Kompanianan petrolífiko a hasi bon negoshi den 2022. Asina e produktor Britániko di petroli i gas British Petroleum, konosí pa su abreviashon BP, a registrá un ganashi rèkòrt aña pasá. Esaki relashoná ku e preisnan haltu di kombustibel. E kompania a registrá un ganashi di 28 mil mion dòler. Esei ta mas ku dòbel di e resultado den 2021.
E oumento di preis di kombustibel rònt mundu a benefisiá kompanianan di energia konsiderablemente. Asina Shell a registrá un ganashi di kasi 40 mil mion dòler den 2022. Einan tambe ta trata di un oumento di 100% kompará ku un aña promé. Analistanan ta atribuí e oumento di preis di kombustibel na e konflikto entre Rusia i Ukrania.
Sientífikonan a logra transplantá pida sesu humano den djaka i a logra krea interakshon. E deskubrimentu aki ta nifiká un posibel paso dilanti den e búskeda pa un tratamentu efisiente pa daño na selebro.
E eksperimentonan a tuma lugá den un laboratorio di e Universidat di Pennsylvania, kaminda sientífikonan a ekstraé sélula serebral humano, kria esakinan te na tamaño di un pida zjozjoli i pasa esakinan pa e kráneo di un djaka adulto ku tabatin problema di bista. Tres luna siguiendo e transplante e pida selebro humano a bira unu ku esun di e animal. E selebro a konektá ku e sistema kardiovaskular i neurológiko di e djaka. Pa gran sorpresa di e investigadónan e djaka su bista a parse di ta registrá lus, pero nan no por a determiná te na kua grado su bista a mehorá. Esei lo rekerí mas investigashon.
Think To DO Institute ta bai investigá kumplimentu ku Press Freedom Index na Kòrsou. E asina yamá Press Freedom Index ta un evaluashon kompilá i publiká tur aña pa Reporters Without Borders for di 2002. E índise ta basá riba e datonan di kada aña tras di lomba ku e organisashon ta inventarisá den e paisnan partisipante.
E índise ta duna un indikashon di e grado di libertat ku periodistanan, medionan di komunikashon i siudadanonan tin den kada pais i kiko ta e esfuersonan di outoridatnan pa salbaguardiá e libertat aki. E Press Freedom Index, manera e nòmber ta sugerí, ta midi solamente e grado di libertat i no e kalidat di periodismo di e pais en kuestion i tampoko no ta trata violashon di derechinan humano.
Think To DO Institute, un instituto di investigashon independiente na Kòrsou, ta enfoká riba resiliensia di poblashon di Kòrsou. Otro investigashonnan di e organisashon a demostrá ku e resiliensia di un komunidat tin un impakto direkto riba e forsa di su demokrasia. Un demokrasia sano ta mihó sibrí ku un poblashon bon informá i mas versá posibel.
E informashon aki mester yega serka e siudadano via un prensa ku por funshoná libremente. Pa e motibu aki Think To DO Institute, komo organisashon ku ta traha a base di datonan verifikabel, ke sa di miembronan di prensa kon nan mes ta eksperensiá libertat pa hasi nan trabou den demokrasia di Kòrsou.
E Press Freedom Index ta un enkuesta a base di 5 punto di enfoke: e aspekto polítiko, e aspekto hurídiko, e aspekto ekonómiko, e aspekto sosial kultural i siguridat. E índise ta konsistí di dos parti: unu pa e sektor di medionan i unu pa públiko en general.
E resultadonan di e enkuesta aki lo keda publiká den aprel.
Paisnan ku ta eksportá petroli probablemente mester subi nan produkshon. Esaki debí na un demanda mas haltu for di China. Asina e Agensia Internashonal di Energia a publiká den vários medio di komunikashon. En partikular e demanda pa Jet Fuel na China a oumentá. Resien e pais a laga hopi medida pa kombatí Covid bai i p’esei hopi Chines por biaha atrobe.
E organisashon OPEP i Rusia a disidí konhuntamente na kuminsamentu di e luna aki pa mantene e nivel aktual di produkshon. De echo lo produsí diáriamente 2 mion barí ménos pa dia i stabilisá e ofèrta aki te fin di aña. Tin basta preshon sinembargo riba OPEP pa subi e produkshon pa e preis por baha.
Twitter no ta kore peliger mas pa bai bankarota. Asina propietario Elon Musk a publiká riba su account. Bou di su guia mas o ménos mitar di e trahadónan na e kompania a haña òntslag. Tambe a ekonomisá riba vários departamentu. Segun Musk e kompania su entradanan ta entretantu den balansa ku e gastunan i tambe por nota ku e durashon di uso di e plataforma a stabilisá.
