Sigur 6 persona a fayesé i desénanan di otro hende a keda heridá dor di un eksploshon na Istanbul, kapital di Turkia. Tabata basta drùk den kaya na momentu di e eksploshon dor ku tabata den oranan di atardi. Segun presidente Erdogan di Turkia tin tur indikashon ku ta trata di un atentado.
El a duna òrdu na servisionan di siguridat pa buska e kulpabelnan di e atentado. Entretantu e sospechoso prinsipal di e insidente aki ta detené. For di riba kámaranan di siguridat a konkluí ku ta trata di un dama ku por mira ta laga un pakete atras den e kaya. Ounke ningun organisashon a claim e atentado, tin sospecho ku ta trata di e organisashon Kurdo PKK.
Na Italia a registrá un temblor ku un forsa di 5.7 riba skala di Richter. E temblor a tuma lugá nèt dilanti e kosta ost di e pais. Te asina leu no a registrá ningun víktima mortal di e temblor. Si a registrá bastante daño material na kasnan i edifisionan. Na vários lugá den e region a sera skolnan i tambe transporte públiko ta paralisá. E temblor a tuma lugá na un profundidat di 7 kilometer bou di awa, pero esaki afortunadamente no a okashoná un tsunami.
Rusia ta bai retirá su tropanan na e siudat Ukraniano Kherson. Asina e ministerio di defensa di Rusia a disidí pa evitá un masakre den e siudat ku ta kompletamente rodiá pa tropanan Ukraniano. Algun siman pasá Rusia a okupá Kherson ku ta forma un entrada importante na e península Krimea ku Rusia a aneksá algun aña pasá.
E come-back i atakenan dirigí di e tropanan Ukraniano den último simannan ta isolando e áreanan okupá dor di Rusia, hasiendo nan presensia den Ukrania mas difísil ku antisipá.
Na Uganda e vírus ebola ta plamando na un velosidat haltu. Konsekuentemente e pais a disidí implementá medidanan mas stringente pa evitá pió. Pero e pregunta a lanta si outoridatnan na Uganda ta na tempu ku e medidanan aki pasobra e brote aktual a lanta kabes for di sèptèmber.
Asina gobièrnu a disidí pa sera skolnan promé ku fin di e aña eskolar, pero esaki ta tuma lugá efektivamente te aki dos siman, esta riba 25 di novèmber. Dos lockdown den e siudatnan mas afektá no ta parse di kontené e problema.
E premio di number ganadó mas grandi den historia a kaba di kai na Merka. Ta trata na total di 2 mil mion dòler (un sifra ku 9 sero). E ganadó tabatin tur sifra korekto di e loteria Merikano Powerball. Den e loteria ei e montante ganadó ta sigui subi miéntras e jackpot no kai.
Si e ganadó ke e pago den 1 tiru e ta risibí kasi mil mion dòler. E por bai tambe pa e premio kompleto, pero den tal kaso por dura 29 aña promé ku e haña e montante kompleto riba su kuenta. No ta konosí ken e ganadó ta eksepto ku el a kumpra e lòt na un negoshi den Altadena, un lugá pegá ku Los Angeles. Segun Powerball e chèns ku algu asin’akí por a pasa ta 1 den 292,2 mion.
Merka ta ofresé un rekompensa di 1 mion dòler pa informashon ku por kondusí na detenshon di e 7 lidernan di gangnan Haitiano Mawozo i Kraze Barye. E hòmbernan ta responsabel pa sekuestro di siudadanonan Merikano. Segun ministerio di hustisia na Merka lo tin tres sospechoso detené kaba pa nan ròl aña pasá den sekuestro di un grupo di misionario pegá ku kapital di Haiti Port-au-Prince.
Su gobièrnu tin apénas dos siman sintá, pero ya kaba promé minister di Inglatera Rishi Sunak mester a tuma despedida di un di su ministernan. Ta trata di su aliado polítiko i sekretario di estado sin kartera Gavin Williamson kende a disidí retirá despues di akusashonnan di tentamentu i komportashon menasante. Tambe Williamson lo a buta preshon inadekuá riba miembronan di su partido konservativo.
