by Webmaster | 14/12/2023 | Medioambiente
E akuerdo final di e tòp klimátiko COP28 na Dubai no ta perfekto pero si satisfaktorio. Asina vários medio di komunikashon rònt mundu ta raportá despues di e kumbre. Di un banda e ta stipulá ku mundialmente lo redusí uso di kombustibelnan fósil. Di otro banda ainda tin espasio pa sigui ku esei.
E teksto no ta inkluí un fase di redukshon kompleto di kombustibel fosil, manera Oropa tabata ke. Ainda lo tin espasio den futuro pa uso di kombustibelnan fosil den mundu di kímika kaminda materia prima ta keda un nesesidat indispensabel.
E plan ta stipulá un emishon di 0% di kombustibel fosil den 2050. Di aworakí te ku e momentu ei lo mester sigui stimulá teknologianan manera energia di bientu i solo pa saka mas for di esakinan.
Sierto forma di energia nuklear limpi tambe ta inkluí den e opshonnan pa generá energia den futuro. Almasenamentu di karbodiókseno tambe mester haña mas prioridat den añanan benidero.
Por lo pronto no ta fiha un fecha definitivo pa para ku uso di gas natural. Tampoko no tin klaridat kiko e akuerdo nobo aki ta nifiká pa e paisnan mas pober. Paisnan ku ekonomianan mas fuerte ta dispuesto pa yuda nan, pero asina no ta konosí ken mester di yudansa di ken.
by Webmaster | 14/12/2023 | Business & Economy
E gobièrnu di e presidente nobo di Argentina Javier Milei ta bai baha balor di peso ku 54%. Ku e devaluashon di e peso Argentino e gobièrnu resien instalá ke duna un estímulo na ekonomia. E plan ta pa hasi e preis di produktonan di eksportashon mas interesante den eksterior.
Aparte di e plan pa devaluá peso tambe e gobièrnu ta bai ekonomisá riba supsidionan pa energia, transporte i obranan públiko. E kantidat di ministerionan tambe lo baha ku 50%.
E pais ta pasando dor di un inflashon hopi haltu. Konsekuentemente mester adaptá preisnan kasi tur siman. Gobièrnunan anterior a purba baha importashon di produktonan, pero esaki no a duna resultadonan satisfaktorio. Tambe ta kalkulá ku 40% di Argentinonan ta biba den pobresa. E programanan di ayudo sosial eksistente lo no kambia.
Segun e korant The Telegraph IMF ta satisfecho ku e pasonan ku e gobièrnu entrante ta tumando. Di momentu Argentina debe IMF mas o ménos 40 mil mion dòler.
by Webmaster | 14/12/2023 | Teknologia
E fabrikante di vehíkulo elektróniko Tesla mester ‘recall’ mas di 2 mion outo. Ta trata di un limitashon di e software di e modelonan S, X, 3 i Y ku Tesla a introdusí for di òktober 2012.
E supervisor Merikano NHTSA a yega na konklushon ku e sistema di asistensha Autopilot no ta sufisiente sigur. E sistema lo no ta stimulá e shofùr pa keda paga tinu.
E supervisor a investigá tur aksidente ku a tuma lugá durante dos aña kaminda e outo a kore riba Autopilot. NHTSA a nota un riezgo di aksidente elevá ora e sistema ta operashonal. Hopi konduktor ta keda sin paga tinu despues ku nan aktivá esaki.
Ounke ta papia di un asina yamá ‘recall’, esta ku e outonan mester bai bèk fábrika, Tesla por aktualisá e sistema riba distansha. E kompania ta bai adaptá e sostware di Autopilot ku un update pa esaki duna mas alerta na e shofùr di e vehíkulo.
by Webmaster | 13/12/2023 | IT, Apps & Social Media
Parlamentu Oropeo ke prohibí tur triki ku ta hasi social media adiktivo. E prohibishon lo mester kubri tur funshon tras di scrolling sin límite, likes i check boxes si hende a lesa un mensahe òf nò.
E parlamentu di Oropa a vota djamars ku gran mayoria na fabor ku 545 voto na fabor, 12 kontra i 61 apstenshon pa un proposishon di lei. Básikamente e miembronan ke pa funshonnan manera likes, notifikashon i check box pa mira si hende a lesa sierto mensahe ta standart pagá. Tambe retnan sosial mester inkorporá atvertensha ora ku usuarion ta pasando mas di mei ora riba nan plataforma.
