by Webmaster | 07/06/2023 | Internashonal
E kiebro di dam na Ukrania riba djamars ta yega na momentu ku e pais tabata den preparashon pa un kontra ofensiva riba tropanan di Rusia. Ta asina ku djaluna presidente di Ukrania Volodymyr Zelenski a bisa den e konosido korant The Wall Street Journal ku e pais tabata preparando un ofensiva grandi. E kiebro di dam ta trese un retraso konsiderabel den e liña frontal di Ukrania.
E tropanan di Ukrania i Rusia ta separá di momentu dor di e riu Dnipro, ku a keda inundá ku awa dje dam, ku ta situá pues den teritorio okupá pa tropanan di Rusia. E inundashon ta forma un problema mas grandi pa Ukrania ku no por avansá, miéntras e parti okupá pa Rusia ta intakto ainda, dunando asina un bentaha.
Den Konseho di Siguridat di Nashonnan Uní a kuminsá reuní for di ayera, pero ainda tin diskushonnan fuerte andando riba e kuestion. Miéntras Ukrania i Rusia ta keda kulpa otro di kiebro di e dam entretantu ta kalkulá ku e kiebro di dam lo afektá alrededor di 40 mil persona direktamente i un otro 100 mil indirektamente. Rekonstrukshon di e region ta bai bira algu difísil. Dor di e daño ya okashoná kaba pa e agreshonnan hopi hende lo no ke bai bèk nan kas di akuerdo ku ekspertonan.
by Webmaster | 07/06/2023 | Internashonal
E operashon na barika di Papa Francisco a kana sin problema. Asina Vatikano a publiká djarason. Papa Francisco lo tin ku keda algun dia mas den hospital Gemelli na Roma despues di e operashon di djamars. Den próksimo 11 dia no tin oudiensia planiá. For di 2021 e pontífise ta tratá na su tripanan pa diverticulitis, algu basta frekuente serka hende grandi. Esaki tin ora por kondusí na infekshonnan ku mester keda tratá.
by Webmaster | 06/06/2023 | Medioambiente
Ta probablemente muchu lat pa salba e eis di verano na nortpol. Te asta si logra redusí emishon di gasnan dañino kompletamente, probablemente entre aña 2030 i 2050 no ta bai tin eis mas durante verano na e nortpol di nos planeta. Segun kálkulonan anterior e eis lo a disparsé no mas promé ku 2050.
Pero segun un estudio publiká den Nature Communications te asta ku ménos emishon esaki lo a pasa tòg, i posiblemente ya aki 7 aña. E estudio ta kondusí a base di datonan di satelit. For di potrètnan tumá tur aña den sèptèmber, ora zomer ta na su fin, a konkluí ku kada aña tin ménos eis den e region.
Manera ta konosí tambe e desaparishon di nortpol no ta okashoná subida drástiko di nivel di laman. Esaki pa motibu di e asina yamá lei di físika di Archimedes. Di otro banda desaparishon di e eis ta forma un peliger direkto pa e ekosistema di e region. Partikularmente pa e animalnan ku ta migra pa nortpol.
by Webmaster | 06/06/2023 | Internashonal
Un eksploshon inesperá a buta un dam enorme na Ukrania basha abou djamars, okashonando un inundashon desastroso di e área. E siudat pegá ku e dam, Nova Kakhovka, ta okupá pa Rusia. Segun e agensia di prensa estatal di Rusia mitar di e dam a basha abou i chèns ta grandi ku esei lo pasa ku sobrá di e dam tambe.
E dam ta konektá via e riu Dnipro ku un sentral di distribushon di awa 60 kilometer mas leu na e siudat Kherson. E parti nort dje riu ta okupá pa Ukrania i e parti sùit ta den man di tropanan di Rusia. Te ainda no tin klaridat ken ta responsabel pa e eksploshon. Ukrania i Rusia ta kulpa otro, miéntras ainda no tin un investigashon a tuma lugá na e sitio. No tin indikashon ku un atake militar a tuma lugá i te asina leu ta konosí ku ta Rusia ta okupá e region.
Segun informenan den otro medio Rusia lo kier a probechá di e dam su suministro di awa i a laga esaki yena muchu. Sin ku esaki tabata e intenshon esei por a resultá den un sobrekarga i desfunshonamentu di e dam. E desaster aki ta forma un problema pa tur dos partido den e konflikto. Ta asina ku e awa tabata usá pa suministro di awa na Krimea ku ta aneksá pa Rusia for di 2014 tambe.
