by Webmaster | 09/05/2023 | IT, Apps & Social Media
E app nobo pa iPhone Hotshot ta bin ekipá ku inteligensha artifisial ku por traha potrèt falsu di e usuario huntu ku konosí i amigunan den vários situashon. Segun e fabrikante di Hotshot Aakash Sastry e usuario por krea potrèt kaminda e usuario por fingi di ta partisipando den vários aktividat kaminda e no tabata presente. E app ta diseñá si pa funshoná den grupo, pues bo no por us’é si bo konosí i amigunan no tin Hotshot.
Usuarionan mester hasi un scan di nan kara pa e sistema di inteligensha artifisial por funshoná. E app tin vários opshon i template ku e usuario por usa pa krea e potrètnan. Asina usuarionan por krea potrètnan tambe ku personanan konosí manera Christiano Ronaldo i Elon Musk den vários situashon ku un simpel boton.
Te asina leu e app ta ekipá ku imágen di backgroun di restorant i di den bar. E app no ta funshoná perfekto, pues ainda por distinguí si ta trata di falsifikashon. Te asina leu Hotshot ta solamente disponibel pa iPhone i no pa Android. Hopi usuario di social media a bisa ku nan no ta masha kontentu ku e tipo di appnan aki, pero segun e fabrikante hende no mester preokupá ku nan lo sali riba potrèt ku otro hende ku nan no ke. E potrètnan lo ta delete outomátikamente denter di 24 ora…
by Webmaster | 09/05/2023 | IT, Apps & Social Media
Outoridatnan Chines a detené un hòmber ku a usa e chatbot ChatGPT pa traha fake news di un aksidente ku trein mortal i distribuishon di esaki riba social media. Ta un di e promé detenshonnan relashoná ku mal uso di e plataforma di inteligensha artifisial na China. ChatGPT no ta disponibel na China, pues e hòmber a usa un ret privá pa haña akseso na e chatbot.
E hòmber a inventá un historia ku 9 persona a pèrdè nan bida den un aksidente ku un trein. Poko despues esaki a alkansá mas di 15 mil hende promé ku e retnan a kita e mensahe. E hòmber lo tabatin intenshon di traha sèn ku e programa. E por konta ku un kastigu di kasi 5 aña pa e echo aki.
by Webmaster | 09/05/2023 | Internashonal
Un hurado di korte na Merka ta tene èks presidente Donald Trump responsabel pa abusu seksual i difamashon den un kaso entamá pa e eskritor E. Jean Carroll. Alabes e hurado no ta ten’é responsabel pa violashon, manera e dama a akus’é. Carroll tin ku risibí segun e hurado un kompensashon di 5 mion dòler.
E hurado a argumentá ku e echo ku Trump a hasi bofon di e akusashonnan públikamente den un video a hasi daño na e dama su reputashon. Segun e eskritor Trump lo a viol’é den añanan 90 den un espasio pa kambia paña. Siman pasá dos otro dama a duna testimonio ku Trump lo a mishi ku nan di forma inapropiá. Trump ta hibando un kampaña di momentu pa pastisipá den elekshon pa presidensia di Merka atrobe.
