5W Press Newsletter #28 2023
Resúmen di tur item di 16 yüli – 22 yüli 2023
Usuario di smartphone por scroll di artíkulo pa artíkulo tambe.
Fanátikonan di Sean Bean kansá di mira nan ídolo muri den serie òf pelíkula
Fanátikonan di e konosido aktor Britániko Sean Bean (no di konfundi ku e otro konosido aktor Merikano Sean Penn) ta kansá di mira nan ídolo muri den sea un serie òf pelíkula. A bira un kustumber ku Sean Bean su personahe semper ta fayesé den fase tempran di sea un pelíkula òf serie den kua e ta hunga un ròl. I bèrdat mester keda bisá: ya ta di 25 biaha ku su fanátikonan a mira su personahe muri den e serie World On Fire. Fanátikonan di Bean ta furioso i mas ku fadá.
Den pasado ya tabatin petishonnan na produktornan di pelíkula i serie pa no laga e personahe di Sean Bean muri òf en todo kaso lag’e fayesé mas na kabamentu. Ta bèrdat ku Sean Bean a muri ya na final di e promé temporada di e serie popular Game of Thrones, den e promé pelíkula di e trilogia The Lord of the Rings i den e pelíkula di James Bond GoldenEye.
Resien por a mira Sean Bean komo e personahe Douglas Bennett den e serie World On Fire. Fanátikonan tabata aliviá ku el a sobrebibí e promé temporada di e serie. Pero e personahe ta muri de repente den e promé episodio di e di dos temporada dje serie. Bean a yega di rekonosé ku ta un poko repititivo i muchu fásil di antisipá ku kada bes su personahe ta muri.
Di otro banda mester bisa ku semper e mortonan di Sean Bean tin un impakto emoshonal enorme riba e historia di e serie òf pelíkula. Sean Bean sa kon gana simpatia di oudiensia hopi lihé ku personahenan humilde òf otro personahenan importante pa e plòt di e serie òf film. Pa e motibu ei semper su morto ta shòk. Algu inevitabel ora bo ta hopi bon den bo trabou.
FTX ta demandá èks gerensha pa mil mion dòler
E plataforma pa kriptomoneda FTX, kua a kai aña pasá, ta demandá èks gerensha di e plataforma pa un suma di mil mion dòler. Entre nan èks direktor Sam Bankman-Fried, kende huntu ku tres otro akusado lo a malversá kapital di FTX. E plaka lo a bai pa entre otro apartamentunan di luho, donashonnan polítiko i invershonnan riezgoso.
Tres miembro di e gerensha ya a konfesá, sinembargo Bankman-Fried ta sigui ninga kulpabilidat. Te ku aña pasá FTX tabata un di e plataformanan di kriptomoneda mas grandi na mundu, pero den novèmber a sali afó ku e kompania tabatin problema finansiero enorme. For di e atministrashon a resultá ku a pasa hopi kapital pa e kompania ruman Alameda Research, ku despues a invertí e sèn den invershonnan ku riezgonan enorme. E kompania a kai den otro i Bankman-Fried mester a retirá mesora pa motibu di froude.
Entretantu e ta den aresto di kas serka su mayornan na California pendiente tratamentu di e kaso. Despues di pidi bankarota FTX a sigui ku su direktor nobo John Ray. Un di su promé akshonnan ta pues e kaso aki pa rekobrá mil mion dòler bèk pa asina por kompensá esnan ku a keda perhudiká dor di e kaida di FTX.
Leon lòs na Berlin a resultá porko salvage
E siudat Aleman Berlin tabata ariba’bou djaweps despues ku informashon a sali ku un leon tabata kana lòs. Pero ku tur probabilidat ta trata di un porko salvage. Asina e alkalde di e parti spesífiko ei di Berlin Michael Grubert a partisipá djabièrnè mainta. Entretantu ya no tin estado di emergensha vigente.
E búskeda pa e animal a kuminsá mesora despues ku a publiká un posibel grabashon dje animal. E leon lo a ataka un porko salvage segun testigunan. Pero despues di un estudio mas profundo di e imágennan a resultá ku finalmente no ta trata di un leon.
Durante un konferensha di prensa a presentá imágennan di un leon berdadero i a kompará esaki ku e imágennan publiká anteriormente. E operashon inisial pa buska e animal tabata basta spektakular. A mobilisá sigur 120 agente polisial, un vehíkulo militar blindá, drone i asta helikòpter. Habitantenan di e region mester a keda paden ku nan animalnan di kas.