Na banda di Ukrania tambe por surgi un problema enorme. E sentral di awa ta usá pa fria un sentral nuklear na Ukrania. Por lo pronto tur kos ta parse bou di kòntròl eynan ainda. Esey dimes ta un alivio, pero te ainda tin e problema di vários mil persona ku mester a bandoná nan hogar.
Nashonnan Uní a yama un reunion di urgensha relashoná ku e insidente.
by Webmaster | 06/06/2023 | Business & Economy
E balor di bolsa di e plataforma pa kriptomoneda Coinbase a baha ku 20% djamars despues ku e instansha Merikano di supervishon Securities and Exchange Commission (SEC) a start un kaso penal kontra e kompania. Coinbase, e plataforma di kriptomoneda mas grandi na Merka, lo ta ofresiendo servisio sin e pèrmitnan korespondiente.
E balor a baha den un ratu di ora di un poko mas ku $58 pa $48,45. E propiedatnan di Coinbase ta kaluklá na $130 mil mion danki na kapital di un par di desena di mion invershonista.
E supervisor SEC a anunsiá mas aleu ku ta vigilando tambe e otro plataforma mas grandi na mundu Binance, ku tambe ta sospechá di ofresé servisio sin e debido pèrmitnan. Kontrali na Coinbase, Binance no ta aktivo riba merkado di bolsa. Pero Binance a sinti e klap tòg ora e balor di su kriptomoneda BNB a pèrdè 10% di su balor.
by Webmaster | 05/06/2023 | Internashonal
Haiti ta asotá di momentu pa hopi inundashon i movementu di tera. Por lo ménos 15 persona a pèrdè nan bida i mas di 13 mil persona mester a bandoná nan hogar. Alrededor di 1200 kas ta deklará inapropiá pa biba aden i tin sigur 7400 kas ku a raportá daño material.
Tin hopi daño tambe na kosechanan, loke ta lanta e miedu pa un situashon di mas hamber den partinan dje pais. Manera ta konosí Haiti tin hopi problema ku distribushon di alimento.
Ta bini aserka ku e pais ta asotá pa algun aña pa violensha i guera entre gangnan kriminal ku tin kòntròl riba vários parti di e kapital Port-au-Prince. Promé minister Ariel Henry a hasi un yamada urgente na instanshanan internashonal pa yuda kontené e situashon. Nashonnan Uní ta dispuesto na yuda, entre otro ku restourashon di òrdu polisial pa trese trankilidat bèk.
by Webmaster | 05/06/2023 | Cinema News
E pelíkula animá nobo di Spiderman “Across the Spider-Verse” tabatin un eksitoso promé wikènt ku un resultado impreshonante di $120.5 mion, si bo realisá ku su antesesor “Into the Spider-Verse” a generá $35.3 mion den su promé wikènt. Mester bisa aserka si ku despues e resultado total di “Into the Spider-Verse” a subi te na $375.5 mion na nivel mundial.
Loke ta hasi e resultado di e pelíkula aki asina remarkabel ta ku ta pa promé biaha ku resultado di un susesor ta tres biaha mas ku e resultado di su antesesor. Ku e logro aki Spiderman “Across the Spider-Verse” ta e di dos pelíkula ku promé wikènt mas eksitoso e aña aki.
E título di pelíkula mas eksitoso den promé wikènt te ainda ta bai pa “The Super Mario Bros. Movie” ku a alkansá un benta di $146.3 mion. Esei a hasi e pelíkula mesora tambe e mihó interpretashon di un video game riba pantaya den historia.
by Webmaster | 05/06/2023 | IT, Apps & Social Media
E próksimo update di e sistema operashonal di iPhone, esta iOS 17, ta bin ku algun kambio chikitu kompará ku iOS 16. Despues di e update usuarionan di iPhone lo nota un asina yamá Journal app i un stand-by mode nobo. E update básikamente ta inkluí algun adaptashon na FaceTime i e funshon di kontakto i mensahe. Tambe ta bai tin un forma pa transkribí voicemail den teksto skirbí.
Pero e funshon ku mas ta resaltá ta e Journal app. Esaki ta un diario ku bo por usa pa graba i registrá bo relatonan diário òf anotashonnan ku bo kier hasi di un dia. E app mes lo puntra e usuario tur dia na un momentu programá si tin algu di e dia ey ku e usuario ke keda kòrda.
E update ta planiá pa un roll out den sèptèmber.
by Webmaster | 05/06/2023 | Cinema News
Ta posibel traha un pelíkula inklusivo SIN inklusividat fòrsá? “Woke done right” ta èksistí? Bo por “race swap” un personahe, sin daña e origin story original? Ta posibel traha un pelíkula moderno ku no ta resultá den divishon riba social media? Awèl sigui lesa e spoiler-free review aki and let’s find out!
