E kompania Genesis, ku ta finansiá kompanianan di kriptomoneda, a pidi un bankarota parsial. E kompania tin un debe di 3 mil mion dòler. Genesis ta fia kompanianan di kriptomoneda sèn, pues e ta fungi manera un banko pa kompanianan di kambio di sèn digital. Pero Genesis a keda afektá seriamente pa e kaida di e bolsa FTX na kabamentu di aña pasá.
E sèn ku Genesis tabata fia nan tabata invershonnan di akshonista, ku den novèmber último de pronto no tabatin akseso mas na nan plaka pa Genesis por a atraé kapital nobo, pero e strategia aki no a duna resultado. E bankarota parsial a resultá inevitabel. Básikamente Genesis a para tur aktividat di fiamentu an kompanianan di kriptomoneda.
Netflix a mira su archivo di usuarionan krese ku kasi 7.7 mion usuario nobo den e último kuartal di 2022. Esei ta mas ku e 4.5 mion ku e kompania a pronostiká. E programanan ku mas a kontribuí na e subida aki ta e serie Wednesday, e serie Monster: The Jeffrey Dahmer Story i e dokumental di Harry i Meghan. Na kabamentu di 2022 Netflix tabatin alrededor di 231 mion usuario. Den e di tres kuartal Netflix a mira e kantidat di usuarionan subi ku 2,4 mion ku kier a wak e serie Stranger Things.
E rekuperashon ta un alivio pa Netflix ku a mira e kantidat di abonadonan baha drástikamente despues di un oumento durante e pandemia di Covid, ora ku tur hende mester a keda paden. Tambe Netflix a haña kompetensha di Disney+, HBO Max i Amazon Prime. Den vários pais Netflix a kuminsá ofresé paketenan mas barata, pero e usuario mester biba si ku propaganda pa kompensá e diferensha ku e preis original sin propaganda aden.
Tambe e kompania no ta bai pèrmití èkstra account grátis mas. Pa kada account adishonal e kliente mester bai paga èkstra. No ta konosí ki dia e medida ei ta drenta na vigor, pero e ta bai tuma lugá e aña aki.
Siguiendo Microsoft anteriormente e siman aki e kompania Google tambe ta plania un buèlta di òntslag masivo na e aña aki. Ta trata di 12 mil kupo di trabou, o sea 6% di e personal, di akuerdo ku agensia di prensa Bloomberg. Mayoria òntslag lo kai den e departamentu di benta i marketing na Merka i Reino Uní.
Sundar Pichai, presidente di Alphabet bou di kua Google ta kai, a anunsiá e reorganisashon den un email na e personal. Google a indiká kaba for di aña pasá ku e ganashinan ta hopi ménos ku ántes. Klientenan di Google no ta invertí mes tantu den promoshon mas i e kompania mester ekonomisá e gastunan haltu pa atraé nan. Google ta bai purba yuda e trahadónan haña otro trabou.
Manera indiká den nos itemnan anterior, un pa un e kompanianan Big Tech manera Google, Facebook, Amazon i Microsoft ta anunsiando buèltanan masivo di òntslag. Invershonistanan si ta reakshoná positivo riba e notisianan aki. Djabièrnè e preis di akshonnan di Google a rekuperá ku 5% despues di e notisia. Pa invershonista e òntslagnan aki ta nifiká ku e kompanianan ta ekonomisando riba departamentunan ku no ta generá ganashi.
Mester warda tur app i otro mensahenan di chat ku ta relashoná ku trabou di ministernan, sekretarionan di estado i alto funshonarionan di gobièrnu. Asina Adviescollege Openbaarheid en Informatiehuishouding a informá minister Bruins Slot di Binnenlandse Zaken na Hulanda.
Tur hende mester haña akseso na e deliberashonnan ku gobièrnu ta hasi ora di tuma desishon. Mas aleu e akseso ta di importansha vital pa por skirbi historia. Asina e kolegio di konseho ta argumentá. Di e forma ei demokrasia por funshoná mihó. Esaki ta e promé konseho na gobièrnu despues ku a lanta e órgano aña pasá.
E kolegio a lanta despues ku a sali afó ku promé minister Mark Rutte tabata delete su mensahenan di sms riba su telefòn di trabou regularmente. Manera Inspectie Overheidsinformatie en Erfgoed a konkluí òktober último, esaki no ta pèrmití. Te asina leu ta e usuario di e telefòn ta responsabel pa warda tur informashon riba un server sentral.
Segun e konseho nobo esaki mester tuma lugá di awor i dilanti di forma outomatisá i kubri tur mensahe ku ta regardá maneho di gobièrnu. Si ta pa e Adviescollege Openbaarheid en Informatiehuishouding e medida aki mester keda implementá pa mas tardá próksimo aña.
Un team di investigadó di e universidat Hapones Tohoku a desaroyá un tela spesial ku por midi nos estado di salú a base di sodó di kurpa. Ta trata di un tela mikro-elektróniko ku por midi salu i metabolit (esta supstansianan kímiko den nos kurpa manera suku). E ta midi diferente señal ku ta duna un indikashon di e estado físiko i mental di e usuario di e tela.
