by Webmaster | 09/11/2023 | Cinema News
Aktornan Merikano probablemente ta bai reanudá trabou. E sindikato SAG-AFTRA a logra un akuerdo ku e studionan grandi i servisionan di streaming. E miembronan tin ku aprobá e akuerdo ofisialmente djabièrnè próksimo. Si tur kos bai bon produkshonnan por kuminsá drai atrobe despues di tabata 4 luna paralisá.
E 160 mil miembronan tabata den wèlga pa subida di salarionan mínimo, un parti di e ganashi di servisionan di streaming i protekshon kontra imágennan produsí ku inteligensha artifisial. Tur esakinan ta reglá den e akuerdo.
E aktornan tin miedu ku inteligensha artifisial por hasi nan remplasabel. Asina e industria di sine ya ta usa e teknologia aki pa produsí vershonnan mas yòn di e aktornan.
Na Hollywood tin un sentido di alivio. Hopi produkshon tabata paralisá dor di e wèlga ku a kuminsá for di mei. Promé ku esei ya kaba script writers tabata den wèlga. Un wèlga ku por sierto a kaba den sèptèmber último.
by Webmaster | 09/11/2023 | Business & Economy
E demanda pa djamanta a kasi kongelá den último par di luna. Asina por dedusí for di sifranan di De Beers Group, un di e komersiantenan di djamanta mas grandi na mundu.
Den òktober e kompania a bende pa mas o ménos 80 mion dòler na djamanta. Esei ta ménos ku mitar di e benta den e luna anterior i asta 80% mas abou ku aña pasá.
Paisnan manera China i India a importá hopi ménos djamanta den último lunanan. Hopi komersinate lokal tin sufisiente djamanta den stòk kaba.
No ta De Beers Group so ta sinti e efektonan. E kompania na Rusia Alrosa tambe ta pèrdè entrada dor di e demanda redusí. Segun agensia di prensa Bloomberg e benta a asta para dor di demanda redusí for di India.
by Webmaster | 09/11/2023 | Business & Economy
E kompania Hapones Eneos Group lo a paga sigur 4 mion dòler pa haña preferensha pa pasa dor di e kanal di Panamá. Asina entre otro agensia di prensa Bloomberg ta informá a base di dokumentonan di findishi.
Manera ta konosí dor di sekura i temperaturanan haltu e nivel di awa den e kanal ta hopi abou. Konsekuentemente no ta tur barku por pasa dor di e kanal, e ruta mas importante ku ta konektá Pasífiko i Atlántiko ku otro.
Di momentu tin un rei basta largu di barku ku ta wardando pa pasa e kanal. Pero alabes e gerensha di e kanal lo ta bende pasahe dor di e kanal na findishi. E barku di Eneos Group ku a pasa dor di e kanal di Panamá pa 4 mion dòler lo ta transportando krudo i produktonan kímiko.
by Webmaster | 08/11/2023 | Medioambiente
E glèchernan den parti nort di Grunlandia ta dirti mas lihé ku hende tabata pensa. For di 1978 te ku aworakí ya un terser parti di e eis a disparsé. Kontrali na e eis di nort pol ku práktikamente ya ta disparsé den verano e eis di Grunlandia ta eis riba tera ku si ta subi nivel di laman.
Segun sientífikonan ku a papia ku e revista Nature Communications e eis ku a dirti te ku aworakí tabata blòkia e otro partinan ku ta konhelá ainda di yega laman. E eis ku entrante awor dirti i yega laman si lo kontribuí na un subida di e nivel di awa.
Te ku 20 aña pasá tabata asumí ku e eis riba Grunlandia lo keda stabil. Pero den e mesun periodo por nota kambionan enorme. Na total tin sufisiente eis riba Grunlandia pa elevá nivel di laman ku 2.1 meter. E subida di laman notá den último añanan ta okashoná pa mas di 17% pa e fenomeno aki mes.
by Webmaster | 08/11/2023 | Internashonal
Promé minister di Portugal António Costa a tuma retiru relashoná ku un posibel kaso di korupshon i fabornan polítiko. Costa a anunsiá su retiru despues di un reunion ku presidente di Portugal Marcelo Rebelo de Sousa.
Djamars ora Costa a hasi su anunsio polis ya a hasi algun entrada na su kas gubernamental Palacio São Bento. Tambe tabatin entrada na kantor di su hefe di staf i e ministerionan di Medioambiente i Infrastruktura.