E proposishon ta dirigí riba apps manera Facebook, Instagram, TikTok i YouTube. Tur funshon adiktivo mester minimalisá. Di momentu tin opshonnan ku usuarionan por aktivá individualmente. Pero ku e lei aki e funshonnan ei mester bira standart te ora e usuario paga esaki.
E proposishon tin ku pasa awor pa Komishon Oropeo pa un evaluashon. Despues meter formulá un teksto pa e lei, pues ta bai dura algun aña promé ku e lei kristalisá.
by Webmaster | 13/12/2023 | Medioambiente
Ta desèmber, pero ketu bai ta hasi bastante kalor den sierto parti di Spaña. Djamars a registrá 29.9 grado Celsius na e siudat Málaga.
For di sùit tin korientenan di kalor ta subi tera, resultando den un temperatura basta haltu pa e temporada di aña. Asina na Alicante a midi 27.3 grado.
E rèkòrt aki a kibra esun di 13 aña pasá ora a midi 29.4 grado na Granada, pegá ku Málaga na Andalusia.
by Webmaster | 13/12/2023 | IT, Apps & Social Media
Netflix ta bai publiká e sifranan di sintonia di su pelíkulanan i serie 2 biaha pa aña. Den e rapòrt aki por konsultá kuantu ora usuarionan a dediká na un título disponibel riba e plataforma. E rapòrt lo inkluí tur título riba Netflix ku tin mas di 50 mil ora na views.
Esaki ta marka un kambio drástiko den e maneho di Netflix. Anteriormente e kompania no kier a kompartí e informashon aki i sigur no ku kompetensha. Den último dos aña Netflix a kompartí su top 10 di pelíkulanan mas mirá, pero e raport aki lo duna un bista mas profundo riba Netflix su sintonia.
E kambio aki lo ta un kumplimentu ku eskritor i aktornan ku a èkesigí pa e servisionan di streaming duna mas transparensha. Ta un tema ku a bin dilanti durante e wèlga di aktor i eskritornan anteriormente e aña aki.
Por sierto ku e rapòrt solamente lo duna un overview di e kantidat di oranan i no e kantidat di usuarionan ku a wak. Tampoko e rapòrt lo no kontené informashon riba kuantu hende bèrdaderamente a wak un serie kompletamente.
by Webmaster | 12/12/2023 | Naturalesa
Na Brasil un kantidat enorme di foka a muri den último par di luna dor di kontagio ku grip di para. E malesa a lanta kabes den mei di e aña aki. E grip posiblemente no ta afektá solamente foka, pero tambe pinguino i tortuga. Na Rio Grande do Sul a haña vários karkas.
For di sèptèmber ya tabatin indikashon ku algu tabata pasando ku e populashon. For di outopsia riba 942 foka morto a determiná ku ta trata en bèrdat di grip di para. Kriadónan di galiña ta preokupá. E sektor Brasilero ta esun mas grandi na mundu i tin basta miedu pa ku un prohibishon di eksportashon atrobe.
Posiblemente e malesa a surgi na Perú, pa despues sigui plama tambe pa Chile, Argentina i Uruguay.
by Webmaster | 12/12/2023 | Medioambiente
No tin un deal satisfaktorio pa para gradualmente ku kimamentu di kombustibelnan fósil. Den vários parti di mundu gruponan di interes ta desapuntá ku e resultado di e tòp di klima na Dubai. Por lo pronto mayoria pais por sigui kima petroli, gas i karbon.
Mayoria proposishon ku a bin dilanti ta opshonal, pues no ta enserá niun obligashon. Básikamente e tòp a resultá den un lista di rekomendashon sin kompromiso. Union Oropeo en todo kaso no ta satisfecho ku e resultado. Oropa a hasi basta invershon den medidanan pa redusí uso di kombustibelnan fósil.
Otro ekonomianan grandi manera Merka, Rusia i China no ta mashá inkliná pa redusí nan uso di kombustibel fosil. Partikularmente Saudi Arabia lo ta kontra medidanan pa redusí produkshon di kombustibelnan fosil.
