by Webmaster | 08/12/2023 | Internashonal
Parlamentu di Dinamarka a bai di akuerdo ku un lei ku ta prohibí kimamentu di koran, e buki sagrado di Islam. E lei ta kontroversial dor di su implikashonnan pa libertat di ekspreshon.
Den e parlamentu 94 miembro tabata na fabor kontra 77 miembro ku no ta di akuerdo ku e lei. E lei lo ta enserá un kastigu di prison di 2 aña na momentu ku esaki wòrdu violá.
E proposishon pa e lei a bin dilanti despues di protestanan na Dinamarka kaminda tabatin kimamentu di e buki. Esei a kondusí na protestanan den paisnan mòslem ku a kondená e kimamentu di buki. Na Dinamarka esei a lanta preokupashon pa ku posibel atentado komo represaya si e akshonnan ei kontinuá. E pais ke yega na un balanse di libertat di un banda, inkluso esun di religion versus siguridat nashonal.
Segun proponentenan e lei no ta afektá libertat di ekspreshon. Lo tin otro formanan pa kritiká un religion sin mester di kima e buki sagrado di e religion.
by Webmaster | 08/12/2023 | Siensia
Sientífikonan di Stanford University na California ta avansando den desaroyo di un tèst di sanger nobo ku por midi edat di nos órganonan. Di e forma ei dòkternan lo por kalkulá e riezgo riba sierto situashon manera problema di kurason òf demensia. Resultadonan di e investigashon ta publiká den e revista Nature.
E estudio ta den un fase yòn ainda, pero e resultadonan te asina leu ta prometedor. Na total 5676 persona a partisipá den e investigashon.
Aparentemente órganonan ku ta embehesé mas lihé ku e persona su berdadero edat tin un chèns mas grandi pa desaroyá malesa den un plaso di 15 aña. Dor ku sierto malesa ta tuma basta aña pa desaroyá e tèst nobo aki por yuda antisipá mas lihé riba sierto malesa den futuro.
Di e forma ei por kuminsá trata demensia den un stadium mas tempran. E no ta un kura definitivo pa e malesa, pero si un paso den e direkshon ei.
by Webmaster | 08/12/2023 | Internashonal
Konseho di Siguridat di Nashonnan Uní ta reuní djabièrnè pa papia riba eskalashon di e disputa entre Venezuela i Guyana. E paisnan ta den konflikto riba soberania riba e region Essequibo ku ta aktualmente bou di maneho di Guyana.
Djadumingu Venezuela a tene un referèndem riba e status di Essequibo. Segun e enkuesta popular 95% di e pais lo ta ofisialmente di akuerdo pa aneksá e region ku ta den disputa. Siguiendo e referèndem Korte Internashonal di Hustisia a atvertí Venezuela pa no tuma akshon adishonal.
Djaweps Merka i Guyana a tene ehersisionan militar konhunto. Lo ta trata di ehersisionan di rutina, pero no ta sekreto tampoko ku Merka ta desaprobá Venezuela su akshonnan.
Na Brasil presidente Luiz Inácio Lula da Silva a deklará ku un konflikto harmá no ta benefisiá e kontinente. E pais a posishoná militar na su frontera ku Venezuela komo prekoushon i tene e konflikto pafó di fronteranan di Brasil. Alabes e presidente a hasi un apelashon na organisashonnan regional pa intermediá pa yega na un solushon pasífiko.
by Webmaster | 07/12/2023 | Infotainment
Un outomobilista na Inglatera a logra saka su reibeweis despues di 60 intento. Ta trata di e èksamen di teoria. Na total tur e intentonan aki a kosta e outomobilista 1400 pound den un periodo di 6 luna.
Ta un trend ku por nota serka mas hende. Tabatin otro kandidatonan e aña aki ku a hasi por ehèmpel 57, 55 i 53 intento pa pasa e èksamen di teoria. E ofisina di reibeweis na Inglatera ta bai investigá kiko ta okashoná e trend aki.
by Webmaster | 07/12/2023 | Internashonal
Èks presidente di Perú Alberto Fujimori ta den libertat atrobe pa motibunan humanitario. Fujimori tin problema di salú pa algun tempu kaba. Imágennan ku a keda publiká riba retnan sosial ta konfirmá esaki.
E èks presidente tabata sintando un kastigu di 25 aña pa su embolbimentu den asesinato di 25 Peruano den añan 90. El a haña e kastigu den 2009.