For di un prinsipio tabatin duda ku tabata trata di un leon ya ku no tabatin un melding a drenta na outoridatnan di un leon pèrdí for di sea dierentuin, sirko òf sanktuarionan pa animal.
Sientífikonan ta deskubrí strea ku dos kara
Sientífikonan a deskubrí un strea ku dos kara. Ta trata di un opheto den espasio ku ta kambiando di elemento. Na un banda e strea ta konsistí prinsipalmente di helium, miéntras e otro banda ta konsistí di hidrógeno. E bon notisia ta ku ta trata di un fenómeno ku por opservá hopi bon pa promé biaha den historia.
Janus, manera sientífikonan a yama e strea, ta un asina yamá enano blanku, un strea ku ta kasi morto i básikamente ta kayendo den otro. E strea ta rekohé hopi lihé i alabes e proseso ta generá hopi kalor i ta subi e densidat di e strea. Segun kálkulonan nos propio solo tambe lo bira un enano blanku aki 5 mil mion aña.
E nòmber Janus ta derivá for di e dios Romano ku mesun nòmber ku ta konosí pa su dos karanan ku ta simbolisá komienso i fin. E luna di yanüari su nòmber tambe ta derivá for di e dios Romano ei.
Sientífikonan rònt mundu ta maraviyá ku e fenómeno aki. Nan no por splika ta kiko ta okashoná e dos karanan aki. Te asina leu tabata konosí ku ora un strea transformá den un enano blanku e elementonan mas pisá ta move pa e núkleo di e strea. Hidrógeno ta e elemento mas leve ku nos konosé. Pa e motibu ei lo e mester tabata notabel riba hinter e superfísie. No ta normal ku hidrógeno ta kompartí espasio ku helium, manera ta pasando ku Janus.
Kisas pues ku tin un vèlt magnétiko desbalansá ku ta okashoná e fenómeno straño aki òf nos lo ta testigu di algu ku no sa pasa normalmente. Mas detaye rondó di e deskubrimentu aki ta publiká den e revista Nature.
Netflix ta rekuperá ku 5.9 mion usuario nobo
Den último par di luna Netflix a haña miónes di usuario nobo. Esaki despues ku e kompania a limitá kompartimentu di account ku hende ku no ta paga pa e servisio. Esei a fòrsa hopi hende ku no tabata paga pa tuma un abono riba e servisio di streaming.
For di mart e kompania a haña 5.9 mion usuario nobo. Esei ta dòbel di loke analistanan na Wall Street a pronostiká. Promé ku e medida e kompania lo tabata pèrdè hopi entrada dor ku usuarionan tabata kompartí nan account ku amigunan i famia. Na total Netflix tin 238 mion usuario rònt mundu. 100 mion di nan tabata kompartí nan account. Entretantu usuarionan eksistente mester paga èkstra si nan ke kompartí nan account.
Por sierto ku e wèlga di aktor i produktornan di sine na Hollywood tin su impakto riba Netflix. E kompania a indiká ku ta bai tin ménos lansamentu di pelíkula i serie.
Apple tambe ta bai lansa programa di inteligensha artifisial
Aparentemente Apple tambe ta trahando riba su propio programa di inteligensha artifisial. Asina agensia di prensa Bloomberg a publiká. ‘AppleGPT’, manera insiders ta yama e programa, en todo kaso no ta kla pa públiko ainda.
E chatbot aki di Apple ta traha ku su propio lenguahe, esta Ajax. Ku e modelo ei ta posibel generá teksto a base di informashon ku e apsorbá. Otro chatbots, manera ChatGPT ku ta kolaborá ku Microsoft i e programa Bard di Google ta traha segun e mesun prinsipio. Segun Bloomberg Apple ta trahando ku vários team riba e proyekto. Asina nan ta investigando si tin riezgonan di privacy.
E paso di Apple ta remarkabel si konsiderá ku direktor Tim Cook a bisa den un entrevista ku Good Morning America ku e kompania ta siguiendo e desaroyonan ku wowo di falki. Den mei Cook tambe a ekspresá su reservashonnan pa ku e subida di inteligensha artifisial.
Usuarionan di Binance na Hulanda mester lanta nan kriptomonedanan promé ku 17 di ougùstùs
E plataforma pa kriptomoneda Binance ta bai sera su portanan na Hulanda. Usuarionan Hulandes mester lanta nan kriptomoneda i bandoná e plataforma promé ku 17 di ougùstùs. Ta asina ku Nederlandse Bank no a i no ta bai tampoko otorgá un pèrmit na Binance, apesar ku ta trata di un di e plataformanan mas grandi na mundu.
