Investigadónan a haña loke ta parse e konstrukshon di palu mas bieu den historia. Nan a haña e konstrukshon na Zambia i a kalkulá ku e tin por lo ménos 476 mil aña. E investigashon a keda publiká den e revista di siensia Nature.
E konstrukshon ta konsistí di dos pida palu ku ta pas den otro via un konekshon di piedra. E konstrukshon tin karakterístikanan di un sosten pa un brùg òf plataforma. E deskubrimentu a tuma lugá den e region fronteriso entre Zambia i Tanzania. Pegá ku e konstrukshon a haña tambe algun pida hèrmènt.
Te asina leu kasi tur e deskubrimentunan mas bieu ku nos konosé ta di e Edat di Piedra 300 mil aña pasá. E konstrukshon hañá na Zambia lo ta bai bèk pues 476 mil aña i ta sugerí ku nos ansestronan tabata traha konstrukshon relativamente sofistiká ku palu pa basta tempu promé ku nan a pasa pa konstrukshonnan mas robusto ku piedra.
Kuerpo Polisial di Hulanda ta sospechá ku e eksploshonnan ku a tuma lugá anteriormente e siman aki den e provinsia Groningen ta relashoná ku otro. Den último dianan tabatin vários eksploshon na vários lokalidat na Winschoten i Oude Pekela.
Ta posibel ku tin un relashon ku otro kasonan di violensha tambe. Te ainda polis no sa ken òf kiko tin tras di e eksploshonnan aki. Polis ta tene en todo kaso kuenta ku konfliktonan den mundu kriminal.
Por sierto ku e aña aki a registrá mas eksploshon ku den añanan anterior na Hulanda. NOS ta informá ku den e promé 9 lunanan di e aña aki ya a registrá 358 eksploshon na kas òf na edifisio.
Mas di 50% di e eksploshonnan ei a tuma lugá na Amsterdam i Rotterdam. Pero den último dianan e eksploshonnan aki ta tuma lugá den otro parti di Hulanda tambe.
Un káos inesperá na Microsoft ta tópiko di diskushon di momentu den mundu di gaming. Ta asina ku den último dianan un kantidat konsiderabel di informashon deliká relashoná ku e console Xbox a lèk. Esaki dor di un kaso entamá dor di e supervisor na Merka FTC pa para e take-over di Activision Blizzard. E dokumentonan ta kontené entre otro basta detaye relashoná ku e vershon nobo di e console ku ta planiá pa 2028. I e informashon aki ta hopi balioso pa e konkurentenan di Microsoft.
Den e dokumentonan tin mas aleu detayenan tòg basta remarkabel manera komentarionan di direktor di Microsoft Gaming Phil Spencer riba un eventual take-over di Nintendo, un joystick nobo ku Microsoft ta diseñando i algun re-make di games ku ta planiá pa Xbox.
E revelashonnan aki a brua e planning di Microsoft kompletamente. E dokumentonan a lèk dor ku Microsoft a entregá un serie di dokumento na korte pa trata e take-over di Activision Blizzard.
Direktor di Microsoft Gaming Phil Spencer a duna di konosé na trahadónan di Microsoft ku nunka tabata intenshon pa asina tantu informashon bira públiko. Asina e direktor ta bisa den un mensahe interno ku a yega na redakshon di e revista tékniko The Verge.
E dokumentonan no ta riba e plataforma públiko di korte mas, pero periodistanan den mundu di gaming ya a optené mayoria informashon i probablemente lo revelá vários detaye den tempu benidero.
Aktor Keanu Reeves a pidi e produktornan di e serie di pelíkula di John Wick pa laga su personahe muri den e di 4 pelíkula. Asina e produktor Basil Iwanyk a bisa e revista di entertainment Collider.
Segun Iwanyk e ròl ta emoshonalmente i físikamente basta pisá. E pelíkulanan di John Wick ta konta e kuenta di un èks asesino i ta kontené hopi esena di akshon hopi intensivo. E produktor ta kòrda un okashon ku Keanu Reevs, ku entretantu tin 59 aña, tabata asina kansá ku el a indiká ku mester mata e personahe.