E asesinatonan pa kua e tabata den prison a tuma lugá na dos diferente okashon den 1991. Esnan responsabel lo a haña un pago di e gobièrnu di Fujimori, ku na e momentu ei tabata den konflikto ku iskierdistanan den e pais.
Fujimori tabata presidente di Perú di 1990 te 2000 i tabata basta popular pa e forma ku el a yuda ekonomia di e pais drecha. Pero siguiendo un kaso di korupshon den aña 2000 el a hui pa e pais di su mayornan, Hapon. Einan el a tuma retiru via fax.
5 aña despues ora el a bai Chile pa prepará pa su regreso na Perú, el a keda detené i ekstraditá pa Perú.
by Webmaster | 07/12/2023 | IT, Apps & Social Media
Segun e informashon ku a bin dilanti durante lansamentu di e trailer di Grand Theft Auto VI di e distribuidor di video games Rockstar e próksimo edishon di e game lo sali den 2025. E fecha eksakto sinembargo no ta konosí.
E setting di GTA VI manera tabata antisipá ta Vice City, esta Miami. Asina por dedusí for di e trailer. GTA VI ta konta e aventura di un pareha kriminal, ku un personahe femenino na kabes. E game lo sali promé riba PlayStation 5 i Xbox.
Fanátikonan di e serie GTA tin 10 aña wardando GTA VI. GTA V a sali den 2013. E promé vershon di Grand Theft Auto a sali den 1997 i a sigui krese pa bira un di e títulonan mas popular den mundu di video games.
by Webmaster | 07/12/2023 | Cinema News
Review skirbí pa Maurilhio Nobrega
Mi a ferwagt di skirbi un review kaminda lo mi a finalisá ku un konseho na The Daily Wire pa bai siña traha comedy promé ku nan purba algu asin’aki atrobe… pero as things turn out… Lady Ballers ta tòg un poko mihó ku mi a ferwagt… Yes, e ta basta bon. Sigui lesa (spoiler free!) dikon…
Pa bo komprondé algun joke bo mester ta siguiendo desaroyonan ku niun hende por ignorá mas. Desaroyonan manera e promoshon di diversidat den tur sintí den Miss Universe, deporte, sine, show bizz i awendia asta polítika… i resien lokal tambe si bo pens’é un ratu 😉
Lady Ballers ta limitá na e tema deporte.
Ta bon pa bo sa ku e kompania tras di e pelíkula aki, The Daily Wire, ta un plataforma konservativo na Merka ku notisia, komentario i media audiovisual. E ta manehá pa e komentaristanan Ben Shapiro i Jeremy Boreing. Esnan ku konosé e kabayeronan aki sa ku nan ta basta krítiko riba e komunidat LGBTQ. P’esei mi a asumí ku Lady Ballers lo ta algu fòrsá ku no ta sirbi ningun otro propósito sino kritiká hende LGBTQ.
Tambe mi a ferwagt un sobrekarga di jokes polítikamente kargá. Pa mi gran sorpresa nan ta hasi esei di un forma hopi respetuoso. Nan krítika ta ópviamente “in your face”, pero realidat amargo di e esenanan kaminda e produktornan ta kritiká “woke culture” ta ku….
…den bida real “woke people” ta komportá nan mes di un forma hopi mas agresivo ku Shapiro i Boreing ta presentá nan den Lady Ballers. Trust me on that one! Mi no por gaña… nan a berdaderamente hasi nan bèst pa no ofendé miembronan di e komunidat LGBTQ. I nan lo por a hasi esaki fásilmente ku ehèmpelnan ku bo por haña masha fásil mes riba social media. Trust me on that one, too!
The Daily Wire en todo kaso no a kue e mesun rumbo ‘kruel’ manera South Park ku nan film mas resien Joining The Panderverse.
Un di e puntonan mas fuerte di Lady Ballers ta e cast. Lo bo no kere, pero e personahenan den e comedy aki no ta aktor at all!
Jeremy Boreing, un di e direktornan di The Daily Wire, mes ta protagonisá en persona. Mi no ta bai revelá na kua momentu, pero komentaristanan konosí riba social media manera Ben Shapiro, Michael Knowles, Brett Cooper i asta Matt Walsh (komentarista i produktor di e dokumental What Is A Woman) ta aparesé na e momentunan mas inesperá ku lo buta bo hari garantisá si bo konosé nan. Nan entrada ta kada bes genial, inesperá i funny AF.