Elon Musk tin un par di luna basta pisá tras di lomba. Despues ku el a atkirí Twitter den òktober 2022 e situashon den i rondó di e kompania tabata basta kaótiko ora ku usuario i spònser a kuminsá bandoná e plataforma. Entretantu Musk lo a kaba di paga e interes riba un fiansa di 12,5 mil mion dòler pa atkisishon di e plataforma.
Un temblor fuerte di 7.9 riba skala di Richter na Turkia i parti di Siria a okashoná bastante daño, sentenáres di morto i míles di persona heridá. Djaluna e temblor tabata tópiko di e sekshonnan internashonal rònt mundu.
En partikular Turkia sa haña temblor frekuentemente, debí na e lokalidat di e pais. Na Siria tin hopi ménos temblor ta tuma lugá. For di aña 1900 a midi un total di 16 temblor di kua esun di djaluna ta esun di dos mas fuerte midí. Na Siria a midi un magnitut di 5.6 riba skala di Richter.
Turkia sinembargo ta lokalisá riba un parti kaminda plachinan ku ta forma e superfísie di nos planeta ta topa i krusa otro, e asina yamá plachinan tektóniko.
E plachinan ta move algun sèntimeter pa aña i ta okashoná frikshon ku nos ta eksperensiá komo temblor. Dependiendo di e direkshon ku e plachinan ta move, nan ta sea dal den otro òf skùif riba otro. Un par di sèntimeter ta sufisiente pa okashoná bastante destrukshon. E temblornan mas fuerte ta tuma lugá pues na e rant di e plachinan aki.
E aktornan Will Smith i Martin Lawrence a konfirmá djamars riba Instagram ku tin un di kuater pelíkula Bad Boys na kaminda. E pelíkula ya ta den pre-produkshon na Sony Pictures i lo keda dirigí pa e direktornan Adil El Arbi i Bilall Fallah.
E saga di Bad Boys a kuminsá den 1995 ku Bad Boys, siguí den 2003 pa Bad Boys II. 17 aña despues e direktornan a lansa e di tres pelíkula Bad Boys for Life. E di 4 pelíkula a keda anulá vários biaha i a kambia vários biaha di direktor tambe. No tin klaridat ainda kiko lo ta e título i fecha di lansamentu di e di 4 Bad Boys.
Sony ta bai produsí ménos brel pa virtual reality pa PlayStation 5. Esaki debí na un kantidat desepshonante di pre-order. Asina agensia di prensa Bloomberg a publiká djamars. Anteriormente e kompania tabata bai produsí alrededor di 2 mion unidat pa e lansamentu próksimo aña, pero awor e kantidat ta fihá na 1,5 mion unidat. Fuentenan na Sony a duna di konosé si ku si e demanda di pre-order subi ku e kantidat lo adaptá.
E fábrika ku ta trahando e pantayanan pa e brel virtual pa Playstation 5 mester tene kuenta ku Sony ta bai adaptá nan pedido. E lansamentu di e brel virtual pa Playstation 5 ta planiá pa próksimo aña mart / aprel. E preis ta kalkulá te asina leu na mas o ménos 650 dòler pa kada brel.
E app Spotify a mira e kantidat di abonadonan ku ta paga pa e servisio oumentá te na 205 mion den e último kuartal di 2022. Asina e kompania a anunsiá djamars. Na total Spotify tin di momentu 489 mion usuario ku ta paga òf usa e vershon grátis di Spotify. Esaki ta nifiká ku mas o ménos 6,5 porshento di tur hende na mundu ta usa e app.
No opstante esaki, e kompania ta drai pèrdida. Esaki dor ku e kompania ta saka hopi sèn pa atraé usuarionan ku podcasts i audio books. Aparte di esei Spotify tin ku paga kasi 70% di su resultado na kompanianan diskográfiko pa kompensá derechinan di outor di e musik riba e plataforma. Apesar di un resultado impreshonante pues di kasi 3500 mion dòler, asina mes e pèrdida ta kalkulá na mas di 250 mion dòler.
Na Alemania tin entretantu 55 persona detené pa preparashon di un gòlpi di estado. For di fin di aña pasá e divishon di kombatimentu di terorismo na Alemania a señalá un organisashon ekstremoderechista yamá Reichsbürger. E miembronan di e organisashon no ta rekonosé e repúblika di Alemania den su forma aktual i ke restourá e imperio Aleman ku segun nan a èksistí entre 1871 i 1945 i te ainda lo ta èksistí klandestinamente.
