Resien nos a pasa un dia na un serie di workshops organisá pa Passion & Skillz i Curasound. E kas aki tabata senario di un serie di aktividat musikal den grupo i riba nivel individual. Na nos yegada e partisipantenan tabata hañando un workshop polyrhythms. Ken a organisá e aktividat aki?
Segun e último enkuesta di Peilingwijzer promé ku e elekshon awe na Hulanda PVV di Geert Wilders ta kana pareu na kabes ku VVD ku un diferensha di 1% na fabor di VVD. E partidonan ta kada un bon pa 19% di akuerdo ku Peilingwijzer. Esaki ta bon pa 30 i 29 asiento respektivamente den e parlamentu di 150 miembro.
E kombinashon GL-PvdA por konta segun e enkuesta ku 17% ku ta bon pa 27 asiento. NSC ta sigui na di 4 lugá ku 14% ku ta en todo kaso garantia pa un oumento riba e asiento ku e partido su lider Omtzigt tin den Tweede Kamer.
D66 ta sigui e partidonan aki ku 7% di votonan den e enkuesta ku ta bon pa 11 asiento. Esaki ta hopi ménos kompará ku e 24 asientonan ku e partido tin aktualmente den Tweede Kamer. Otro partidonan en todo kaso no ta pasa 4% den e enkuesta aki.
Fuente: Peilingwijzer.nl
Sigur 3 persona a pèrdè nan bida siguiendo un movementu di tera na Alaska. Ainda tin 3 otro persona pèrdí. Djaluna anochi un parti di un seru kaminda tabatin hopi palu ta krese a derumbá dor di su propio peso.
Tin mas o ménos 2000 persona ta biba den e área di e insidente. Ta trata di un lugá pegá ku kosta kaminda partikularmente piskadó i kapdó di palu ta biba i traha.
Trabounan di reskate ta kana poko poko relashoná ku e peliger di instabilidat di tera. Anteriormente áwaseru a okashoná bastante peso èkstra riba e área ku a derumbá bin abou. E influensha di e forsa di awa tambe a kontribuí na e derumbe.
E drama rondó di retiru di èks direktor di e kompania di inteligensha artifisial OpenAI ta kontinuá. Siguiendo e òntslag di Sam Altman komo direktor di e kompania djabièrnè siman pasá i anunsio ku el a haña un trabou nobo na Microsoft, entretantu Altman ta bèk na OpenAI.
Despues di hopi preshon di invershonistanan riba gerensha di OpenAI, esaki a mir’é fòrsá di pidi Altman bini bèk. A resultá tambe ku lo remplasá algun miembro di e direktiva di e kompania ku a èksigí retiru di Altman anteriormente. E miembronan aki no tabatin konfiansa den Altman.
Djaluna a resultá ku Sam Altman lo a haña un trabou nobo na Microsoft kaminda lo el a bai guia un team nobo dediká na inteligensha artifisial. Microsoft ta alabes un di e invershonistanan mas grandi di OpenAI ku no tabata kontentu ku e desishon pa retirá Altman.
Direktor di Microsoft Satya Nadella a duna di konosé djarason mainta ku e reinstalashon di Altman komo direktor mester stabilisá e kompania. Tambe mester instalá un gerensha nopbo ku ta mihó informá riba funshonamentu di e direktor.
E preshon riba e gerensha di OpenAI tabata bini di tur banda inkluso di den e kompania mes. Hopi trahadó a indiká di lo retirá si Altman no bini bèk.
Despues di tur e preshon parti di e gerensha lo retirá. Pero te asina leu no tin klaridat ainda dikon sierto miembro kier a mira Sam Altman retirá.
Think To DO Institute (T2DI) ta publiká otro investigashon di resilensia di pais ku ta duna informashon valioso tokante e vulnerabilidat (of resilensia) di pais di Kòrsou. E informe, titulá “Indeks di Estadonan Frakil – Rapò di Pais Kòrsou 2023”, ta e 4ta edishon di e informe influyente (multi-variabel) aki i ta duna informashon detayá di areanan vulnerable pa Kòrsou.