Tambe un kòmplimènt na tur side character den e film aki. Aki tambe ta trata di hende ku no ta aktor at all. E tim di basketball ku ta sentral den e film aki ta un tim amateur di bida real ku a kolaborá di un forma ekselente na Lady Ballers.
Un kòmplimènt èkstra grandi ta bai na e kantidat grandi di deportista femenino ku a yuda hasi e mensahe tras di e film aki posibel. Mi ta kere ku e produktornan a hasi un eskoho deliberá pa buska mas tantu deportista femenino di bida real pa aksentuá e mensahe tras di e film. I bo por mira ku nan tabata físikamente hopi ‘committed’.
Otro ‘move’ genial den Lady Ballers ta e forma kon nan a inkorporá diversidat. Nèt na momentu ku bo ta kere ku nan a traha e pelíkula aki pa un públiko spesífiko i no unu ku tur hende por identifiká ku n’e, sierto esena tin un “impakto emoshonal” èkstra fuerte.
Lady Ballers ta gewoon erg netjes en respectvol gedaan. E focus di e film ta keda vooral “e issue”, no e hende ku un eksperensha humano ku mayoria di nos no ta komprondé. Mi no por papia pa otro hende, pero mi tin sigur ku lo tin hende ku inevitablemente lo sinti nan mes ofendé dor di e film aki. Pero mi ke ripití ku e produktornan a berdaderamente hasi nan bèst pa no hasi esei.
Mi ta tribi bisa ku Lady Ballers ta un comedy basta desente ku asta mucha a partir di 12 aña por wak KOMPAÑÁ PA NAN MAYORNAN. Lady Ballers tin un invalshoek speels i basta edukativo ku ta brinda un bon punto di partida pa mayornan por papia ku nan yunan riba e temanan inkómodo aki. Kisas ta bon pa mayornan wak e promé pa huzga pa nan mes. E film ta basta leerzaam den e sintí ei.
Si bo no ta konfia e kos, laga mi splik’é asin’aki anto: ta entre otro hende ku fé den Dios ta tras di e pelíkula aki i bo ta ripará ku nan sa na unda nan tin ku hala un liña pa tene e kos netjes i aseptabel. Kaminda tin palabra malu mes, esaki ta proporshonal ku loke bo ta mira pasa den pantaya.
Si ta difísil pa kere ku komentarista religioso no por traha comedy… you’re wrong. Lady Ballers ta keda un eksperensha spòrtif kaminda e produktornan no ta tuma nan mes muchu serio tampoko i ta krea espasio pa outokrítika tambe.
Kisas e no ta un film di kua tur hende lo komprondé tur joke. Pa bo por komprondé e konteksto di e setting di Lady Ballers bo mester ta berdaderamente sigui sierto desaroyo ku un mente habrí pero tòg krítiko.
Afortunadamente tin sufisiente apsurdidat pa tur hende por tin su momentunan pa hari. Ta solamente ku algun hende lo hari mas duru ku otro.
I esei ta keda tòg e handicap di e film aki… Esei i algun esena ku ta baha e tempo di e pelíkula. Pero e momentunan ei tin diálogo ku hopi hende lo gusta pa e kontenido moral. Vooral den e esenanan ku mucha aden.
Mi própio handicap ta ku mi gusta comedy un poko mas agresivo ku esaki, pero opyektivamente no tin masha kos robes ku e low budget film aki.
Ta parse manera Sound of Freedom a lanta un trènt nobo e aña aki di pelíkulanan low budget produsí pafó di Hollywood, pero ku ta hala un públiko sufisientemente grandi pa ta lukrativo.
I si no tabata pa e intentonan di Hollywood atrobe pa blòkia e pelíkula aki tambe, lo mi no tabata na altura di su eksistensha mes…
Èniwei…
Lady Ballers ta gewoon un family film ouderwets ku un story positivo ku basta hende lo por rekonosé. I yes, e kos tin un very happy ending ku… sè… mi a haña un tiki stòf den wowo na kabamentu.
E film aki no ta e mihó comedy ku mi a yega di wak. Pero e ta meet e standard di un forma satisfaktorio vooral si bo konsiderá e kalidat ku lo bo no ferwagt di esnan ku a trah’é.
7 out of 10 ta parse mi un score hopi netjes pa e film aki.
