Presidente saliente di Brasil Jair Bolsonaro ta bai apelá kontra algun resultado di e elekshon presidensial di 3 siman pasá. Segun Bolsonaro algun voto elektróniko lo ta inbálido. Fayonan den machinnan bieu lo por a influenshá e resultado i pa e motibu ei mester keda konsiderá inbálido, di akuerdo ku e presidente saliente.
Anteriormente Bolsonaro a bisa ku e ta aseptá e resultado, pero awor el a bin bèk riba e posishon aki. Tres siman pasá Jair Bolsonaro a pèrdè elekshon presidensial na Brasil pèrtá pèrta kontra Luiz Inacio Lula da Silva. Hopi Brasilero a buta nan konfiansa den e èks presidente pa mehorá e situashon di minorianan den e pais.
Siguiendo un investigashon ekstenso outoridatnan na Italia a detené sigur 49 sospechoso di miembresia di mafia. Ta trata akinan di miembronan ku posibel lasonan estrecho ku e grupo ‘ndrangheta, un organisashon ku ta operá den e parti mas sùit di Italia.
E detenidonan ta sospechá di ekstorshon, narkotráfiko, violensha i insendio. Tambe nan ta sospechá di a intimidá hende dor di manda kabes di kabritu i porko matá pa nan.
E grupo lo ta bou di liderazgo di un dama ku un reputashon basta notorio. Durante e operashon pa detené e sospechosonan tambe a konfiská kantidatnan grandi di droga, arma i munishon.
Outoridatnan a haña nan obligá di intensivá nan investigashonnan kontra ‘ndrangheta. No solamente nan ta kolaborá ku e ya konosido organisashon kriminal camorra, pero tambe nan lo tin influensha den vários konseho munisipal na Italia di akuerdo ku agensia di prensa Reuters.
Den oranan di mardugá – orario ost Oropeo – e siudat Düzce den parti wèst di Turkia a sufri impakto di temblor. E sismo ku forsa di 5.9 riba skala di Richter a okashoná mas di 20 persona heridá. Te asina leu ta 1 persona a keda registrá komo kaso krítiko. Despues di e temblor original a registrá kasi 20 aftershock.
Dos aña pasá tambe Turkia a registrá un sismo fuerte ku un forsa di 7.0. Den 1999 tambe Düzce a sufri impakto di temblor.
Na mes momentu ku gobièrnu di Colombia ta hibando palabrashon di pas ku e movementu Ehérsito de la Liberación Nacional (ELN), djaluna minister di defensa di Colombia Ivan Velasquez a konfirmá ku konfrontashonnan den wikènt entre disidentenan rebelde ku ántes tabata forma parti di FARC i bandanan kriminal a resultá den sigur 18 víktima mortal.
Lo ta trata di un gang yamá “Comandos de la Frontera” ku ta inkluí tambe èks miembronan di FARC i algun èks paramilitar. E disidentenan i miembronan di e gang lo ta hibando un konfrontashon sangriento pa haña kòntròl di un ruta di narkotráfiko Putumayo.
Presidente Petro su maneho te asina leu pa ku gruponan armá ta di ofresé redukshon di kastigu si e gruponan ta dispuesto na baha arma.
E isla Griego Kreta mester a bati alarma despues ku un temblor ku un forsa di 5.4 a tuma lugá den mardugá di djadumingu pa djaluna. Asina e Sentro di Sismologia Oropeo a konfirmá. Poko despues di e temblor outoridatnan a emití un atvertensha pa tsunami. E temblor a tuma lugá na un profundidat di 80 kilometer na un distansha di 65 kilometer for di e isla. Alfinal no a raportá daño signifikante siguiendo e sismo.
Na e isla Java (Indonesia) un temblor a okashoná mas di 160 morto. Ta trata di un temblor ku un forsa di 5.6 riba skala di Richter. E episentro tabata na e siudat Cianjur na West Java, mas o ménos 75 kilometer sùitost di Jakarta, segun e servisio di meteorologia na Indonesia. E temblor a tuma lugá na un profundidat di 10 kilometer, pero no tabatin efekto riba laman.