Den 2018 Sony a kontestá e promé 2 di e 4 preguntanan ey kaba ku un SI rotundo ku lansamentu di Spiderman – Into The Spiderverse. I Sony ta deliver ATROBE ku Spiderman – Across The Spiderverse. Sony a logra ku e film aki ($120.5 mion na Merka den promé wikènt) loke Disney NO a logra ku e remake di Little Mermaid ($118.6 mion na Merka den promé wikènt). Esei ta gewoon the hard facts…
Mi ta bai un paso mas leu! Ku un ekselente mix di good storytelling & character development, humor i diseño 3D impekabel, Sony a logra loke Marvel mes nunka a logra: hasi Ultimate Spiderman (a.k.a. Miles Morales) un personahe no solamente aseptá, pero tambe stimá. Asta pa esnan ku nunka a gust’é!
Those who know, know… Originalmente Miles Morales tin e notorio reputashon di ta un asina yamá “tokenized character”: e ta èksistí djis pa bisa ku “tin un Spiderman di otro rasa tambe”… Loke ta molostiá hopi fanátiko ta e echo ku tokenized characters hopi biaha ta haña èkstra abilidat for di e personahe original òf hopi biaha nan no tin e mesun debilidatnan ku e personahe original.
E fout mas grandi di esnan responsabel pa e kambionan ey ta buta nan meimei di kanon eksistente. I ta nèt e kanon, debilidatnan i falta di abilidatnan ey ta e partinan esensial di e historia di personahenan original. E ta hasi nan mas “relatable” pa e oudiensia ku stima nan pa dékadas kaba. Pa un públiko por aseptá un otro persona tras di un alias bo mester hustifiká dikon e personahe ey ta meresé e nòmber.
Sony a fix e problema ey for di un prinsipio ku Spiderman – Into The Spiderverse dor di krea un setting den un dimenshon diferente i duna Miles un “character development” mas sólido i konsistente ku su kreadornan original. Into The Spiderverse ta un bunita kuenta kon Miles ta siña aseptá di ta e “exception to the rule”. Kontrali na Peter, Miles ke ta “part of the group”, tin un hopi bon bida sosial i e no ta un mucha ku nan ta “bully”.
E dinámika ku su mayornan tambe ta diferente: nan ta stimul’é pa usa su brains mas tantu i ku ta ok pa ta diferente from the group. Miles mester a bai un skol pa mucha sabí pasó skol regular ta muchu fásil p’e. Miles su eksperensha pa bira Spiderman ta kompletamente diferente for di Peter Parker i e ta sinti hustifiká. Sony a deliver gewoon un obra maestral ku Into The Spiderverse!
Spiderman – Across The Spiderverse ta pick up from there di un forma ku ta sinti hopi natural i ta introdusí mas inklusividat ainda ku na ningun momentu ta sinti fòrsá. Den e context ku Sony a krea e ta funshoná perfektamente i ta tene bo invested in the story. Sony ta asina sabí di no inkluí diversidat via mensahe polítiko sino via un actual story. And a damn good one!
Loke ta trese mi na e di tres pregunta ku mi a hasi na kuminsamentu di e review aki. E asuntu di race swapping…
Miles Morales NO ta e “race swapped” character akinan… E “título” ey ta bai pa Jessica Drew, alias Spiderwoman. Sony a krea un forma ekselente di hustifiká e “race swap” via e Spiderverse setting. Kontrali na Disney ku ta “race swap” i kambia e kuenta original pa loko, anto despues ke tilda hende di rasismo… Yes! Esaki ta un race swapped Jessica Drew ku hende por biba ku n’e!
Tambe Sony su Spiderverse ta “make sense” si bo kompará esaki ku e Marvel Multiverse di Disney. Pa esnan ku gusta i komprondé e konsepto di “multiverso”: eventonan no ta kana paralèl, pues hende por “look completely different indeed”. Si bo sa di inkorporá esei di un forma sabí den bo story bo no tin mester di ofendé un fanatikada eksistente inesesariamente manera Disney ta hasi. Sony made it part of the story! Mi ta sinti mi invested!
Mayoria hende no ta interesá den identifiká nan mes ku personahe: nan ke simplemente sinti nan mes invested den e personahenan. No ta pa personahe bo ta wak… Bo ta wak pa tur i damn it… e filmnan aki ta deliver!
Loke ta trese mi na e di 4 pregunta….. Ta posibel krea un interpretashon moderno SIN okashoná divishon?