For di un prinsipio tabatin krítika riba nombramentu di e èks sekretario di estado. Williamson no tabatin kartera i su nombramentu lo ta un rekompensa di Sunak pa servisionan di Williamson durante kampaña.
Un barku di reskate ku sigur 230 migrante meser a desviá pa Franisa despues ku Italia a rechasá di risibí esaki. Un otro grupo di migrante di un poko mas di 200 persona ku a bini riba tres otro barku si por a drenta e pais.
Organisashonnan di derechinan humano a protestá kontra e desishon di Italia ku den último dianan no kier a desviá for di e maneho di promé minister Giorgia Meloni, por sierto e promé dama den e funshon aki. Te na último momentu ta hende muhé i menornan di edat so tabata pèrmití pa bandoná e barku.
E gobièrnu di Giorgia Meloni ta hiba un maneho di migrashon hopi stringente. Despues di a komuniká ku presidente di Fransia Emmanuel Macron Meloni a konkluí e kontakto bisando ku migrashon ta un asuntu Oropeo.
Vigilantenan di parkenan natural na Merka ta atvertí kontra lembementu di un tipo di sapu ku ta kousa halusinashon. Ta asina ku e mesun supstansia ei por hasi hende hopi malu. Segun National Park Service hendenan ku ta bin keiru sa kapturá un sorto ku ta biba den parke natural di e desierto Sonora.
E sorto aki, ku por alkansá un largura di 18cm, ta soda un supstansia ku ta okashoná un efekto sikodéliko ku ta usá tambe den droga rekreativo. Pero segun e vigilantenan konsumo direkto di e supstansia dor di lembe e sapu no ta un bon idea, pasobra tin basta kaso ta bin dilanti di hende ku a bira hopi malu.
Entretantu e animal ta kore peliger di ekstinshon dor di popularidat di e droganan ku ta kontené e supstansia presente den e animalnan aki.
Donald Trump tin un anunsio importante otro siman. Asina e èks presidente di Merka a duna di konosé durante un diskurso na Ohio. Espektativa ta ku e ke anunsiá su kandidatura pa bira presidente atrobe. Lo no ta un sorpresa ya ku den último dianan e tabata duna hopi indikashon di e plannan aki.
Trump ta na Ohio di momentu pa kore kampaña pa e elekshon di awe (djamars 8 novèmber) pa e Kas di Representantenan, o sea e parlamentu di e pais, i un parti di Senado. Di momentu e demókratanan tin un mayoria chikitu den parlamentu i segun enkuestanan esaki por kambia den un minoria chikitu. Den tal kaso presidente aktual Joe Biden lo no por trese hopi kambio mas den e pais.
Sigur 11 obispado na Fransia ta akusá di violensha seksual. Asina un bosero di e Iglesia Katóliko na Fransia a konfirmá. Ta trata di lidernan spiritual ku a retirá i algun ku tabata den funshon te ku resien. Un di e sospechosonan ta e obispu Jean-Pierre Ricard, ku a rekonosé di tabatin relashon 35 aña pasá ku un mucha muhé di 14 aña.
E obispunan por spera un kaso den korte, inkluso medidanan disiplinario di Iglesia Katóliko. Segun kálkulonan alrededor di 200 mil mucha Franses lo a bira víktima di abusu seksual na man di lidernan spiritual den último 70 aña.
Outoridatnan na Hulanda a haña kantidatnan enorme di vürwèrk ilegal den último dianan. Den mardugá di djabièrnè pa djasabra polis a haña 900 ehemplar di un produkto yamá cobra den un kas na Veldhoven. A detené 3 persona.
Na Den Haag tambe outoridatnan a bin topa ku kasi 80 kilo di vürwèrk pisá den un kelderbox. Einan a detené 4 otro persona. Segun polis e situashonnan aki ta forma un peliger mortal.