E daño mas impaktante tabata na edifisionan manera skolnan, hospital, bibienda i pakusnan ku awor ta forma un peliger pa esnan ku tin ku frekuentá esakinan. Trabounan di reskate ta difikultá dor ku kamindanan a sufri hopi daño.
Indonesia ta keda den e asina yamá renchi di kandela. Un área den Pasífiko ku mas di 100 volkan aktivo i kaminda temblor ta tuma lugá ku frekuensha. Aña pasá e isla Sulawesi tambe a sufri di un temblor ku un forsa di 6.2.
Un kandela den un fábrika na China a okashoná sigur 36 víktima mortal i un kantidat deskonosí ainda di persona disparsé. E kandela a tuma lugá den un distrikto ku hopi kompania tékniko. A rekerí sigur 63 trùk di brantwer i mas di 200 kolaboradó di emergensha pa kombatí e kandela.
E kousa di e tragedia no ta konosí ainda. Segun outoridatnan lokal servisionan di siguridat tin algun sospecho. E insidentenan aki no ta skars na China dor ku en general no tin kumplimentu ku normanan internashonal di siguridat.
E di dos bolsa di kriptomoneda mas grandi na mundu FTX a pidi “faillissement”. I esei miéntras ku 2 siman pasá e kompania tabata parse super eksitoso. Awor sinembargo FTX a resultá un di e frakasonan mas grandi den historia.
What: Kiko a pasa?
FTX tabata un plataforma hopi aktivo pa transakshonnan via kriptomoneda. FTX un dado momentu a traha vários debe huntu ku su supsidiario Alameda Research. Un dado momentu e kantidat di debenan tabata asina haltu ku FTX no por a kumpli mas.
Asina e maneho di datonan konfidensial no tabata optimal i tambe lo a usa hopi plaka pa kumpra kas pa trahadónan.
Why: Dikon kos a sali for di man?
Tin hopi spekulashon ainda tras di kon bin kos por a sali asina drástiko for di man. Asina a lanta hopi pregunta rondó di fundadó di FTX Sam Bankman-Fried ku te ku 2 siman pasá tabata parse un persona integro.
E tabata hopi biaha na Washington pa papia ku polítikonan Merikano riba regulashon mas severo pa kriptomonedanan. Irónikamente Bankman-Fried a resultá di ta responsabel pa skùifmentu di míles di mion pa asina tapa e pèrdidanan enorme di FTX i Alameda Research.
When: Kiko por antisipá ku kaida di FTX?
Pa kuminsá tur kompania rondó di FTX lo kai un pa un den otro, entre otro esnan ku a invertí hopi sèn den FTX òf kompanianan ku a fia FTX sèn. Di momentu ta inventarisando ta di kuantu kompania afektá ta trata.
Opviamente klientenan di FTX tambe lo keda afektá dor di e kaida di e bolsa. Ta asina ku hopi plaka di kliente a bai den gastunan personal. Sèn ku probablemente nan lo no mira bèk, pasobra nan ta esnan delaster den rei di tur esnan ku FTX debe kapital.
E konosido aktor retirá Michael J. Fox a risibí un premio Oscar honorario durante e asina yamá Governors Awards na Los Angeles. A otorgá Fox e premio pa su trabou pa kombatí e malesa Parkinson, rekohiendo mas di mil mion dòler na fondo pa desaroyá un trato p’e malesa. E aktor di entretant 61 aña a tende den 1991 ku e tambe tin Parkinson.
Fox a risibí e premio di su kolega Woody Harrelson ku a bisa di e aktor ku nunka el a pidi pa e ròl aki, pero ku e premio ta na su lugá si konsiderá kuantu el a logra ku su aktivismo.
Michael J Fox ta konosí di vários serie i pelíkula, en partikular Back to the Future. Durante su karera el a risibí entre otro 5 premio Emmy, 4 Golden Globe i un Grammy. Pero nunka pa un Oscar. Den 2020 el a retirá definitivamente for di mundu di sine ku lansamentu di su buki No Time Like the Future.