E Indeks di Estadonan Fragil di Kòrsou ta duna un bista detayá di diferente aspektonan di fragilidat, repartí entre kuater grupo di indikadónan di preshon i un grupo relashoná ku kapasidatnan di e estado. E ta eksaminá e prevalensia i severidat di un variedat di faktornan (por ehempel ekonomia, seguridat, hustisia i desigualdat) i ta mustra nan impakto riba poblashon i ekonomia lokal. Temanan prinsipal den e informe di e aña aki ta inklui e desigualdat ekonómiko i sosial, inseguridat, un regla di ley fragil i kapasidat di e estado. E informe ta inklui 48 rekomendashon den tur e areanan ku ta promové resilensia di hende i pais.
E informe ta mustra ku e nivel di vulnerabilidat kasi no ta kambia kompletamente en komparashon ku añanan anterior. Esaki en sí no ta sorpresa. Resultadonan sosial no ta kambia di un dia pa otro, i e eksistensia di diferente programanan di asistensia di desaroyo (ku e asina jama landpakket, e mas grandi) ta un indikashon ku e pais ta enfrentá problemanan struktural serio ku a evit’é di sali for di un siklo perpetuo di vulnerabilidat pa un mínimo 3
dekada kaba.
Manera a menshoná anteriormente, e informe aki ta duna informashon importante tokante e potensial konsekwenshanan di fragilidat, basá riba investigashon den 179 paisnan, i ta sirbi komo un instrumento pa informá i guía esnan meti den politika di pais, un bista holistiko di e sitwashon di pais basá riba evidensha. Dor di komprondé e faktornan ku ta kousa vulnerabilidat, nos por traha riba resilensia di un manera mihó.
T2DI ta urgi gobierno pa tuma i/o aselerá medidanan hòlistiko pa reduí vulnerabilidat. Dor di kooperashon i kolaborashon, nos por sigurá ku e pais aki por bira mas pròspero i ku e vulnerabilidatnan den e pais aki keda atrás.
Nota editorial: 5W Press tin entendí ku e rapòrt aki ta un investigashon komparativo a base di informashon disponibel i ku no ta tur fuente konsultá ta kompleto. Lesa tambe e publikashon anterior riba 5W Press.
Na Surnam un grupo di trahadó ilegal den minanan di oro a pèrdè nan bida despues ku un tunel a kai den otro. Presidente Chan Santokhi a konfirmá e insidente den parlamentu.
Ta trata segun Santokhi di sigur 10 persona i e kantidat di mortonan por sigui subi. Ehérsito, polis i timnan di reskate ta trahando duru pa yega na eventual sobrebibientenan.
E insidente a tuma lugá na Kleine Saramacca, konosí pa ‘Camp 21 pasi’, kaminda tin hopi mineria ilegal di oro ta tuma lugá.
Pa mineria di oro mester di un pèrmit di gobièrnu, pero den práktika ta tolerá hopi kompania ku ta operá sin e pèrmit aki. Konsekuentemente e kompaninan aki ta tuma riezgonan pa ku siguridat di trahadónan.
Balor di euro a subi te na su balor mas haltu for di fin di ougùstùs. Esaki dor di e bahada di e balor di dòler Merikano. Invershonistanan ta kouteloso, pasobra e pèrdida di balor ta hasi e moneda Merikano ménos atraktivo.
Djaluna balor di euro tabata kalkulá na 1,0936 dòler, e balor mas haltu den kasi tres luna. Djabièrnè ainda esaki tabata 1,0876 dòler.
Den último 18 luna Federal Reserve, e banko sentral Merikano, a subi interes gradualmente pa kontené inflashon. Pero esaki ta frena kresementu ekonómiko.
Ta premirá ku pronto Federal Reserve lo baha interes atrobe, pero esaki lo no stimulá e preis di dòler pariba atrobe. Banko Sentral Oropeo por lo pronto lo no subi su interes, pero lo no baha esaki tampoko.
Sam Altman, for di djabièrnè èks direktor di OpenAI, a haña un posishon na Microsoft kaminda lo e guia un team ku lo traha riba inteligensha artifisial. Direktor di Microsoft Satya Nadella a partisipá e notisia personalmente. No solamente Altman, pero tambe ko-fundadó di OpenAI Greg Brockman tambe a bandoná e kompania pa bai traha na Microsoft.