HELL YEAH! Último añanan Disney a ataká hopi hende ku e asina yamá “race card”… Si en bèrdat tin asina tantu hende “rasista”, dikon no ta mira e problema ey ku Spiderman – Into & Across The Spiderverse? ‘Cause you have to make sure it makes sense!
Kontrali na otro títulonan ku ta lanta diskushonnan basta fuerte riba social media generalmente públiko a aseptá e kambionan den Across The Spiderverse. Su antesesor Into The Spiderverse no tabata eksitoso na momentu di lansamentu.
Pero despues hopi reviewers notorio i krítiko inesperadamente a elogiá e diversidat di Into The Spiderverse. It can be done! Into The Spiderverse a bira popular poko poko i por fin hende ta aseptá Miles Morales komo un otro Spiderman.
E voice-acting tambe ta tremendo i ta sinti natural. E personahenan i diálogonan ta hopi bon skirbí i bo ta sinti ku e eskritornan a hasi nan bèst pa duna e partinan emoshonal bon kontenido ku ta relatable i ménos genériko ku otro interpretashonnan moderno.
Loke Sony ta komprondé mihó ku Disney tambe ta e dinámika maskulino i femenino. Algu ku Nintendo i Universal a hasi magistralmente tambe den The Super Mario Bros Movie. Disney a introdusí un fórmula algun aña pasá kaminda personahenan maskulino ku públiko tabata stima a wòrdu kompletamente desmaskulinisá òf ridikulisá na fabor di personahe femenino “over-powered” ku un aktitut i personalidat ku ta duna bo gana di vomitá. P’esei awe niun hende no ta tuma Thor òf The Hulk serio mas….. I’m just saying…
Sony i Universal NO a kometé fout aki. E personahenan femenino den e Spiderverse no ta prediká òf kompará nan mes ku hende hòmber. Na ningun momento nan ta parse di ta dependé di hende hòmber tampoko. They trust the guys and the guys trust the girls. Esei ta hasi nan hopi mas likeable.
Pa bo kompletamente enjoy e eksperensha aki bèrdat bo mester konosé Spiderman basta bon pa bo rekonosé tur e referenshanan “cross media” ku ta genialmente inkorporá den e serie nobo aki.
Yep! Spiderverse ta un serie i “het smaakt verdorie naar meer” i Miles ta meresé di ta e lead Spiderman! Ta SU story! Spiderman – Into The Spiderverse i Across The Spiderverse ta forma parti di un storyline mas largu ku ta laga bo ku un smak di satisfakshon total i vooral investment den personahenan hopi bon skirbí pa e kreadornan di e Spiderverse aki.
I love it!
Across The Spiderverse ta meresé mi skor máksimo pa superhero movies: 8 out of 10!
– Maurilhio Nobrega pa 5W Press
by Webmaster | 04/06/2023 | Newsletters
Resúmen di tur item di 28 mei – 3 yüni 2023
Usuario di smartphone por scroll di artíkulo pa artíkulo tambe.
by Webmaster | 03/06/2023 | Notisia Lokal
E repartishon di paña kolektá pa KuraZorg na Sentro Sùr Lumena tabata un éksito enorme. E fundashon ta sumamente kontentu pa e akohida i ta gradisí tur esnan ku a hasi donashon i / òf duna un man pa realisá e akshon aki.
Gustosamente e fundashon ke informá ku riba petishon di Kuerpo Polisial di Banda’riba ta bai kontinuá ku e proyekto! Pues tur esnan ku ainda kier hasi un doashon por hasi esaki i otro siman por pasa atrobe pa tuma donashonnan hasí na KuraZorg.
Un palabra di danki ta bai na pueblo di Kòrsou ku en grande a kontribuí òf hasi uso di e posibilidat pa pasa tuma paña!
Pa esnan ku no tabata tey, aki ta sigui un impreshon di e aktividat.
by Webmaster | 02/06/2023 | Business & Economy
Mundialmente preis di alimento ta mustrando un bahada leve. Preis di produktonan básiko manera grano, produktonan derivá di lechi i zeta di palma a sigui baha despues di e bahada di luna pasá. Preisnan ta na e nivel mas abou for di aprel 2021.
Motibu prinsipal ta e deal di suministro di grano ku Rusia i Ukrania a akordá ku otro aña pasá i tambe e kosecha favorabel di último tempu. Ta un desaroyo ku por kondusí na un bahada di preis di sierto produkto den supermarket. Esaki por trese pronto un alivio pa konsumidornan rònt mundu, inkluso na Kòrsou, kaminda preis di komestibel a subi drástikamente.