Tin plannan pa un di 5 pelíkula pero e futuro di e serie no ta sigur di momentu.
Hapon tin e poblashon mas na edat na mundu. Di momentu 1 den kada 10 Hapones ta riba 80 aña. Kasi 30% tin 65 aña òf mas. E pais ta siguí pa Italia, kaminda 25% di poblashon tin 65 aña òf mas. Finlanda ta sigui na di tres lugá ku 24%.
Segun pronóstikonan di e instituto nashonal di investigashon na Hapon den 2040 alrededor di 35% di poblashon lo tin 65 aña òf mas. E grupo di siudadano di 65 aña òf mas ta representá alrededor di 13% di e forsa laboral.
No opstante esaki opviamente e edat promedio tin un preshon haltu riba gastunan di gobièrnu i funshonamentu di sosiedat. Dia pa dia ménos hende ta nase den e pais. Asina aña pasá a bin 800.000 Hapones aserka, un bahada konsiderabel kompará ku 1970 ora 2 mion mucha a nase. Mas o ménos 1 den kada 3 dama di 18 aña lo no haña yu. Parehanan yòn no ta forma famia mas pasó bida na Hapon ta hopi karo.
Hapon no ta e úniko pais Asiátiko ku e problema aki. Na China tambe e kantidat di nasementu a baha pa promé biaha for di 1961. Na Sur Korea lo tin ainda ménos hende ta nase kompará ku Hapon.
Tin basta intrankilidat di momentu den mundu di gaming. Desaroyadónan ta hopi malkontentu ku e plataforma Unity despues ku esaki a anunsiá un kambio den su método di kobransa. Unity ta un plataforma kaminda diseñadónan i produktornan di videogames por traha wega nobo ku software avansá.
Diseñadónan ta paga mas o ménos $1900 dòler pa aña pa un abono Pro riba e servisio aki. Pero entrante promé di yanüari ta bai kobra un suma èkstra. Te ku 1 mion download diseñadónan no ta paga nada, pero a partir di e promé mion downloads Unity ta kobra entre 2 pa 15 sèn pa kada biaha ku hende download un wega. Usuarionan ta malkontentu pasobra nan lo no por kambia fásil tampoko pa otro plataforma pa instalá i sigui desaroyá nan videogames.
Unity ta argumentá di otro banda ku 61% di tur diseñadó di videogames rònt mundu ta riba nan plataforma. Videogames popular manera Pokemon Go, Genshin Impact i e konosido Among Us tin nan orígen aki. Unity ta bisa den un reakshon riba e preokupashonnan ku 90% di usuarionan lo no sinti e efektonan di e medida aki. Di otro banda e kompania ta konfrontá ku gastunan haltu i ta purba kompensá e pèrdida di e forma aki.
Den mardugá di djaluna pa djamars vários eksploshon a tuma lugá den diferente parti di Hulanda. Asina a registrá eksploshon den edifísionan na Amsterdam, Weesp i Winschoten. Ku eksepshon di un persona ku a keda levemente heridá no tabatin herido kousá pa e eksploshonnan.
Na Breda deskonosínan a manda algu ku tabata kima den direkshon di un bibienda ku despues a pega kandela dor di e eksploshon na impakto. Un otro eksploshon na Amsterdam a tuma lugá alrededor di 22.30 na un bibienda den stadsdeel Zuidoost kaminda tambe a benta un opheto na kandela paden.
Poko despues un otro eksploshon a tuma lugá na un bibienda den sentro di Weesp. Einan tambe ta trata di un opheto na kandela ku deskonosínan a manda paden ku despues a eksplotá. Un situashon komparabel a tuma lugá na Winschoten alrededor di 02.00.
E insidentenan aki ta sigui un serie di insidente un dia anterior den e provinsia Groningen na e lugánan Winschoten, Oude Pekela i e siudat Groningen. E eksploshonnan ta motibu pa preokupashon den Kuerpo Polisial ku ta investigando si tin un konekshon entre e vários insidentenan.