Bo ke wak Lady Ballers? Follow mi WhatsApp Channel, kaminda e ta disponibel komo stream. Kòrda sigui e instrukshonnan den WhatsApp disponibel bou di e link pa e stream.
by Webmaster | 06/12/2023 | Cinema News
E konosido aktor Nicolas Cage ta pensando pa retirá pronto for di Hollywood. Asina e aktor a bisa den e revista Vanity Fair. Segun e aktor e tin 3 òf 4 pelíkula mas den dje i despues e ta kla ku aktuamentu den pelíkula. Un karera den serie di televishon sinembargo ainda e no ke deskartá.
Den yanüari Cage ta kumpli 60 aña i esei lo a buta e aktor kuminsá pensa riba su futuro. El a pèrdè su tata ku 75 aña, un diferensha di 15 aña for di su edat aktual. Esei a hiba e aktor na e realisashon ku e kier dediká mas tempu na famia.
Cage a bira konosí den añanan 80 ku su ròlnan den Moonstruck (huntu ku e konosido kantante i aktris Cher) i Raising Arizona. Tambe e tabatin éksito grandi ku Leaving Las Vegas, Face/Off i Con Air.
by Webmaster | 06/12/2023 | Medioambiente
E paisnan mas grandi ku ta produsí petroli i gas no ke para por lo pronto ku kombustibelnan fosil. Asta esnan ku a primintí di redusí emishon di karbodiókseno lo no ta kumpliendo ku nan promesa. Asina por dedusí for di un investigashon di e instituto Net Zero Tracker i Universidat di Oxford.
E aktitut di e paisnan lo ta den konflikto ku e akuerdonan será na e tòp di klima ku ta tumando lugá na Dubai. Di e paisnan mas grandi ku ta produsí kombustibelnan fosil 69 tin plannan konkreto pa redukshon di CO2, pero alabes nan ta kontinuá ku proyektonan di boramentu.
Segun investigadónan di Net Zero Tracker i University of Oxford no tin berdadero ehekushon di e akuerdonan palabrá aworakí na Dubai. Nan ta kompará e realidat ku tene diet miéntras bo ta sigui kome e kosnan ku no ta bon pa bo kurpa.
Asina produktornan chikitu manera Fransia, Dinamarka i Spaña tin plannan konkreto miéntras produktornan grandi manera Merka, Saudi Arabia, China, Rusia i e mesun Emiratonan Árabe kaminda e tòp ta tuma lugá no ta kumpli ku loke a keda akordá den pasado. De echo e último pais ei tin plannan pa subi su produkshon.
Kompará ku otro añanan e kantidat di hende ku ta lòbi pa kompanianan grandi durante e enkuentro aki ta 4 biaha mas haltu.
by Webmaster | 06/12/2023 | Medioambiente
Union Oropeo ta bai prohibí destrukshon di paña, sapatu i algun otro produkto ku kompanianan no logra bende. E desishon aki mester buta un fin na un kantidat enorme di produktonan pa bisti ku ta kaba den fòrnu pa kima sushi.
Fabrikantenan lo ta sobra basta paña ku no ta bende i konsumidornan ta deshasí den promedio di mas o ménos 11 kilo na paña òf tela tur aña. Segun Parlamentu Oropeo esaki ta gastamentu di material ku no ta kumbiní medioambiente, klima i e budget di mayoria konsumidó.
E promé paso den e rumbo nobo aki ta e obligashon na fabrikantenan pa duna kuenta i rason pa deshasí di loke nan sobra i ke benta afó. Tambe nan mester purba mas tantu produsí paña mas duradero ku ta bai mas largu i ku por reusá òf drecha mas fásil.
Esaki ta konta den promé instansha pa mueble, matras, tayer, produkto pa limpiesa, fèrf i otro materialnan manera heru i aluminio. Kuminda i remedi por lo pronto lo no kai bou di e regulashonnan nobo aki.
Pa mas tardá den 2 aña mester regla i finalisá e promé pasonan aki.
by Webmaster | 05/12/2023 | Business & Economy
E banko privá na Suisa Pictet a rekonosé ku el a yuda klientenan na Merka pa evadí impuesto. Di e forma ei IRS, e ofisina di impuesto Merikano, no tabatin bista riba alrededor di 5600 mion dòler.
E banko lo a sera un deal ku e ministerio di hustisia Merikano pa sera e kaso. Pictet lo mester paga e ministerio 122.9 mion dòler.
Pictet ta spesialisá den maneho di kapital pa su klientenan. E banko tabata yuda klientenan aktivamente pa keda for di bista di ofisina di impuesto na Merka.