Segun kálkulonan di Food and Agriculture Organization di Nashonnan Uní, e organisashon ku ta monitoria i mantené un registro di preisnan mundial, preisnan a baha ku 2.6% debí na un bahada di 3.2% di e preis di produktonan derivá di lechi. Kompará ku e mesun periodo aña pasá por papia di un diferensha di 18%. Vèt vegetal di girasol i soya, trigo i maishi tambe tabata mas barata, pero aros i karni si a bira mas karo. E preis mas haltu ku nos ta mira ainda ta esun di suku. Preis di suku ta mustra un subida permanente.
Manera indiká e bahada aki ta indikashon ku preisnan den supermarket tambe ta bai baha, pero dor di konyuktura ekonómiko por dura vários luna promé ku nos ripará un bahada di preis den supermarket tambe.
by Webmaster | 02/06/2023 | Business & Economy
China a kuminsá ku boramentu di un buraku ku un profundidat di 11 kilometer den un afan pa yega na mas kombustibel fosil. Ta trata di un rèkòrt pa Chinesnan. E proyekto ta bou di guia di China National Petroleum Corp ku ta papia di un suministro garantisá di energia pa China.
E proyekto a kuminsá e siman aki na Tarim den parti wèst di China kaminda tin hopi petroli presente den tera. Pa e proyekto aki mester tene kuenta ku vários lag di tipo di tera. Na e profundidat ey nos ta papia di tera formá 145 mion aña pasá.
Segun agensia di prensa Bloomberg ta informá e proyekto lo dura alrededor di 11 luna. Aparte di petroli i gas gobièrnu di China ta spera tambe di haña otro materia prima i mineral pa produsí por ehèmpel outo eléktriko. Tambe mester ta posibel pa hasi investigashon sientífiko na e profundidat ey pa studia temblor i erupshonnan volkániko.
E plan ambisioso aki por sierto no ta e promé den su sorto. E pais ku ta karga e rèkòrt ta Rusia ku a bora un buraku ku a alkansá un rpofundidat di 12.262 meter.
by Webmaster | 01/06/2023 | Cinema News
Apesar di e reakshonnan no masha positivo riba e último edishon di e pelíkula Fast & Furious, aktor Dwayne Johnson a konfirmá ku e lo bin bèk komo Hobbs den e Fast & Furious-franchise. Su personahe lo bin bèk den parti 2 di Fast X. E promé parti ku aworakí ta drai bou di e nòmber Fast & Furious 10, a sali 2 siman pasá kaminda nos por a mira e aktor na kabamentu di e pelíkula. Dos aña pasá ainda Johnson tabata bisa ku e tabata kla ku e serie.
by Webmaster | 01/06/2023 | Business & Economy
E kresementu di merkado laboral na Hulanda (esta, e kresementu di kuponan nobo di trabou) a práktikamente stagna. Aña pasá kos tabata mustra bon ainda ora tabatin 1.6 mion vakatura disponibel, e mayor kantidat registrá, pero awor a yega un fin na e situashon ey.
Segun kálkulonan e kantidat di vakatura lo subi ku 1,4%, pero pa 2024 no ta ferwagt un subida di mas ku 0,5%. E sektornan ku mester tene mas kuenta ku kontrakshon di trabou disponibel lo ta konstrukshon i servisionan finansiero. Asina por dedusí di e pronóstiko anual di UWV ku ta atribuí e kontrakshon aki na pronóstikonan ekonómiko ménos favorabel. E kantidat di vakatura nobo ta kalkulá e aña aki pa baha ku 119 mil.
Aparte di esei e merkado laboral Hulandes ta sufri tambe di falta di personal. E mayor problema ta ku no ta ekonomia ta dikta mas kua trabou tin disponibel: ta loke e studiantenan resien graduá aworakí tin di ofresé no ta kompatibel ku loke kompanianan ta buska. Dor di falta di studiantenan ku e konosementu ku merkado ta pidi, kompanianan no por desaroyá aktividatnan nobo ku riba nan turno tin un impakto grandi riba e performance di e respektivo kompanianan.
Konsekuentemente e kompanianan ta kada bes mas inkliná pa outomatisá i reorganisá sierto proseso opreashonal. Segun UWV e mismatch entre kompania i kandidato pa traha ta dia pa dia mas grandi kousando asina un problema struktural riba e merkado laboral Hulandes. E organisashon ta rekomendá pa ofresé e kandidatonan nobo e posibilidat di kambia di estudio pa asina nan tin un mihó chèns riba merkado laboral.