For di djaluna último ya no ta posibel mas pa hasi trámite na Binance. Si usuarionan no lanta nan kriptomonedanan na tempu Binance por kuminsá sera asina yamá wallets.
Binance tin un kolaborashon na Hulanda ku Coinmerce. Klientenan di Binance por pasa fásil pa e plataforma ei via funshonnan di Binance i pasa nan kriptomonedanan mesora. Ya lo tin 100 mil kliente a tuma e paso aki.
Sientífikonan ta deskubrí fósil ku atake di mamífero riba dinosourio
Sientífikonan Chines i Canades a deskubrí un fósil ku ta sugerí un mamífero mordiendo un dinosourio. Lo ta algu úniko ya ku semper e impreshon tabata ku mamífero no ta forma menasa pa dinosourio. E estudio ta publiká den e revista Nature.
E fósil tabata bou di investigashon for di 2012 ora a deskubrí esaki na e provinsia Chines Liaoning, un lugá kaminda tin hopi fósil volkanisá. E skèlètnan tabata práktikamente intakto. Despues di un serie di kálkulo a konkluí ku e fósil ta berdadero i lo tin mas o ménos 100 pa 125 mion aña.
E mamífero tin e tamaño di un pushi komun i koriente, loke tabata e tamaño máksimo pa mamífero den e époka ei. E presa ta un dinosourio bebi di e tipo psittacosaurus, un tipo ku tabata kome vegetal so. E diseño mas abou ta duna un impreshon di e look di e animalnan.
Preis di trigo i maishi a subi drástikamente despues ku Rusia a menasá tránsito marítimo pa Ukrania
Preis di trigo i maishi a subi drástikamente djarason na bolsa di merkado na Chicago despues ku Rusia a papia palabra menasante riba tránsito marítimo den direkshon di Ukrania. E preis di trigo a subi ku 10% i maishi ku 9%.
Djaluna e palabrashonnan entre Rusia i Ukrania pa prolongá e dil pa e último por eksportá trigo a pega. Rusia a buta vários kondishon i èksigensha riba mesa pa pèrmití transporte di trigo via Mar Pretu. Rusia ta sospechá ku e ruta aki ta usá pa fasilitá ekipamentu militar na Ukrania.
Manera ta konosí e pais ta un di e eksportadónan mas grandi di trigo i maishi na mundu. Partikularmente paisnan Afrikano ta dependé di e trigo i maishi ku e pais ta eksportá. Interferensha den e entrega aki por kondusí na un krísis di alimento riba e kontinente.
Paul McCartney ta bai lansa podcast ku historia di kansionnan
E konosido artista i èks integrante di The Beatles Paul McCartney ta bai lansa su propio podcast e aña aki. Den e podcast aki titulá “McCartney: A Life in Lyrics” e kantante di 81 aña ta konta e historianan tras di tekstonan ku el a skirbi i lansa durante su karera. Segun e revista Rolling Stone ta trata di 12 episodio ku lo ta disponibel riba tur plataforma konosí entrante 20 di sèptèmber.
Den kada episodio McCartney lo papia di un kansion di sea su karera solo, The Beatles òf e banda di dje i su kasá Wings. Títulonan ku ta konfirmá ku lo e trata ta Eleanor Rigby, Let It Be i Live and Let Die. E podcast, manera indiká, lo ta disponibel riba tur plataforma popular entrante 20 di sèptèmber.
Ola di kalor pasando riba nos planeta
No ta na Kòrsou so nos a sinti’e. Ta bèrdat ku tin un ola di kalor sofokante ta pasando riba vários lugá rònt mundu. Nos ta repasá e situashon aktual di region pa region. Pasobra ta rèkòrt tras rèkòrt ta kibra den último simannan.
Si nos kuminsá opservá for di Asia bin den nos direkshon mester bisa ku partikularmente China ta registrá vários rèkòrt último tempu. Djadumingu atrobe. Riba e dia ei e pais a registrá un temperatura di 52.2 grado na e siudat Sanbao. Esei ta kasi 2 grado mas kalor ku e rèkòrt anterior. Pero esei mester keda konfirmá ainda pa World Meteorological Organization (WMO). Na Beijing a registrá temperatura riba 35 grado durante 27 dia konsekutivo. Na India, Bangladesh, Tailandia i Vietnam tambe a kibra vários rèkòrt. Na vários lugá na Asia a registrá 40 grado òf mas.