Hinter e asuntu a kuminsá kana fin di 2019 relashoná ku un investigashon tras di akuerdonan ilegal pa produkshon di litium i produkshon di hidrógeno na Portugal.
Portugal tin e reserva mas grandi di litium na Oropa. Litium ta un di e supstansianan mas usá pa traha bateria pa outo eléktriko. Ta un industria kaminda hopi kapital ta lora i tin vários partido embolbí, kada un ku nan propio interes.
Polis a detené sigur 5 persona: e hefe di staf di e promé minister, dos propietario di kompania embolbé, un komersiante i un alkalde. Tambe tin akusashonnan serio kontra minister di infrastruktura João Galamba.
Promé minister Costa en todo kaso ta akusá di a yuda aselerá sierto deal personalmente. El a indiká den un deklarashon ku su konsenshi ta limpi pero ku e no por sigui ehersé e funshon di promé minister ku akusashonnan asina serio. El a primintí di koperá ku e investigashon.
Costa tabata promé minister di Portugal for di 2015. For di yanüari 2022 e tin un mayoria apsoluto den parlamentu ku Partido Socialista. E próksimo elekson tabata planiá pa 2026. Presidente Marcelo Rebelo de Sousa mester disidí awor si lo hala e fecha ei dilanti òf si e mayoria den parlamentu mester trese un promé minister nobo dilanti. Costa lo keda promé minister en todo kaso te ora ku e desishon final kai.
by Webmaster | 08/11/2023 | Business & Economy
Nintendo ta sigui traha hopi ganashi riba e pelíkula Super Mario Bros. Movie i e video game The Legend of Zelda: Tears of the Kingdom. E éksito di e dos títulonan aki a stimulá benta di games i unidatnan di Switch, e console mas popular di Nintendo di momentu.
E último 2 kuartalnan ta e mihó 6 luna for di lansamentu di Nintendo Switch na 2017. E kompania su pronóstiko di resultado pa e aña aki ta kalkulá na 500 mil mion yen, esta 3.3 mil mion dòler.
Super Mario Bros. Movie a estrená den aprel di e aña aki, loke a stimulá e benta di games riba Switch. Di Mario Kart 8 Deluxe, ku a sali 6 aña pasá, a bende 3,2 mion kopia, e título mas bendé pa hunga riba Switch. E game ya a bende mas di 57 mion biaha for di su lansamentu.
Aparte di Mario Kart 8 Deluxe e game The Legend of Zelda: Tears of the Kingdom tambe ta bende bon. Esei a sali na mei di e aña aki i a bende mas di 19.5 mion biaha.
E benta di Switch console tambe ta kana hopi bon. Den e aña aki e kompania ta antisipá di bende 15 mion unidat. Di Switch te asina leu a bende mas di 132.5 mion unidat. Ku esei e console ta mas popular ku Nintendo Wii (101 mion unidat) i Game Boy (118.7 mion unidat).
Nintendo lo ta trahando riba e susesor di Switch. Te asina leu e kompania no a duna detaye riba esaki.
by Webmaster | 07/11/2023 | IT, Apps & Social Media
E plataforma X (ántes Twitter) tin 1 persona so ku ta komprondé Hulandes bou di su team di moderadó. E team aki ta responsabel pa kontrolá si e mensahenan riba e plataforma ta kumpli ku e respektivo reglanan di kondukta.
E team kompleto di moderadó ta konsistí di 2294 persona segun un rapòrt publiká pa e kompania. No ta konosí sinembargo si e persona aki ta berdaderamente Hulandes òf si e ta e úniko persona ku ta kontrolá mensahenan na Hulandes. Tampoko no ta konosí si ta semper e situashon tabata asin’aki òf si e lo sigui di e mesun forma.
Ta remarkabel ku ta 1 persona so tin den e team ku ta papia Hulandes kaminda tin sigur 81 ku ta dominá Aleman, 52 ku ta papia Franses i 41 ku ta papia Portugues. Segun X tur moderadó ta spesialisá den evaluashon i tratamentu di mensahenan prohibí riba e plataforma.
by Webmaster | 07/11/2023 | Internashonal
Ukrania i Moldavia por kuminsá ku negosiashonnan pa bira miembro di Union Oropeo. Asina NOS ta informá a base di un konseho di Komishon Oropeo ku lo keda tratá djarason. Segun e miembronan di e komishon e paisnan ta kumpli ku e rekerimentunan pa miembresia di Union Oropeo.