E plataforma sosial Instagram a tuma e promé paso pa kuminsá kontrolá e edat di usuarionan hóben. Menornan di edat ku adaptá nan edat na unu mas haltu mester proba esaki ku nan ID físiko.
Usuarionan ku no ke hasi esaki por saka un video selfie ku ta pasa pa e kompania Yoti. E teknologia di e kompania aki ta analisá i kalkulá e edat di e usuario a base di ekspreshon di kara. E resultado ta bai pa Instagram pa despues di un evaluashon i aprobashon por kambia e fecha di nasementu. Instagram a enfatisá den un deklarashon ku e imágennan no ta wòrdu mandá pa e kompania Meta ku ta doño di Instagram i Facebook.
E no ta algu frekuente, pero segun e Media Watch Dog Brit;aniko Ofcom de bes en kuando ta deskubrí accountnan di adulto di kua e usuario den realidat ta un menor di edat. Download e investigashon.
KOMUNIKADO – E Asosiashon di Komèrsio i Industria “VBC” a tuma nota di Gobièrnu su intenshon pa subi salário mínimo. Segun VBC a komprondé e intenshon tabata pa subi esaki ku 58 sèn na sèptèmber último i adishonalmente ku 50 sèn entrante 1 yanüari 2022. Esaki lo nifiká un subida di en total 11.2%.
Realidat ta ku for di medio 2021 preisnan riba merkado mundial a bin ta subi poulatinamente. E inflashon aki a oumentá mas ainda, dor di e invashon di Rusia na Ukraïna na febrüari 2022 i e konsekuenshanan ku esaki a trese ku ne pa preis di krudo i básikamente tur otro produkto riba merkado mundial. Segun nos Ofisina di Estadístika “CBS”, na agosto último e inflashon tabata 5.8%. Segun e último sifranan ofishal, na Merka e inflashon ta riba 8% i na Hulanda riba 16%. Mirando ku nos ta importá kasi tur kos for di exterior, inkluso e inflashon, tin tur indikashon ku nos lo sera 2022 ku un inflashon anual mas haltu ku e 5.8% ku e tabata na agosto último. Tumando e realidat aki na konsiderashon i tambe ku no tabatin indeksashon di e suèldo mínimo na 2020 i 2021 VBC tin komprenshon ku Gobièrnu ke oumentá e suèldo mínimo i ta bai di akuerdo ku esaki, pero e mester bai akompañá ku un flankerend beleid!
Tin algun realidat mas ku tambe mester tene kuenta ku ne.
Pa kuminsá e komersiante tambe ta sinti e peso di e subida fuerte di inflashon riba bida diario di dje i su famia.
Varios negoshi ketu bai ta den “survival mode” despues di e pandemia, kaminda ku nos ekonomia a kontraé (“kremp”) ku 18.4%. Espesialmente negoshinan kaminda tin hopi empleado ku suèldo mínimo ta laborá lo mira nan gastunan operashonal subi drástikamente, ku tur e konsekuenshanan negativo ku esaki ta trese ku ne.
Na 2021 tabatin un kresementu ekonómiko di 4.2% i pa 2022 ta pronostika 5.5%. Pues ainda falta hopi pa rekuperá i neutralisá ful e kontrakshon di 18.4% di 2020.
Dor di emigrashon hopi hende ku tabatin bon forsa di kompra a bandoná Kòrsou i bai biba Hulanda òf Boneiru, hasiendo asina nos merkado mas chikí.
Gobièrnu su propio Ministerionan i konseheronan a bisa Gobièrnu ku e oumento di salário mínimo aki lo (por) tin konsekuensha negativo pa kresementu ekonómiko na 2023. Tambe ta kore riesgo ku desempleo lo oumentá i e oumento lo por pone ku preisnan pa e konsumidó lo subi aun mas tantu. VBC tambe ta hopi prekupá pa e konsekuenshanan no deseá aki.
