manifestantenan ta usando blachi di papel blanku pa ekspresá tambe nan mal kontentu pa ku libertat di ekspreshon na China. E pais ta prohibí pankarta òf tekstonan krítiko riba gobièrnu. Dor di manifestá ku papel blanku sin teksto nan no ta violá leinan Chines.
Di otro banda gobièrnu a kuminsá tuma akshonnan represivo kontra e manifestantenan. Asina polis lo ta kontrolando telefòn di siudadanonan den kaya pa wak si nan tin apps instalá manera Telegram, Instagram òf Twitter. E appnan ei en partikular ta sirbi pa kompartí imágennan di e protestanan rònt mundu. Tambe a raportá detenshon di vários manifestante, pero no tin sifranan konkreto konosí.
Direktor James Cameron tin un reto basta grandi su dilanti ku lansamentu di Avatar: The Way of Water, e siguiente kapítulo di e pelíkula 3D Avatar di 2009. E gastunan pa Avatar: The Way of Water a resultá asina haltu ku e pelíkula mester generá por lo ménos $2.200,- mion (2.200.000.000 dòler) pa “break even”, o sea hasi sufisiente ganashi pa gana e gastunan bèk.
Den e otro palabra Avatar: The Way of Water mester bira e di 3 òf den mihó kaso 4 pelíkula mas eksitoso den historia pa por papia di un éksito finansiero. Asina direktor James Cameron mes a konfirmá na e revista digital GQ. The Way of Water a resultá un obra basta karo pa produsí, Cameron ta rekonosé. Cameron mes no a menshoná kuantu sèn a kosta pa produsí Avatar: The Way of Water, pero for di su palabranan mester konkluí ku e pelíkula mester a kosta alrededor di $1.000 mion.
E promé pelíkula Avatar, ketu bai ta e pelíkula mas eksitoso den historia ku un benta mundial di $2.900,- mion (sin konta inflashon), siguí pa Avengers: Endgame ku un benta di $2.800,- mion mundialmente (sin konta inflashon). Na di tres lugá ta sigui Titanic ku $2.200,- mion i Star Wars: The Force Awakens ku $2.000 mion (ámbos sin konta inflashon). Dje tantu plaka ei The Way of Water mester bai generá. E promé Avatar lo a kosta segun estimashonnan alrededor kasi $400 mion.
16 di desèmber ta lansamentu mundial di Avatar: The Way of Water.
Gobièrnu i oposishon di Venezuela a firma un akuerdo di siguridat sosial. Esaki a tuma lugá na Mexico djasabra último. Ku e akuerdo aki gobièrnu di Merka a disidí aliviá algun sanshon kontra e pais. Lo ta trata di un akuerdo relashoná ku enseñansa, salubridat i siguridat di alimento. E speransa di Merka ta aworakí ku e akuerdo aki por kondusí na un elekshon mas hustu den 2024. Asina a lanta sanshonnan riba e kompania Chevron ku awor tin pèrmit pa importá petroli for di Venezuela.
Na China a lanta un ola di protesta kontra e maneho di gobièrnu pa kombatí propagashon di Covid-19. E protestanan ta parse di ta hala kada bes mas hende. Alabes tin hopi preokupashon ku e oumento kada bes mas haltu di kasonan nobo den e pais. Asina a registrá 40 mil kaso djasabra último. Siman pasá a registrá un rèkòrt kaba ku 31.144 kontagio nobo.
Segun outoridatnan for di komienso di e pandemia a registrá 5.232 morto den e pais di 1400 mion habitante. E gobièrnu Chines ta atribuí esaki na e medidanan severo. E pais ta buta lockdown riba un siudat asina ku registrá un kaso nobo. Algun siudat ta opta pa sera sierto distrikto so.
Pero e butamentu di lockdown ta asina di repente ku esaki a kuminsá afektá pasenshi di siudadanonan ku pa un kambio no ta obediendo gobièrnu. Te asina leu e protestanan ta limitá na algun sentenar pa un par di mil di persona. Eseinan ta gruponan chikitu konsiderando kuantu hende ta biba den e pais.
Segun un publikashon di Aidsfonds na Hulanda e kantidat di hende ku ta keda infektá ku HIV a oumentá den sigur 45 pais. Segun e organisashon 1.5 mion persona rònt mundu a pega ku e malesa aña pasá butando e kantidat mundial registrá na 38.4 mion kaso. Alrededor di 650 mil a fayesé komo konsekuensha di aids.
E mayor oumento di kasonan a keda registrá den Ost Oropa, Asia Sentral, Medio Oriente i Nort Áfrika i Latino Amerika, kaminda anteriormente tur kos tabata parse di ta bou di kòntròl. En partikular na El Salvador a nota un oumento bou di hòmbernan ku ta tene relashon seksual ku otro. E oumento ta en partikular notabel bou di hóbennan entre 15 i 24 aña. Na Áfrika e malesa tin um impakto haltu riba mucha muhé adolesente.
Segun Aidsfonds dunamentu di informashon den kon prevení ta laga hopi di deseá. E organisashon ta indiká mas aleu ku kombatimentu di Covid-19 a buta ku ménos atenshon a bai na kombatimentu di aids.
Komishon elektoral na Brasil a rechasá e petishon di presidente saliente Jair Bolsonaro pa evaluá e resultado di elekshon di nobo. Bolsonaro a apelá kontra su pèrdida kontra Lula da Silva dor ku lo tabatin fayo den mashinnan di vota ku por a influenshá e resultado final.