Ukrania i Moldavia mester a implementá vários reforma pa kombatí korupshon i labamentu di plaka. E leinan aki i e poder hudisial den e paisnan kandidato mester ta na òrdu promé ku por kuminsá palabrá miembresia di Union Oropeo.
Ópviamente no ta Komishon Oropeo ta disidí sino e 27 miembronan di Union Oropeo. E miembronan mester indiká si nan ta di akuerdo ku e konseho. E desishon final lo mester tuma lugá den desèmber.
Te asina leu Alemania so a indiká di ta na fabor di miembresia di e dos paisnan. Otro paisnan a keda mas reservá i tabata wardando e konseho aki promé. Espektativa ta ku lo duna lus bèrdè pa kuminsá negoshá, pero e palabrashonnan ei probablemente no ta tuma lugá e aña aki ainda.
E miembresia di Ukrania partikularmente ta di sigui konsiderando e implikashonnan polítiko relashoná ku e konflikto entre e pais i Rusia. Un eventual miembresia di Union Oropeo ta kambia e dinámika di e konflikto.
Aña pasá, siguiendo e invashon di Rusia, Ukrania a hasi un petishon urgente pa bira miembro di Union Oropeo. Poko despues Moldavia a sigui. Durante un reunion den yüni aña pasá ya e miembronan a aprobá e kandidatura di e paisnan.
by Webmaster | 07/11/2023 | Business & Economy
E preis pa materianan prima pa traha bateria pa outo eléktriko a baha konsiderablemente e aña aki. Asina e preis di litium a baha ku 70% i nikel ku mas o ménos 40%. E bahada ta un alivio konsiderando ku aña pasá e preisnan a subi drástikamente.
E mayor motibu pa e redukshon di preis ta relashoná ku e benta di outo eléktriko i tambe e ofèrta mas haltu for di partikularmente China, Indonesia i Repúblika Demokrátiko di Congo. Dor ku gobièrnu di China a amplia e kapasidat di produkshon e ofèrta di bateria ta mas haltu ku e demanda.
Esaki por kondusí na un redukshon di gastu di produkshon pa fabrikantenan di outo eléktriko. Den tal kaso e por ta interesante pa konsumidornan tambe. Segun pronóstikonan e produkshon di e materialnan aki ta bai sigui haltu.
Por lo pronto e preis di litium, nikel i kobalt, e materialnan mas importante pa produkshon di bateria lo keda abou. Pero na momentu ku e demanda subi e paisnan produktor sin duda lo subi e preis.
by Webmaster | 06/11/2023 | Siensia
Djaka tin e mesun kapasidat di imaginashon manera hende. Asina investigadónan na Janelia Research Campus a konkluí. Atraves di virtual reality e sientífikonan a midi e aktividat serebral di djaka di laboratorio.
E aktividat opservá lo ta komparabel na esun di sernan humano. Meskos ku serka hende e asina yamá hippocampus, e parti ku ta yuda nos kòrda espasio, tambe ta bira aktivo serka e animalnan di prueba. E kapasidat aki ta krusial pa determiná susesonan di pasado i futuro.
by Webmaster | 06/11/2023 | Naturalesa
Surnam ta e promé pais den region di Amazona ku a registrá 0 kaso di kontagio ku malaria for di 2021. Esaki apesar ku e pais ta rondoná ku otro paisnan kaminda si ta registrá kontagio lokal. Pa e logro aki e pais a risibí un rekonosementu di parti di Pan American Health Organisation (PAHO).
Mas o ménos 20 aña pasá e pais tabatin un problema grandi ku kontagio ku malaria. E kasonan eksistente ta kasonan importá for di Guyana, Brasil i Guyana Franses.
Den 2005 Surnam a lansa un programa kaminda a repartí nèt di protekshon i tambe a kombatí e muskitanan ku ta karga e malesa ku insektisida. Tambe a buska i detektá pashèntnan aktivamente pa trata nan ku medikamentu.
Segun PAHO e maneho aki a duna fruta despues di 2 dékada. Repúblika Dominikano, Belize, e estado Mehikano Quintana Roo i e siudat Brasileño Manaus tambe a haña e mesun rekonosementu.
by Webmaster | 06/11/2023 | Business & Economy
E resultado di Apple a baha den di tres kuartal ku 0.7% kompará ku e mesun periodo aña pasá. Apple a sera e kuartal mas resien ku un resultado total di 89.5 mil mion dòler.
