by Webmaster | 26/04/2023 | IT, Apps & Social Media
Windows, Xbox i otro aparatonan di Microsoft no a generá masha ganashi den e promé kuartal di e aña aki. E merkado di hardware a fria despues di un temporada basta benefisioso durante e pandemia di Covid-19. Fabrikantenan di aparato digital tabata bestèl ménos lisensia pa buta Windows riba laptop i PC, okashonando un pèrdida di 28% kompará ku e mesun periodo aña pasá. Asina análisnan di IDC i Canalys ta indiká ku a bende un tersera parti ménos hardware.
Xbox ta drai relativamente bon i a generá 3% ganashi, pero mayor parti ta generá pa e asina yamá Xbox Game Pass ku ta duna akseso ilimitá na un biblioteka yen di videogames. Pa loke ta trata Microsoft su take-over di fabrikante di Call of Duty Activision Blizzard anunsiá anteriormente, e supervisor Britániko CMA a prohibí e take-over pa Microsoft no haña muchu poder riba merkado di videogames online. Esaki ta nifiká ku un take-over mundial no ta posibel. Microsoft a apelá e desishon.
Te eynan e kontratempu pa Microsoft, pasó e kompania tabatin éksito enorme den otro departamentu. Microsoft a generá basta ganashi ku benta di software, servisionan di cloud Azure ku a subi ku 27% i su mashin di búskeda Bing ku awor ta ekipá ku ChatGPT di e kompania OpenAI.
Pues na total e resultado di Microsoft ta mustra tòg un subida di 7% te 52.9 mil mion dòler. Por lo pronto e kompania ta bai enfoká riba desaroyo di servisionan a base di inteligensha artifisial. E mashin di búskeda Bing ya tin mas di 100 mion usuario pa dia.
by Webmaster | 25/04/2023 | Internashonal
E konosido kantante Merikano Harry Belafonte a fayesé na 96 aña di edat na New York. Belafonte ta dimes konosí pa e hit mundial Day-O (The Banana Boat Song).
Belafonte tabata polítikamente aktivo tambe i a hasi hopi esfuerso pa promové derechinan sivil na Merka. E tabata un amigu di serka di Martin Luther King i a lucha banda di dje pa eliminá separashon di rasa na Merka.
El a keda traha te na edat basta haltu. Asina ainda el a hunga un ròl ku su 91 aña den e pelíkula BlacKkKlansman di direktor Spike Lee.
Belafonte a kasa tres biaha i ta laga 4 yu atras. Su último esposa ta Pamela Frank, ku ken el a kasa den 2008.
by Webmaster | 25/04/2023 | Naturalesa
Simionan por rashonalisá i tuma desishon bon elaborá. Sientífikonan na Universidat di Pittsburgh a deskubrí ku makaku sa bon bon ki ora un esfuerso tin sintí i ki ora nò. Tambe nan ta konsiente di opstákulo riba un trayektoria ku nan a enkaminá kaba.
Pa e estudio aki a opservá un grupo di rhesus, simionan chikitu di e tipo ‘macaca mulatta’. Nan mester a yena un tas riba un pantaya digital te ora esaki tabata yen. Una bes ku e animal tabata hasi un eskoho e no por a kambia esaki. Tambe e tempu pa hasi un eskoho tabata mará na 5 sekònde. Si e tas tabata muchu yen, nan no tabata haña un rekompensa. Pero nan tabata siña hopi lihé kon yen por a yena e tas i kuantu tempu nan mester pa nan por konta ku nan rekompensa.
Bou di e sirkunstanshanan aki e simionan a bira konsiente di e kondishonnan i tambe e riezgonan di no kumpli. Pero kaminda e sirkunstanshanan tabata imposibel pa kumpli ku n’e, por ehèmpel dor di duna nan muchu tiki tempu, e makakunan no tabata hasi esfuerso mas. E resultadonan ta publiká den e revista sientífiko Nature.com.
by Webmaster | 25/04/2023 | Siensia
Arkeólogonan a deskubrí un ruina di e époka di Maya na Mexico ku por lo ménos 25 kurpa di ser humano sakrifiká komo ofrenda. E sientífikonan a deskubrí kráneo, kak i vários otro parti di kurpa di loke ta parse kurpa di partikularmente hóben maskulino.