Por a nota ku China a invertí hopi den energia renobabel den último añan. Ounke e pais ainda no ta pensa di baha su uso di kombustibel fosil e pais ta kana dilanti ku su promesanan na e tòp di klima.
E tòp mester a finalisá kaba, pero pa motibu di e opheshonnan di entre otro Oropa lo mester adaptá partinan grandi di e akuerdo final.
by Webmaster | 12/12/2023 | IT, Apps & Social Media
Alphabet, e kompania propietario di Google, tin un monopolio ilegal ku Google Play. Asina un hurado na Merka a disidí den un kaso entamá pa e produktor di videogames Epic Games, konosí partikularmente pa e game Fortnite.
E hurado a yega unanimamente na su desishon den un par di ora. E miembronan ta di akuerdo ku Google ta abusá di produktor di video games i otro aplikashon dor di obligá nan di usa e sistema di pago di Google.
E desishon di e hurado por tin konsekuensha grandi pa e entradanan di Alphabet si wes bai di akuerdo ku e hurado. Den tal kaso Alphabet lo apelá e desishon.
Epic Games a start e kaso aki den 2020 pa e prosedimentu di pago di Google. Epic Games a entamá un kaso kontra Apple Store tambe, pero no a gana e kaso riba tur punto.
by Webmaster | 11/12/2023 | Infotainment
E búskeda mas popular bou di Hulandesnan riba Google e aña aki tabata Stemwijzer. E kompania a publiká djaluna e 10 keywords mas buská riba e servisio di búskeda.
Generalmente por bisa ku interes di Hulandesnan tabata pa un gran parti den polítika. Aparte di Stemwijzer tambe tabatin bastante interes den e search items ‘verkiezingen’, ‘BBB’ i ‘NSC’. ‘Kabinet gevallen’ loke a kondusí finalmente na elekshon ta finalisá e lista na number 10.
For di e lista por dedusí tambe ku Hulandesnan ta hopi interesá den ChatGPT ku ta pará na number 2 i ku futbòl pa dama por a konta ku bastante interes pa alkansá di 3 lugá riba e lista di Google.
Meskos ku na Kòrsou tambe tin hopi interes pa e konflikto entre Israèl i Palestina. Siguiendo desasternan natural por nota tambe ku Hulandesnan ta buska Giro555 pa hasi eventual donashon.
E Top 10 ta segun Google:
- StemWijzer
- ChatGPT
- WK vrouwenvoetbal
- Oorlog Israël en Gaza
- Giro555
- BBB
- Verkiezingen
- Crompouce
- NSC
- Kabinet gevallen
by Webmaster | 11/12/2023 | IT, Apps & Social Media
Humanidat ta kore riezgo di pèrdè kòntròl riba Inteligensha Artifisial. Asina Rene Haas, direktor di e fabrikante Britániko di chip pa computer Arm Holdings, a bisa agensia di prensa Bloomberg.
E desaroyonan ta bai asina lihé ku esaki por yega na dominá den teknologianan importante. Rene Haas ta haña ku mester pensa riba un forma pa drai e desaroyonan bèk si esakinan sali for di man.
E ta rekonosé ku Inteligensha Artifisial tin su benefisionan tambe, pero mester perkurá pa esaki sirbi hende. Den próksimo 5 pa 10 aña nos lo nota kambionan signifikante.
Den e entrevista ku Bloomberg Haas a bisa mas aleu ku te ku aworakí su sektor, esun di produkshon di chips pa computer, su enfoke te ku aworakí tabata riba produkshon di chips pa telefòn. Su kompania Arm Holdings ke kuminsá kompetí ku e konosido kompania Merikano NVIDIA ku ya ta fasilitando entre otro OpenAI i Google.
by Webmaster | 11/12/2023 | Internashonal
E presidentenan di Venezuela i Guyana lo reuní ku otro djaweps próksimo pa papia riba e disputa rondó di e region Essequibo, un region ku ámbos pais ta èksigí. Di momentu e region ta rekonosé internashonalmente komo teritorio di Guyana.
E reunion ta bai tuma lugá riba inisiativa di promé minister di Saint Vincent i Grenadines, kaminda nan lo topa ku otro tambe. Di momentu Saint Vincent i Grenadines ta presedé e inisiativa di kolaborashon CELAC.