E bahada ta debí na e benta redusí di tablets i Macs. E benta di smartwatches i speaker inteligente tambe a baha. E bahada di benta tabatin konsekuensha notabel pa e resultado total di e kuartal mas resien.
E benta di Macs a baha ku 33.8% den 1 aña di tempu. iPads tambe a bende 10.2% ménos. Meskos a pasa ku Apple Watch i su aksesorionan, ku a bende 4% ménos.
Di otro banda Apple a bende pa mas di 43.8 mil mion dòler na iPhones. E benta di iPhone, e produkto mas importante pa Apple, tabata 2.8% mas haltu ku e mesun periodo aña pasá. Mester bisa serka si ku e subida di preis di 7% di e aparatonan probablemente a hunga un ròl. Esei ta un indikashon ku e resultado no ta dor di benta di aparato sino di preis.
Tambe Apple a generá entrada dor di servisionan digital manera App Store, Apple Music i Apple TV. E resultado di e servisionan ei ta bon pa 16.3% di e resultado total den último aña, esta 22.3 mil mion dòler.
by Webmaster | 05/11/2023 | Newsletters
Resúmen di tur item di 30 di òktober te ku 5 di novèmber. Usuario di smartphone por scroll horizontal di item pa item.
by Webmaster | 03/11/2023 | Enkuesta
Segun e enkuesta polítiko mas resien di Ipsos na Hulanda e partidonan VVD i NSC ta kana kasi pareu na kabes pa e próksimo elekshon. E partidonan por konta ku 28 i 26 asiento respektivamente pa e parlamentu di 150 miembro. E bloke formá pa Groen Links i PvdA ta sigui na di 3 lugá na un distansha ku 22 asiento i PVV na di 4 lugá ku 17 asiento.
E éksito di e elekshon di Eerste Kamer no a resultá den un éksito garantisá pa Tweede Kamer pa BBB. E partido ta sigui PVV na di 5 lugá na un distansha konsiderabel ku 12 asiento.
Gran pèrdèdó den e enkuesta aki ta D66, e partido di sekretario di estado demishonario van Huffelen. D66 a baha di 24 asiento aktual den Tweede Kamer te na 8 asiento den e enkuesta aki.
by Webmaster | 03/11/2023 | Internashonal
Un hurado na Merka a deklará e komersiante di kriptomoneda Sam Bankman-Fried kulpabel di froude ku míles di mion dòler. Bankman-Fried a slùis sumanan enorme for di su bolsa pa kriptomoneda FTX, ora esaki a kai aña pasá. Ku kaida di e kompania tur e kapital a disparsé.
Bankman-Fried (31 aña) tabata konsiderá un Steve Jobs òf Elon Musk nobo ku a subi te na tòp di mundu di tech, partikularmente kriptomoneda. Su aparensha humilde tabata hala hopi atenshon i atmirashon rònt mundu.
Den un aña i mei di tempu el a logra produsí miónes ku komèrsio ku bitcoin i ethereum. Promé ku su 30 aña ya Bankman-Fried a gana 20 mil mion dòler.
Na kabamentu di aña pasá a resultá ku Bankman-Fried tabata usa sèn di invershonista pa finansiá su propio aktividatnan personal. A resultá ku el a diseñá un kódigo ku por a pèrmití transakshonnan te na 65 mil mion dòler sin prueba di garantia.
Ora invershonistanan a tuma nota di e problemanan rondó di e bolsa i a purba retirá nan kapital a resultá ku FTX tabata un hùls bashí. Bankman-Fried ta sospechá di a slùis sigur 8 mil mion dòler.
Den su deklarashon na korte Bankman-Fried a keda para ariba ku el a bira víktima di un konseho finansiero malu. Pa e motibu ei e no tabatin bista riba e situashon na FTX.
Di otro banda tin hopi prueba a bin dilanti dor di deklarashonnan di esnan ku tabata partisipe den e froude. A kambio di redukshon di kastigu nan a duna vários testimonio kontra Bankman-Fried. Bankman-Fried i algun konosí, inkluyendo su èks partner, a laga hopi prueba atras den nan grupo di app Wirefraud, esta froude digital.
E hurado no a tuma mas ku 4 ora pa yega na un veredikto. Riba 28 di mart lo bira konosí kiko lo ta su kastigu eksakto. Pa e tipo di krímen aki e mester tene kuenta ku algun dékada den prison.