E deskubrimentu a tuma lugá na Moral-Reforma den e estado Tabasco. E region ta un lugá kaminda vários pueblo Maya tabata hasi komèrsio i interkambio kultural ku otro den e periodo entre 600 i 900 aña despues di Kristu.
Segun e arkeólogonan ta trata di un edifisio ku tabata sirbi pa servisio na e dios di morto di e sivilisashon di Maya. Di por lo ménos 8 di e kadavernan e kabes tabata kitá afó.
E kurpanan tabata wardá repartí riba 2 piso riba otro. Kálkulonan te asina leu ta indiká ku un di e pisonan aki tabata èksistí entre 300 aña promé i 250 aña despues di Kristu. E otro piso ta konstruí i usá 600 pa 900 aña despues di Kristu. Aparte di e wesunan tambe a deskubrí vários prenda i pòchi ku probablemente a sirbi komo ofrenda.
by Webmaster | 25/04/2023 | IT, Apps & Social Media
Pa promé biaha den su kasi 17 aña di eksistensha e servisio di musik online Spotify a pasa e kantidat di 500 mion usuario ku ta usa e servisio mensualmente. Spotify a logra esaki den e promé kuartal di e aña aki, pero te ainda e servisio ta drai pèrdida. Na total e kompania Sueko a pèrdè 156 mion euro.
Ta asina ku di e 515 mion usuarionan, 210 mion so ta paga pa nan account. Esei a generá 2,7 mil mion euro den e promé tres lunanan di e aña aki. E sobrá 317 mion usuarionan ta usa e app grátis i no tin molèster di e avisonan komersial. Kompanianan di merkadeo ta paga Spotify pa e avisonan komersial aki, pero e ganashi ta kalkulá na mas o ménos 1 euro pa kada usuario.
Mester bisa aserka si ku Spotify a drai mihó ku aña pasá. Esaki pa un parti ta danki na e podcasts i audio books.
by Webmaster | 24/04/2023 | Internashonal
Un di e gitaranan original di e konosido guitarista di orígen Hulandes Eddie van Halen a bai na un findishi pa 3.9 mion dòler. Ta trata di e mesun guitara ku Van Halen, kende a fayesé tres aña pasá, a usa den e videoclip di Hot for Teacher den 1984. No ta e mesun Frankenstrat kòra ku strepi blanku original ku Van Halen a traha den añanan 70 sino unu trahá di eksaktamente mesun forma.
Van Halen a regalá e instrumento na un tékniko den 1990 ku a stòp di traha pa e banda. Despues di a kambia di doño un par di biah e guitara a bin kaba na e konosido kas di findishi Sotheby’s. E doño nobo no ta konosí. Van Halen a drenta historia komo un di e maestronan di guitara eléktriko. E revista musikal Rolling Stone a nombr’é e di 8 mihó guitarista den historia.
by Webmaster | 24/04/2023 | Naturalesa
Video-call ta un bon manera pa lora tin interakshon sosial ku otro. Sientífikonan Britániko i Amerikano di Universidat di Glasgow a studia 18 lora ku no solamente tabata parse mas alegre i aktivo, pero tambe a parse di siña komportashon nobo. Ta pa promé biaha ku a studia kiko ta e influensha di video-calling riba e paranan.
Un dado momento e loranan tabata kapas di bati un bèl spesial ora nan kier a video-call ku otro. Remarkabel tabata ku nan por a rekonosé otro a base di potrèt i skohe for di vários ku kua para partikularmente nan kier a video-call. Durante e estudio a opservá ku e loranan tabata realisá ku nan tabatin komunikashon ku nan mes sorto meskos ku den naturalesa.
Loranan intrankil tambe tabata mustra mas rustig. Na total a studia kasi 360 video-call durante tres luna. E deskubrimentu ta habri un mundu nobo pa amantenan i kriadó di lora. E resultado mas bunita tabata ku e animalnan a kuminsá bèl otro bèk. E estudio ta publiká riba e website di Universidat di Glasgow.
by Webmaster | 24/04/2023 | Medioambiente
Noordzee mester bira e sentral di energia duradero mas grandi na mundu. Asina Hulanda i Bèlgika, Alemania, Dinamarka, Irlanda, Fransia, Luxemburg, Reino Uní i Norwega a disidí despues di a reuní djaluna. Promé minister Mark Rutte i minister di Klima Rob Jetten a firma un akuerdo ku ta komprometé Hulanda pa añanan benidero pa stimulá produkshon di energia den Noordzee.