Tantu Venezuela komo Guyana a solisitá presensia di presidente di Brasil Lula na mesa. Ámbos pais ta kompartí un frontera ku Brasil ku resien a mobilisá militar den e region. Presidente Lula a urgi su koleganan pa trata na de-eskalá.
Di momentu e Korte Internashonal di Hustisia ta tratando e asuntu, pero te asina leu no tin un desishon a kai. Pa e motibu ei mes e Korte a pidi Venezuela pa respetá e fronteranan manera nan ta aworakí.
Segun un konsulta popular tené na Venezuela siman pasá 95% di Venezolanonan lo ta na fabor di aneksashon di e region den disputa. No tin masha klaridat ta kiko presidente Maduro ke logra ku e referèndem.
Djabièrnè último riba petishon di Guyana tin reunion riba nivel diplomátiko tras di porta será a tuma lugá den e Konseho di Siguridat di Nashonnan Uní. No ta konosí kiko a sali for di e reunion ei.
by Webmaster | 08/12/2023 | Internashonal
Parlamentu di Dinamarka a bai di akuerdo ku un lei ku ta prohibí kimamentu di koran, e buki sagrado di Islam. E lei ta kontroversial dor di su implikashonnan pa libertat di ekspreshon.
Den e parlamentu 94 miembro tabata na fabor kontra 77 miembro ku no ta di akuerdo ku e lei. E lei lo ta enserá un kastigu di prison di 2 aña na momentu ku esaki wòrdu violá.
E proposishon pa e lei a bin dilanti despues di protestanan na Dinamarka kaminda tabatin kimamentu di e buki. Esei a kondusí na protestanan den paisnan mòslem ku a kondená e kimamentu di buki. Na Dinamarka esei a lanta preokupashon pa ku posibel atentado komo represaya si e akshonnan ei kontinuá. E pais ke yega na un balanse di libertat di un banda, inkluso esun di religion versus siguridat nashonal.
Segun proponentenan e lei no ta afektá libertat di ekspreshon. Lo tin otro formanan pa kritiká un religion sin mester di kima e buki sagrado di e religion.
by Webmaster | 08/12/2023 | Siensia
Sientífikonan di Stanford University na California ta avansando den desaroyo di un tèst di sanger nobo ku por midi edat di nos órganonan. Di e forma ei dòkternan lo por kalkulá e riezgo riba sierto situashon manera problema di kurason òf demensia. Resultadonan di e investigashon ta publiká den e revista Nature.
E estudio ta den un fase yòn ainda, pero e resultadonan te asina leu ta prometedor. Na total 5676 persona a partisipá den e investigashon.
Aparentemente órganonan ku ta embehesé mas lihé ku e persona su berdadero edat tin un chèns mas grandi pa desaroyá malesa den un plaso di 15 aña. Dor ku sierto malesa ta tuma basta aña pa desaroyá e tèst nobo aki por yuda antisipá mas lihé riba sierto malesa den futuro.
Di e forma ei por kuminsá trata demensia den un stadium mas tempran. E no ta un kura definitivo pa e malesa, pero si un paso den e direkshon ei.
by Webmaster | 08/12/2023 | Internashonal
Konseho di Siguridat di Nashonnan Uní ta reuní djabièrnè pa papia riba eskalashon di e disputa entre Venezuela i Guyana. E paisnan ta den konflikto riba soberania riba e region Essequibo ku ta aktualmente bou di maneho di Guyana.
Djadumingu Venezuela a tene un referèndem riba e status di Essequibo. Segun e enkuesta popular 95% di e pais lo ta ofisialmente di akuerdo pa aneksá e region ku ta den disputa. Siguiendo e referèndem Korte Internashonal di Hustisia a atvertí Venezuela pa no tuma akshon adishonal.
Djaweps Merka i Guyana a tene ehersisionan militar konhunto. Lo ta trata di ehersisionan di rutina, pero no ta sekreto tampoko ku Merka ta desaprobá Venezuela su akshonnan.
Na Brasil presidente Luiz Inácio Lula da Silva a deklará ku un konflikto harmá no ta benefisiá e kontinente. E pais a posishoná militar na su frontera ku Venezuela komo prekoushon i tene e konflikto pafó di fronteranan di Brasil. Alabes e presidente a hasi un apelashon na organisashonnan regional pa intermediá pa yega na un solushon pasífiko.