Djabièrnè último e notisia di retiru fòrsá di Sam Altman for di OpenAI, e kompania ku ta produsí ChatGPT, a lanta hopi stòf den mundu di IT. Direktiva di e kompania no tabatin konfiansa mas den Altman. Poko despues di e òntslag di Altman, ko-fundadó Brockman tambe a bandoná e kompania.
Microsoft ta un di e invershonistanan mas importante pa OpenAI. E gigante a finansiá mayor parti di e start-up di OpenAI. E kambionan na OpenAI no a kambia Microsoft su disposishon pa sigui traha ku e kompania.
Un bòter di wiski Macallan 1926 Single Malt a bai na e konosido kas di findishi Sotheby’s pa kasi 2,5 mion euro. Ta e preis mas haltu pagá na findishi pa un bòter di wiski den historia.
Macallan 1926 Single Malt ta e wiski mas buská na mundu. Segun konosedónan di e bebida un gota ta sufisiente pa pruf e kombinashon di fruta seká, speserei i palu roble (na Hulandes “eik”).
E bòter ta pertenesé na un serie di 40 bòter ku a sali den 1986 for di un barí di palu di roble ku a para hecha 60 aña largu den kèlder. E bòternan nunka tabata na benta i a bai pa e klientenan mas importante di Macallan. Último biaha ku a bende un bòter na findishi e wiski a bai pa 1.7 mion euro.
Ruud Sondag, e direktor interino di aeropuerto Schiphol, ta premirá ku e kompania tin ku bai kremp tòg despues ku a anulá un plan anterior pa baha e kantidat di buelonan. Asina el a bisa djadumingu anochi den e programa Nieuwsuur na Hulanda.
E kantidat di buelonan na Schiphol den e plan anterior lo a keda limitá na 460 mil pa e siguiente zomer. Sinembargo Union Oropeo i Merka a apelá kontra e desishon serka gobièrnu di Hulanda.
Esaki ta buta ku e aeropuerto no por kumpli ku demandanan di esnan ku ta biba rondó di e aeropuerto. Esei por resultá den kasonan den korte ku lo tuma mas tempu ku aktualmente.
Schiphol mester tene kuenta ku un total di 500 mil buelo pa próksimo zomer i posiblemente e aeropuerto no tin e kapasidat pa akapará e kantidat di buelo.
Invershonistanan ku a hinka kapital den OpenAI, e kompania tras di e konosido programa di inteligensha artifisial ChatGPT, ta butando hopi preshon riba gerensha pa drai bèk e desishon pa retirá Sam Altman komo direktor. Asina agensia di prensa Bloomberg a publiká despues di e òntslag di Altman djabièrnè último. E notisia inesperá a lanta basta stòf.
Invershonistanan no a keda kontentu ku e desishon di gerensha di OpenAI. Altman lo ta dispuesto na bai bèk. Di momentu e direktor tékniko di OpenAI ta okupando e funshon temporalmente.
E gerensha di OpenAI a bisa djabièrnè ku su retiru ta relashoná ku un investigashon ku a mustra ku e no a komuniká semper habrí ku e gerensha i ku esei tabata stroba su bon funshonamentu.
Microsoft, un di e invershonistanan mas grandi di OpenAI lo ta pará tras di e direktor retirá. Den e kompania tambe lo tin vários stèm a lanta siguiendo e retiru. Asina e ko-fundadó di OpenAI Greg Brockman lo a retirá komo forma di protesta i asina lo tin vários trahadó klave ku ta pensa di sigui su ehèmpel. Nan lo ke uni Altman den lantamentu di un otro kompania di inteligensha artifisial di akuerdo ku fuentenan ku a papia ku agensia di prensa Reuters.
Segun agensia di prensa Bloomberg tin un diferensha di vishon entre Altman i gerensha di e kompania relashoná ku siguridat di inteligensha artifisial, e rapides di e desaroyonan i e aspketo komersial ku ta hasiendo su entrada den e mundu di inteligensha artifisial.