Segun un artíkulo agensia di prensa Bloomberg propietario di Twitter Elon Musk ta evaluando si mester despedí mas trahadó na Twitter. Entretantu a despedí asina tantu hende ku ekspertonan ta ferwagt defekto trempan òf lat riba e ret.
E atkisishon di Twitter a lanta basta inkietut último simannan. Despues di a despedí mitar di e personal el a pèrdè mas trahadó ku no tabata kier a traha mas duru a petishon di Musk.
Bloomberg ta skribi ku no opstante esaki Musk ta bai kita mas hende for di trabou, entre otro na e departamentu di benta. Te asina leu no a bin un reakshon ofisial di Twitter, ya ku e trahadónan na e departamentu di komunikashon no tei mas.
Segun e ekspertonan ku a papia ku Bloomberg, si surgi un problema na eskala grandi aworakí e kantidat di hende ku a sobra na e respektivo departamentunan lo no por resolvé e problema. Esei por afektá konfiansa di usuarionan.
Algun kompania ku tabata hasi propaganda riba Twitter, manera Volkswagen i Pfizer ya lo a para nan avisonan riba e plataforma.
E kompanianan lo ta preokupá ku e lantamentu di restrikshon por resultá den mensahenan negativo bou di nan avisonan. Hopi usuario lo ta malkontentu tambe ku Donald Trump no ta suspendé mas di e plataforma.
E konosido aktivista Argentino Hebe de Bonafini a fayesé na 93 aña di edat. Bonafini ta un di e fundadónan i presidente di Madres de Plaza de Mayo, un grupo di hende muhé ku a mobilisá masivamente den añanan 70 na Argentina pa haña klaridat riba kiko a pasa ku nan yunan ku a disparsé durante e diktadura militar na Argentina.
Bonafini a lanta e organisashon despues ku den 1977 tropanan di siguridat nashonal a sekuestrá su dos yunan. Tur djaweps Madres de Plaza de Mayo a tene akshon dilanti e palasio di gobièrnu. Den e era ei alrededor di 30 mil oponente di e régimen militar a disparsé misteriosamente. Bonafini tampoko nunka mas a mira su yunan…
Na e aeropuerto di Lima, kapital di Perú, un vehíkulo di brantwer i un avion a dal den otro. E trùk tabata krusando e pista na momentu ku un avion tabata lanta. E dos bomberonan den e vehíkulo no a sobrebibí e aksidente.
E avion, di e kompania LATAM Airlines, tabatin 102 pasahero na bordo ku aparte di e spantu no a sufri leshon. No tin klaridat dikon e trùk tabata krusando na e momentu ei.
Outoridatnan na haf di Antwerpen na Bèlgika ta interseptando asina tantu kokaina ku e fòrnunan pa destruí e droga konfiská no ta yega. Asina e korantnan De Standaard i Gazet van Antwerpen a revelá den wikènt tras di lomba. Aña pasá só a konfiská alrededor di 90 mil kilo di kokaina só.
E kantidatnan ku no ta keda destruí ta asina haltu ku a lanta preokupashon ku gangs lo usa violensha pa buta nan man riba e droga ku ta almasená ainda pa keda destruí. Tin indikashon ku e aña aki lo konfiská mas droga ainda ku lo trese mas violensha ku n’e rondó di e haf di Antwerpen.
Turkia a hiba un serie di atake riba e siudat Kobani, den parti nort di Siria, ku a kosta bida di sigur 12 kombatiente. Asina algun organisashon humanitario na Siria a konfirmá. E atake ta un reakshon riba e atentado na Istanbul siman pasá ku a laga 6 morto i mas di 80 persona heridá.
Gobièrnu di Turkia a indiká na e okashon ei kaba di lo kontrarestá e atentado. E atake lo ta dirigí riba blankunan di e movementu Kurdo PKK, un organisashon ku ta menshoná tambe riba e lista internashonal di organisashonnan terorista.
Segun agensia di prensa Bloomberg Turkia lo a haña aprobashon di Rusia pa hiba e atake a kabo. Rusia ta kontrolá sierto parti di e teritorio aéreo di Siria.