No ta trata di un invenshon kompletamente nobo, pasobra ya tin bestuario inteligente kaba. Pero eseinan ta ekipá ku vários parti sólido i pues no ta masha konfortabel. E adaptashon aki ta nifiká un adelanto. E team di sientífikonan ta spera ku nan adaptashonnan lo kondusí na uso frekuente den kuido.
Bebementu di lechi ta hasi nos kurpa mas grandi. Asina sientífikonan na Canada a deskubrí despues di kompará skelèt ku skelètnan di personanan ku a muri vários mil aña pasá. E sientífikonan a kompará mas di 3500 skelèt hañá durante trabounan di arkeologia na Oropa. Durante e komparashon aki nan a deskubrí prueba ku konsumo di lechi ta okashoná un oumento di masa físiko, loke ta hasi nos mas largu tambe.
Loke e sientífikonan a deskubrí tambe tabata un diferensha entre skelètnan hañá den paisnan parti nort i esnan hañá den parti sùit. Den e paisnan mas den nort sernan humano a kuminsá mas trempan ku konsumo di lechi puru, pues no usá pa traha keshi òf yògert. Te dia di awe por nota ku e intoleransha pa lechi den paisnan sùit ta mas frekuente ku den paisnan parti nort.
Por mayor parti e investigashon a tuma lugá ku skelètnan Oropeo. Awor e sientífikonan ke hasi e investigashon riba otro kontinentenan tambe.
Lucile Randon, nasé den 1904 i pues e persona mas na edat na mundu, a fayesé na 118 aña di edat. Sùr André, manera nan tabata yam’e, a fayesé den su soño na un kas di kuido na Toulon, den parti sùit di Fransia. Randon tabata siegu i tabata den ròlstul.
El a tuma e nòmber Sùr André ora ku el a bira miembro di e orden katóliko di Fransia. Dos aña pasá e tabata den notisia rònt mundu despues di a sobrebibí un infekshon ku Covid-19.
Sùr André a bira e persona mas na edat na mundu despues ku e Hapones Kane Tanaka a fayesé aña pasá na 119 aña di edat. Ainda investigadónan ta buskando e persona mas na edat na mundu na e momentu aki despues di fayesimentu di Sùr André.
Siman pasá Dierenbescherming Curaçao a publiká un aviso kaminda ta ofresé un rekompensa pa kada kachó rekohé for di kaya. Esaki pa tene kayanan di Kòrsou liber di kachónan ku ta kousa molèster.
E aviso a lanta bastante konsternashon i pregunta. Entre otro kiko ta bai pasa ku e animalnan i kon a para ku e sanctuary pa kachó ku a keda primintí algun aña pasá i pa kua Dierenbescherming a risibí supsidio.
Durante un entrevista resien a puntra bosero di Dierenbescherming pa e status di e sanctuary. A kontestá lo siguiente: “E sanctuary pa kachó ta kla pa mas ku un aña kaba.”
Pa verifiká esaki, nos a hasi un bishita na e sitio di e sanctuary pa fact-check e ponensia aki.
Di momentu e asina yamá World Economic Forum ta tumando lugá na Davos, un lugá na Suisa. E aña aki e evento a hala mas o ménos 2700 partisipante di rònt mundu. E reunion aki di esnan mas poderoso na mundu ta sali den notisianan internashonal tur aña atrobe, pero ta kiko e ta?
E lidernan i representantenan di e kompanianan mas grandi na mundu ta papia riba temanan ku ta regardá ekonomia mundial. Esaki ta tuma lugá individualmente i den gruponan di trabou. Meta ta pa yega na solushonnan pa problemanan transfronteriso, esta problemanan ku paisnan individual no por resolvé.
E parti práktiko di e enkuentro ta ku tur esnan ku influensha riba nivel mundial ta topa otro, pero di otro banda mester bisa ku e enkuentronan generalmente tin un karákter informal. Pa e motibu ei mes no ta tur hende ta kere den e nesesidat di e World Economic Forum. Ademas for di su prinsipio diskursonan na e foro ta partikularmente alimento pa teorianan di kòmplòt, dor ku ta trata di esnan mas poderoso.
Arkeólogonan a deskubrí un tumba di 3500 aña pegá ku e siudat Egipsio Luxor. E graf probablemente ta konstruí durante e di 18 dinastia di fáraonan, di 1550 pa 1300 aña promé ku Kristu. Esei tabata e époka di Achnaton i Tutanchamon. E tumba ta lokalisá den e asina yama Vaye di Rei i Reinanan pegá ku riu Nilo. Lamentablemente tin basta daño na e tumba. Inskripshonnan a sufri basta daño dor di inundashonnan dje riu den serkania.