Ta bon konosí ku VBC ta boga pa tin un kresementu ekonómiko aselerá i duradero. VBC ta firmemente konvensí ku kresementu ekonómiko ta e uniko solushon pa yuda nos sali for di e krisis sosial-ekonómiko ku nos ta aden. Na varios okashon den pasado VBC a trese dilanti ku mester atendé ku nos ekonomia den un forma di krisis. Meskos ku a hasi den pandemia pa atendé ku Covid i manera ta hasiendo awor aki ku salubridad, kaminda a instituí un Regiegroep.
Enfin, apesar di e konsekuenshanan negativo ku e oumentu di salário mínimo por trese ku n’e, VBC ta bai di akuerdo pasobra mester yuda e grupo ku ta sufriendo mas hopi dor di e inflashon devastador aki, pa mantené nan forsa di kompra. Mantenshon di forsa di kompra ta bon pa nos ekonomia. Ta bon pa Gobièrnu realisa sí, ku no ta tur negoshi por akapará e oumentu di salário mínimo, sin haña nan mes den problema finansiero. Den e kuadro aki VBC ta sugerí Gobièrnu enfátikamente pa bini ku un maneho (flankerend beleid) ku ta hasi posibel ku e negoshinan por kumpli ku e oumentu di sálario mínimo, sin haña nan mes den problema i sin tin ku rekurí na outomátikamente traspasá e subida kompletu pa e konsumido. Den esaki ta sumamente importante pa envolví e partnernan sosial den e proseso pa huntu nan yega na un flankerend beleid riba termino kòrtiku i ku realmente lo baha e “cost of doing business”.
Algun ehèmpel di medidanan den un flankerend beleid pa mantené forsa di kompra i redusí cost of doing
business:
Redukshon temporal riba prima sosial ku empleadonan i doño di trabou ta kontribuí ku ne;
Redukshon adishonal temporal di aksèins riba kombustibel;
Redukshon temporal riba gas pa kushiná;
No kobra empleado “bijzondere belasting” ora ku e traha overtaim;
Supsidio temporal riba energia pa personanan ku ta biba bou di e “bestaansmininimum”;
Supsidio temporal riba energia pa empresanan ku tin hopi empleado ku suèldo mínimo den servisio;
Un pago na e minimumloner kual e no ta paga impuesto riba dje i kual e doño di trabou por dedusí for di e OB ku e mester paga;
Modernisashon di lei di retiro pa esaki no mas ta un opstákulo pa tuma hende den servisio;
Subi e “lunchvergoeding” na por lo menos 15 florin, sin kobra impuesto, den kaso di overtaim;
Oumento temporal di huursubsidie;
Oumento temporal di kinderbijslag pa esnan ku ta biba bou di bestaansminimum.
Manera ta konosi, e problema di inflashon ta unu riba eskala mundial i ta rekomendabel pa wak tambe ki medidanan otro paisnan a tuma. Pues konkretamente VBC ta di akuerdo pa e siguiente pakete integral:
subi suèldo mínimo konforme proposishon di Gobièrnu;
huntu ku partnernan sosial yega na un pakete di medida kaminda ta mantené e forsa di kompra di esnan ku ta kobra salário mínimo i na mesun momentu yega na un flankerend beleid pa;
redusí e kosto di hasi negoshi, pa asina sektor privá por kumpli ku e oumento di salário mínimo.
Además, VBC ta propone pa paralelo na e desishon pa subi salário mínimo, pa huntu ku partnernan sosial yega riba termino korto na un akuerdo di prinsipio, kaminda ta hasi e siguiente palabrashonnan:
Establesé un Economic Recovery Board (ERB) den kual partnernan sosial tin partisipashon igual;
Laga e ERB desaroyá medidanan a largo plaso ku ta kontribuí na kresementu ekonómiko duradero;
Realisá un ofisina di planifikashon, sea dentro di un instituto eksistente manera Banko Sentral of otro, ku ta disponé di metodonan di investigashon moderno i instrumentario validá, pa midi e efektonan ekonómiko ku futuro eskohonan of desishonan por tin riba nos ekonomia, por ehèmpel den kaso di un subida di salário mínimo mes.