Pasando pa Oropa mester bisa ku partikularmente e paisnan den sùit manera Spaña, Italia i Gresia ta asotá pa kalor. Den vários parti tin un kódigo oraño òf kòrá emití relashoná ku kalor ekstremo. Asina a midi 41.8 grado na Roma, un rèkòrt pa e kapital Italiano. Na Sardinia a midi te asta 46 grado. Na Spaña a registrá 45 grado òf mas na vários sitio. Na Spaña i Gresia a surgi vários kandela di mondi tambe.
Na Áfrika partikularmente den Sahara ta registrá temperatura ekstremo. E kalor aki ta okashoná e temperatura ekstremo den parti nort di Áfrika i parti sùit di Oropa. Na Maroko i Algeria a registrá temperaturanan di 47.5 i 48 grado respektivamente.
Na Merka tambe ta registrá kalor ekstremo. Death Valley partikularmente ta aproksimando e temperatura mas haltu na mundu. E desierto, ku ta keda na California, a midi 53.3 grado riba djadumingu. Den un region pegá ku Death Valley a registrá asta 53.9 grado. Death Valley tin ketu bai e rèkòrt di temperatura mas haltu midí den historia. Einan a midi 56.7 grado den 1913. Na Texas a midi kasi 48 grado i na Phoenix (Arizona) temperaturanan di mas di 43.3 grado durante 19 dia konsekutivo.
Wèlga di aktornan na Hollywood a bira bisto pa públiko
E wèlga di aktornan na Hollywood a bira bisto pa públiko den wikènt tras di lomba. Djasabra e pelíkula di Disney Haunted Mansion no por a konta ku presensia di e respektivo aktornan riba e anochi di estreno. Esei ta nifiká ku red carpet tabata bashí.
E próksimo Comic Con, un konferensha pa kultura popular, ta parse e próksimo evento ku no por konta ku presensia di vários aktor pa enkuentro ku fanátikonan. Studionan manera Marvel, HBO, Lucasfilm i Netflix a partisipá kaba ku nan lo no ta presente relashoná ku e wèlga.
Tantu aktornan komo trahadónan den produkshon di sine a buta trabou abou. Nan ta èksigí mihó pago i tambe ke limitá e subida di inteligensha artifisial den sine.
Mester bisa por sierto ku e ousensia di aktornan na seshonnan ku fanátikonan ta stipulá den e reglanan di nan sindikato. Ora e sindikato drenta wèlga enkuentro ku fanátiko ta konsiderá komo trabou.
Facebook i Instagram no por publiká aviso komersial dirigí mas na Norwega por lo pronto
Por lo pronto Facebook i Instagram no por publiká aviso komersial dirigí mas na Norwega. E supervisor di privacy den e pais a prohibí esaki temporalmente relashoná ku posibel aktividat ilegal. E kompania ta haña 3 luna di tempu entrante 4 di ougùstùs pa kumpli ku regulashonnan vigente den e pais. Si Meta, e kompania propietario di e plataformanan, no kumpli e ta rizga un but di 89 mil euro pa dia. Facebook i Instagram ta keda pues disponibel, pero no por publiká aviso komersial dirigí.
Segun e supervisor Norwego e forma ku Facebook i Instagram ta traha e avisonan aki ta a base di e lokalidat di usuario, ki tipo di mensahe nan ta lesa i kiko nan ta publiká. Eseinan ta konsiderá violashonnan serio di privasidat den e pais. E supervisor ta argumentá ku usuarionan na Norwega mester duna pèrmit eksplisitamente pa e plataformanan hasi uso di e perfil di usuarionan i tantu Facebook komo Instagram mester puntra esaki eksplisitamente na usuarionan.
Call of Duty lo keda disponibel riba Playstation
E konosido wega Call of Duty lo keda disponibel riba Playstation. Asina Microsoft a konfirmá despues di atkisishon di e produktor di videogames Activision Blizzard. E kompania a indiká mas aleu ku esei ta reglá den un akuerdo.
Manera nos a informá anteriormente e take-over di Activision Blizzard ta esun mas grandi den historia di video gaming. Instanshanan di supervishon tabata kontra di e take-over aki relashoná ku posibel kompetensha inhustu si videogames sali solamente pa Xbox, e gaming console di Microsoft. Ainda Reino Uní no a duna aprobashon pa e take-over.