Den desèmber outoridatnan a detené sigur 25 persona ku tabatin plan pa kometé un serie di atake terorista riba parlamentu pa asina tuma poder na Alemania. For di e momentu ei regularmente polis a haña pista pa detené otro miembronan di e grupo. Di e 55 sospechosonan detené 54 ta di Alemania i unu ta kedando na Italia. 24 di esnan na Alemania ta será te ora ku nan kaso keda tratá.
Direktor di e app TikTok Shou Zi Chew ta bai hasi un bishita na Kongreso Merikano den mart. Meta di e bishita ta pa e paresé dilanti un komishon di Kongreso Merikano ku ta preokupá ku privacy di usuarionan di TikTok, e siguridat di e datonan wardá i si gobièrnu di China ta disponé di e datonan aki. Mas aleu tin preokupashon ku hóbennan lo ta mira muchu imágen ku ta malu pa nan riba e app i ku nan lo por bira víktima di abusu seksual via e app.
Merka tin alrededor di 100 mion usuario di TikTok, práktikamente un tersera parti di e pais ta riba TikTok, en partikular hóben i adultonan yòn. Di momento tin gruponan den e Kongreso Merikano ku ke un prohibishon total riba TikTok na Merka pa salbaguardiá siguridat nashonal. Algun luna pasá a lanta basta konsternashon despues ku a resultá ku lo a warda datonan di un periodista di e revista Forbes pa pasa esakinan despues pa gobièrnu di China.
Jaafar Jackson, yu di Jermaine Jackson, ta bai protagonisá den un pelíkula riba su tio Michael Jackson. Asina direktor Antoine Fuqua a anunsiá riba su kuenta di Instagram. Jaafar, ku di momentu tin 26 aña, lo tin e ròl prinsipal di su tio Michael Jackson den e pelíkula titulá Michael. Ta por sierto e promé ròl den un pelíkula pa Jafaar.
E pelíkula Michael lo kubri e trayektoria di Michael Jackson di for di tempu ku el a kuminsá te ku e momentu ku el a konkistá mundu ku su musik. E pelíkula lo keda produsí den konsulta ku e famia di Michael Jackson. Segun e kompania produktor Lionsgate e pelíkula ta bai kubri kasi hinter Michael su bida. No tin klaridat ainda si e aspektonan mas kontroversial di Michael Jackson lo haña atenshon den e pelíkula.
E organisashon internashonal pa individuonan superdotá Mensa a inskribí nan miembro mas yòn den historia. Ta trata di Teddy, un hobensito di 4 aña ku a haña su miembresia ya ku tres aña. Pero ta awor numa e organisashon a publiká riba esaki. Teddy por konta te shen den 6 idioma, entre nan Chines Mandarin, i por lesa kaba. Pa bo por bira miembro di Mensa bo mester ta pèrtenesé na e 2% mas sabí bou di hende.
Segun e mama Teddy a kuminsá lesa ku 26 luna dor di simplemente wak televishon i kopia sonido di lèter. Poko despues el a nota ku e por a lesa karta via pòst sin problema. Úniko problema ku nan tin ku Teddy ta ku e ta siña solamente loke ta interes’é. Tambe nan a ripará kaba ku e mucha ta realisá ku e ta diferente, pero tòg nan ke dun’é un bida mas normal posibel.
Siguiendo Twitter, Facebook i Instagram tambe a duna èks presidente di Merka Donald Trump akseso bèk na su kuentanan despues di tabata di blòk dos aña. Den simannan benidero Trump por aksedé su kuentanan atrobe. Segun e kompanianan, públiko tin derechi di tende kiko polítikonan tin di bisa. Pero den kaso di Trump en partikular nan lo keda vigilá. Si e bolbe publilká mensahenan divisivo, esaki lo resultá den un ban atrobe.
Benta di smartphone a baha rònt mundu ku kasi 20% den último kuartal di 2022. Asina International Data Corporation a kalkulá a base di sifranan preliminario di benta. Segun nan análisis esaki ta debí na miedu pa un reseshon, loke ta buta ku konsumidónan no ta saka sèn dje lihé ei mas. Den último tres luna di 2022 a bende alrededor di 300 mion unidat. Esei ta 18 porshento ménos ku den e mesun periodo den 2021.
E bahada aki ta esun mas fuerte midí te asina leu. E periodo di fin di aña ta hopi indikativo pa estado di ekonomia: ta e temporada ku hende ta kumpra artíkulonan pa regalá nan sernan kerí. Finalmente bendedónan mester a duna deskuentonan hopi fuerte pa asina tòg por stimulá benta. E kompanianan en kuestion dimes ta sinti e klap. Tantu Samsung komo Apple a mira nan benta baha hopi fuerte den e último tres luna di 2022.