E dama Oustraliano Erchana Murray-Bartlett a registrá un rèkòrt mundial koriendo un marathon 150 dia siguí. Na total el a kore un distansia di 6300 kilometer krusando Oustralia di e parti mas nort na Cape York (Queensland) te e siudat portuario den sùit Melbourne. Ku e logro aki Murray-Bartlett a gana un lugá den e Guinness Book of Records.
Ofisialmente e por yama su mes e dama ku a kore mas dia siguí den historia. E rèkòrt anterior ta riba nòmber di e dama Britániko Kate Jayden, ku a alkansá 106 dia siguí. Ku e kareda aki Murray-Bartlett a rekohé 100 mil dòler Oustraliano ku lo bai pa Wilderness Society, un organisashon ku ta lucha pa protekshon di animalnan na Oustralia. Den dianan benidero Erchana ta bai rekuperá di e kareda largu aki.
E diferensha entre pober i riku rònt mundu a sigui krese den último tres aña. Asina e organisashon Oxfam Novib a konkluí den e rapòrt Survival of the Richest. E kapital di e 1% mas riku na mundu a oumentá den promedio ku 2700 mion dòler pa dia, un suma di 9 sifra pa dia. Alabes 1 den kada 10 persona ta pasa hamber i e salario di sigur 1700 mion trahadó rònt mundu a mira nan entrada subi ménos lihé ku inflashon. Lesa e rapòrt kompleto mas abou.
E momentu di e publikashon no ta un koinsidensia. E ta sali na momentu ku e World Economic Forum na Davos ta tuma lugá. E foro ta un reunion anual di lidernan di pais i representantenan i direktornan di e kompanianan mas grandi na mundu. Oxfam Novib ta konkluí den su rapòrt ku 10 aña despues ku a atvertí e partisipantenan di e foro aki, ta mas inigualdat só por nota rònt mundu.
E balor di bitcoin a subi ku 20% den último 7 dia. Djaluna mainta e balor di bitcoin tabata kalkulá na 20.847 dòler. Siman pasá e kriptomoneda tabata kalkulá na 17 mil dòler pa kada bitcoin. E balor a subi pasobra invershonistanan ta antisipá ku no ta bai tin mas subida di interes.
Bankonan Sentral rònt mundu a subi interes pa frena inflashon, pero esaki ta parse di a pasa su pik. Ora ku interes subi konsumidónan ku forsa di kompra ta kuminsá spar plaka i kompanianan ta invertí di forma mas selektivo, kua tin un efekto negativo riba balor di bolsanan di akshon.
E di dos kriptomoneda na mundu, Ether, tambe a mustra un subida fuerte. Djaluna mainta invershonistanan tabata dispuesto na paga 1.542 dòler pa kada Ether, un subida di 16% kompará ku un siman anterior. E rekuperashon ta trese alivio pa invershonistanan den kriptomoneda. 2022 tabata un aña hopi malu pa p’e merkado di kriptomoneda.
Aña pasá bitcoin a kai di kasi 45 mil dòler den aprel pa 19 mil dòler den yüni. Den novèmber e merkado a sufri otro klap duru ku kaid di e bolsa FTX. A partir di e momentu ei bitcoin su balor a keda fluktua rondó di 17 mil dòler.
Gobièrnu sentral di Reino Uní na Lònden a blòkia un proposishon di lei ku Eskosia a trata den desèmber ku ta pèrmití hende kambia di sekso mas fásil. E ministernan ta preokupá si e proposishon no ta bai kontra di e igualdat di derechi. E gobièrnu Britániko ta mustra riba siguridat di hende muhé ku e argumento ku hende hòmber ku kambia di sekso pa motibunan kuestionabel por haña akseso mas fásil na fasilidatnan i espasionan eksklusivamente reservá pa hende muhé, manera baño i kamber pa kambia paña.
E paso aki ta promé biaha ku e gobièrnu Britániko ta intervení ku un veto riba un proposishon di lei Eskoses. Promé minister di Eskosia Nicola Sturgeon a reakshoná furioso riba e paso di e gobièrnu di Reino Uní i ta pensa di tuma su propio pasonan kontra e desishon di Lònden.
E proposishon di lei di Eskosia tabata inkluí entre otro un bahada di e edat mínimo pa kambia di sekso di 18 pa 16 aña. Tambe a kita e rekerimentu di un diagnóstiko médiko pa hustifiká e kambio di sekso. Otro paisnan manera Irlanda, Dinamarka i Argentina ya a adoptá leinan komparabel.
Direktor di e kompania Apple Tim Cook a pidi e kompania pa redusí su rekompensa ku 40%, despues di basta krítika di invershonista. E redukashon ta supstansial, pero al fin al kabo Cook lo kobra 49 mion dòler pa aña. E rekompensa ta den forma di paketenan di akshon. Komo akshonista Cook lo keda risibí un repartishon di ganashi konsiderabel, si nos tene kuenta ku Apple a buk un resultado di 100 mil mion dòler aña pasá. E krítika riba e kompensashon di Tim Cook ta relashoná ku un bonus ku no ta mará na e resultadonan di e kompania. Invershonistanan tabata haña ku e bonus ei por baha.