Djamars a kuminsá ku otro subida di preisnan internashonal di petroli. Ya ta di 4 dia konsekutivo ku preisnan ta subi. Preis di barí di krudo a alkansá $92.49 i barí di Brent oil un dado momentu a pasa e preis di $95.00, pero a baha un poko despues atrobe. Segun analistanan e motibu prinsipal pa esaki ta e limitashon di produkshon imponé dor di Rusia i Arabia Saudita via e organisashon OPEC. Dor di e disponibilidat limitá e preis ta subi ora demanda di energia subi.
Tin airu den atmósfera di Mars ku hende por hala aden sin problema. Asina NASA ta konkluí a base di un eksperimento riba e planeta kòrá. Opviamente e atmósfera di Mars ta yen di gas ku ta dañino pa ser humano, pero NASA a deskubrí ku tin oksígeno i hidrógeno tambe i esei si no ta forma un problema pa ser humano si tin sufisiente den e atmósfera.
NASA a logra hasi e eksperimento ku e Mars Rover Perseverance ku a kolektá e partíkulanan i manda e análisis di esakinan. Si tin un manera pa generá airu riba e planeta lo bira un poko mas interesante pa manda mishonnan tripulá. Pero esei por dura hopi aña ainda.
E supervisor di privacy na Irlanda a imponé un but di 345 mion euro riba e plataforma TikTok. E kompania lo no a hasi sufisiente pa protgé e privacy di muchanan Oropeo.
Segun e Data Protection Commission na Irlanda videonan ku mucha ta buta riba TikTok ta standart ahustá pa buta kontenido públiko hasiendo e muchanan asina vulnerabel pa hende ku nan no konosé. TikTok lo no a informá riba esaki i tampoko nan no tabata na altura ku tur hende por mira nan videonan.
E funshon Family Pairing, esta e funshon pa akoplá e account di e mucha na esun di su mayornan, tambe tabata funshoná malu. Asta terseronan por a hasi esaki ku e account di muchanan. E sede Oropeo di TikTok ta keda na Irlanda. Pa e motibu ei e medida a keda imponé na Irlanda mes.
Por sierto ku vários supervisor Oropeo lo ta siguiendo i vigilando e efektonan di inteligensha artifisial riba mucha, inkluso na Hulanda. Lo ta trata di e funshon di inteligensha artifisial di un app konosí, pero ainda no a revelá di kua app ta trata.
No ta probabel ku interes lo baha den promé mitar di 2024. Asina miebro di direktiva di Banko Sentral Oropeo Martins Kazaks a bisa durante un rueda di prensa. Siman pasá e Banko Sentral di Oropa a subi interes te na 4%. Tabata ya di 10 okashon konsekutivo i ta e sifra di interes mas haltu den historia di Banko Sentral di Oropa.
Spekuladónan a antisipá ku esaki lo ta fin di e sifra haltu di interes i ku pronto esaki lo baha atrobe. Pero segun Kazaks ainda e kresementu di salarionan no a pik i tampoko ta konosí si e inflashon ku ta kompañá esaki lo frena. Pa e motibu ei mester asta tene kuenta ku un posibel subida di interes atrobe. Segun e Banko Sentral e situashon por pèrsistí te di dos mitar di próksimo aña.
Resien e obra Rumannan Purunchi di Milushka Birge a estrená na Huize Habaai. E piesa teatral-musikal ta basá riba historianan real di infansia dje eskritor Loekie Morales. Den su buki Rumannan Purunchi, Morales ta kompartí ku nos herensia familiar intangibel di e rumannan Moral.
Milushka Birge, eskritor i direktor di esena, a nutri su mente ku e herensia familiar di rumannan Moral, pa krea un storia nobo den kual ta papia ku e hóben entre 10 i 14 aña, tokante entre otro spiritu komunitario, forsa i impontensia. Milushka Birge huntu ku músiko i kompositor Eric Calmes ta forma un nèshi kaluroso pa e aktornan hunga diferente personahe dunando espasio pa ekspresá kantikanan bunita komponé speshalmente pa e obra akí. E aktornan ku ta forma e elenko ta: Greysha Niebe, Gian van Eiker, Rachelle Le Blanc, Kionn Yung i Maxine Fabian.