IRS na Merka lo a pèrdè míles di mion entre 2008 i 2014 na impuesto di klientenan di e banko.
by Webmaster | 05/12/2023 | Medioambiente
E parti ost di Áfrika ta asotá pa algun siman kaba pa inundashon okashoná pa áwaseru pisá. Na paisnan manera Tanzania, Somalia, Etiopia i Kenya tin un kantidat deskonosí ainda di morto i segun estimashonnan míles di persona a pèrdè nan bibienda.
Na Tanzania e problemanan ta mas grave den parti nort di e pais kaminda movementu di tera i subida di awa a okashoná bastante problema. Trahadónan di reskate ta antisipá ku lo tin kurpa pegá bou di riunan di lodo.
Den simannan tras di lomba tabatin bastante problema tambe na Somalia, Etiopia i Kenia. Na Kenia a registrá 142 morto i na Somalia sigur 96 morto.
Ta trata di e pió inundashonnan den último 40 aña. Promé ku e mal tempu aki e paisnan a pasa dor di e pió temporada di sekura tambe den e mesun periodo di 40 aña.
Ekspertonan ta atribuí e kambio ekstremo di tempu na e fenómeno El Niño ku ta buta temperatura di sierto parti di Pasífiko subi.
by Webmaster | 05/12/2023 | Internashonal
Un avioneta mester a hasi un aterisahe di emergensha den un bario suburbano di Paris. E tres pasaheronan a keda heridá i trasladá pa hospital. Riba potrètnan di e sitio por dedusí ku tin basta daño na e avion, ku a bin para por sierto nèt patras di un edifisio ku apartamentu.
Segun outoridatnan lo tabatin un fayo den e motor. Na bordo tabatin un instruktor di mas di 80 aña i dos hóben adulto den nan 20 i piku aña. Segun e último informenan e pasaheronan no ta gravemente heridá.
E avion a sali for di e lugá Rouen, un siudat na mas o ménos 128 kilometer for di e sitio kaminda el a kai i tabata bayendo den direkshon di Versailles. Outoridatnan ta investigando e suseso.
by Webmaster | 04/12/2023 | Internashonal
Na Venezuela un referèmndem riba aneksashon di e region Essequibo na Guyana a resultá den un viktoria pa esnan na fabor. Segun e resultado partisipá pa e konseho elektoral di e pais 95% di esnan ku a vota ta na fabor di aneksashon di e region.
Essequibo ta tópiko di diskushon for di siglo 18. Ta un region ku 100 mil habitante ku tantu Venezuela komo Guyana ta claim komo teritorio. Den 1899 un komishon internashonal di arbitrahe a konsedé e region na Guyana, pero Venezuela nunka a rekonosé e desishon ei.
Djabièrnè último e Korte Internashonal di Hustisia a manda un atvertensha por eskrito pa Venezuela pa no tuma pasonan pa kambia e situashon aktual. Pa hopi tempu e konflikto no tabata biba asina fuerte. Te na momentu ku den 2015 a deskubrí kantidatnan grandi di reserva di petroli den e region.
For di e momentu ei presidente Nicolás Maduro a mustra interes pa e region kai bou di Venezuela. Ku e referèmdem Maduro lo ke buta preshon riba Guyana pa e pais entregá e region.
No ta konosí kua ta e pasonan ku e presidente Venezolano ke tuma ku e resultado aki. Na Guyana en todo kaso tin basta preokupashon pa ku e pasonan di e gobièrnu di Venezuela.
CARICOM a hasi un yamada na Venezuela pa tuma desishonnan ku koutela, pero e pais a rechasá e krítika.
by Webmaster | 04/12/2023 | IT, Apps & Social Media
Produktor di videogames Rockstar riba 5 di desèmber lo publiká e promé imágennan di e próksimo edishon di Grand Theft Auto. Asina e kompania a anunsiá riba su website. E imágennan lo ta disponibel rònt di 9or di mainta orario di Kòrsou riba e social media di e kompania Rockstar.
E trailer aki ta hopi antisipá konsiderando ku e último edishon di Grand Theft Auto a sali mas o ménos 10 aña pasá. Espektativanan ta hopi haltu tambe konsiderando ku e último edishon ei, Part V, ta un di e videogames mas bendé den historia. Mundialmente a bende mas di 150 mion kopia.
Lo tin un kambio grandi e wega. Pa promé biaha e protagonista di e wega lo ta un personahe femenino. Tambe e setting di e wega ta bai bèk na Grand Theft Auto: Vice City ku ta tuma lugá na Miami. Sobrá detaye lo bira konosí djamars mainta.