Pa 2030 e paisnan mester ta produsiendo 120 gigawatt na energia duradero. Pa 2050 esaki mester a subi te 300 gigawatt. Esei lo ta sufisiente pa fasilitá 300 mion hogar ku energia duradero na Oropa. Tambe e paisnan a sera akuerdo pa ku konstrukshon di parkenan di mulina i e aspektonan di seguridat ku ta kompañá esaki.
by Webmaster | 21/04/2023 | Internashonal
Na Hulanda a detené e konosido abogado Inez Weski. Weski, kende ta tratando e kaso di e kriminal Ridouan Taghi, ta sospechá di a hasi uso di su posishon pa pasa informashon. Asina Het Parool i De Telegraaf a skirbi djabièrnè.
Outoridatnan tabatin un bista kaba riba Weski. Tabatin un investigashon andando kaba kaminda a interseptá mensahenan kodifiká destiná pa e Ridouan Taghi. Ta trata di mensahenan di famia mandá ku e programa SKY ECC. Polis a logra hack e sistema dos aña pasá i asina departamentu di hustisia a interseptá miónes di mensahe.
Ta trata di mensahenan ku ta forma parti di un investigashon riba Youssef Taghi, primu i abogado di Ridouan Taghi ku a haña un sentensia pa pasamentu di informashon pa e organisashon tras di Taghi.
by Webmaster | 21/04/2023 | Cinema News
Lionsgate Studios ta trahando riba un serie basá riba e di e konosido kolekshon di buki Twilight di Stephenie Meyer. Asina The Hollywood Reporter a anunsiá. No ta konosí si e serie lo sigui e liña di e bukinan òf si ta trata di un kuenta kompletamente nobo. Tampoko ta konosí riba kua plataforma e ta bai sali òf na kua kanal di televishon.
Ta trata akinan di e bukinan ku ta konta e kuenta di Bella Swan ku ta namorá di e vampiro Edward Cullen. E bukinan a sali riba pantaya kaba den forma di 5 pelíkula ku a sali entre 2008 i 2012, ku Kristen Stewart i Robert Pattinson den e ròlnan prinsipal.
Ya ta di dos anunsio di serie di buki ku ta pasa pa televishon. Asina tin plan tambe pa un serie basá riba e bukinan di Harry Potter.
by Webmaster | 21/04/2023 | Medioambiente
Oropa ta sigui registrá rèkòrt nobo di temperatura haltu. Aña pasá e kontinente a pasa dor di e verano mas kalor den su historia. E fenómeno a bai kompañá pa ola di kalor, kandela di mondi, ménos kaida di sneu i glècher ku ta pèrdiendo masa di eis. Asina ta konkluí den e State of the Climate Report di e instituto klimatológiko Copernicus.
Den e rapòrt anual ey ta registrá estado di klima na Oropa. Den promedio e temperatura aña pasá tabata 1.4 grado mas haltu ku den último 30 aña i tambe tin ménos awa a kai. En partikular den e paisnan den parti sùit por nota e trènt. E konsekuenshanan ta notabel den agrikultura, sektor di energia i transporte di awa: kosechanan ku a daña, mester usa mas èrko i akseso na awa na algun lugá a forma problema.
Copernicus ta premirá ku e trènt lo kontinuá por lo pronto.
by Webmaster | 20/04/2023 | Notisia Lokal
Curaçao Airport Partners (CAP) was pleased to receive Azul Airlines’ Airport Team in support of the preliminary launch preparations. The launch of Azul’s non-stop weekly service from Belo Horizonte-CNF to Curacao-CUR, is a first for both the airline and Curaçao. Curaçao is Azul’s first Caribbean destination and Azul is the first airline to offer non-stop service from Brazil to Curaçao. CAPs Senior Management welcomed Milena Mie Konno, Azul Airport Relations Manager and Aline Menezes, Azul Airport Planning and Ground Handling Manager and various productive meetings with various key divisions namely, Aviation Market Development, Commercial, Operations and concluded with a thorough airport tour.