Tur skol di fundeshi, skol sekundario i skol spesial na Kòrsou, a risibí dos siman pasá un pakete ku material di Rumannan Purunchi pa prepará promé ku wak e obra teatral-musikal Rumannan Purunchi. Den e pakete tin material edukativo, poster i flyer ku informashon di e piesa teatral-musikal. E buki Rumannan Purunchi ‘saga di un nèshi tropikal’ di eskritor Loekie Morales tambe ta forma parti di e pakete aki.
Tin hopi konfushon rondó di e kantidat di hende ku a bira víktima di e tormenta Daniel na Libia. Asina entre otro agensia di prensa Reuters ta informá.
Anteriormente Luna Kòrá na Libia a informá ku lo tabatin ya 11 mil víktima mortal. Mas lat atrobe Luna Kòrá a desmentí su informe anterior. Turesten Krus Kòrá a informá ku lo tabatin 20 mil persona pèrdí. Dado momentu Krus Kòrá a kuminsá kontradesí e informenan di Luna Kòrá. Loke a hasi e konfushon mas grandi tabata ku medionan manera BBC, agensia di prensa AP i Al Arabiya tabata hasi menshon di e sifranan di Luna Kòrá.
Motibu pa e konfushon ta e situashon polítiko den e pais. Libia ta manehá pa 2 gobièrnu diferente for di kaida di Moammar Kadafi ku ta duna informashon diferente. Asina e gobièrnu rekonosé internashonalmente ta papia di 7000 víktima konfirmá miéntras e gobièrnu no rekonosé, i kaminda e inundashonnan de fakto a tuma lugá, ta papia di 5500 víktima konfirmá.
Libia ta asotá pa inundashon masivo siguiendo tormenta Daniel ku anteriormente e siman aki a pasa riba Mediteranio. Na kabamentu di siman pasá e tormenta a okashoná bastante daño tambe na entre otro Gresia.
Banko Sentral Oropeo, den un esfuerso pa sigui kontené inflashon, ta bolbe subi interes. Entrante 20 di sèptèmber interes lo keda fihá na 4%. Ta promé biaha ku interes a yega na e porsentahe aki i ta di 10 okashon kaba for di yüli aña pasá ku e Banko Sentral di Oropa ta subi interes.
For di kuminsamentu di ougùstùs presidente di e banko Christine Lagarde a atvertí ku interes lo sigui subi si inflashon keda muchu haltu. Ounke e subida di preis ta ménos fuerte ku resien te ainda preisnan na Oropa ta hopi mas haltu ku normal.
Presidente Christine Lagarde a indiká ku e enfoke di momentu ta pa frena inflashon gradualmente te na 2%.
Usuarionan di WhatsApp por awor risibí aktualisashon di persona òf organisashon via kanalnan spesial diseñá pa e plataforma. E funshon aki no ta funshoná meskos ku grupo: e siguidónan por solamente lesa mensahe.
Propietario di WhatsApp Meta a tèst e funshon aki for di yüni na Colombia i Singapur i ta kla awor pa lans’é ofisialmente den 150 pais mas. Persona públiko i organisashonnan por usa e kanalnan pa mantené nan siguidónan na altura di nan aktividatnan. Asina bo por risibí e últimonan updates di un artista òf klup di deporte ku bo ke sigui.
E mensahenan lo drenta den un sekshon separá den WhatsApp. Usuarionan por buska e kanal riba nan telefòn i inskribí grátis. Kanalnan di WhatsApp lo filtra outomátikamente a base di e pais kaminda bo ta biba. Tambe bo por indiká si bo kier mira e kanalnan mas nobo, mas aktivo òf mas popular.
Usuarionan lo por reakshoná solamente ku emoji riba e mensahenan den e kanalnan ku despues lo keda registrá pa otro usuarionan mira e kantidat di reakshonnan. Updates ta keda disponibel 30 dia i despues ta keda eliminá outomátikamente.
Number di telefòn tampoko lo ta visibel. Tur number di manehadónan di kanal i siguidó ta keda privá. Pronto e funshon lo bira visibel den bo WhatsApp.