Pa e motibu ei Bolsonaro tabata ke pa e komishon deklará e votonan ei inbalido. No solamente e komishon a rechasá e apelashon, pero tambe a imponé un multa di alrededor di 4 mion dòler riba Bolsonaro pa intervenshon ku e proseso elektoral. E presidente di e komishon ta forma alabes parti di e Korte Supremo di Brasil, pues chèns ta chikitu ku Bolsonaro lo por logra algu via korte.
For di investigashon a resultá ku Hulanda a hiba un atake ilegal riba un pueblo na Afganistan den 2007. Ta trata di e lugá Chora kaminda entre 50 pa 80 siudadano a pèrdè nan bida despues di un atake aéreo bou di komando di Hulanda. Estado Hulandes tin ku para responsabel pa e daño i perhuisio. Asina Korte na Den Haag a disidí.
Segun e korte outoridatnan tabata sa ku tabatin sivil den e edifisio ku a keda bombardiá, violando asina lei di guera. Hulanda a hiba e atake a kabo pasobra e organisashon Taliban lo tabata operá for di einan pa finnan militar. E kaso a keda entamá pa sobrebibientenan i famianan di víktimanan di e atake.
Den un prosedura nobo lo disidí kuantu Hulanda mester paga na daño i perhuisio. Hulanda tabata forma parti den e tempu ei di e koalishon internashonal ku tabata kombatí Taliban na Afganistan.
Eskosia no por tene un referèndem pa independensha sin outorisashon di e gobièrnu sentral Britániko na Lònden. Asina Korte Supremo di Reino Uní a disidí den un kaso entamá pa gobièrnu di Eskosia. Un desishon ku por konta ku sosten di e promé minister Britániko Rishi Sunak.
Den añanan 90 Eskosia a atkirí su propio representashon di pueblo, pero tur asuntu relashoná ku Reino Uní a keda den man di parlamentu na Lònden.
Siguiendo e salida di Reino Uní for di Union Oropeo dor di e Brexit referendum den 2016, Eskosia a wòrdu fòrsá pa bandoná Union Oropeo i asina pèrdè bastante benefisio di supsidio. I esei miéntras ku dos aña promé, den 2014, Eskosia a opta pa keda forma parti di Reino Uní kontando ku nan lo a keda forma parti di Union Oropeo. E resultado di Brexit no a kai na bon agrado di Eskosia ku for di e momentu ei ke bandoná e union Britániko.
Gobièrnu di Eskosia ta desapuntá, pero lo respetá e desishon di e Korte. Prome minister di Eskosia Nicola Sturgeon a duna di konosé ku e lucha pa independensha no ta kaba akinan i ku e gritu pa esaki lo sigui resoná.
Presidente saliente di Brasil Jair Bolsonaro ta bai apelá kontra algun resultado di e elekshon presidensial di 3 siman pasá. Segun Bolsonaro algun voto elektróniko lo ta inbálido. Fayonan den machinnan bieu lo por a influenshá e resultado i pa e motibu ei mester keda konsiderá inbálido, di akuerdo ku e presidente saliente.
Anteriormente Bolsonaro a bisa ku e ta aseptá e resultado, pero awor el a bin bèk riba e posishon aki. Tres siman pasá Jair Bolsonaro a pèrdè elekshon presidensial na Brasil pèrtá pèrta kontra Luiz Inacio Lula da Silva. Hopi Brasilero a buta nan konfiansa den e èks presidente pa mehorá e situashon di minorianan den e pais.
Siguiendo un investigashon ekstenso outoridatnan na Italia a detené sigur 49 sospechoso di miembresia di mafia. Ta trata akinan di miembronan ku posibel lasonan estrecho ku e grupo ‘ndrangheta, un organisashon ku ta operá den e parti mas sùit di Italia.
E detenidonan ta sospechá di ekstorshon, narkotráfiko, violensha i insendio. Tambe nan ta sospechá di a intimidá hende dor di manda kabes di kabritu i porko matá pa nan.
E grupo lo ta bou di liderazgo di un dama ku un reputashon basta notorio. Durante e operashon pa detené e sospechosonan tambe a konfiská kantidatnan grandi di droga, arma i munishon.
Outoridatnan a haña nan obligá di intensivá nan investigashonnan kontra ‘ndrangheta. No solamente nan ta kolaborá ku e ya konosido organisashon kriminal camorra, pero tambe nan lo tin influensha den vários konseho munisipal na Italia di akuerdo ku agensia di prensa Reuters.
Den oranan di mardugá – orario ost Oropeo – e siudat Düzce den parti wèst di Turkia a sufri impakto di temblor. E sismo ku forsa di 5.9 riba skala di Richter a okashoná mas di 20 persona heridá. Te asina leu ta 1 persona a keda registrá komo kaso krítiko. Despues di e temblor original a registrá kasi 20 aftershock.
Dos aña pasá tambe Turkia a registrá un sismo fuerte ku un forsa di 7.0. Den 1999 tambe Düzce a sufri impakto di temblor.
Na mes momentu ku gobièrnu di Colombia ta hibando palabrashon di pas ku e movementu Ehérsito de la Liberación Nacional (ELN), djaluna minister di defensa di Colombia Ivan Velasquez a konfirmá ku konfrontashonnan den wikènt entre disidentenan rebelde ku ántes tabata forma parti di FARC i bandanan kriminal a resultá den sigur 18 víktima mortal.
Lo ta trata di un gang yamá “Comandos de la Frontera” ku ta inkluí tambe èks miembronan di FARC i algun èks paramilitar. E disidentenan i miembronan di e gang lo ta hibando un konfrontashon sangriento pa haña kòntròl di un ruta di narkotráfiko Putumayo.
Presidente Petro su maneho te asina leu pa ku gruponan armá ta di ofresé redukshon di kastigu si e gruponan ta dispuesto na baha arma.