The new service commencing on Saturday, June 24, 2023, will enhance the passenger experience as the flights are during the day. The A320-Neo aircraft departs Belo Horizonte-CNF at 13:00 arriving in Curaçao-CUR at 18:00 on Saturdays. The flight will return on Sundays departing Curaçao-CUR at 09:00 and arriving in Belo Horizonte-CNF at 16:00.
by Webmaster | 20/04/2023 | Cinema News
Tin testigu i un grabashon ku ta demostrá ku aktor Jonathan Majors no ta kulpabel di maltrato. Asina su abogado a bisa den un deklarashon. Majors a bira tópiko di kontroversia despues ku un dama a hasi denunsia di maltrato físiko. Un hòmber ku tabata transportá e aktor i ku lo ta testigu di dicho insidente ta dispuesto na duna testimonio di loke el a mira pasa entre e pareha.
E grabashon lo ta demostrá ku e dama no tabatin ningun leshon ora ku el a sali bai baila despues. Outoridatnan a detené Majors fin di luna pasá siguiendo un denunsia di violensha doméstiko. E dama lo a keda ku leshon na kabes i su nèk. El a bisa tambe ku el a kibra un dede dor di e maltrato.
E testigu a indiká sinembargo ku e no a mira e aktor hisa man pa e dama, pero ku el a mira e dama si dal e aktor i huñ’é. E imágennan lo ta mustra ku e dama por a usa su telefòn sin problema despues di e insidente, kua ta un indikashon ku su dede no por ta kibrá. Tambe e dama a manda vários mensahe pa Majors despues den kua no tin ningun reklamo di loke e lo a hasi ku e dama.
E kaso ta delikado. Asina e revista Variety a skirbi resien ku mas dama lo a mèldu pa entregá keho kontra Majors. Anteriormente e siman aki e management di Jonathan Majors a para su kolaborashon ku e aktor.
by Webmaster | 20/04/2023 | IT, Apps & Social Media
Siguiendo un ola enorme di krítika fabrikante di e app Snapchat a disidí adaptá e chatbot ku el a kaba di introdusí. E chatbot no solamente tabata sugerí pa topa en persona, pero tambe tabata papia di polítika. Mirando e aspekto suphetivo di polítika, esei no ta un tema ku chatbots mester por papia riba dje. Ekspertonan no ta kontentu ku e desaroyo aki.
Ta trata di un funshon nobo den Snapchat yamá My AI, un abreviashon pa artificial intelligence, esta inteligensha artifisial. E funshon ta konsistí di komponentenan di ChatGPT, e programa di e kompania OpenAI ku por kontestá pregunta den kuestion di sekònde.
Den Snapchat sinembargo algu tabata diferente: My AI ta komuniká manera e ta bo mihó amigu. E chatbot ta proponé pa topa, ta puntra kua partido polítiko tin preferensha dje usuario i te asta duna konseho di voto. Segun ekspertonan tin un peliger eynan, pasó inteligensha artifisial no ta un forma di bida konsiente. Tin riesgo mará na tuma konseho di un aparato ku no ta distinguí moral, pues e konsehonan ta kuestionabel den mihó kaso.
Siguiendo e kontroversia Snapchat lo a adaptá e funshon pa no hasi esaki mas. Tambe a agregá un mensahe ku e chatbot ta un aparato, pues no un ser humano.
Manera ta konosí algun siman pasá 1100 prominente di e sektor di teknologia a ekspresá nan preokupashon pa ku e desaroyonan aki. Na Oropa entretantu ta trahando riba leinan spesial pa mitigá riesgo di inteligensha artifisial.
by Webmaster | 20/04/2023 | Internashonal
Trahamentu di pizza na kas a bira kasi 20% mas karo na Italia kompará ku aña pasá. Motibu prinsipal pa e oumento ta e preis haltu di zeta di oleifi. Dor di sekura hopi kosecha di oleifia na Spaña a daña, butando asina basta preshon riba e preis. Segun agensia di prensa Bloomberg zeta di oleifi su preis ta 27% mas haltu ku aña pasá.
Generalmente Italianonan tambe ta notando un oumento di preisnan den supermarket. Aparte di zeta di oleifi mozarella su preis tambe a subi ku 27%, miéntras tomati a subi ku 13%. Eseinan no ta solamente ingrediente importante pa traha pizza, pero tambe pa traha vários otro kuminda Italiano. Segun Bloomberg entretantu ta más ekonómiko pa bestèl pizza i laga trese esaki ku trah’é na kas. E preis di un pizza di un pizzeria ta 8,5% mas karo ku aña pasá.