Entrante 11 di yanüari e servisio di streaming Peacock ta bai lansa un serie basá riba e pelíkula popular Ted di e komediante Seth MacFarlane. MacFarlane atrobe lo hasi e stèm di Ted i direkshon di e serie, kua ta bai bèk den pasado.
E serie kómiko lo konsistí di 7 episodio kaminda e tèdiber lo yuda e famia di su amigu John, kende a mira su tèdiber haña biba despues di pidi un deseo. Pero meskos ku den e pelíkula e peluche su komportashon deskontrolá ta hinka John, ku den e serie tin 16 aña, den bastante problema.
Konhuntamente e pelíkulanan original Ted i Ted 2 a generá 750 mion dòler mundialmente. Ámbos pelíkula ta protagonisá pa Mark Wahlberg i Seth McFarlane komo e stèm di Ted.
E korant The Guardian a kita un karta di Osama Bin Laden for di su website. Den e karta Bin Laden ta splika ku e atake riba Merka riba 11 di sèptèmber 2001 ta entre otro pa motibu di e pais su sosten pa Israèl. Den último dianan e karta a bira viral riba TikTok.
E karta a keda publiká 21 aña pasá riba 24 di novèmber di 2002. E korant no a kita e página kompleto sino solamente e karta. Riba e página original tin un mensahe kaminda The Guardian ta motivá su desishon.
Ta trata di videonan kaminda hóbennan ta reakshoná riba e kontenido di Bin Laden su karta. Un di e videonan aki a haña mas di 1 mion di views despues ku e usuario a yama otronan pa bai lesa e karta.
Despues a sigui vários otro video di usuarionan ku sea ta lesa e karta kompleto na bos haltu òf partinan di e karta. Otronan ta bisa ku nan ta den shòk pasobra nan ta pa un gran parti di akuerdo ku Bin Laden ku ta referí na inhustisianan kontra di Palestino.
No ta masha komun ku korantnan ta kita artíkulonan bieu for di nan website. Pero den e kaso aki, asina The Guardian a splika e website 404 Media, e usuarionan di TikTok a kompartí e karta sin menshoná su konteksto original.
Ta asina ku no ta 100% sigur ku e karta ta di Bin Laden mes. E karta original ta bin di un website kaminda Al Qaida tabata kompartí mensahe 21 aña pasá. Te asina leu tabata asumí ku e karta por ta di Bin Laden, pero esaki nunka a keda konfirmá.
E ofèrta di LEGO riba websitenan ku artíkulonan segunda mano a oumentá bastante despues di e pandemia di Covid-19. Partikularmente riba e website di findishi Catawiki tin hopi komèrsio di LEGO ta tuma lugá.
Den e promé 9 lunanan di e aña aki e ofèrta di LEGO riba Catawiki tabata 40% mas haltu ku e mesun periodo aña pasá. Einan esnan ku temporalmente a kumpra piedra di LEGO pa entretenimentu na kas durante e pandemia ta bende nan sètnan, kaha òf piedra lòs na findishi. Partikularmente piedranan dediká na tema manera Star Wars i Harry Potter ta popular.
Na Hulanda e website Marktplaats tambe ta nota ku e ofèrta di LEGO ta haltu, pero ku interes a baha.
Pa benta di piesa nobo di LEGO no ta masha bon notisia, pero pa amantenan i kolekshonista di LEGO ópviamente si.
Ekonomia di Ukrania ta rekuperando bon e aña aki di e impakto di e invashon di Rusia. Esaki ta relashoná entre otro ku e bon kosecha i sosten di komunidat internashonal. Awor ku Ukrania ta kandidato pa bira miembro, Union Oropeo ta inkluí e kosecha di Ukrania den su pronóstikonan ekonómiko.
Komishon Oropeo ta premirá ku ekonomia di e pais lo krese e aña aki ku 4.8%. Esei ta un diferensha grandi ku aña pasá ora ekonomia di e pais a kontraé ku 29%. Den 2024 i 2025 tambe ta premirá mas kresementu.
E presupuesto di e pais ta un poko dinámiko relashoná ku e konflikto ku Rusia, pero esaki tambe por stabilisá si ekonomia di Ukrania sigui krese.
